26 C
Phnom Penh

ក្រុម​អ្នក​តវ៉ា​ទាម​ទារ​ឲ្យ​​រដ្ឋាភិបាល​បញ្ចប់​ការ​បណ្ដេញ​ចេញ​ អំឡុង​ទិវា​លំនៅ​ដ្ឋាន​ពិភព​លោក​

ដោយ ឌឹ ខេមបូឌា ដេលី

បទវិភាគ

អ្នក​តវ៉ា​ជាង​១.៥០០​នាក់​​មកពី​ទូទាំង​ប្រទេស​ បាន​ប្រារព្ធ​ទិវា​លំនៅ​ដ្ឋាន​ពិភព​លោក​របស់​អង្គការ​សហប្រជាជាតិ​នៅ​ក្នុង​រាជ​ធានី​ភ្នំពេញ​កាលពី​ម្សិលមិញ ដោយ​ហែក្បួន​ទាម​ទារ​ឲ្យ​រដ្ឋាភិបាល​បញ្ឈប់​ការ​បណ្ដេញ​ចេញ​ពី​ដីធ្លី និង​ផ្ទះ​សំបែង ហើយ​ផ្ដល់​សំណង​សមរម្យ​ដល់​​អ្នក​ដែល​ត្រូវ​បាន​បណ្ដេញ​ចេញ​រួច​​ហើយ។front

ក្រុម​នេះ​បាន​ប្រមូល​ផ្ដុំគ្នា​កាលពី​ព្រឹក​​ម្សិលមិញ​នៅ​អតីត​​តំបន់​ដីក្រហម​​ក្នុង​ខណ្ឌ​ចំការ​មន ទីដែល​ការ​បណ្ដេញ​ចេញ​ដ៏​ហិង្សា​បំផុត​មួយ​នៅ​ក្នុង​ប្រវត្តិសាស្ត្រ​ថ្មីៗ​នេះ​របស់​រាជ​ធានី​ភ្នំពេញ ​បាន​កើត​ឡើង​កាលពី​ឆ្នាំ​២០០៩។

បន្ទាប់ពី​ព្រះសង្ឃ និង​សកម្មជន​ថ្លែង​សុន្ទរកថា​រួច ក្រុម​អ្នក​តវ៉ា​បាន​សែង​ផ្ទះ​ឈើ​តូច​មួយ ហើយ​ដឹក​នាំ​ការ​តវ៉ា​តាម​ផ្លូវ​​ឆ្ពោះ​ទៅ​រដ្ឋសភា​​ដើម្បី​ដាក់​ញត្តិ​។ បន្ទាប់​ពី​​ស្រែក​នៅ​ខាង​ក្រៅ​រដ្ឋសភា​អស់​​រយៈ​ពេល​បី​ម៉ោង​​ តំណាង​ប្រាំបី​នាក់​ត្រូវ​បាន​អនុញ្ញាត​ឲ្យ​ចូល​ទៅ​ខាង​ក្នុង​​ដើម្បី​ដាក់​ញត្តិ​ជូន​តំណាង​រាស្ត្រ​បួន​រូប​ដូច​ជា លោក​ស្រី កែ​ សុវណ្ណរតន៍ លោក អេង ឆៃអ៊ាង និង​លោក ចាន់ ចេង មក​ពី​គណបក្ស​សង្គ្រោះ​ជាតិ និង​លោកស្រី​ ឡោ ខេង មក​ពី​គណបក្ស​ប្រជា​ជន​កម្ពុជា។​​

តំណាង​ម្នាក់​ឈ្មោះ ឡុង ចណ្ឌី បាន​និយាយ​បន្ទាប់​ពី​ចេញ​មក​ផ្លូវ​វិញ​​ថា ” យើង​បានជួប​តំណាង​រាស្ត្រ​បួន​រូប ហើយ​ពួកគាត់​បាន​សន្យា​ស្វែង​រក​ដំណោះ​ស្រាយ​អំឡុង​សម័យ​ប្រជុំ​សភាលើក​ក្រោយ​”។

អ្នក​តវ៉ា​ម្នាក់​ឈ្មោះ ហ៊ុយ យ៉ារុំ អាយុ​៥៦​ឆ្នាំ មក​​ពី​សហគមន៍​បឹង​កក់ ដែល​ត្រូវ​បាន​​បណ្ដេញ​ចេញ​​​​និយាយ​ថា អ្នកស្រី​​មិន​រំពឹង​ថា ការ​តវ៉ា​​​ឬការ​ដាក់​ញត្តិ​​នឹង​មិន​ទទួល​បាន​ផល​ច្រើនឡើយ​។ អ្នកស្រី​និយាយ​ទៀត​ថា ” តំណាង​រាស្ត្រ​បាន​សន្យា​ដោះ​ស្រាយ​បញ្ហា​​នេះ​ឲ្យ​ពួកយើង​។ ខ្ញុំ​មិន​ជឿ​ពួកគាត់​ទេ ប៉ុន្តែ​យើង​ត្រូវ​តែ​ព្យាយាម​ ពីព្រោះ​យើង​គ្មាន​ផ្ទះ​សំបែង​”។habitat

ខណៈ​ពេល​ក្រុម​អ្នក​តវ៉ា​បន្ត​ដើរ​ឆ្ពោះ​ទៅ​តាម​ផ្លូវ​លេខ​៧​ ដើម្បី​ដាក់​ញត្តិ​មួយ​ទៀត​នៅ​ខុទ្ទកាល័យ​របស់​លោក​នាយក​រដ្ឋមន្ត្រី ហ៊ុន សែន ក្រុម​នេះ​ត្រូវ​បាន​រារាំង​ដោយ​របាំងបិទ​​ផ្លូវ​ ដែល​សន្តិសុខ​ជាង​១០​នាក់​បាន​ដាក់​។ ​បន្ទាប់​ពី​ឈរ​នៅ​ចំណុច​របាំង​ដែក​បិទ​​ផ្លូវ​អស់​រយៈ​ពេល​មួយ​ម៉ោង អ្នក​តវ៉ា​ទាំង​នេះ​បាន​​ប្រគល់​​ញត្តិ​ឲ្យ​លោក គង់ ចំរើន ដែល​ជា​មន្ត្រី​ខុទ្ទកាល័យ​ និង​លោក ឃួង ស្រេង អភិបាល​រង​រាជ​ធានី​ភ្នំពេញ​ ហើយ​ក៏​​បាន​បញ្ចប់​ការ​ហែក្បួន​នេះ​។

ក្នុង​រយៈ​ពេល​២០​ឆ្នាំ​កន្លង​មក​នេះ ១០ភាគរយ​នៃ​ប្រជា​ពល​រដ្ឋ​រស់​នៅ​ក្នុង​រាជ​ធានី​ភ្នំពេញ​ ឬ​ប្រហែល​២០០.០០០​នាក់​ត្រូវ​បាន​បណ្ដេញ​ចេញ​ នេះ​បើ​យោង​តាម​ការ​ឲ្យ​ដឹង​ពី​លោក សៀ ភារម្យ នាយក​អង្គការ​ក្រុម​ការ​ងារ​​សិទ្ធិ​លំនៅដ្ឋាន ជា​អង្គការ​មួយ​ក្នុង​ចំណោម​អង្គការ​ចំនួន​១១២​​ដែល​បាន​​​ចូល​រួម​ពាក់​ព័ន្ធ​​​នៅ​ក្នុង​ការ​ហែក្បួន​កាលពី​ម្សិលមិញ​។ លោក​បាន​មាន​ប្រសាសន៍​ទៀត​ថា ប្រជា​ពល​រដ្ឋ​ចំនួន​៧០០.០០០​នាក់​ផ្សេង​ទៀត​នៅ​ទូទាំង​ប្រទេស​​ ត្រូវ​បាន​បណ្ដេញ​ចេញ​ពី​ផ្ទះ​សំបែង​ឬ​ដីធ្លី​របស់​ពួកគេ​​ដោយ​ការ​បង្ខិត​បង្ខំ​៕ សុខុម​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស