26 C
Phnom Penh

អង្គភាព​ប្រឆាំងអំពើ​ពុករលួយ​ចាប់​ខ្លួន​អធិការ​នគរ​បាល​ខណ្ឌម្នាក់​មក​សាក​សួរ ​ដោយ​អាថ៌កំបាំង

ដោយ ឌឹ ខេមបូឌា ដេលី

បទវិភាគ

កាលពី​ថ្ងៃ​អង្គារ អង្គភាព​ប្រឆាំង​អំពើ​ពុក​រលួយ​បាន​ចាប់​ខ្លួន​អធិការ​នគរ​បាល​ខណ្ឌ​មាន​ជ័យនៅ​ក្នុង​រាជ​ធានី​ភ្នំពេញ ព្រមទាំងអ្នក​នៅក្រោម​បង្គាប់​របស់​គាត់​ពីរ​នាក់ទៀត​​មក​សាក​សួរ​នៅ​ក្នុង​ករណី​មួយ​ ដែល​ធ្វើឡើង​ដោយ​អាថ៌កំបាំង​។

មន្ត្រីអង្គភាព​ប្រឆាំង​អំពើ​ពុករលួយ​ជាន់​ខ្ពស់​មួយ​រូប ដែល​បានបដិសេធ​មិន​ប្រាប់​ឈ្មោះ​ពីព្រោះ​លោក​មិន​ត្រូវ​បានអនុញ្ញាត​ឲ្យ​និយាយទៅ​កាន់​ប្រព័ន្ធ​ផ្សព្វ​ផ្សាយ​ព័ត៌មាននោះ​បាន​មាន​ប្រសាសន៍​ថា លោក ហ៊ី ណារិន អធិការ​នគរ​បាល​ខណ្ឌ​មានជ័យ​ត្រូវ​បាន​ចាប់​ខ្លួន​ ហើយ​កំពុង​ត្រូវ​បាន​សាក​សួរ​ដោយ​អង្គភាព​ប្រឆាំង​អំពើ​ពុក​រលួយ​របស់​រដ្ឋាភិបាល​។

មន្ត្រី​រូប​នេះ​បាន​មាន​ប្រសាសន៍​ថា ” លោក ហ៊ី ណារិន ត្រូវ​បាន​ចាប់​ខ្លួន​កាលពី​ម្សិលមិញ ហើយ​កំពុង​ត្រូវ​បាន​សាកសួរ​”។ លោក​បាន​បន្ថែម​ថា មន្ត្រី​នគរ​បាល​ពីរ​រូប​ទៀត​ដែល​លោក​មិនស្គាល់​ឈ្មោះ​ក៏​ត្រូវ​បានសាក​សួរ​ផង​ដែរ​។

មន្ត្រី​រូប​នេះ​បាន​បដិសេធ​មិន​និយាយអំពី​ករណី​នេះ​បន្ថែមឡើយ​ ហើយ​បាន​បង្វែរ​សំណួរ​ទៅ​លោក​ ឱម យ៉ិនទៀង ប្រធាន​អង្គភាព​ប្រឆាំងអំពើ​ពុករលួយ​ដែល​គេមិនអាចទាក់​ទង​បាន​។

លោក កែវ រ៉េមី អ្នក​នាំពាក្យ​អង្គភាព​ប្រឆាំង​អំពើ​ពុករលួយ​បាន​បដិសេធ​មិន​ធ្វើ​អត្ថា​ធិប្បាយទេ​។ មុន​ពេល​ដាក់​ទូរស័ព្ទ​អ្នក​យក​ព័ត៌មាន​ចុះ​ លោក​បាន​មាន​ប្រសាសន៍​ថា ” សូម​ដាក់​លិខិត​ប្រសិន​បើ​អ្នក​ចង់​សម្ភាស​”។

លោក មុំ វៃ អធិការ​រង​នគរ​បាល​ខណ្ឌ​មានជ័យ​បាន​បញ្ជាក់​ថា អង្គភាព​ប្រឆាំង​អំពើ​ពុក​រលួយ​បាន​ឃុំ​ខ្លួន​មេរបស់​លោក​ ហើយលោក​បាន​មាន​ប្រសាសន៍​ថា លោក​មិន​ភ្ញាក់ផ្អើល​ទេ​។ លោក​ វៃ បាន​មាន​ប្រសាសន៍​ថា ” យើង​មិន​ភ្ញាក់​ផ្អើល​ទេ ពីព្រោះ​យើង​កំពុង​និយាយ​អំពី​​ការ​ងារ​របស់​មន្ត្រី​កំពូលៗ​។ នេះ​គឺ​ជារឿង​ធម្មតា​ ពីព្រោះ​មេៗ​ទាំងនោះមិន​មែន​សុទ្ធតែ​ឥតខ្ចោះ​១០០​ភាគរយ​ទេ​។

លោក វៃ បាន​មាន​ប្រសាសន៍​ថា លោក ណារិន បាន​កាន់​តួនាទី​ជា​អធិការ​នគរ​បាល​ខណ្ឌ​រយៈ​ពេល​ប្រាំពីរ​ឬប្រាំបី​ឆ្នាំ​មក​ហើយ ហើយ​លោកបាន​បដិសេធ​មិន​និយាយ​បន្ថែម​ឡើយ​។

កាលពី​ឆ្នាំ​២០០៤ នៅពេល​លោក ណារិន ជា​អធិការ​រង​នគរ​បាល​ខណ្ឌ​ចំការមន​ជាប់គ្នា​នោះ​ មេធាវី​ ផេង ស៊ីដេត ត្រូវ​ក្មេង​ទំនើង​មួយ​ក្រុម​ដេញ​រត់ចូល​ក្នុង​អធិការ​ដ្ឋាន​នគរ​បាល​ខណ្ឌ​​។ លោក ស៊ីដេត បាន​មាន​ប្រសាសន៍​ថា នគរ​បាល​បាន​បណ្ដោយ​ឲ្យ​ក្មេង​ទំនើង​មួយ​ក្រុម​នោះ​ចូល​ខាង​ក្នុង​ ហើយ​ថា លោក​ ណារិន បាន​ឈរមើល​ខណៈ​ដែល​ពួកគេ​បាន​វាយ​រូប​គាត់​​។ លោក​ ណារិន បាន​បដិសេធ​ការ​ចោទ​ប្រកាន់​នោះ​។

លោក ហៀក ចាន់លាង អភិបាល​រង​ខណ្ឌ​មាន​ជ័យ​បាន​មាន​ប្រសាសន៍​កាលពី​ម្សិលមិញ​ថា លោក​ដឹង​ថា​អង្គភាព​ប្រឆាំង​អំពើ​ពុក​រលួយ​បាន​ឃុំ​ខ្លួន​អធិការ​នគរ​បាល​ខណ្ឌ​របស់​លោក ប៉ុន្តែ​មិន​បាន​ដឹង​រឿង​អ្វី​ទៀត​ឡើយ។

លោក​ បែន សុវាសនា​ អធិការ​រង​នគរ​បាល​ខណ្ឌ​ដែល​ត្រូវ​បាន​សាក​សួរ​ដោយ​​អង្គភាព​​ប្រឆាំង​អំពើ​ពុករលួយ​​ជាមួយ​លោក​ ណារិន ដែរ​នោះ​បាន​មាន​ប្រសាសន៍​ថា លោក​មិន​ត្រូវ​បាន​ចាប់​ខ្លួនទេ គ្រាន់​តែ​កោះ​ហៅ​តែ​ប៉ុណ្ណោះ​។

លោក​បាន​មាន​ប្រសាសន៍​ថា “ពួកគេ​ [អង្គភាព​ប្រឆាំង​អំពើ​ពុក​រលួយ​] បាន​សួរ​ខ្ញុំ​​អំពី​បញ្ហា​ចរាចរណ៍​ និង​នីតិវិធី​។ ខ្ញុំ​បាន​ត្រឡប់​មក​ផ្ទះវិញ​កាលពី​ល្ងាច​ថ្ងៃ​អង្គារ។ ខ្ញុំ​មិន​ដឹងថា លោក​ ណារិន ត្រូវ​បាន​សាក​សួរ​អំពី​រឿង​អ្វី​ទេ​ ពីព្រោះ​ [ការ​សាកសួរ​នោះ​] ធ្វើនៅក្នុង​បន្ទប់​ឯកជន”៕ សារុន​​​​​​​​​​​

 

© 2023, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស