29 C
Phnom Penh

អធិ​ការ​នគរ​បាល​ខណ្ឌ​ត្រូវបាន​ចោទ​ប្រកាន់ពីបទទារប្រាក់ពីប្រជាពលរដ្ឋ និង​កិបកេង​លុយរដ្ឋ

ដោយ ឌឹ ខេមបូឌា ដេលី

បទវិភាគ

លោក ហ៊ី ណារិន អធិការ​នគរ​បាល​ខណ្ឌ​មានជ័យ ដែល​អង្គភាព​ប្រឆាំង​អំពើ​ពុក​រលួយ​បាន​ចាប់​ខ្លួន​កាលពី​ថ្ងៃ​អង្គារ ត្រូវ​សាលា​ដំបូង​រាជ​ធានី​ភ្នំពេញ​ធ្វើ​ការ​សាក​សួរ​កាលពី​ម្សិល​មិញ​ជុំវិញ​ការ​ចោទ​ប្រកាន់​ថា លោក​​បាន​កិប​កេង​លុយរដ្ឋ​ និង​ទារប្រាក់ពីប្រជា​ពលរដ្ឋ​របស់​ខ្លួន​ជាង​៦០០.០០០​ដុល្លារ​​អំឡុង​​លោកកាន់តំណែង​​ជា​អធិការ​នគរ​បាល​​​រយៈពេល​៨ឆ្នាំ​។cam photo police

លោក ណារិន ត្រូវ​បាន​ចោទ​ប្រកាន់​​ថា បាន​បន្ថែម​បុគ្គលិក​ខ្មោច​ក្នុង​បញ្ជី​បើក​ប្រាក់​ខែ​របស់​អង្គភាព​លោក ហើយ​បើកយក​ប្រាក់​ខែទាំងនោះ កេង​យក​ប្រាក់​ឧបត្ថម្ភ​សម្រាប់​បើក​ឲ្យ​មន្ត្រី​ពិត​ប្រាកដ និង​​ទាមទារ​ប្រាក់​ពី​ម្ចាស់អាជីវកម្ម​​ក្នុង​មូលដ្ឋាន​​ ប្រជាពលរដ្ឋ និង​ជនរង​គ្រោះ​ដោយ​គ្រោះ​ថ្នាក់​ចរាចរណ៍​។

អង្គភាព​ប្រឆាំង​អំពើ​ពុក​រលួយ​​​អះអាង​ថា នៅ​មុន​ការ​ចាប់​ខ្លួន​​ លោក​ ណារិន ត្រូវ​បាន​ព្រមាន​​ពី​រលើក​ឲ្យ​បញ្ឈប់​សកម្មភាព​បែប​នេះ​​។

សេចក្ដីប្រកាសព័ត៌មាន​ដែល​បាន​បង្ហោះ​ក្នុង​គេហទំព័រ​របស់​អង្គភាព​ប្រឆាំង​អំពើ​ពុករលួយ​​កាលពី​ម្សិលមិញ​បាន​លើកឡើង​ថា នៅ​ក្នុង​ការ​ស៊ើប​អង្កេត​រយៈពេល​៨ខែ អង្គភាព​បានសាកសួរ​មន្ត្រី​នគរ​បាល​៤១នាក់អំពីសកម្មភាព​របស់​មន្ត្រី​នគរបាលជាន់​ខ្ពស់​នៅ​ខណ្ឌ​មានជ័យ​។

សេចក្ដីប្រកាសព័ត៌មាននេះលើក​ឡើង​ទៀតថា “ផ្អែក​តាម​ព័ត៌មាន​របស់​មន្ត្រី​នគរ​បាល​ សាក្សី និង​ប្រជា​ពលរដ្ឋ​ដែល​រស់​នៅ​ក្នុង​ខណ្ឌ​មានជ័យ ព្រមទាំង​លោក ហ៊ី ណារិន ផង ចុង​ចោទ​រួប​នេះ​បានទារ​ប្រាក់​ពីប្រជា​ពល​រដ្ឋ​សរុប​៦៧៨.០៥៩​ដុល្លារ​ចាប់​ពី​ឆ្នាំ​​២០០៦​ដល់​ឆ្នាំ​២០១៤។

លោក ចាន់ សេរីវឌ្ឍន៍ ប្រធាន​នាយក​ដ្ឋាន​សន្តិសុខ​អង្គភាព​ប្រឆាំង​អំពើ​ពុក​រលួយ​​​មិន​បាន​និយាយ​លម្អិត​អំពី​ករណី​នេះទេ នៅ​ពេល​ត្រូវ​បាន​ទាក់​ទង​កាលពី​ម្សិលមិញ ដោយ​គ្រាន់​តែ​និយាយ​ថា លោក ណារិន ស្ថិត​ក្នុង​ក​ន្លែងឃុំឃាំង​របស់អង្គភាព​ប្រឆាំង​អំពើ​ពុក​រលួយ​នៅ​ក្នុង​រាជ​ធានី​ភ្នំពេញ ហើយ​នឹង​បញ្ជូន​ទៅ​តុលាការ​ដើម្បី​សាក​សួរ​បន្ថែម​នៅ​ព្រឹក​នេះ​។

លោក សេរីវឌ្ឍន៍ បាន​មាន​ប្រសាសន៍​ថា “គាត់​មិន​ទាន់​ត្រូវបាន​បញ្ជូន​ទៅ​ពន្ធនាគារ​នៅ​ឡើយ​ទេ ពីព្រោះ​តុលាការ​មិន​ទាន់​បាន​បញ្ចប់​នីតិវិធី​របស់​ខ្លួន​ឡើយ​”។

លោក អ៊ុំ សុភ័ក្ត្រ ព្រះរាជ​អាជ្ញារង​អម​សាលា​ដំបូង​រាជ​ធានី​ភ្នំពេញ​ ដែល​បាន​សាក​សួរ​លោក​ ណារិន ​កាលពី​ម្សិលមិញ​មិន​អាច​ទាក់​ទង​សុំ​អត្ថាធិប្បាយ​បាន​ទេ​។លោក ឆាយ សាវុធ អនុប្រធាន​អង្គភាព​ប្រឆាំង​អំពើ​ពុក​រលួយ​​ក៏មិនអាចទាក់ទងបានដែរ​។

សេចក្ដីប្រកាសព័ត៌​មានរបស់​អង្គភាព​ប្រឆាំង​អំពើ​ពុក​រលួយ​​លើក​ឡើង​ថា ​ការបើក​យក​​ប្រាក់​របស់​មន្ត្រី​នគរ​បាល​ជាតិ​មាន​ទាំង​ពិត​ និង​ប្រឌិត​ ហើយលោក ណារិន ក៏​ឲ្យ​មន្ត្រីក្រោម​ឱវាទខ្លួន​ទិញអាវចំណាំងផ្លាត​ និង​ស្រោម​កាំភ្លើង​វែង ជា​របស់ដែល​ត្រូវ​ផ្ដល់​ឲ្យ​ដោយ​ឥត​គិត​ថ្លៃ​។

សេចក្ដីប្រកាសព័ត៌មាននេះ​អះអាង​ថា លោក​បាន​យក​ប្រាក់​ពី​ជនរងគ្រោះ​នៅ​ក្នុង​គ្រោះ​ថ្នាក់​ចរាចរ​ណ៍​១០ភាគ​រយ​ក្នុង​ចំណោម​ប្រាក់​សំណង​របស់​ពួកគេ​ ដើម្បី​សម្រប​សម្រួល​​​ឲ្យ​មាន​ដំណោះ​ស្រាយ​ ហើយ​ថា លោក​បាន​លក់​ម៉ូតូ​ដែល​​បាន​ចាប់ទុក​បន្ទាប់​ពី​គ្រោះ​ថ្នាក់​ចរាចរ​ណ៍ទៀត។

សេចក្ដីប្រកាសព័ត៌មានដដែល​នេះ​លើក​ឡើង​ទៀតថា លោក​ ណារិន បាន​យក​ប្រាក់​ប្រចាំ​ខែ​ពី​ម្ចាស់​បើក​កន្លែង​ល្បែងស៊ីសងក្នុង​មូលដ្ឋាន​ ម្ចាស់អាជីវកម្ម​ និង​រោងចក្រ​ ហើយ​បាន​​ប្រមូល​លុយ​ផាក​ពិន័យ​លើសកំណត់ពី​ម្ចាស់ម៉ូតូដែលចាប់ទុក​​។

អង្គភាព​ប្រឆាំង​អំពើ​ពុក​រលួយ​​ក៏​បាន​អះអាង​ផង​ដែរ​ថា អធិការ​នគរ​បាល​រូប​នេះ​បាន​យក​ប្រាក់​ពី​ប្រជាពលរដ្ឋយ៉ាងច្រើន​​ក្នុង​ការធ្វើ​សៀវភៅ​ស្នាក់នៅ និង​ការ​ចុះឈ្មោះ​សមាជិកថ្មីទៅ​ក្នុង​សៀវភៅ​នោះ​។

យោង​តាម​សេចក្ដីប្រកាសព័ត៌មាននោះ​បាន​ឲ្យ​ដឹង​ថា លោក ណារិន បាន​សារភាព​ថា លោក​ពិតជា​បាន​យក​ប្រាក់​ទាំង​អស់​ដែល​លោក​ប្រមូល​បាន​ដើម្បី​​ប្រយោជន៍ផ្ទាល់​ខ្លួន​មែន។

លោក សុង លី ស្នង​ការ​រង​នគរ​បាល​រាជ​ធានី​ភ្នំពេញ​បាន​មាន​ប្រសាសន៍​កាលពី​ម្សិលមិញ​ថា លោក ជឹម ស៊ីថា ជា​អធិការ​រង​​ត្រូវ​បាន​ដំឡើង​តួនាទី​ទៅ​ជា​អធិការ​​នគរ​បាល​ខណ្ឌ​មាន​ជ័យ​ស្ដីទី​ ប៉ុន្តែ​បាន​បដិសេធ​មិន​ធ្វើអត្ថាធិប្បាយ​ស៊ីជម្រៅ​អំពី​ករណី​នេះ​ទេ​។

លោក សុង​ លី បានមាន​ប្រសាសន៍​ថា ” វា​ជាការ​ពិត លោក​ ណារិន បាន​ជាប់​ពាក់​ព័ន្ធ​នឹង​អំពើ​ពុក​រលួយ​។ ប៉ុន្តែ​ខ្ញុំ​មិន​ដឹង​ព័ត៌មាន​លម្អិត​ទេ ពីព្រោះ​យើង​មិន​ទទួល​បន្ទុក​ករណី​នេះ​ឡើយ។

នៅ​ពេល​ត្រូវ​បានទាក់​ទង​តាម​ទូរស័ព្ទ​ លោក ស៊ីថា បាន​មាន​ប្រសាសន៍​ថា វា​មិនមែន​ជា​តួនាទី​របស់​លោកក្នុង​ការ​​និយាយ​អំពី​ការ​ធ្លាក់​ចៅហ្វាយ​នាយ​របស់​លោក​ឡើយ​។ លោក​បាន​មាន​ប្រសាសន៍​ថា ” ខ្្ញុំ​នឹង​ប្រឹង​ប្រែង​ឲ្យ​អស់​ពីសមត​្ថភាព​​ដើម្បី​ធ្វើ​កិច្ច​ការ​នេះ​”៕ សារុន​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស