អ្នកតវ៉ាដែលនៅតែមានកំហឹងចំពោះការលើកឡើងដោយអតីតអ្នកនាំពាក្យស្ថានទូតវៀតណាមម្នាក់កាលពីបួនខែកន្លងទៅ បានបន្តធ្វើបាតុកម្មកាលពីចុងសប្ដាហ៍ដើម្បីទាមទារឲ្យមានការសូមអភ័យទោស ដោយបានដុតទង់ជាតិវៀតណាម និងគំរាមដុតស្ថានទូតវៀតណាមថែមទៀត។
អំឡុងកិច្ចសម្ភាសតាមវិទ្យុកាលពីខែមិថុនា លោក ត្រាន វ៉ានថុង អ្នកនាំពាក្យ និងជាលេខាទី១ស្ថានទូតវៀតណាមនៅពេលនោះ បានច្រានចោលការអះអាងរបស់ពលរដ្ឋខ្មែរមួយចំនួនដែលថា កម្ពុជាក្រោមដែលជាផ្នែកនៃទឹកដីវៀតណាមភាគខាងត្បូងក្នុងពេលសព្វថ្ងៃ និងជាទឹកដីដែលខ្មែរកម្ពុជាក្រោមជាច្រើនកំពុងរស់នៅនោះ ជារបស់ប្រទេសកម្ពុជាមុនពេលប្រទេសបារាំងកាត់ទៅឲ្យវៀតណាមក្នុងឆ្នាំ១៩៤៩។
ការបាត់បង់ទឹកដីនេះធ្វើឲ្យមានកំហឹងយ៉ាងខ្លាំងក្នុងចំណោមពលរដ្ឋខ្មែរ ដែលភាគច្រើនចងចាំប្រវត្តិសាស្ត្រហើយមានកំហឹងប្រឆាំងប្រទេសភូមិផងរបងតែមួយដែលស្ថិតនៅភាគខាងកើតប្រទេសកម្ពុជា ហើយការលើកឡើងរបស់អ្នកនាំពាក្យស្ថានទូតវៀតណាមកាលពីខែមិថុនា បានធ្វើឲ្យផ្ទុះការតវ៉ាដោយមានការដុតទង់ជាតិនៅខាងមុខស្ថានទូតវៀតណាមនៅខែបន្ទាប់។
ដោយនៅតែរង់ចាំការសូមអភ័យទោស អ្នកតវ៉ាជាង១០០នាក់បានត្រឡប់ទៅកាន់ស្ថានទូតនេះម្ដងទៀតកាលពីថ្ងៃសៅរ៍ និងថ្ងៃម្សិលមិញដើម្បីដុតទង់ជាតិបន្ថែមទៀត។
ព្រះតេជគុណ សឹង ហៃ សកម្មជនជាព្រះសង្ឃ និងជាបុគ្គលម្នាក់ក្នុងចំណោមសមាជិកនិយាយឥតសំចៃមាត់នៃក្រុមអ្នកតវ៉ានេះបានមានសង្ឃដីកាថា អ្នកតវ៉ាបានដុតទង់ជាតិធំៗចំនួនប្រាំបួន និងទង់ជាតិតូចៗរាប់រយទៀតនៅក្នុងការតវ៉ាចំនួនពីរថ្ងៃ។ នគរបាលបានបិទផ្លូវមិនឲ្យចូលទៅកាន់ស្ថានទូតវៀតណាមឡើយ ដោយដាក់របាំងដែកការពារនៅចុងទាំងសងខាងនៃអគាររបស់ស្ថានទូត ដែលស្ថិតនៅតាមបណ្ដាយមហាវិថីព្រះមុនីវង្ស ប៉ុន្តែគ្មានការប៉ុនប៉ងធ្វើអន្តរាគមន៍ឡើយ។
ព្រះតេជគុណ សឹង ហៃ បានស្រែកនៅខាងមុខស្ថានទូតវៀតណាមកាលពីថ្ងៃសៅរ៍ថា “ប្រសិនបើអ្នកឯងចង់បញ្ចប់បញ្ហាគឺត្រូវតែចេញមកប្រាប់ការពិតអំពីប្រវត្តិសាស្ត្រខ្មែរ ហើយសុំទោសពលរដ្ឋខ្មែរ។ យើងដុតទង់ជាតិដើម្បីបង្ហាញថា យួនមិនអាចធ្វើអ្វីតាមតែចិត្តបានឡើយ”។
ដោយត្រឡប់មកវិញម្ដងទៀតកាលពីម្សិលមិញ ព្រះសង្ឃអង្គនេះបានគំរាមធ្វើការតវ៉ាដោយមានការចាត់វិធានការកាន់តែខ្លាំងបន្ថែមទៀតប្រសិនបើប្រទេសវៀតណាមមិនសូមអភ័យទោសនៅត្រឹមថ្ងៃនេះទេនោះ។
ព្រះតេជគុណមានសង្ឃដីកាថា ” បើយួនមិនចេញមកទេ យើងនឹងសម្រុកចូលទៅក្នុងស្ថានទូតយួន ហើយដុតស្ថានទូតតែម្ដង”។ អ្នកផ្សេងៗទៀតដែលចូលរួមការតវ៉ាដែរនោះ ក៏បានស្រែកបន្ទរផងដែរ។
លោក ថាច់ សេដ្ឋា ដែលដឹកនាំសហគមន៍ខ្មែរកម្ពុជាក្រោម និងដែលដើរតួនាទីយ៉ាងសំខាន់ក្នុងការរៀបចំការតវ៉ាបានលើកឡើងថា ក្រុមអ្នកតវ៉ាក៏នឹងចាប់ផ្ដើមធ្វើពហិការមិនប្រើទំនិញវៀតណាមផងដែរនៅថ្ងៃនេះ ដោយនឹងបញ្ជូនសមាជិករបស់ខ្លួនទៅតាមទីផ្សារនានាក្នុងរាជធានីភ្នំពេញ ដើម្បីជំរុញឲ្យអតិថិជនកុំទិញទំនិញវៀតណាមដែលដឹកឆ្លងកាត់ព្រំដែន។
លោកបានមានប្រសាសន៍ថា ” វាដល់ពេលដែលយើងត្រូវក្រោកឈរឡើងទាំងអស់គ្នា ហើយដើម្បីបង្ហាញឲ្យយួនឃើញថា យើងរួបរួមគ្នា ហើយថា យើងនឹងការពារជាតិ និងទឹកដីរបស់យើង”។
ប៉ុន្តែគ្មាននរណាម្នាក់ក្នុងចំណោមក្រុមអ្នកតវ៉ាប្រើអំពើហិង្សាខ្លាំងនោះឡើយ។ អ្នកតវ៉ាពីរបីនាក់បានឃាត់អ្នកតវ៉ាដូចគ្នាកុំឲ្យដុតទង់ជាតិវៀតណាម ប៉ុន្តែគ្មានបានផលអ្វីឡើយ។ យុវជនវ័យក្មេងម្នាក់បានប្រាប់ទៅកាន់ក្រុមអ្នកតវ៉ាថា ” យើងមិនគាំទ្រអ្នកដែលដុតទង់ជាតិឡើយ។ តើការប្រើអំពើហិង្សាមានប្រយោជន៍អ្វី? ការប្រើអំពើហិង្សាគឺជាដំណោះស្រាយរបស់សត្វធាតុ។ យើងត្រូវតែប្រើបញ្ញារបស់យើងដើម្បីដោះស្រាយបញ្ហា”។
លោក ឡុង ឌីម៉ង់ អ្នកនាំពាក្យសាលារាជធានីបានបដិសេធមិនធ្វើអត្ថាធិប្បាយទាក់ទិននឹងការតវ៉ានេះឡើយ ដោយបង្វែរសំណួរទៅស្ថានទូតវៀតណាម និងក្រសួងការបរទេសវិញ។ អ្នកនាំពាក្យស្ថានទូតវៀតណាមក៏មិនអាចទាក់ទងបានដែរ។
បន្ទាប់ពីអ្នកតវ៉ាបានដុតទង់ជាតិមួយរបស់វៀតណាមនៅខាងមុខស្ថានទូតវៀតណាមកាលពីខែសីហា ក្រសួងការបរទេសវៀតណាមបានចេញសេចក្ដីថ្លែងការណ៍មួយថ្កោលទោសទង្វើនេះ ហើយទទូចឲ្យរដ្ឋាភិបាលកម្ពុជាចាត់វិធានការផ្លូវច្បាប់លើក្រុមប្រព្រឹត្តបទល្មើសទាំងនេះ។
ទោះជាយ៉ាងណា រដ្ឋាភិបាលមិនបានធ្វើការលើករណីនេះឡើយ ហើយបានលើកឡើងថា វាជាសិទ្ធិក្នុងការតវ៉ាជាសាធារណៈ។
ក្រសួងការបរទេសកម្ពុជាបានប្រកាសកាលពីខែមុនថា លោក វ៉ានថុង នឹងត្រូវជំនួសតំណែងជាអ្នកនាំពាក្យស្ថានទូតដោយអ្នកផ្សេង៕ ស៊ុយឈាង