32.1 C
Phnom Penh

អង្គការ​សង្គមស៊ីវិល​អំពាវនាវ​ឲ្យ​មាន​កា​រពិភាក្សា​លើកំណែទម្រង់​ការ​បោះឆ្នោត

ដោយ ឌឹ ខេមបូឌា ដេលី

បទវិភាគ

រយៈ​ពេល​ជាង​២ខែបន្ទាប់ពី​គណបក្ស​ប្រជា​ជន​កម្ពុជា និង​គណបក្ស​សង្គ្រោះជាតិ​បាន​ព្រម​ព្រៀង​ពិភាក្សា​អំពី​កំណែទម្រង់​ប្រព័ន្ធ​បោះ​ឆ្នោត​មក អង្គការ​សង្គម​ស៊ីវិល​ដែល​ធ្វើ​ការ​លើ​កំណែទម្រង់​បោះ​ឆ្នោត​នៅ​ក្នុង​ប្រទេស​កម្ពុជា​កាលពីម្សិលមិញ​បាន​អំពាវ​នាវ​ឲ្យ​មាន​​តម្លាភាព​បន្ថែម​ទៀត​នៅ​ក្នុង​ការ​ពិភាក្សា​រវាង​គណបក្ស​ទាំង​ពីរ​ខណៈដែល​ពួកគេ​លើកឡើង​អំពី​​ព័ត៌មាន​លម្អិត​នៃ​កិច្ច​ព្រមព្រៀង​កាលពី​ថ្ងៃទី​២២ ខែ​កក្កដា។

កាលពី​សប្ដាហ៍​មុន សមាជិក​សភា​បាន​បោះ​ឆ្នោត​ជា​ឯកច្ឆន្ទ​​ឲ្យ​មាន​ការ​​​ធ្វើ​វិសោធនកម្ម​រដ្ឋ​ធម្មនុញ្ញ ដែល​នឹង​ធ្វើ​ឲ្យ​គណៈកម្មាធិការ​ជាតិ​រៀបចំ​ការ​បោះ​ឆ្នោត (គ.ជ.ប.) ជា​ស្ថាប័ន​ដែល​មាន​ហិរញ្ញប្បទាន​ដោយ​ឯករាជ្យ និង​ស្វយ័ត​ភាព​ពីស្ថាប័ននីតិប្រតិបត្តិ​ ​ជា​ជំហាន​ដំបូង​នៅ​ក្នុង​កំណែ​​ទម្រង់​ដូច​ដែល​បាន​សន្យា​។

ប៉ុន្តែអ្វីដែលត្រូវ​បញ្ចប់នោះ ​គឺ​ការកែ​ច្បាប់​ស្ដីពី​ការ​បោះ​ឆ្នោត​ជ្រើស​រើស​សមាជិក​សភា និង​ច្បាប់​ថ្មី​ស្ដីពី​ដំណើរ​ការ​គ.ជ.ប. ដែល​​ព័ត៌មាន​លម្អិត​នៅតែកំពុង​ធ្វើ​ការ​​ពិភាក្សា​ដោយ​ក្រុម​ការ​ងារ​មក​ពី​គណបក្ស​ប្រជា​ជន​កម្ពុជា និង​គណបក្ស​សង្គ្រោះជាតិ​។

សម្ព័ន្ធ​កំណែទម្រង់​ការ​បោះ​ឆ្នោតដែល​​ជាអង្គការ​មួយ​ក្នុង​ចំណោម​អង្គការ​មិន​មែន​រដ្ឋាភិបាល​ជាច្រើន​ ដែល​ធ្វើ​ការ​ដើម្បី​លើក​កម្ពស់​ប្រជា​ធិបតេយ្យ​នៅ​ក្នុង​ប្រទេស​នោះ បាន​អំពាវ​នាវ​ឲ្យ​គណបក្ស​ទាំង​ពីរ​​ធ្វើ​ការ​ខិត​ខំ​ប្រឹង​ប្រែង​រួម​គ្នា ដើម្បី​ឲ្យ​អ្នក​ជំនាញ​​បាន​ចូល​រួម​នៅ​ក្នុង​កិច្ច​ពិភាក្សា និង​ធ្វើ​​ឲ្យ​ប្រាកដ​ពីស្ថាន​ភាព​នៃការ​ចរចា​។

លោក សួន យុធ្យា មន្ត្រី​ច្បាប់​នៅ​គណៈកម្មាធិការ​ដើម្បី​ការ​បោះ​ឆ្នោត​ដោយ​សេរី និង​យុត្តិធម៌​នៅ​កម្ពុជា​ បាន​មាន​ប្រសាសន៍អំឡុង​សន្និសីទ​កាសែត​កាល​​ពី​ម្សិលមិញ​នៅ​ការិយា​ល័យ​របស់​អង្គការ​មិន​មែន​រដ្ឋាភិបាល​នេះ​នៅក្នុង​រាជធានី​ភ្នំពេញ​ថា ” ក្រុម​ការ​ងារ​បាន​ចាប់​ផ្ដើម​ពិភាក្សា​បិទ​ទ្វារ​ ហើយ​មិន​ទាន់​មាន​ការ​កំណត់​ពេល​វេលា​ច្បាស់​លាស់​នៅឡើយទេ”។ លោក​បាន​មាន​ប្រសាសន៍​ថា ” យើង​ចង់​ឲ្យ​ក្រុម​ការ​ងារ​បើក​ចិត​្ត​ឲ្យ​ទូលាយ និង​មាន​តម្លាភាព​នៅ​ក្នុង​ការ​សម្រេច​ចិត្ត​របស់​ខ្លួន និង​ការ​ពិភាក្សា​ស្ដីពី​ការ​ធ្វើ​សេចក្ដីព្រាង​ច្បាប់​​​ស្ដី​ពីការ​រៀបចំ​ និង​ការ​ប្រព្រឹត្តទៅ​នៃ​គ.ជ.ប.ថ្មី”។

លោក យុធ្យា បាន​មាន​ប្រសាសន៍​ថា សម្ព័ន្ធ​កំណែទម្រង់​នេះ​បាន​ដាក់​ជូន​សេចក្ដីព្រាង​ច្បាប់គ.ជ.ប. ទៅ​គណបក្ស​ប្រជា​ជន​ និង​គណបក្ស​សង្គ្រោះជាតិជាមួយ​សំណើ​កាលពី​ថ្ងៃ​​ទី​១២ ខែ​កញ្ញា សុំឲ្យ​មាន​ការ​ពិភាក្សា​ឲ្យ​បាន​លម្អិត​ ប៉ុន្តែ​លោក​មិន​បានទទួល​ការ​ឆ្លើយ​តប​ពី​គណបក្ស​ណាមួយ​ឡើយ​។

លោក យ៉ែម បុញ្ញឫទ្ធិ អ្នក​នាំាពាក្យ​គណបក្ស​សង្គ្រោះ​ជាតិ និង​ជា​សមាជិក​ក្រុម​ការ​ងារ​របស់​គណបក្ស​ទទួល​បន្ទុក​ការ​បោះ​ឆ្នោត​ បាន​មាន​ប្រសាសន៍​ថា គណបក្ស​ប្រឆាំង​គាំទ្រ​ឲ្យ​ដាក់​បញ្ចូល​អ្នក​ជំនាញ​មកពី​ខាង​ក្រៅ​នៅ​ក្នុង​ការ​ពិភាក្សា​ស្ដីពី​កំណែទម្រង់​នេះ​។

លោក បុញ្ញឫទ្ធិ បាន​មាន​ប្រសាសន៍​ថា ” យើង​គាំទ្រ​ឲ្យ​ពួកគាត់​បាន​ចូល​រួម​នៅ​ក្នុង​ជំនួប​នោះ ដើម្បី​ឲ្យ​​ពួកគាត់​អាច​ស្ដាប់​ឮ​នូវ​អ្វី​ដែល​យើង​​ពិភាក្សា។ ប៉ុន្តែ​ពួកគាត់​ត្រូវ​ទាក់​ទង​គណបក្ស​ប្រជា​ជន​កម្ពុជា​ដោយ​ផ្ទាល់ ពីព្រោះ​ការ​ពិភាក្សា​មិន​ត្រូវ​ធ្វើ​ឡើង​ដោយបក្ស​របស់​យើងតែម្នាក់ឯង​ឡើយ​”។

លោក ស៊ិក ប៊ុនហុក សមាជិក​សភា​គណបក្ស​ប្រជា​ជន​កម្ពុជា និង​ជា​សមាជិក​ក្រុម​ការ​ងារ​គណបក្ស​​​បាន​មាន​ប្រសាសន៍​ថា គណបក្ស​របស់​លោក​ទទួល​បានសេចក្ដី​ព្រាង​ច្បាប់​ស្តីពី​សម្ព័ន្ធ​កំណែទម្រង់​ការ​បោះ​ឆ្នោត​ហើយ ប៉ុន្តែ​បាន​បង្វែរ​សំណួរ​បន្ថែម​ទៅ​លោក​ ប៊ិន ឈិន ប្រធាន​ក្រុម​ការ​ងារ​គណបក្ស​ប្រជា​ជន​កម្ពុជា​ ដែល​មិន​អាច​ទាក់​ទង​បាន​៕ សារុន​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស