កាលពីម្សិលមិញ អ្នកជាតិនិយម ដែលតវ៉ាប្រឆាំងនឹងការលើកឡើងរបស់មន្ត្រីស្ថានទូតវៀតណាមពាក់ព័ន្ធនឹងការប្រគល់ទឹកដីកម្ពុជាក្រោមទៅឲ្យប្រទេសវៀតណាមបានបន្តការតវ៉ារបស់ខ្លួនក្នុងរាជធានីភ្នំពេញដោយដាក់ញត្តិជូនអង្គការសហប្រជាជាតិ និងរដ្ឋសភា។
អំឡុងកិច្ចសម្ភាសតាមវិទ្យុកាលពីខែមិថុនា អ្នកនាំពាក្យស្ថានទូតវៀតណាមម្នាក់បានជំទាស់នឹងការអះអាងដែលថា ទឹកដីកម្ពុជាក្រោមជារបស់ប្រទេសកម្ពុជាមុនពេលប្រទេសបារាំងកាត់ទៅឲ្យវៀតណាមក្នុងឆ្នាំ១៩៤៩។
អ្នកតវ៉ាចង់ឲ្យប្រទេសវៀតណាមសុំទោស ហើយអ្នកតវ៉ាប្រហែល១០០នាក់ក្នុងចំណោមពួកគេបានដាក់ញត្តិជូនអង្គការសហប្រជាជាតិ និងរដ្ឋសភាកាលពីម្សិលមិញ ដោយស្នើសុំឲ្យមានការជួយគាំទ្រដល់ការអះអាងដែលថា បើតាមប្រវត្តិសាស្ត្រទឹកដីកម្ពុជាក្រោមគឺជារបស់កម្ពុជានោះ។
នៅឯរដ្ឋសភាអ្នករៀបចំការតវ៉ាប្រហែល១០នាក់ត្រូវបានអញ្ជើញឲ្យចូលក្នុងរដ្ឋសភាជាទីដែលពួកគេបាននិយាយថា ខ្លួនបានជួបជាមួយអ្នកនាំពាក្យរដ្ឋសភា គឺលោក ឈាង វុន ។ លោក ឃុន ខេមរិន្ទ អ្នករៀបចំការតវ៉ាម្នាក់បាននិយាយថា ខ្លួនបានស្នើឲ្យលោក ឈាង វុន ទៅនិយាយជាមួយស្ថានទូតវៀតណាម ដើម្បីឲ្យសុំទោស ប៉ុន្តែ គ្មានបានផលនោះទេ។
លោក ខេមរិន្ទ បាននិយាយថា “លោក ឈាង វុន បានប្រាប់យើងថា លោកគ្មានសមត្ថភាពក្នុងការកោះហៅលោក ហ៊ោ ណាំហុង រដ្ឋមន្ត្រីក្រសួងការបរទេសមកសាកសួរនោះទេហើយថា ប្រសិនបើរដ្ឋាភិបាលស្នើសុំឲ្យមន្ត្រីយួនសុំទោសជាសាធារណៈ វានឹងធ្វើឲ្យខូចទំនាក់ទំនងជាយូរមកហើយរវាងខ្មែរ និងយួន”៕ស៊ុយឈាង