35 C
Phnom Penh

តំណាង​រោងចក្រ​កាត់​ដេរ​និយាយ​ថា ការ​ពន្យារពេល​បោះ​ឆ្នោត​អនុម័ត​ប្រាក់ខែ​គោល​ នឹង​មិន​អាច​ជួយ​អ្វី​បាន​ទេ

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ តំណាង​​មួយ​រូប​ដែល​តំណាង​ឲ្យ​រោងចក្រ​កាត់​ដេរ​នានា​នៅ​ក្នុង​ប្រទេស​កម្ពុជា ​បាន​លើក​ឡើង​ថា សេចក្ដី​សម្រេច​នៅ​នាទី​ចុង​ក្រោយ​​របស់​រដ្ឋាភិបាល​​ដើម្បី​ពន្យារពេល​បោះ​ឆ្នោត​សម្រេច​លើប្រាក់​ខែ​គោល​ថ្មី​សម្រាប់​វិស័យ​កាត់​ដេរ​ ទំនង​ជាមិន​អាច​ដោះ​ស្រាយ​បញ្ហា​រវាង​រោងចក្រ​ និង​សហជីព​បានឡើយ​ ហើយ​​វា​ប្រាកដ​ជា​អាច​ធ្វើ​ឲ្យ​ប៉ះពាល់​ដល់​ឧស្សាហកម្ម​នេះតាម​រយៈ​ការ​ធ្វើ​ឲ្យ​​ក្រុម​ហ៊ុន​បញ្ជា​ទិញ​នានា​បាត់​បង់​​​ទំនុក​ចិត្ត​លើ​ប្រទេស​នេះ​។

គណៈកម្មាធិការ​ប្រឹក្សា​ការ​ងារ​ ដែល​មាន​សមាសភាព​តំណាង​មក​ពី​រដ្ឋាភិបាល​ រោងចក្រ និង​សហជីព​នានា​ គ្រោង​នឹង​បោះ​ឆ្នោត​​នៅ​ថ្ងៃ​សុក្រ​នេះ​ដើម្បី​សម្រេច​ថា តើ​ត្រូវ​ដំឡើង​ប៉ុន្មាន​លើ​ប្រាក់​ខែ​គោល​១០០ដុល្លារ​នាពេល​បច្ចុប្បន្ន​។ ប៉ុន្តែ​​​នៅ​ក្នុង​ចំណាត់​ការ​មួយ​ដែល​បាន​ធ្វើ​ឲ្យ​ម្ចាស់​រោងចក្រ​កាន់​តែ​មាន​ការ​ភ្ញាក់​ផ្អើល​ជាង​នេះ​ទៀត​នោះ គឺ​ក្រសួង​ការ​ងារ​បាន​ប្រកាស​កាលពី​ថ្ងៃ​ច័ន្ទ​ថា គណៈកម្មាធិការ​នេះ​នឹង​​កោះ​ប្រជុំ​នៅ​ពេល​ណាមួយ​ក្នុង​ខែ​វិច្ឆិកា ​”ដើម្បី​ឲ្យ​ភាគី​ពាក់​ព័ន្ធ​មាន​ពេល​វេលា​គ្រប់​គ្រាន់​​សម្រាប់​ពិភាក្សា​ និង​ពិចារណា​ឲ្យ​បាន​គ្រប់​ជ្រុង​ជ្រោយ​ដើម្បី​ឈាន​ទៅ​ដល់​​ការ​ឯកភាព​គ្នា​មួយ​ ដែលភាគី​​ទាំង​អស់​អាច​ទទួល​យក​បាន”។

ប៉ុន្តែ​លោក កែន លូ អគ្គលេខាធិការ​​សមាគម​រោងចក្រ​កាត់​ដេរ​នៅ​កម្ពុជា (GMAC) បាន​មាន​ប្រសាសន៍​ថា ” គ្មាន​ផ្លូវ​​” ដែល​រោងចក្រ​ និង​សហជីព​ព្រមព្រៀង​គ្នា​ឡើយ​​ចំពោះ​ចំនួន​ប្រាក់​ខែ​គោលថ្មី​​ដែល​ត្រូវ​ដំឡើង​​ និង​ការ​ពន្យារ​ពេល​នេះ។​ ​បណ្តា​សហជីព​កំពុង​ជំរុញ​ឲ្យ​ដំឡើង​៧៧​ដុល្លារ​លើ​ប្រាក់​ខែ​គោល​បច្ចុប្បន្ន ចំណែក​ឯ​រោងចក្រ​ចង់​ដំឡើង​តែ​១០ដុល្លារ​ប៉ុណ្ណោះ​។

លោកបាន​មាន​ប្រសាសន៍​ទៀត​ថា “វា​អាស្រ័យ​លើ​ភាគីនីមួយៗថា តើ​ត្រូវធ្វើ​យ៉ាង​ណា​អំឡុង​ពេល​នេះ​។ បើ​យើង​មិន​ធ្វើ​អ្វី​សោះ​ តើ​​វា​ជួយ​ម៉េច​នឹង​បាន​? ឬ​ក៏​យើងទាំង​គ្នា​​មកជួប​គ្នា​​និយាយ​រឿង​ដដែល​ៗ​ម្ដង​ហើយ​ម្ដង​ទៀត​?”។

លើក​ឡើង​​ពី​បទ​ពិសោធ​កន្លង​មក​ និង​​ឥរិយាបថ​នៃការ​ចរចា​នាពេល​បច្ចុប្បន្ន លោក កែន​ លូ បាន​មាន​ប្រសាសន៍​ថា លោក​មិន​រំពឹង​ថា​ទទួល​បាន​ជោគ​ជ័យ​ទេ​​។ ប្រសិន​បើ​​​​អ្វី​ដែល​លោក​បាន​លើក​ឡើង​ជា​ការពិត​មែន​នោះ គណៈកម្មាធិការ​ប្រឹក្សា​ការ​ងារ​នឹង​បោះ​ឆ្នោត​ជា​សម្ងាត់​នៅ​ខែ​វិច្ឆិកា ហើយ​ក្រសួង​ការ​ងារ​នឹង​យក​ចំនួន​​ដែល​ត្រូវ​ដំឡើង​នោះ​ទៅ​ពិចារណា​ ហើយ​កំណត់​ប្រាក់​ខែ​គោល​ថ្មី​ ដែល​នឹង​ចូល​ជា​ធរមាន​នៅ​ខែ​មករា។

លោក កែន លូ បាន​មាន​ប្រសាសន៍​ថា ចំណាត់​ការ​ដ៏​គួរ​ឲ្យ​ភ្ញាក់ផ្អើល​របស់​រដ្ឋាភិបាល​​ក្នុង​ការ​ពន្យារ​ពេល​សេចក្ដី​សម្រេច​ មិន​អាច​ជួយ​ដោះ​ស្រាយ​បញ្ហា​បាន​ឡើយ ពោល​គឺ​បាន​ត្រឹម​តែ​​បន្ថែម​អ្វី​ដែល​ក្រុម​ហ៊ុន​បញ្ជា​ទិញ​ស្អប់​បំផុត​ប៉ុណ្ណោះ​ទៅវិញ​ទេ​ នោះ​គឺ​ភាព​មិន​ប្រាកដ​ប្រជា​។

លោក​បាន​មាន​ប្រសាសន៍​ទៀត​ថា ” តម្លៃ​ យើង​តែង​តែ​អះអាង​ថា វា​ជា​កត្តា​មួយ​ក្នុង​ចំណោម​​កត្តា​សំខាន់ៗ​បំផុត​ ហើយ​វា​ជា​ការ​ពិត​។ ប៉ុន្តែ​មុន​ពេល​ក្រុម​ហ៊ុន​បញ្ជា​ទិញ​អាច​ពិចារណា​តម្លៃ​របស់​អស់​លោក​​បាន​ ពួកគេ​ចាំបាច់​ត្រូវ​មានទំនុក​ចិត្ត​ថា យើង​អាច​ប្រគល់​ទំនិញ​បាន​។ ប្រសិន​បើ​ពួកគេ​គ្មាន​ទំនុក​ចិត្ត​លើ​ការ​សន្យា​របស់​យើង​ក្នុង​ការ​ការ​ពារ​កិច្ច​សន្យា​​ទេ យើង​អាច​នឹង​ថោក​​ដូច​អស់​លោក​​ចង់​បាន​។ ហើយ​អស់​លោក​​ពន្យារ​ពេល​កាន់​តែ​យូរ បើ​អស់​លោក​គ្មាន​​ផែនការ​ច្បាស់​ទេ​ វា​នឹង​បង្ក​ឲ្យ​មាន​​ភាព​មិន​ប្រាកដ​ប្រជា​បន្ថែម​ទៀត​”។

