ច្បាប់ថ្មីរបស់រដ្ឋាភិបាលសម្រាប់ឧស្សាហកម្មកម្សាន្ត ដែលត្រូវបានប្រកាសកាលពីម្សិលមិញ មានគោលដៅផ្តល់ឲ្យស្ត្រីរកស៊ីផ្លូវភេទ និងអ្នកងាយរងគ្រោះផ្សេងៗទៀតនូវការការ ពារបន្ថែមតាមច្បាប់ការងារ ប៉ុន្តែ អ្នកជំនាញបានរំឭកដាស់តឿនថា ការអនុវត្តច្បាប់នេះនឹងជាការងារដ៏លំបាក ហើយចំណាយពេលយូរ។
អំឡុងព្រិត្តិការណ៍មួយនៅក្រសួងការងារ លោក អិុត សំហេង រដ្ឋមន្ត្រីក្រសួងការងារបានប្រកាសច្បាប់ថ្មីនេះ ដល់ម្ចាស់រង្គសាល ម្ចាស់ខារ៉ាអូខេ និងម្ចាស់កន្លែងកម្សាន្តសម្រាប់មនុស្សពេញវ័យក្នុងគោលបំណងលើកកម្ពស់ជីវិត និងការការពារតាមផ្លូវច្បាប់ដល់បុគ្គលិកដែលភាគច្រើនជាស្ត្រីនៅក្នុងឧស្សាហកម្មនេះឲ្យបានកាន់តែប្រសើរ។
នៅក្នុងប្រកាសនេះរួមមានលក្ខខណ្ឌការងារ ការគាំពារសុខភាព និងសុវត្ថិភាព និងការផ្តល់សេវាកម្មការពារមេរោគអេដស៍ដល់ស្ត្រីរកស៊ីផ្លូវភេទ ហើយវានឹងជាការផ្តល់ការការពារជាលើកដំបូងតាមច្បាប់ការងារដល់បុគ្គលិកនៅក្នុងវិស័យនេះដែល លោក អិុត សំហេង លើកឡើងថា កំពុងទទួលជោគជ័យ។
លោក អិុត សំហេង បានមានប្រសាសន៍នៅក្នុងពិធីប្រកាសកាលពីម្សិលមិញថា “ខ្ញុំប៉ាន់ប្រមាណថា ក្នុងមួយឆ្នាំៗមនុស្សភាគច្រើនទៅកន្លែងកម្សាន្តម្តងឬក៏ពីរដងរួមទាំងខ្ញុំផងដែរ”។ លោកបានបញ្ជាក់ចំពោះអ្នកចូលរួមដែលកំពុងតែសើចថា “សេវាកម្សាន្តទាំងនេះរួមមាន ក្លឹបឌីស្កូជាដើម”។
លោកស្រី ចាន់ ឌីណា ជាតំណាងបណ្តាញកម្មករនិយោជិកផ្នែកសេវាកម្សាន្តថ្នាក់ជាតិបានលើកឡើងថា ច្បាប់ថ្មីនេះត្រូវបានគេរង់ចាំជាយូរមកហើយ។ លោកស្រី ឌីណា បានមានប្រសាសន៍នៅក្នុងសេចក្តីថ្លែងការណ៍មួយថា ”ទីបំផុតរដ្ឋាភិបាលបានទទួលស្គាល់ថា បុគ្គលិកកន្លែងកម្សាន្ត គឺជាបុគ្គលិកដូចកន្លែងផ្សេងៗដែរ ហើយគួរតែត្រូវបានការពារតាមច្បាប់ការងារ។ ម្ចាស់កន្លែងកម្សាន្តនានាមានកាតព្វកិច្ចយកចិត្តទុកដាក់ចំពោះបុគ្គលិករបស់ខ្លួន ហើយទប់ស្កាត់បញ្ហាសំខាន់ៗដូចជាការប្រើអំពើហិង្សា និងរំលោភបំពានផ្លូវភេទជាដើម”។
ប៉ុន្តែ ខណៈច្បាប់ថ្មីនេះកំពុងតាក់តែងនៅឡើយនោះ លោក អិុត សំហេង បានលើកឡើងថា ដំបូងឡើងការអនុវត្តច្បាប់នេះតម្រូវឲ្យមានការស្ម័គ្រចិត្តជាមុនសិននៅពេលវិធានការត្រូវបានដាក់ចេញ។
លោកបានប្រាប់អ្នកយកព័ត៌មាននៅក្រៅព្រឹត្តិការណ៍កាលពីម្សិលមិញថា “យើងតម្រូវឲ្យនិយោជក ក៏ដូចជានិយោជិក [ទទួលស្គាល់] ថា ខ្លួនមានកាតព្វកិច្ចត្រូវអនុវត្តច្បាប់នេះ ប៉ុន្តែ ជំហានដំបូងនឹងជាគោលការណ៍អប់រំតាមការស្ម័គ្រចិត្ត ដើម្បីធ្វើឲ្យប្រាកដថា ពួកគាត់យល់ដឹងអំពីច្បាប់នេះ ហើយលើកទឹកចិត្តពួកគាត់ឲ្យគោរពច្បាប់នេះដោយស្ម័គ្រចិត្ត”។
លោក អិុត សំហេង បានលើកឡើងថា នៅពេលច្បាប់នេះត្រូវបានអនុម័ត ម្ចាស់កន្លែងកម្សាន្តណាដែលមិនអនុវត្តតាមច្បាប់នេះនឹងត្រូវផាកពិន័យ។
ប៉ុន្តែ ការអនុវត្តច្បាប់ថ្មីនេះនៅក្នុងវិស័យសេដ្ឋកិច្ចក្រៅផ្លូវការនឹងមិនមែនជាការងាយស្រួលនោះទេ។
យោងតាម លោក ថោង ខុន រដ្ឋមន្ត្រីក្រសួងទេសចរណ៍បានឲ្យដឹងថា បច្ចុប្បន្នកន្លែងកម្សាន្តសម្រាប់មនុស្សពេញវ័យនៅទូទាំងប្រទេសមានចំនួន៦៥៩កន្លែង ដោយជួលបុគ្គលិកជាង១១.០០០នាក់។ លោកបានលើកឡើងថា ក្នុងចំណោមកន្លែងកម្សាន្តទាំងនោះបើនិយាយត្រឹមតែបួនកន្លែងវិញមានលើសពីមួយទៅហើយដែលគ្មានអាជ្ញាប័ណ្ណ។
លោក Neil Poetschka អ្នកផ្តល់ប្រឹក្សាផ្នែកសុខាភិបាលនៅសហជីព UnionAid Abroad-APHEDA ជាទីភ្នាក់ងារផ្តល់ជំនួយក្រៅប្រទេសនៃក្រុមប្រឹក្សាប្រទេសអូស្ត្រាលី ដែលបានធ្វើការសិក្សាលើការរកស៊ីផ្លូវភេទក្នុងប្រទេសកម្ពុជាកាលពីឆ្នាំ ២០១០ បានលើកឡើងថា ស្ត្រីក្រលំបាកនៅក្នុងវិស័យនេះជារឿយៗគ្មានជម្រើសនោះទេ ទើបពួកគាត់ទទួលយកការងារដែលមានប្រាក់ខែទាប និងលក្ខខណ្ឌការងារដែលមានការរំលោភបំពាន។
លោកបានលើកឡើងតាមរយៈអីុម៉េលថា “កង្វះការការពារលើការងារ គឺមានន័យថា និយោជក អាចផ្តល់ប្រាក់ខែទាបទៅឲ្យបុគ្គលិក តាមដែលខ្លួនអាចធ្វើបាន ហើយផ្តល់ឲ្យពួកគាត់នូវកិច្ចសន្យារយៈពេលខ្លី (ឬគ្មានកិច្ចសន្យាណាមួយ) ហើយធ្វើឲ្យបុគ្គលិកបង្ខំចិត្តទទួលយកលក្ខខណ្ឌការងារដ៏គ្រោះថ្នាក់ និងរំលោភបំពាន”។
លោកបានបន្ថែមថា “បុគ្គលិកជារឿយៗតែងតែរងការរំលោភបំពានផ្លូវកាយ ការជេរស្តី ការយាយីផ្លូវភេទ និងត្រូវបានបង្ខំឲ្យទទួលទានគ្រឿងស្រវឹងដើម្បីកំដរភ្ញៀវអំឡុងពេលធ្វើការ ហើយក្នុងករណីជាច្រើនទៀតពួកគាត់ត្រូវបង្ខំចិត្តរកស៊ីផ្លូវភេទដើម្បីផ្គត់ផ្គង់ខ្លួនឯង និងគ្រួសារ”។
លោក Poetschka បានលើកឡើងទៀតថា ប្រកាសថ្មីនេះទទួលបានជោគជ័យគឺវាអាស្រ័យលើការតាំងចិត្តរបស់រដ្ឋាភិបាល និងនិយោជកក្នុងការធ្វើកំណែទម្រង់។
លោកបានមានប្រសាសន៍បន្ថែមទៀតថា “ខ្ញុំគិតថា ការផ្លាស់ប្តូរជាលើកដំបូងនឹងមានដំណើរការយឺត ព្រោះថាម្ចាស់ និងអ្នកគ្រប់គ្រងនានានៅរង់ចាំការផ្លាស់ប្តូរជាទូទៅនៅក្នុងវិស័យនេះ ជាមុនសិនដោយពួកគេនៅតែផ្តល់ប្រាក់ខែ និងលក្ខខណ្ឌការងារទាប តាមដែលអាចធ្វើទៅបានដើម្បីប្រកួតប្រជែងជាមួយដៃគូ”។
លោក Richard Howard អ្នកជំនាញជាន់ខ្ពស់ស្តីពីមេរោគអេដស៍នៅអង្គការពលកម្មអន្តរជាតិដែលធ្វើការជាមួយរដ្ឋាភិបាល ដើម្បីធ្វើសេចក្តីព្រាងនៃប្រកាសនេះបានលើកឡើងថា ច្បាប់ថ្មីនេះនឹងផ្តល់ឲ្យបុគ្គលិកតាមកន្លែងកម្សាន្តនានានូវគោលការណ៍មួយ ដែលអាចធ្វើឲ្យពួកគាត់មានសិទ្ធិចរចាជាមួយថៅកែរបស់ខ្លួន ដើម្បីទទួលបានលក្ខខណ្ឌការងារល្អ។
លោក Howard បានលើកឡើងទៀតថា ការលំបាកខ្លាំងបំផុត គឺការអនុវត្តវិធានការចំពោះស្ត្រីដែលរកស៊ីផ្លូវភេទលាក់មុខលាក់ក្រោយ។
លោកបានមានប្រសាសន៍នៅក្នុងព្រឹត្តិការណ៍កាលពីម្សិលមិញថា “ជាការពិត បញ្ហាប្រឈមនៅក្នុងការរកស៊ីផ្លូវភេទគឺលំបាកណាស់។ អ្នកទាំងនោះភាគច្រើនជាស្ត្រីដែលងាយរងគ្រោះ ហើយពួកគាត់ពិតជាត្រូវការការពារ។ យើងត្រូវតែធ្វើការងារ ដើម្បីសម្រេចឲ្យបាននូវអ្វីដែលពួកគាត់ចង់បាន”៕ស៊ុយឈាង