អាជ្ញាធរខេត្តសៀមរាបបានចាប់ខ្លួនមន្ត្រីនគរបាលយ៉ាងហោចណាស់បីនាក់នៅនាយកដ្ឋានប្រឆាំងបទល្មើសសេដ្ឋកិច្ចក្រសួងមហាផ្ទៃកាលពីថ្ងៃពុធ ដោយសង្ស័យថា បានគំរាមទារប្រាក់ពីអ្នកនេសាទនៅក្នុងខេត្តនេះ។
លោក ម៉ម សាម៉ុន មេបញ្ជាការកងរាជអាវុធហត្ថខេត្តបានមានប្រសាសន៍ថា ការចាប់ខ្លួននេះធ្វើឡើងបន្ទាប់ពីក្រុមអ្នកនេសាទបានដាក់ពាក្យបណ្ដឹងទៅកងរាជអាវុធហត្ថខេត្ត ដោយចោទប្រកាន់នគរបាលសេដ្ឋកិច្ចថា បានទាមទារប្រាក់ពីរូបគាត់ និងអ្នកនេសាទដទៃទៀត ខណៈដែលពួកគាត់បានធ្វើការនេសាទដោយខុសច្បាប់នៅបឹងទន្លេសាប។
លោក សាម៉ុន ដែលបដិសេធមិនប្រាប់ពីចំនួនទឹកប្រាក់ដែលមន្ត្រីទាំងនេះបានទាមទារនោះ បានមានប្រសាសន៍ថា ” យើងបានចាប់ខ្លួនពួកគេបន្ទាប់ពីទទួលបានពាក្យបណ្ដឹងពីអ្នកនេសាទមួយក្រុម ដែលបានចោទមន្ត្រីទាំងនេះថា បានគំរាមទារប្រាក់ពីពួកគាត់ ខណៈដែលពួកគាត់ធ្វើការនេសាទមួយថ្ងៃមុនការចាប់ខ្លួន”។
លោក កើត វណ្ណារ៉េត ព្រះរាជអាជ្ញាអមសាលាដំបូងខេត្តបានមានប្រសាសន៍ថា លោកបានដឹកនាំប្រតិបត្តិការនេះ ហើយថា មន្ត្រីនគរបាលបួននាក់ត្រូវបានចាប់ខ្លួន ប៉ុន្តែលោក ឡុង ស្រេង អនុប្រធាននាយកដ្ឋានប្រឆាំងបទល្មើសសេដ្ឋកិច្ចបានមានប្រសាសន៍ថា មានតែមន្ត្រីបីនាក់ប៉ុណ្ណោះក្នុងចំណោមអ្នកដែលត្រូវបានចាប់ខ្លួននោះមកពីនាយកដ្ឋានរបស់លោក ហើយជនសង្ស័យទី៤គឺជាអ្នកបើកទូកដែលពួកគេកំពុងជិះល្បាត។
លោក ឡុង ស្រេង បានហៅការចាប់ខ្លួននេះថា “ខុសច្បាប់” ពីព្រោះលោក វណ្ណារ៉េត មិនបានជូនដំណឹងដល់លោក អ៊ុក សាវុធ អគ្គព្រះរាជអាជ្ញាសាលាឧទ្ធរណ៍អំពីផែនការចាប់ខ្លួននេះជាមុនឡើយ។
លោកបានចេញឈ្មោះនគរបាលពីរនាក់ដែលត្រូវចាប់ខ្លួននោះ គឺ ម៉ាតា យ៉ា និង ឈាង ស្រីពៅ ប៉ុន្តែបានមានប្រសាសន៍ថា លោកមិនចាំឈ្មោះមន្ត្រីទី៣ឬអ្នកបើកទូកឡើយ។ លោកបានមានប្រសាសន៍ថា “អាជ្ញាធរខេត្តបានផ្ញើសារជាអក្សរតាមរយៈទូរស័ព្ទដៃមកខ្ញុំកាលពីថ្ងៃពុធ ដោយអះអាងពីការចាប់ខ្លួនមន្ត្រីនាយកដ្ឋានរបស់ខ្ញុំ”។
លោក ឡុង ស្រេង បានមានប្រសាសន៍ថា ” យើងជឿថា ការចាប់ខ្លួនមន្ត្រីរបស់យើង គឺខុសច្បាប់ ពីព្រោះព្រះរាជអាជ្ញាអមសាលាដំបូងខេត្តបានអនុញ្ញាតឲ្យមន្ត្រីរបស់លោកចាត់វិធានការដោយមិនចាំបាច់ជូនដំណឹងទៅអគ្គព្រះរាជអាជ្ញា [លោក អ៊ុក សាវុធ]” ឡើយ។
ប៉ុន្តែ បើទោះជាមានការរិះគន់ពីការចាប់ខ្លួននេះក៏ដោយ ក៏លោក ឡុង ស្រេង បានមានប្រសាសន៍ថា មន្ត្រីរបស់លោកទំនងជាមានកំហុសពាក់ព័ន្ធបទល្មើសនោះឯង”។
លោកបានមានប្រសាសន៍ថា ” យើងមិនទាន់ដឹងថា តើមន្ត្រីរបស់យើងពិតជាបានគំរាមទារប្រាក់មែនឬយ៉ាងណានោះឡើយ ប៉ុន្តែខ្ញុំប្រាកដ៨០ភាគរយថា វាជារឿងពិត ពីព្រោះមន្ត្រីមួយចំនួនបានប្រព្រឹត្តបទល្មើសក្នុងពេលកន្លងមកមែន”។
ការនេសាទនៅបឹងទន្លេសាប និងទន្លេមេគង្គត្រូវបានហាមឃាត់ចាប់ពីថ្ងៃទី១ ខែមិថុនា ដល់ថ្ងៃទី៣០ ខែតុលា ដើម្បីឲ្យចំនួនត្រីកើនឡើងអំឡុងរដូវត្រីពង៕ សារុន