កាលពីម្សិលមិញ អង្គការមិនមែនរដ្ឋាភិបាលមួយចំនួនបានលើកឡើងថា បទបញ្ជាផ្ទៃក្នុងថ្មីៗដ៏តឹងរ៉ឹងដែលលោក ហេង សំរិន ប្រធានរដ្ឋសភាបានចេញជាបន្តបន្ទាប់កាលពីសប្ដាហ៍មុន បានរំលោភបំពានរដ្ឋធម្មនុញ្ញ និងបទបញ្ជាផ្ទៃក្នុងរបស់រដ្ឋសភា ហើយបានអំពាវនាវឲ្យតំណាងរាស្ត្រដែលមានភក្ដីភាពចំពោះគណបក្សកាន់អំណាចលុបចោលបទបញ្ជានេះ។
នៅក្នុងសារាចរមួយចុះថ្ងៃទី១២ ខែកញ្ញា លោក ហេង សំរិន បានផ្ដល់អំណាចថ្មីលើសលប់ឲ្យខ្លួនឯងមានសិទ្ធិកំណត់ និងរឹតបន្តឹងការចូលទៅកាន់រដ្ឋសភាដោយនរណាក៏ដោយដែលមិនមែនជាតំណាងរាស្ត្រ។ សារាចរនោះបានលើកឡើងថា លោក ហេង សំរិន នឹងត្រូវអនុម័តរាល់ការអញ្ជើញរបស់តំណាងរាស្ត្រណាម្នាក់ឲ្យសាធារណជនចូលមកកាន់បរិវេណរដ្ឋសភាថា សាធារណជនមិនអាចផ្ដល់សក្ខីកម្មដល់គណៈកម្មការជំនាញទាំង១០នៃរដ្ឋសភា ឬចូលអង្គុយស្ដាប់នៅក្នុងរដ្ឋសភាបានឡើយ ហើយថា គណៈកម្មការទាំងនេះចាំបាច់ត្រូវមាន “ ការព្រមព្រៀង” គ្មានការបញ្ជាក់ច្បាស់លាស់ជាមុនសិន មុនពេលកោះហៅរដ្ឋមន្ត្រីណាម្នាក់ឲ្យចូលបំភ្លឺនៅក្នុងរដ្ឋសភា។
បទបញ្ជាផ្ទៃក្នុងថ្មីទាំងនេះកើតមានឡើងស្របពេលដែលគណបក្សសង្គ្រោះជាតិចាប់ផ្ដើមមានឥទ្ធិពលខ្លាំងនៅក្នុងរដ្ឋសភា ដែលមិនធ្លាប់មានពីមុនមក រួមទាំងតំណែងប្រធានគណៈកម្មការចំនួនប្រាំក្នុងចំណោមគណៈកម្មការទាំង១០នៃរដ្ឋសភាផងដែរ ហើយបានប្ដេជ្ញាប្រើប្រាស់អំណាចថ្មីរបស់ខ្លួនដើម្បីកោះហៅរដ្ឋមន្ត្រីឲ្យចូលខ្លួនឆ្លើយបំភ្លឺ និងពិនិត្យផ្ទៀងផ្ទាត់ឡើងវិញនូវច្បាប់ចម្រូងចម្រាសជាច្រើន។
នៅក្នុងសេចក្ដីថ្លែងការណ៍រួមមួយកាលពីម្សិលមិញ អង្គការមិនមែនរដ្ឋាភិបាលចំនួន១៣ បានអំពាវនាវឲ្យដកសារាចរនេះចេញ។ សេចក្ដីថ្លែងការណ៍នេះមានខ្លឹមសារដូច្នេះថា “គណៈកម្មការមួយចំនួនដែលដឹកនាំដោយគណបក្សប្រឆាំង កំពុងដឹកនាំការជួបជុំ បើកសវនាការ ឬពិភាក្សាដេញដោលជាសាធារណៈ ខណៈដែលប្រធាន [រដ្ឋសភា] មកពីគណបក្សកាន់អំណាច និងលេខាធិការរដ្ឋសភាហាក់ដូចជាកំពុងតែព្យាយាមគ្រប់គ្រងគណៈកម្មការទាំងេនះតាមរយៈការចេញសារាចរនេះ។ អង្គការសង្គមស៊ីវិលបានទាមទារឲ្យស្ថាប័ននីតិប្រតិបត្តិផ្ដោតការយកចិត្តទុកដាក់បន្ថែមទៀតលើគោលការណ៍ប្រជាធិបតេយ្យ តម្លាភាព និងប្រសិទ្ធភាពនៃរដ្ឋសភាតាមរយៈការរម្លាយសារាចរនេះ”។
នៅឯសន្និសីទកាសែតមួយក្នុងរាជធានីភ្នំពេញ អង្គការមិនមែនរដ្ឋាភិបាលទាំងនេះបានលើកឡើងថា សារាចរនេះបានបំពានបទប្បញ្ញត្តិនៃបទបញ្ជាផ្ទៃក្នុងរបស់រដ្ឋសភា ហើយបានចោទប្រកាន់លោក ហេង សំរិន ថា កំពុងតែព្យាយាមប្រើអំណាចហួសដែនកំណត់ ដែលបទបញ្ជាផ្ទៃក្នុងទាំងនោះ និងរដ្ឋធម្មនុញ្ញផ្ដល់ឲ្យលោក។
លោក គល់ បញ្ញា ប្រធានគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា (ខុមហ្វ្រែល) បានមានប្រសាសន៍ថា ” គ្មានមាត្រា ឬបទប្បញ្ញត្តិណាផ្ដល់អំណាចដល់ប្រធានរដ្ឋសភាឲ្យមានសិទ្ធិចេញសារាចរ ឬបទបញ្ជាឡើយ។ មាត្រា ៨៧ នៃរដ្ឋធម្មនុញ្ញចែងថា ប្រធានរដ្ឋសភាត្រូវតែទទួលខុសត្រូវចំពោះបទបញ្ជាផ្ទៃក្នុង។វាមិនអនុញ្ញាតឲ្យលោកចេញសារាចរនោះទេ មានន័យថា លោកត្រូវបានអនុញ្ញាតឲ្យធានាតែការអនុវត្តបទបញ្ជាផ្ទៃក្នុងរបស់រដ្ឋសភាប៉ុណ្ណោះ”។
លោក អ៊ូ វីរៈ ប្រធានក្រុមប្រឹក្សាភិបាលនៃមជ្ឈមណ្ឌលសិទ្ធិមនុស្សកម្ពុជា បានមានប្រសាសន៍ថា សារាចរនេះក៏បានរំលោភបំពានស្មារតីនៃកិច្ចព្រមព្រៀងមួយរវាងគណបក្សប្រជាជនកម្ពុជា និងគណបក្សសង្គ្រោះជាតិដែលបានធ្វើឡើងកាលពីខែកក្កដា ដើម្បីបញ្ចប់ការធ្វើពហិការមិនចូលរដ្ឋសភារយៈពេលជាច្រើនខែរបស់គណបក្សប្រឆាំង ដើម្បីធ្វើការតវ៉ាជុំវិញការបោះឆ្នោតជ្រើសតាំងតំណាងរាស្ត្រដ៏ចម្រូងចម្រាសកាលពីឆ្នាំមុន ដែលរួមមានការចរចារួមគ្នាឡើងវិញជុំវិញបទបញ្ជាផ្ទៃក្នុងរបស់រដ្ឋសភាផងដែរ។
លោកមានប្រសាសន៍ទៀតថា ” វាជាការដាក់រទេះមុនគោ។ សារាចរនេះដកសិទ្ធិ (របស់តំណាងរាស្ត្រ) ទាំងអស់មុនការពិភាក្សាណាមួយ”។
មន្ត្រីខុទ្ទកាល័យរបស់លោក ហេង សំរិន មិនអាចទាក់ទងបានទេ។ ចំណែកឯលោក ឈាង វុន តំណាងរាស្ត្រមកពីគណបក្សប្រជាជនកម្ពុជា និងជាអ្នកនាំពាក្យរដ្ឋសភា បានបដិសេធមិនឆ្លើយបំភ្លឺទេពាក់ព័ន្ធនឹងបញ្ហានេះ។
នៅឯសន្និសីទកាសែតមួយកាលពីចុងខែមុន ដែលត្រូវបានរៀបចំឡើងដើម្បីឆ្លើយតបទៅនឹងការរិះគន់សារាចរេនះ លោក ឈាង វុន បានអះអាងថា រដ្ឋធម្មនុញ្ញ និងបទបញ្ជាផ្ទៃក្នុងរបស់រដ្ឋសភា សុទ្ធតែផ្ដល់អំណាចដល់ប្រធានរដ្ឋសភាឲ្យមានសិទ្ធិចេញសារាចរ៕ សុខុម