លោក កែន លូ បាន​មាន​ប្រសាសន៍​ថា ប្រសិន​បើ​​មាន​អ្នក​ផ្លាស់​ប្ដូរ​ចិត្ត​គំនិត​ គឺមិន​មែន​រោងចក្រ​​ជា​អ្នក​ផ្លាស់​ប្ដូរ​ឡើយ។ លោក​​លើកឡើង​ថា និយោជក​នៅ​តែ​ប្រកាន់​​យក​​ការ​ដំឡើង​១០​ដុល្លារ ពីព្រោះ​​វា​ជា​ចំនួន​ដែល​ពួកគេ​ទាំង​អស់​សុទ្ធ​តែ​អាច​មាន​លទ្ធភាព​។

ចំណូល​នាំចេញ​ក្នុង​​វិស័យ​​កាត់​ដេរ​​សម្រាប់​ឆមាស​ទី១​ដើម​ឆ្នាំ​២០១៤​នេះ បាន​កើន​ឡើង​​ឆ្នាំ​ធៀប​ឆ្នាំ​។ ប៉ុន្តែ​ GMAC និយាយ​ថា ការ​ស្ទង់​មតិ​មួយ​​ធ្វើ​ឡើង​នៅ​ពេល​ថ្មីៗ​នេះ​លើ​​សមាជិក​ប្រហែល​ពាក់​កណ្ដាល​ក្នុង​ចំណោម​រោងចក្រ​​ជាសមាជិក​ប្រហែល​៦០០​ បាន​រក​ឃើញ​ថា រោងចក្រ​ជា​សមាជិក​ជាច្រើន​​បាន​ចាប់​ផ្ដើម​រង​ផល​ប៉ះពាល់​​ដោយ​សារ​​ការ​ធ្លាក់​ចុះ​ការ​បញ្ជា​ទិញ​ពី​ក្រុម​ហ៊ុន​បញ្ជា​ទិញ​សូម្បី​នៅ​ដំណាក់​កាល​ប្រាក់​ខែ​គោល​នាពេល​បច្ចុប្បន្ន​ក្តី​។

លោក កែន លូ បាន​មាន​ប្រសាសន៍​ថា “សូម្បី​តម្លៃ​បច្ចុប្បន្ន ហេតុ​អ្វី​បាន​ជា​រោងចក្រ​​គ្មាន​សមត្ថភាព​ពេញ​លេញ​? ដោយ​សារ​តែ​ពួកគេ​មិន​ទទួល​បាន​ការ​បញ្ជា​ទិញ​។ យើង​មិន​ទាំង​អាច​បំពេញ​​​បាន​​ផង​នៅ​កម្រិត​បច្ចុប្បន្ន ដូច្នេះ​​​ស្រមៃ​​ទៅ​មើល​ថា តើ​វា​នឹង​ទៅ​ជាយ៉ាង​ណា​​បើ​​ដំឡើង​បន្ថែម​ទៀត​?”។

បណ្ដា​សហជីព​ដែល​កំពុង​ជំរុញ​ឲ្យ​ដំឡើង​៧៧​ដុល្លារ​​លើ​ប្រាក់​ខែ​គោល​បច្ចុប្បន្ន​លើក​ឡើង​ថា ការ​ព្រមាន​ស្រដៀង​គ្នា​នាពេល​កន្លង​មក​ មិន​ដែល​ចេញជា​លទ្ធផល​ពិត​ប្រាកដ​ទេ​។ ពួកគេ​និយាយ​ថា រោងចក្រ​អាច​មាន​លទ្ធភាព​ដំឡើង​ប្រាក់​ខែ​គោល​ ហើយគួរ​តែ​​​តម្រូវ​ឲ្យ​​ពួកគេដំឡើង​។ ក្រុម​ហ៊ុន​សម្លៀកបំពាក់​មួយ​ចំនួន​ថែម​ទាំង​បាន​ស្ម័គ្រ​ចិត្ត​ដំឡើង​ថ្លៃ​ទំនិញ​​​ទិញ​ពីរោងចក្រ​​ទៀត​ផង​ដើម្បី​ឲ្យ​រោងចក្រ​​ទាំង​នោះ​ទទួល​យក​​ការ​​ដំឡើង​ប្រាក់​ខែ​គោល ប៉ុន្តែ​រោងចក្រ​ភាគ​ច្រើន​មិន​បាន​ធ្វើ​ដូច្នេះ​​ទេ​។

ប្រតិកម្ម​របស់​សហជីព​ចំពោះ​សេចក្ដី​សម្រេច​របស់​ក្រសួង​ការ​ងារ​ក្នុង​ការពន្យារ​ពេល​បោះ​ឆ្នោត​សម្រេច​លើ​ប្រាក់​ខែ​គោល​ថ្មី​​នេះ​ មាន​ចម្រុះ​គ្នា​។

លោក អាត់ ធន់ ដែល​ជា​សមាជិក​គណៈកម្មាធិការ​ក្រុម​ប្រឹក្សា​ការ​ងារ​ និង​ជា​ប្រធាន​សហ​ជីព​ឯករាជ្យ​ធំ​បំផុត​​​នៅ​កម្ពុជា បាន​ស្វាគមន៍ការ​ពន្យារ​ពេល​នេះ​។ លោក​មាន​ប្រសាសន៍​ថា ការ​ចរចា​ចំនួន​ពីរ​លើក​មុន​រវាង​ភាគី​ទាំង​បី​ គឺ​មិន​​គ្រប់​គ្រាន់​​​ និង​មិន​ទាន់​ទទួល​បាន​​សេច​ក្តី​លម្អិត​ស្តីពីគោល​ជំហរ​របស់​ភាគី​នីមួយ​ៗ​​នៅឡើយ​ទេ ហើយ​សង្ឃឹម​ថា ពេល​វេលា​បន្ថែម​ទៀត​នឹងធ្វើ​ឲ្យ​មាន​ការ​ខុស​ប្លែក ប៉ុន្តែ​លោក​នៅ​តែ​បដិសេធ​មិន​ពិចារណា​ប្រាក់​ខែ​គោល​ថ្មី​ណាមួយ​ ដែល​មាន​ចំនួន​តិច​ជាង​១៥០​ដុល្លារ​ឡើយ​។

លោក​បាន​មាន​ប្រសាសន៍​​ទៀត​ថា ” ប្រសិន​បើ​ពួកគេ​នៅ​តែ​ធ្វើ​សេចក្ដី​សម្រេច​នៅ​ថ្ងៃ​ទី១០ ខែ​តុលា មុខ​ជា​​មាន​ការ​តវ៉ា និង​អំពើ​ហិង្សា ពីព្រោះ​មានការ​ចរចា​តែ​ពីរ​លើក​ប៉ុណ្ណោះ ហើយ​យើង​មិន​ទាន់​បានពិភាក្សា​អំពី​សេចក្ដី​លម្អិត​នៅ​ឡើយ​ទេ ហើយ​យើង​ឮថា ប្រាក់​ខែ​គោល​[ថ្មី] ទាប។ យើង​សង្ឃឹម​ថា ពេល​នេះ​ សហជីព​ និយោជក និង​ក្រសួង​​នឹង​មាន​ពេល​វេលា​បន្ថែម​ទៀត​​ដើម្បី​ពិភាក្សា​ និង​ស្វែង​រក​ដំណោះ​ស្រាយ​មួយដែល​អ្នក​គ្រប់​គ្នា​អាច​ទទួល​យក​បាន​”។

សហជីព​ចំនួន​​ប្រាំមួយ​បាន​ជូន​ដំណឹង​ទៅ​សាលា​រាជ​ធានី​ភ្នំពេញ​កាលពី​ម្សិលមិញ​ថា ខ្លួន​មាន​បំណង​ធ្វើ​ពិធី​ជួបជុំ​មួយ​​នៅ​ទីលាន​ប្រជា​ធិបតេយ្យ ហើយ​ហែក្បួន​នៅ​ក្នុង​រាជ​ធានី​នៅ​ថ្ងៃ​អាទិត្យនេះ​ ជាមួយ​​សមាជិក​រហូត​ដល់​ទៅ​៣.០០០​នាក់ ដើម្បី​ដាក់​សម្ពាធ​ឲ្យ​រដ្ឋាភិបាល រោងចក្រ​ និង​ក្រុមហ៊ុន​បញ្ជា​ទិញ​បំពេញ​តាម​ការ​ទាម​ទារ​ដំឡើង​ប្រាក់​ខែ​គោល​របស់​ខ្លួន​​។

លោក ឡុង ឌីម៉ង់ អ្នក​នាំពាក្យ​សាលា​រាជ​ធានី​​មាន​ប្រសាសន៍​ថាទទួល​បាន​សេចក្ដី​ជូន​ដំណឹង​នេះ​ហើយ ហើយ​នឹង​​ប្រគល់​ជូនអភិបាល​រាជ​ធានី​៕ សុខុម​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស