26 C
Phnom Penh

អាជ្ញាធរ​រឹបអូស​ឈើ​ប្រណីត​ពី​បន្ទាយ​យោធា​ក្នុង​ខេត្ត​ក្រចេះ

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រី​បាន​និយាយ​កាលពី​ម្សិលមិញ​ថា អាជ្ញាធរ​ខេត្ត​ក្រចេះ​បាន​រកឃើញឈើ​ប្រណីត​​ជិត​៩០​ដុំ​កាលពី​យប់ថ្ងៃ​សៅរ៍ ដែល​គេ​គរ​ទុក​នៅខាង​ក្រៅបន្ទាយកង​យោពល​ខេមរ​ភូមិន្ទ​ក្នុង​ស្រុក​ឆ្លូង ដែល​គេ​ជឿ​ថា ឈើ​នេះ​បម្រុង​នឹង​ដឹក​ទៅ​ខេត្ត​ត្បូង​ឃ្មុំ​ទៅភាគ​ខាង​ត្បូង​។

លោក សោម សារិទ្ធ អភិបាល​ស្រុក​បាន​មាន​ប្រសាសន៍​ថា អាជ្ញាធរ​មូលដ្ឋាន​បាន​អមដំណើរ​នគរ​បាល កង​រាជអាវុធ​ហត្ថ និង​មន្ត្រី​រដ្ឋបាល​ព្រៃឈើ​ស្រុក​ទៅ​កាន់​បន្ទាយ​កង​យោធពល​ខេមរភូមិន្ទ​ក្នុង​ឃុំ​ឆ្លូង​កាលពី​យប់​ថ្ងៃសៅរ៍ ដោយ​ទទួល​បាន​ដំណឹង​​អំពី​ការ​គរ​ទុក​ឈើ​ខុស​ច្បាប់​នេះ។

លោក សារិទ្ធ បាន​មាន​ប្រសាសន៍​ថា “យើងបាន​ឃើញ​ឈើ​នេះនៅ​មុខ​បន្ទាយ​ទាហាន​ស្រុក​នៅ​ម៉ោង​ប្រហែល​១១​យប់ ហើយ​ក្រុម​របស់​យើង​បាន​ដឹក​ឈើ​នេះ​នៅ​យប់​ថ្ងៃ​ដដែល​ទៅការិយាល័យ​រដ្ឋបាល​​ព្រៃ​ឈើ​ស្រុក”។ លោក​បាន​បន្ថែម​ថា ឈើប្រភេទធ្នង់សរុប​៨៩​ដុំ​ត្រូវ​បានរឹប​អូស ដែល​មួយ​ដុំ​ៗ​មាន​ប្រវែង​ពី​បីទៅ​បួនម៉ែត្រ និង​មានមុខកាត់​២៥​ទៅ​៣០សង់ទីម៉ែត្រ សរុប​ចំនួន​​១៤​ម៉ែត្រ​គូប។

លោក សារិទ្ធ បានមាន​ប្រសាសន៍​ថា ឈើទាំង​នេះ​​ទំនង​ជា​ដឹក​តាមទូក​មក​​កាន់​បន្ទាយ​នេះ​តាម​ស្ទឹង​ឆ្លូង ហើយ​គ្រោង​នឹង​ដឹក​ទៅ​ស្រុក​តំបែរ ខេត្ត​ត្បូង​ឃ្មុំ​នៅ​យប់​នោះ​។ លោក​បាន​មាន​ប្រសាសន៍ថា ប៉ុន្តែ​ដោយ​សារ​អាជ្ញាធរ​មក​ដល់​កន្លែង​នោះ ​ គ្មាន​នរណា​ម្នាក់មក​យកឈើ​នេះ​ទេ។ លោក​បាន​មាន​ប្រសាសន៍​ថា “គ្មាន​នរណា​ម្នាក់ទាក់ទង​មកយើង ឬ​មកជួបយើង​ដើម្បីអះ​អាង​ពីភាព​ជា​ម្ចាស់​នៃ​ឈើ​នេះឡើយ​ ប៉ុន្តែ​ឈើ​នេះ​ត្រូវ​បាន​គរ​ទុក​នៅមុខ​បន្ទាយទាហាន​ត្រៀម​ដឹកចេញ​នៅអំឡុង​ពេលយប់”។

បើ​ទោះជា​កន្លែង​គរ​ឈើ​នោះ​នៅ​ក្បែរ​បន្ទាយ​កង​យោធពល​ភូមិន្ទ​ក៏ដោយ ក៏​លោក សយ សារិទ្ធ ​ប្រធាន​រដ្ឋបាល​ព្រៃឈើ​ខេត្ត​បាន​មាន​ប្រសាសន៍​ថា មិនមាន​ភ័ស្តុ​តាង​​គ្រប់​គ្រាន់​ដើម្បី​បន្ទោសមន្ត្រី​យោធា​ឡើយ​។ លោក​បានមាន​ប្រសាសន៍​ថា ” យើងមិន​ហា៊ន​សន្និដ្ឋាន​ថា ឈើ​នេះជា​របស់យោធា​ឡើយ…ពីព្រោះ​យើង​គ្មាន​ភ័ស្តុតាង​ដើម្បី​បង្ហាញ​ថា ពួកគេ​ជាប់ពាក់ព័ន្ធ​​”។

លោក សារិទ្ធ បាន​មាន​ប្រសាសន៍​ថា បន្ទាប់​ពីអាជ្ញាធរ​បាន​មក​ដល់​កន្លែង​នោះ​បន្តិច​មក​ លោក ប្រាក់ វណ្ណា មេបញ្ជាការ​រង​កង​យោធពល​ខេមរភូមិន្ទ​ស្រុក​បានលេចមុខ ហើយ​បាន​អះ​អាង​ថា ឈើ​នេះ​ជា​របស់​មន្ត្រី​កង​រាជ​អាវុធ​ហត្ថ​ម្នាក់ ឈ្មោះ ហេង គន្ធា។ លោក​បាន​មាន​ប្រសាសន៍​ថា “លោក​ វណ្ណា បាន​មក​ដល់​កន្លែង​នោះ​ ហើយ​បាន​ប្រាប់​យើង​ថា ឈើ​នេះជា​របស់​លោក គន្ធា ប៉ុន្តែ​យើង​មិន​ដឹង​ថា គា​ត់​ជា​នរណា​ឡើយ”។

លោក ខេង ទីតូ អ្នក​នាំពាក្យ​កង​រាជ​អាវុធ​ហត្ថ​លើ​ផ្ទៃ​ប្រទេស​បាន​មាន​ប្រសាសន៍​ថា លោក​មិន​​ស្គាល់​ឈ្មោះ​លោក ហេង គន្ធា ទេ​។

​លោក ទី សុវិនថាល់ ​ព្រះ​រាជ​អាជ្ញា​អម​សាលា​ដំបូង​ខេត្ត​​ដែល​បានអមដំណើរ​នគរ​បាល និង​មន្ត្រី​ក្នុង​មូលដ្ឋាន​ទៅ​កាន់​បន្ទាយ​នោះ​កាលពី​យប់​ថ្ងៃ​សៅរ៍ បានអះអាង​ថា លោក​ វណ្ណា បាន​មក​ដល់​នៅពេល​ឈើ​នេះ​ត្រូវ​បាន​​រឹប​អូស ប៉ុន្តែ​បាន​មាន​ប្រសាសន៍​ថា លោក​ទៅទីនោះ​ដើម្បី​ជួយ​តែ​ប៉ុណ្ណោះ។ លោក​បាន​មាន​ប្រសាសន៍​ថា ” ខ្ញុំ​ទទួល​ស្គាល់​ថា លោក វណ្ណា មាន​វត្តមាន​នៅ​កន្លែង​នោះ ប៉ុន្តែ​គាត់​មក​ជួយ​យើង​ និង​ផ្ដល់​រថយន្ត​ពីរ​គ្រឿងដើម្បី​ដឹកឈើ​នោះ​”។ គេ​មិនអាច​ទាក់​​ទង​លោក​ វណ្ណា បាន​ទេ​៕ សារុន​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស