ការខិតខំប្រឹងប្រែងរួមគ្នារបស់មន្ត្រីរដ្ឋបាលព្រៃឈើនៅក្នុងខេត្តចំនួនពីរ បានឈានដល់ការចាប់ខ្លួនបុរសម្នាក់ ដែលដឹកឈើគ្រញូងខុសច្បាប់ទម្ងន់៤៥០គីឡូក្រាមនៅក្នុងរថយន្តភីកអាប់របស់ខ្លួនកាលពីថ្ងៃសៅរ៍ នៅក្នុងខេត្តសៀមរាប។
លោក សំរិទ្ធ សុខុម ព្រះរាជអាជ្ញារងបានមានប្រសាសន៍ថា ស៊ុន ប៊ុនរិទ្ធ អាយុ២២ឆ្នាំត្រូវបានចាប់ខ្លួននៅខាងក្រៅកន្លែងកម្សាន្តមួយក្នុងក្រុងសៀមរាប ទីដែលជននេះបានព្យាយាមគេចខ្លួនពីអាជ្ញាធរ។
លោក សុខុម បានមានប្រសាសន៍ថា ”ជននេះត្រូវបានចាប់ខ្លួនបន្ទាប់ពីកម្លាំងចម្រុះរបស់មន្ត្រីរដ្ឋបាលព្រៃឈើ កងរាជអាវុធហត្ថ និងនគរបាលសេដ្ឋកិច្ចបានដេញតាមជននេះពីស្រុកអន្លង់វែង ខេត្តឧត្តរមានជ័យ ដល់ក្រុងសៀមរាប”។
លោក សុខុម បានបន្ថែមថា រហូតមកទល់ពេលនេះមិនទាន់មានការចោទប្រកាន់នៅឡើយទេ ហើយលោក ប៊ុនរិទ្ធ កំពុងត្រូវឃុំខ្លួននៅពន្ធនាគារខេត្តសៀមរាប ខណៈដែលរង់ចាំការសាកសួរពីសំណាក់ចៅក្រមស៊ើបសួរ។
លោក សុខុម បានមានប្រសាសន៍ថា មន្ត្រីរដ្ឋបាលព្រៃឈើខេត្តឧត្តរមានជ័យបានផ្ដល់ព័ត៌មានដល់មន្ត្រីរដ្ឋបាលព្រៃឈើខេត្តសៀមរាប ថាមានរថយន្តមួយគ្រឿងកំពុងបើកមក ហើយមន្ត្រីរដ្ឋបាលព្រៃឈើក្រុងសៀមរាបបានចាប់ផ្ដើមដេញតាមរថយន្តនោះ។
នៅពេលអ្នកបើកបរព្យាយាមបើកគេចពីមន្ត្រីរដ្ឋបាលព្រៃឈើ ដោយបើកចូលទៅក្នុងកន្លែងចតរថយន្តនៅកន្លែងកម្សាន្តមួយ មន្ត្រីរដ្ឋបាលព្រៃឈើបានចាប់ខ្លួនជននេះ ហើយរឹបអូសបានឈើគ្រញូង៤០ដុំទម្ងន់ប្រហែល៤៥០គីឡូក្រាមពីរថយន្តនេះ។ឈើនេះកំពុងរក្សាទុកនៅការិយាល័យរដ្ឋបាលព្រៃឈើខេត្តសៀមរាប។
លោក ម៉ែន វុទ្ធី មន្ត្រីរដ្ឋបាលព្រៃឈើខេត្តសៀមរាបបានមានប្រសាសន៍ថា ” យើងសង្ស័យថា រថយន្តនេះដឹកឈើគ្រញូង។ កម្លាំងរបស់យើងបានដេញតាម ហើយចាប់ខ្លួនអ្នកបើកបរបានក្នុងក្រុងសៀមរាប និងរឹបអូសឈើគ្រញូងនោះ”៕ សារុន