សមាជិកសហជីពរាប់ពាន់នាក់ ដែលនាំគ្នាតវ៉ាប្រឆាំងនឹងការបណ្ដេញចេញពីការងាររបស់ខ្លួន បានប៉ះទង្គិចជាមួយអ្នកគ្រប់គ្រងនៅរោងចក្រស្បែកជើងមួយក្នុងខេត្តកំពង់ចាមកាលពីព្រឹកម្សិលមិញ ដោយធ្វើឲ្យអ្នកគ្រប់គ្រងជនជាតិតៃវ៉ាន់ យ៉ាងតិចចំនួនពីរនាក់បានរងរបួសក្បាល។
កម្មករប្រហែល២.០០០នាក់ ដែលត្រូវបានបណ្តេញចេញពីរោងចក្រស្បែកជើង Juhui នៅក្នុងស្រុកជើងព្រៃ កាលពីខែមុនជុំវិញការតវ៉ា ដែលបានបន្តអស់រយៈពេលជាងមួយខែមកនេះបាននាំគ្នាសម្រុកចូលទៅក្នុងរោងចក្រ ហើយចាប់ផ្តើមគប់ដុំថ្មដាក់អ្នកគ្រប់គ្រងជនជាតិតៃវ៉ាន់មុនពេលកងសន្តិសុខធ្វើអន្តរាគមន៍។
យោងតាមលោក ខុន ខូយ អ្នកឃ្លាំមើលនៅអង្គការសិទ្ធិមនុស្សលីកាដូប្រចាំខេត្តកំពង់ចាមបានឲ្យដឹងថា នៅម៉ោងប្រហែល៨ព្រឹក កម្មករបានសម្រុកចូលតាមច្រកទ្វារមួយ ដែលយាមដោយសន្តិសុខ ហើយបានចាប់ផ្តើមឈ្លោះប្រកែកជាមួយអតីតអ្នកគ្រប់គ្រងរបស់ខ្លួន។
លោក ខូយ បានមានប្រសាសន៍ថា “នៅក្នុងបរិវេណរោងចក្រពួកគាត់បានឈ្លោះប្រកែកពាក្យសម្តីជាមួយអ្នកគ្រប់គ្រងជនជាតិតៃវ៉ាន់។ កងរាជអាវុធហត្ថ និងនគរបាលបង្ក្រាបបាតុកម្មប្រហែល១០០នាក់បានទៅការពារនៅជុំវិញការិយាល័យរបស់អ្នកគ្រប់គ្រងរោងចក្រ និងបរិវេណរោងចក្រ ដើម្បីរារាំងកុំឲ្យកម្មករតវ៉ា និងគប់ដុំថ្ម”។
សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (សីុខៅឌូ) បានរៀបចំកូដកម្មនៅរោងចក្រចាប់តាំងពីថ្ងៃទី១ ខែកញ្ញាមកម្លេ៉ះ នៅពេលកម្មករចំនួនប្រមាណ៥.០០០នាក់បានដើរចេញពីការងារជុំវិញការទាមទារចំនួន១៥ចំណុចរបស់ខ្លួន។
កាលពីថ្ងៃទី១៦ ខែកញ្ញា អ្នកគ្រប់គ្រងរោងចក្រស្បែកជើង Juhui បានបណ្តេញកម្មករពីការងារដោយសារពួកគាត់បដិសេធមិនព្រមគោរពតាមសេចក្ដីបង្គាប់របស់តុលាការ ដែលបង្គាប់ឲ្យពួកគាត់បញ្ឈប់ការតវ៉ា ហើយត្រឡប់មកធ្វើការងារវិញ ប៉ុន្តែ បានទទួលកម្មករប្រហែល៣.០០០នាក់ឲ្យធ្វើការវិញ បន្ទាប់ពីពិធីបុណ្យភ្ជុំបិណ្ឌត្រូវបានបញ្ចប់កាលពីខែមុន។
សមាជិកស៊ីខៅឌូ បានលើកឡើងថា ពួកគាត់ត្រូវបានបណ្តេញចេញពីការងារដោយសារទំនាក់ទំនងរបស់ពួកគាត់ជាមួយសហជីព។
ហែល សុខលីន អាយុ២៣ឆ្នាំ ជាកម្មករនៅរោងចក្រស្បែកជើង Juhui ដែលបានចូលរួមការតវ៉ាកាលពីម្សិលមិញ បាននិយាយថា សមាជិកសហជីពដែលត្រូវគេបណ្តេញពីការងារលែងមានការអត់ធ្មត់ទៀតហើយ។ សុខលីន បាននិយាយថា “កម្មករលែងខ្វល់ទៀតហើយប្រសិនបើមានអំពើហិង្សានោះ ព្រោះរោងចក្របានរំលោភច្បាប់ការងារ។ យើងគ្រាន់តែទាមទារប្រាក់ឧបត្ថម្ភ និងផលប្រយោជន៍ផ្សេងៗប៉ុណ្ណោះ ប៉ុន្តែ ពួកគេបានបណ្តេញយើងចេញពីការងារ ហើយបានរារាំងមិនឲ្យសមាជិកស៊ីខៅឌូ ធ្វើការនៅរោងចក្រវិញឡើយ”។
សុខលីន បានទទួលស្គាល់ថា កម្មករពិតជាបានគប់ដុំថ្មដាក់អ្នកគ្រប់គ្រងរោងចក្រមែន ប៉ុន្តែ បានអះអាងថា វាគ្រាន់តែជាការការពារខ្លួនប៉ុណ្ណោះ ព្រោះអ្នកគ្រប់គ្រងជនជាតិតៃវ៉ាន់ម្នាក់បានវាយមកលើពួកគាត់មុន ដោយទះកំផ្លៀងកម្មការិនីម្នាក់។ សុខលីន បាននិយាយបន្តថា “កម្មករបាននាំគ្នាព័ទ្ធអ្នកគ្រប់គ្រងជនជាតិតៃវ៉ាន់នៅពេលកម្មករម្នាក់ស្រែកថា ចិនកំពុងវ៉ៃខ្មែរ”។ សុខលីន ក៏បានលើកឡើងដែរថា កម្មករមួយចំនួនបានបិទផ្លូវទៅកាន់រោងចក្រ ដែលរារាំងមិនឲ្យរថយន្តសង្គ្រោះបន្ទាន់ចូលទៅដឹកអ្នកគ្រប់គ្រងរោងចក្រដែលរងរបួស។ លោក ជឹម សេងហុង ស្នងការរងនគរបាលខេត្តបានឲ្យដឹងថា ប្រសិនបើកងសន្តិសុខមិនបានធ្វើអន្តរាគមន៍ទេនោះ អំពើហិង្សានឹងកើតឡើងកាន់តែខ្លាំង។
លោកបានមានប្រសាសន៍ថា “អំឡុងការប៉ះទង្គិចគ្នារវាងកម្មករ និងរោងចក្រ អ្នកគ្រប់គ្រងរោងចក្រតៃវ៉ាន់ពីរនាក់បានរងរបួសក្បាល ប៉ុន្តែ ពួកគេមិនបានទទួលការព្យាបាលត្រឹមត្រូវទេ គឺបានត្រឹមតែរុំរបួសប៉ុណ្ណោះ”។ លោកបានបន្ថែមថា នគរបាលមិនបានចាប់ខ្លួននរណាម្នាក់ទេ។ លោកបានមានប្រសាសន៍បន្តថា “មានមនុស្សជាច្រើនដែលយើងមិនស្គាល់ថា នរណាជាអ្នកគប់ដុំថ្មនោះឡើយ”។
លោក ឃុន សុខុម បុគ្គលិកស៊ីខៅឌូ ដែលអង្កេតការតវ៉ាក្នុងខេត្តកំពង់ចាមកាលពីម្សិលមិញ បានឲ្យដឹងថា កម្មការិនីយ៉ាងតិចបួននាក់ ក៏បានរងរបួសស្រាលត្រង់ក្បាល និងមុខដែរ។
លោក ហេត ហ៊ុន តំណាងស៊ីខៅឌូ នៅរោងចក្រនេះបានលើកឡើងថា អំពើហិង្សាកើតឡើង គឺដោយសារតែអ្នកគ្រប់គ្រងរោងចក្រ “មើលងាយ” កម្មករ។ លោកបាននិយាយថា “នៅពេលកម្មករចូលទៅក្នុងរោងចក្រ អ្នកគ្រប់គ្រងជនជាតិតៃវ៉ាន់បានចាប់ក្របួចកអាវរបស់កម្មការិនីម្នាក់ ហើយទះកំផ្លៀងនាង ដោយធ្វើឲ្យកម្មករផ្សេងទៀតផ្ទុះកំហឹង”។
លោក ចេង ហៀង ប្រធានមន្ទីរការងារខេត្តបានឲ្យដឹងថា បន្ទាប់ពីការតវ៉ាបានបញ្ចប់មន្ទីររបស់លោកបានសម្របសម្រួលឲ្យមានការចរចារវាងតំណាងសហជីព និងរោងចក្រ ប៉ុន្តែ ថា នៅមិនទាន់មានដំណោះស្រាយនៅឡើយទេ។
លោកបានមានប្រសាសន៍ថា “ភាគីទាំងពីរបានឯកភាពបន្តការចរចាម្តងទៀតនៅរោងចក្រនៅថ្ងៃទី១០ ខែតុលា។ សមាជិកសហជីពបានយល់ព្រមបញ្ឈប់ការតវ៉ារហូតដល់ថ្ងៃនោះ ហើយរោងចក្របានយល់ព្រមមិនបង្ខំឲ្យកម្មករ ដែលខ្លួននៅជួលនៅឡើយនោះឲ្យមកធ្វើការឡើយ”។ តំណាងរោងចក្រស្បែកជើង Juhui មិនអាចទាក់ទងសុំការធ្វើអត្ថាធិប្បាយបានទេ៕ស៊ុយឈាង