កាលពីម្សិលមិញប្រទេសថៃបានអះអាងថា ខ្លួនបានស្នើឲ្យកម្ពុជាធ្វើមាតុភូមិនិវត្តសកម្មជននិស្សិតថៃម្នាក់ ដែលគេចង់ចាប់ខ្លួនតាមចោទពីបទនិយាយប៉ះពាល់ដល់រាជវង្សានុវង្ស ប៉ុន្តែបានលើកឡើងថា គេបានប្រាប់ថា និស្សិតដែលរត់គេចខ្លួនរូបនេះមិនស្ថិតនៅក្នុងប្រទេសកម្ពុជាទេ។
របបយោធាដែលបានកាន់កាប់ប្រទេសថៃចាប់តាំងពីការផ្ដួលរំលំរដ្ឋាភិបាលជាប់ឆ្នោតកាលពីខែឧសភានោះ ចោទប្រកាន់ ឯកភព ឡូរ៉ា (Ekkapob Luara) ដែលគេស្គាល់ថា តាង អាជីវ៉ា (Tang Achiva) ថាបានរំលោភច្បាប់របស់ប្រទេសថៃដែលចាត់ទុកថា ជាបទឧក្រិដ្ឋក្នុងការនិយាយប៉ះពាល់ដល់រាជវង្សានុវង្ស។
សកម្មជននិស្សិតរូបនេះគឺជាមនុស្សម្នាក់ក្នុងចំណោមមនុស្ស២៨នាក់ដែលតុលាការយោធាក្រុងបាងកកបានចេញដីកាចាប់ខ្លួនកាលពីខែមិថុនា ពីបទមិនអើពើនឹងសេចក្ដីបង្គាប់ឲ្យរាយការណ៍ដល់អាជ្ញាធរថៃ។
កាលពីថ្ងៃទី២៣ ខែកញ្ញា លោក កែម សារិន ដែលពិនិត្យមើលបញ្ហាជនភៀសខ្លួននៅអគ្គនាយកដ្ឋានអន្តោប្រវេសន៍ក្រសួងមហាផ្ទៃបានអះអាងពីសេចក្តីរាយការណ៍ព័ត៌មានថៃដែលថា ឡូរ៉ា ស្ថិតក្នុងប្រទេសកម្ពុជា ហើយបានមានប្រសាសន៍ថា កំពុងដំណើរការដាក់ពាក្យសុំសិទ្ធិជ្រកកោន។
ប៉ុន្តែនៅសប្ដាហ៍បន្ទាប់លោក សារិន បានកែតម្រូវការអត្ថាធិប្បាយរបស់លោកវិញដោយអះអាងថា ឡូរ៉ា មិនបានដំណើរការដាក់ពាក្យសុំទេ ហើយថា រដ្ឋាភិបាលមិនដឹងពីវត្តមានរបស់សកម្មជននិស្សិតរូបនេះនៅក្នុងប្រទេសកម្ពុជាទេ។
កាលពីម្សិលមិញ អ្នកនាំពាក្យកងទ័ពថៃ គឺលោក វីរា៉ឈុន សុគន្ថាបា៉ទីប៉ាក (Werachon Sokundhapatipak) បានមានប្រសាសន៍ថា កម្ពុជាបានផ្ដល់ព័ត៌មានផ្លូវការដល់ប្រទេសថៃដូចគ្នានេះដែរ។
លោកបានមានប្រសាសន៍ថា “ប្រទេសកម្ពុជាលើកឡើងថា ជនជាប់ចោទរូបនេះមិនស្ថិតនៅក្នុងប្រទេសកម្ពុជាទេ។ ឥឡូវនេះ យើងកំពុងធ្វើការសម្របសម្រួល…។ នេះជាបញ្ហារសើប”។ លោក វីរ៉ាឈុន បានបដិសេធមិនធ្វើអត្ថាធិប្បាយបន្ថែមឡើយ។
អ្នកនាំពាក្យក្រសួងមហាផ្ទៃ និងក្រសួងការបរទេសកម្ពុជាមិនអាចទាក់ទងបានទេកាលពីម្សិលមិញ។
កាលពីសប្ដាហ៍មុន អ្នកស្គាល់ ឯកភព គឺលោក ប៉ាវីន ចាចាវ៉ាលប៉ុងពុន (Pavin Chachavalpongpun) បានមានប្រសាសន៍ថា ថ្មីៗនេះលោកបានទាក់ទងជាមួយសកម្មជនរូបនេះ ដែលបានប្រាប់លោកថា រូបគេកំពុងលាក់ខ្លួនក្នុងប្រទេសកម្ពុជាក្រោមការការពាររបស់ឧត្តមស្នងការសហប្រជាជាតិទទួលបន្ទុកជនភៀសខ្លួន។
ទីភ្នាក់ងារអង្គការសហប្រជាជាតិមិនបញ្ជាក់ ឬបដិសេធការអះអាងនេះទេ ដោយលើកឡើងថា គោលនយោបាយរបស់ខ្លួនមិនធ្វើអត្ថាធិប្បាយលើករណីបុគ្គលឡើយ។
ប្រទេសកម្ពុជាត្រូវបានរិះគន់យ៉ាងខ្លាំងចំពោះការធ្វើមាតុភូមិនិវត្តអ្នកស្វែងរកសិទ្ធិជ្រកកោនទៅប្រទេសដែលពួកគេបានរត់គេចខ្លួនមក រួមទាំងជនជាតិវីហ្គួមួយក្រុម ដែលត្រូវបានបញ្ជូនត្រឡប់ទៅប្រទេសចិនវិញកាលពីឆ្នាំ២០០៩ និងក្រុមអ្នកភៀសខ្លួនម៉ុងតាញ៉ារាប់រយនាក់ទៅប្រទេសវៀតណាមវិញកាលពីប៉ុន្មានឆ្នាំមុន។
កាលពីពេលថ្មីៗបំផុតនេះ រដ្ឋាភិបាលបានសម្រេចកិច្ចព្រមព្រៀងដ៏ចម្រូងចម្រាសមួយជាមួយប្រទេសអូស្ត្រាលីក្នុងការតាំងទីលំនៅថ្មីដល់អ្នកស្វែងរកសិទ្ធិជ្រកកោន ដែលបច្ចុប្បន្នកំពុងត្រូវឃុំខ្លួននៅក្នុងប្រទេសណូរូ ជាប្រទេសដែនកោះបា៉ស៊ីហ្វិកខាងត្បូង៕ សារុន