លោក ស ខេង រដ្ឋមន្ត្រីក្រសួងមហាផ្ទៃបានជួបជាមួយម្ចាស់រោងចក្រ និងវិនិយោគិននៅក្នុងវិស័យកាត់ដេរកាលពីម្សិលមិញ ដោយផ្ដល់ការធានាថា រដ្ឋាភិបាលនឹងអនុម័តច្បាប់សហជីពដ៏ចម្រូងចម្រាសមួយ ដើម្បីរក្សាសណ្ដាប់ធ្នាប់នៅក្នុងឧស្សាហកម្មដ៏ធំបំផុតរបស់ប្រទេសកម្ពុជានេះ ដែលផ្ដល់ការងារឲ្យកម្មករប្រមាណ៦០០.០០០នាក់។
លោក ស ខេង បានលើកឡើងថា កងកម្លាំងដែលស្ថិតក្រោមការបញ្ជារបស់លោកនឹងមិនប្រើកម្លាំងដើម្បីឲ្យកម្មកររក្សាសណ្តាប់ធ្នាប់ឡើយ ប៉ុន្តែ ថា លោកនឹងធ្វើការជាមួយក្រសួងការងារ ដើម្បីជំរុញឲ្យមានការអនុម័តច្បាប់ ដែលនឹងអាចជួយឲ្យរដ្ឋាភិបាល អាចគ្រប់គ្រងលើសហជីពបានកាន់តែមានប្រសិទ្ធភាពជាងមុន ហើយនឹងផ្តល់ឲ្យតុលាការនូវសិទ្ធិអំណាចដើម្បីដកអាជ្ញាប័ណ្ណណាដែលខ្លួនគិតថា ប្រើតួនាទីដោយខុសច្បាប់។
លោក ស ខេង បានប្រាប់តំណាងសមាគមរោងចក្រកាត់ដេរនៅកម្ពុជា (GMAG) អំឡុងកិច្ចប្រជុំមួយនៅក្រសួងមហាផ្ទៃថា “ជួនកាលខ្ញុំអាចចូលរួមទប់ស្កាត់បាតុកម្ម និងរកដំណោះស្រាយជួនបាតុករ ប៉ុន្តែ ខ្ញុំមិនអាចប្រើកម្លាំង បាញ់បោះ ឬក៏ប្រើអំពើហិង្សាលើកម្មករបានឡើយ”។
លោក ស ខេង បានបន្តថា “ខ្ញុំទទួលស្គាល់ថា ពិតជាមានសហជីពច្រើនខ្លាំងណាស់” ។លោកបានប៉ាន់ប្រមាណថា មានសហជីពចំនួន៤.០០០និងសហព័ន្ធសហជីពចំនួន៩០ដែលកំពុងមានប្រតិបត្តិការនៅក្នុងប្រទេស។ លោកបានមានប្រសាសន៍បន្ថែមទៀតថា “ខ្ញុំគិតថា វាគឺជាការទទួលខុសត្រូវរបស់រដ្ឋាភិបាលក្នុងការដោះស្រាយបញ្ហានេះ ហើយខ្ញុំនឹងសហការជាមួយឯកឧត្ដម អិុត សំហេង [រដ្ឋមន្ត្រីក្រសួងការងារ] ដើម្បីរៀបចំច្បាប់នេះ។ យើងចាំបាច់ត្រូវតែធ្វើវា។ វាគឺជារឿងចាំបាច់ទោះបីវាជារឿងដ៏ចម្រូងចម្រាសក៏ដោយ”។
សេចក្ដីព្រាងច្បាប់សហជីពដែលត្រូវបានប្រកាសឲ្យសាធារណជនដឹងឮកាលពីខែឧសភា ត្រូវបានត្រួតពិនិត្យមើលដោយអង្គការពលកម្មអន្តរជាតិ (ILO) ដែលលើកឡើងថា សេចក្ដីព្រាងច្បាប់នេះនៅមិនទាន់ឆ្លើយតបគ្រប់គ្រាន់ទៅនឹងអនុសញ្ញាអន្តរជាតិ ដែលចុះហត្ថលេខាដោយប្រទេសកម្ពុជា ដើម្បីធានានូវសិទ្ធិជួបជុំគ្នា និងសិទ្ធិក្នុងការបង្កើតសហជីពនៅឡើយទេ។
ច្បាប់ដែលត្រូវបានស្នើឡើងនេះផ្តល់ឲ្យតុលាការ ដែលកាលពីខែមុនបានដាក់មេដឹកនាំសហជីពដ៏លេចធ្លោបំផុតមួយចំនួនស្ថិតក្រោមការឃ្លាំមើលរបស់តុលាការនូវសិទ្ធិអំណាចដ៏ទូលំទូលាយ ដើម្បីដកអាជ្ញាប័ណ្ណរបស់សហជីព។ សេចក្តីព្រាងច្បាប់នេះក៏បានចែងផងដែរថា កម្មករយ៉ាងតិច២០ភាគរយនៅក្នុងរោងចក្រមួយ ដាច់ខាតត្រូវយល់ព្រមចូលរួមជាមួយសហជីពមុនពេលសហជីពត្រូវបានអនុញ្ញាតឲ្យចុះឈ្មោះនៅក្រសួងការងារ។
មេដឹកនាំសហជីព និងអ្នកតស៊ូមតិពាក់ព័ន្ធនឹងការងារព្រួយបារម្ភថា ច្បាប់នេះនឹងត្រូវបានប្រើដើម្បីគាបសង្កត់សកម្មជនសហជីព ហើយរារាំងមិនឲ្យសហជីពថ្មីចុះឈ្មោះ ដែលរដ្ឋាភិបាលពេញចិត្ត រីឯវិនិយោគិនក្នុងវិស័យនេះវិញជំទាស់ថា ការដែលមានសហជីពច្រើនវាធ្វើឲ្យមានការលំបាកក្នុងការចរចាគ្នា ឬក្នុងការរក្សាសន្តិភាពក្នុងវិស័យឧស្សាហកម្មនេះ។
កិច្ចប្រជុំរវាងលោក ស ខេង និង GMAC ត្រូវបានធ្វើឡើងចំពេលមានភាពតានតឹងក្នុងការចរចាគ្នាទាក់ទិននឹងប្រាក់ខែគោលថ្មីក្នុងវិស័យកាត់ដេរ ដែលគ្រោងនឹងបោះឆ្នោតនៅសប្ដាហ៍នេះ ប៉ុន្តែ ត្រូវបានក្រសួងការងារពន្យារពេលដល់ខែវិច្ឆិកា ដោយគ្មានការពន្យល់នៅក្នុងសប្ដាហ៍នេះ។
កាលពីខែធ្នូឆ្នាំមុន ជាពេលចុងក្រោយដែលរដ្ឋាភិបាលបានដំឡើងប្រាក់ខែគោលរបស់កម្មករ សហជីពចំនួនប្រាំមួយបានធ្វើបាតុកម្មទូទាំងប្រទេស ដែលធ្វើឲ្យប៉ះពាល់ដល់វិស័យនេះ ហើយត្រូវបានបញ្ចប់ទៅវិញនៅថ្ងៃទី៣ ខែមករា នៅពេលកងរាជអាវុធហត្ថបានបើកការបាញ់ប្រហារលើក្រុមអ្នកតវ៉ាគប់ដុំថ្ម ដោយបណ្ដាលឲ្យកម្មករចំនួនប្រាំនាក់បាត់បង់ជីវិត និងរាប់សិបនាក់ផ្សេងទៀតរងរបួស។
លោក ស ខេង បានធានាចំពោះម្ចាស់រោងចក្រថា លោកនឹងធ្វើអ្វីៗគ្រប់យ៉ាងដែលលោកអាចធ្វើទៅបាន ដើម្បីរារាំងកុំឲ្យមានភាពចលាចលម្តងទៀត។
លោកបានមានប្រសាសន៍ថា “ខ្ញុំនឹងព្យាយាមឲ្យអស់ពីសមត្ថភាពក្នុងការដឹកនាំកងកម្លាំងដើម្បីរក្សាសណ្តាប់ធ្នាប់ រក្សាសន្តិសុខ និងរារាំងកុំឲ្យមានអំពើហិង្សា ឬការបាញ់ប្រហារ”៕ ស៊ុយឈាង