កាលពីម្សិលមិញ ក្រសួងរ៉ែនិងថាមពល បានព្យាយាមនិយាយសម្រាលអំពីផលប៉ះពាល់សង្គមនិងបរិស្ថាន ពីសំណង់ទំនប់វារីអគ្គិសនីនៅខេត្តកោះកុង ដោយតបតទៅនឹងការអះអាងមួយចំនួនរបស់ក្រុមបរិស្ថាន ដែលបាននិងកំពុងប្រឆាំងនឹងគម្រោងនេះ រួមជាមួយគ្រួសារជនជាតិភាគតិចជងដែលរស់នៅក្នុងតំបន់នោះ។
ទំនប់ស្ទឹងជាយអារ៉ែងកម្លាំង១០៨មេហ្គាវ៉ាត់នឹងធ្វើឲ្យជន់លិចដីរាប់ពាន់ហិកតានៃជួរភ្នំក្រវាញ រួមទាំងដីកេរដូនតារបស់ជនជាតិភាគតិចជងជាច្រើនរយគ្រួសារផង និងជម្រកសត្វកម្រជាច្រើនប្រភេទ ក្នុងនោះមានទាំងក្រពើភ្នំផងដែរ។
រដ្ឋាភិបាលនិយាយថា ខ្លួនមិនទាន់សម្រេចយល់ព្រមលើគម្រោងនេះនៅឡើយទេ ប៉ុន្តែ ក្រុមអ្នកប្រឆាំងសង្ស័យថា ក្រុមហ៊ុន Sinohydro Resources របស់ចិនបានទទួលការអនុញ្ញាតរួចហើយឲ្យបន្តគម្រោងនេះ ហើយថា ការសិក្សាផលប៉ះពាល់ជាបន្តគ្រាន់តែធ្វើបង្គ្រប់កិច្ចតែប៉ុណ្ណោះ។
ក្នុងសន្និសីទព័ត៌មាននៅឯក្រសួងរ៉ែនិងថាមពលកាលពីព្រឹកម្សិលមិញ លោក អិុត ប្រាំង រដ្ឋលេខាធិការក្រសួងរ៉ែនិងថាមពល បានបញ្ជាក់ថា រដ្ឋាភិបាលមិនទាន់បានសម្រេចយល់ព្រមលើសំណង់នេះទេ ហើយបានចោទអ្នករិះគន់ថា បានបំផ្លើសអំពីផលប៉ះពាល់ពីទំនប់នេះ។
លោកបានមានប្រសាសន៍ថា “បើយើងស្តាប់ការនិយាយបែបនេះ វាហាក់ដូចជាគម្រោងទំនប់វារីអគ្គិសនីជាយអារ៉ែងកំពុងដំណើរការ ហើយព្រៃឈើកំពុងត្រូវកាប់ផ្តួលគ្រប់ទីកន្លែងអ៊ីចឹង។ តាមការពិត ទំនប់នេះកំពុងស្ថិតក្នុងដំណាក់ការសិក្សា។ វាមិនទាន់មានសកម្មភាពនៅឡើយទេ”។
លោក អិុត ប្រាំង ក៏បានចោទអង្គការមាតាធម្មជាតិដែលប្រឆាំងនឹងទំនប់នេះ ថាបានញុះញង់គ្រួសារជនជាតិជងឲ្យប្រឆាំងគម្រោងវារីអគ្គិសនីនេះ ដើម្បីប្រយោជន៍ហិរញ្ញវត្ថុផ្ទាល់ខ្លួន។
លោកបានមានប្រសាសន៍ថា “តើពួកគេបានលុយពីណាមក បើមិនប្រើអ្នកភូមិធ្វើជាខែល ឬថតរូបអ្នកភូមិដែលចូលរួមតវ៉ា បិទផ្លូវ និងប្រឆាំងការអភិវឌ្ឍន៍ទេនោះ? ខ្ញុំអាណិតអ្នកភូមិណាស់ ពីព្រោះអ្នកភូមិចាញ់បោកមកចូលរួមក្នុងសកម្មភាពរបស់ពួកគេ”។
ក្រសួងនេះបាននិយាយថា អាងរបស់ទំនប់នេះនឹងជន់លិចដីតែ៩.៥០០ហិកតាប៉ុណ្ណោះ មិនដល់ពាក់កណ្តាលនៃផ្ទៃដី២០.០០០ហិកតា ដែលអង្គការក្រៅរដ្ឋាភិបាលអះអាងនោះទេ ហើយបានបង្ហាញផែនទីលម្អិតនៃតំបន់នោះ ដែលរៀបចំដោយសាវ៉ាក់ (Sawac) ជាក្រុមហ៊ុនដែលគេជួលឲ្យធ្វើការវាយតម្លៃផលប៉ះពាល់នោះ។
យោងតាមផែនទីនោះ ប្រហែលពាក់កណ្តាលនៃអាងប៉ុណ្ណោះ គ្របដណ្តប់ដោយព្រៃឈើ មានចម្ការផ្លែឈើ ស្រែចម្ការ និងវាលឥតមានដាំអ្វី។
លោក អិុត ប្រាំង បានមានប្រសាសន៍ថា ការវាយតម្លៃផលប៉ះពាល់ដំបូងបានរកឃើញសត្វព្រៃ២៤០ប្រភេទក្នុងតំបន់នោះ ហើយថា ជំហានបន្ទាប់នឹងត្រូវសិក្សាផ្លូវបម្លាស់ទីរបស់សត្វទាំងនោះ ដើម្បីឲ្យដឹងថា ត្រូវកាត់បន្ថយផលប៉ះពាល់លើសុខុមាលភាពរបស់សត្វព្រៃយ៉ាងដូចម្តេច។
ពេលត្រូវទាក់ទងបន្ទាប់ពីសន្និសីទព័ត៌មាននេះ លោក អាឡិច ហ្គន់ហ្សាឡេស ដាវីដសុន សហស្ថាបនិកអង្គការមាតាធម្មជាតិ បានមានប្រសាសន៍ថា លោកនៅតែសង្ស័យអំពីការអះអាងរបស់រដ្ឋាភិបាលដែលថា អាងទំនប់នឹងជន់លិចដីមិនដល់១០.០០០ហិកតានោះ។ លោកបានបង្ហាញរបាយការណ៍មួយដែលអង្គការអភិរក្សអន្តរជាតិដែលធ្វើការជាមួយរដ្ឋាភិបាលនៅជួរភ្នំក្រវាញ បានបញ្ចេញឲ្យដឹង ពេលដែលក្រុមហ៊ុនមួយមុននោះ បានចូលរួមក្នុងគម្រោងនេះក្នុងពេលពីរបីឆ្នាំមុន ដោយបានបង្ហាញឲ្យឃើញថា គម្រោងអាងទឹកគ្របដណ្តប់លើផ្ទៃដី២០.០០០ហិកតា។
លោក អាឡិច ហ្គន់ហ្សាឡេស ដាវីដសុន បានមានប្រសាសន៍ថា “ខ្ញុំមិននិយាយថា ពួកគេខុស ឬ ត្រូវទេ ប៉ុន្តែមានភាពខុសគ្នារវាងផែនទីរបស់យើងនិងផែនទីរបស់ពួកគេ”។
លោកបានបន្ថែមថា “ហើយវាមិនមែនត្រឹមតែអំពីដីព្រៃឈើប៉ុន្មានហិកតានឹងត្រូវជន់លិចនោះទេ គឺគិតពី កន្លែងយកថ្ម ខ្សែបណ្តាញអគ្គិសនី ការបូមខ្សាច់ និង ការកាប់ឈើបញ្ជូនេចញ ដែលកើតចេញពីគម្រោងទំនប់នេះដែរ។ “គឺផលប៉ះពាល់ផ្ទាល់និងផលប៉ះពាល់ប្រយោល”។
លោក អាឡិច ហ្គន់ហ្សាឡេស ដាវីដសុន ក៏បានងឿងឆ្ងល់នឹងការអះអាងរបស់ក្រសួងនេះដែលថា ប្រជាពលរដ្ឋប្រហែល១.៣០០នាក់ប៉ុណ្ណោះរស់នៅក្នុងតំបន់នោះ។ លោកមានប្រសាសន៍ថា ពលរដ្ឋប្រហែល១.៥០០នាក់កំពុងរស់នៅក្នុងអាងទឹកដែលស្នើឡើងនេះបួនឆ្នាំមុន ហើយថា អ្នកផ្សេងទៀតបានចូលមករស់នៅតំបន់នោះតាំងពីពេលនោះមកម៉្លេះ៕មានិត