27 C
Phnom Penh

អ្នកស្រុក​ប៉ៃលិន​​ផ្អើល​ប្រមូល​ផ្តុំ​គ្នា ខណៈ​​មាន​ពាក្យ​ចចាម​អារា៉ម​សុះ​សាយអំពី​ការ​ដក​លោក អុី ឈាន ចេញ​ពី​តំណែង

ដោយ ឌឹ ខេមបូឌា ដេលី

បទវិភាគ

អភិបាល​ខេត្ត​ប៉ៃលិន​បាន​មាន​ប្រសាសន៍​ថា កាលពី​ម្សិលមិញ​ប្រជា​ពលរដ្ឋជាង​១.០០០​នាក់​​បាន​ប្រមូល​ផ្ដុំ​គ្នា​នៅ​ខាង​មុខ​ផ្ទះ​របស់​លោក អុី ឈាន ក្នុង​ក្រុង​ប៉ៃលិន ដើម្បី​ទាម​ទារ​ឲ្យ​លោក​នៅ​កាន់​តំណែង​ជា​ប្រធាន​ក្រុម​ប្រឹក្សា​ខេត្ត​ដដែល​ ទោះបី​ជា​​មិន​ទាន់​មាន​ការ​ប្រកាស​ជា​ផ្លូវ​ការ​នៅ​ឡើយ​ក្ដី​។

ឧត្តមសេនីយ៍ឯក អុី ឈាន វ័យ​៦៣​ឆ្នាំ​​​ បាន​កាន់តំណែង​ជា​ប្រធាន​ក្រុម​ប្រឹក្សា​ខេត្ត​ចាប់​តាំង​ពី​ខែ​មិថុនា​មក នៅ​ពេល​លោក​ចុះ​ចេញ​ពី​មុខ​តំណែង​ជា​អភិបាល​ខេត្ត​ ដែល​​លោក​បាន​កាន់​ចាប់​តាំង​ពី​ប៉ៃលិន ​​ត្រូវ​បាន​កាត់​​ផ្តាច់ចេញ​ពី​ខេត្ត​បាត់​ដំបង​នៅក្នុង​ឆ្នាំ​​១៩៩៦​មក​។

ពេល​ទាក់​ទង​​កាល​ពី​ម្សិលមិញ លោក កើត សុធា អតីត​អភិបាល​រង​ខេត្ត​​នេះ ដែល​បានចូល​ជំនួស​តំណែង​លោក អុី ឈាន កាលពី​ខែ​មិថុនា បាន​មាន​ប្រសាសន៍​ថា លោក​មិន​ដឹង​ពី​ផែន​ការ​​​ដក​អតីត​មេកើយ​របស់​លោក​ចេញ​ពីតំណែង​បច្ចុប្បន្ន​របស់​លោក​ទេ​។ លោក​បាន​មាន​ប្រសាសន៍​ទៀត​ថា ” ខ្ញុំ​មិន​បាន​ឮថា ឯកឧត្តម​ អុី ឈាន បាន​លាលែង​ពី​តំណែងទេ។ ខ្ញុំ​កំពុង​តែ​តាម​ដាន​ដំណឹង​នេះ​”។

លោក លី សាមិទ្ធ មន្ត្រី​មួយ​រូប​នៅ​មន្ទីរ​ព័ត៌មាន​ខេត្ត​បាន​មាន​ប្រសាសន៍​ថា ក្នុង​រយៈ​ពេល​ពីរ​បី​ថ្ងៃ​មក​នេះ មាន​ពាក្យ​ចចាម​អារ៉ាម​សុះ​សាយ​នៅ​ក្នុង​ខេត្ត​ភាគ​ពាយព្យ​ដាច់​ស្រយាល​នេះ​ថា លោក អុី ឈាន ដែល​ជា​អតីត​អង្គរក្ស​របស់​ ប៉ុល ពត នឹង​មក​កាន់​តំណែង​មួយ​នៅ​រាជ​ធានី​ភ្នំពេញ។

លោក​បាន​បន្ត​ថា លោក​ទទួល​បាន​ដំណឹង​ថា រដ្ឋាភិបាល​បាន​បញ្ជា​ឲ្យ​ឧត្តម​សេនីយ៍ឯក អុី ឈាន លាលែង​ពី​មុខ​តំណែង​ ហើយ​ថា ​អ្នក​ដែល​​ត្រូវ​ជំនួស​តំណែង​ត្រូវ​បាន​ជ្រើស​រើស​រួច​ហើយ ប៉ុន្តែ​មិន​ទាន់​មាន​ការ​ប្រកាស​ជា​ផ្លូវ​ការ។ លោក​​បានលើក​ឡើង​បន្ថែម​ទៀត​ថា “​ឯក​ឧត្ដម​ អុី ឈាន នឹង​ត្រូវ​ជំនួស​ដោយ​​លោក​ ឡៃ ចាន់ឆៃ” នេះ​បើ​តាម​មន្ត្រី​​ជាច្រើន​​រូប​នៅ​ក្នុង​ជួរ​រដ្ឋាភិបាល​ប្រាប់​លោក។

ឧត្ដមសេនីយ៍​ត្រី ឡៃ ចាន់​ឆៃ អតីត​ស្នង​ការ​ខេត្ត​ប៉ៃលិន​ដែល​បាន​ចូល​និវត្ត​កាលពី​ខែ​ឧសភា មិន​​អាច​ទាក​់ទង​បាន​ទេ​កាលពី​ម្សិលមិញ​។ ចំណែក​ឯ​ឧត្តម​សេនីយ៍ឯក អុី ឈាន និង​លោក ខៀវ សុភ័គ អ្នក​នាំពាក្យ​ក្រសួង​មហាផ្ទៃ​ក៏​មិន​អាច​ទាក់​ទង​បាន​ដែរ​។

លោក ឌុច សុន អគ្គនាយក​អគ្គនាយកដ្ឋានបុគ្គលិក​ នៃ​ក្រសួង​មហាផ្ទៃ​ បាន​មាន​ប្រសាសន៍​ថា ការ​លាលែង​ពី​តំណែង​របស់​ឧត្តម​សេនីយ៍ឯក​ អុី ឈាន គ្រាន់​តែ​ជា​ពាក្យ​ចចាម​អារ៉ាម​ប៉ុណ្ណោះ ហើយ​បាន​គូស​បញ្ជាក់​ថា ប្រធាន​ក្រុម​ប្រឹក្សា​គឺ​ជា​មន្ត្រី​​ជ្រើស​តាំង​តាម​រយៈ​ការ​បោះ​ឆ្នោត ហើយ​ការ​បង្ខំ​លោក​ឲ្យ​ចុះ​ចេញពី​តំណែង​គឺ​ជា​រឿង​ខុស​ច្បាប់។ លោក​ថ្លែង​ថា ” វា​គ្រាន់​តែ​ជា​ពាក្យ​ចចាម​អារ៉ាម​និយាយ​ពី​មាត់​មួយ​ទៅ​មាត់​មួយ​ប៉ុណ្ណោះ​”។

លោក​បាន​លើក​ឡើង​ទៀត​ថា ពេល​និយាយ​ទូរស័ព្ទ​ជាមួយ​អភិបាល​ខេត្ត​ កើត សុធា ​លោក​ទទួល​បាន​ដំណឹង​​ថា លោក អុី ឈាន បាន​វិល​ត្រឡប់​ទៅ​ផ្ទះ​របស់​លោក​វិញ​នៅ​ម៉ោង​ប្រហែល​៥ល្ងាច​ម្សិលមិញ ហើយលោក អីុ ឈាន ​បាន​សួរ​ទៅ​អ្នក​គាំទ្រ​របស់​លោក​ថា ” ហេតុ​អ្វី​បាន​ជា​បងប្អូន​ទាំង​អស់​គ្នា​មក​ប្រមូល​ផ្ដុំ​​នៅ​មុខ​ផ្ទះ​របស់​ខ្ញុំ​? ខ្ញុំ​មិន​បាន​ចាក​ចេញ​ពី​បងប្អូន​ទេ”។

នៅរយៈ​ពេល​ប៉ុន្មាន​ខែ​មុន​ពេល​លោក​ចុះ​ចេញពី​តំណែង​ជា​អភិបាល​ខេត្ត លោក អុី ឈាន ​ត្រូវ​​​បាន​ទាញ​ទម្លាក់ឲ្យ​​​ជាប់​ពាក់ព័ន្ធ​​ក្នុង​វិវាទ​ដីធ្លី​មួយ​ នៅពេល​ក្រុម​ហ៊ុន​មួយ​​របស់លោក​ស្រី បាន ស្រីមុំ ដែល​ជា​​ភរិយា​ទី២​របស់​លោក និង​​​ជា​តំណាង​រាស្ត្រ​គណបក្ស​​ប្រជា​ជន​កម្ពុជា បាន​បញ្ជា​ឲ្យ​អ្នក​ភូមិ​​ចាក​ចេញពី​ដី​ដែល​ពួកគាត់​អះអាង​ថា បាន​ប្រើ​ប្រាស់​ធ្វើ​កសិកម្ម​ចាប់​តាំង​ពី​ឆ្នាំ​១៩៩៩​មក​។

លោក លី សាមិទ្ធ ដែល​ជា​មន្ត្រី​ព័ត៌មាន ​​បាន​មាន​ប្រសាសន៍​ថា ​ប្រជា​ពល​រដ្ឋ​រស់​នៅ​ក្នុង​ខេត្ត​ដែល​ជា​អតីត​ទីតាំង​ដ៏រឹងមាំ​របស់​ខ្មែរ​ក្រហម​​នេះ​ មិន​ចូល​ចិត្ត​​លោកស្រី បាន ស្រីមុំ យ៉ាង​ខ្លាំង​​ ហើយលោក​យល់​​ថា​ រឿង​នេះ​អាច​ពាក់​ព័ន្ធ​នឹង​ការ​ដក​ស្វាមី​របស់​លោកស្រី​ចេញ​ពី​តំណែង។

លោក​បាន​មាន​ប្រសាសន៍​ទៀត​ថា ” ភរិយា​របស់​លោក អុី ឈាន បាន​ប្រើ​ប្រាស់​អំណាច​​របស់​លោក​ អុី ឈាន ​ច្រើន​ពេក ហើយ​បាន​ធ្វើ​ឲ្យ​អតីត​គ្រួសារ​ខ្មែរ​ក្រហម​ខក​ចិត្ត​ចំពោះ​ទង្វើ​របស់​គាត់​។ កាលពី​មុន​នៅ​ក្នុង​សម័យ​ខ្មែរ​ក្រហម​​ លោក អុី ឈាន ​​​មាន​អំបិល​តែ​មួយ​គ្រាប់​​ យើង​ចែក​រំលែក​គ្រប់​គ្នា​​បរិភោគ​បា​យ​អស់​​មួយ​ចាន​ធំ។ ប៉ុន្តែ​បន្ទាប់ពី​ភរិយា​របស់​លោក​មក​ដល់ យើង​ទៅ​​ផ្ទះ​របស់​គាត់​​លែង​បាន​​​ទៀត​ហើយ​”៕ សុខុម​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស