ជនរងគ្រោះ និងនគរបាលបានលើកឡើងកាលពីម្សិលមិញថា កម្មករម្នាក់នៅរោងចក្រកាត់ដេរដែលកាន់កាប់ដោយជនជាតិចិនក្នុងខណ្ឌដង្កោ រាជធានីភ្នំពេញ ត្រូវបានសន្តិសុខក្រុមហ៊ុនវាយដំកាលពីថ្ងៃពុធ ខណៈពេលកំពុងតវ៉ានៅខាងក្រៅរោងចក្រ។
មឿន ប្រុស អាយុ១៩ឆ្នាំបាននិយាយថា គាត់បានរងរបួសក្បាលបន្ទាប់ពីសន្តិសុខបួននាក់ដែលធ្វើការនៅរោងចក្រកាត់ដេរ Y&W ទាត់គាត់ធ្លាក់ពីលើម៉ូតូ ហើយបន្ទាប់មកបានយកវិទ្យុទាក់ទងវាយគាត់ បន្ទាប់ពីគាត់បានគប់សម្បកដបដាក់ខ្លោងទ្វាររោងចក្រដោយមានកំហឹង។
មឿន ប្រុស ជាកម្មករម្នាក់ក្នុងចំណោមកម្មករ១.៥០០នាក់ ដែលបានធ្វើកូដកម្មនៅរោងចក្រនេះតាំងពីថ្ងៃទី២៩ ខែកញ្ញាមក ដើម្បីទាមទារដំឡើងប្រាក់ខែ និងទាមទារឲ្យយកតំណាងសហជីពដែលត្រូវបានបណ្ដេញចេញចូលបម្រើការងារវិញនោះ បាននិយាយថា ក្រុមសន្តិសុខបានជិះម៉ូតូដេញតាមគាត់ និងមិត្តភក្ដិម្នាក់។
កម្មកររូបនេះបាននិយាយថា ” ពួកគេបានទាត់យើង ហើយយើងបានធ្លាក់នៅក្បែរផ្លូវ បន្ទាប់មកសន្តិសុខម្នាក់បានយកវិទ្យុទាក់ទងវាយក្បាលខ្ញុំ”។
មឿង ប្រុស បាននិយាយថា នៅពេលគាត់ព្យាយាមរាយការណ៍ពីការបង្ករបួសស្នាមនេះទៅនគរបាលឃុំព្រែកកំពឹសកាលពីថ្ងៃពុធ ពួកគេបានច្រានចោល ដោយនិយាយថា គាត់បានបង្ករឿងដាក់សន្តិសុខដោយគប់សម្បកដប។ ប៉ុន្តែបន្ទាប់ពីគាត់ដាក់ពាក្យបណ្ដឹងទៅនគរបាលស្រុកកាលពីម្សិលមិញ នគរបាលឃុំបានហៅគាត់មកប៉ុស្តិ៍នគរបាល ហើយសន្តិសុខម្នាក់ក្នុងចំណោមសន្តិសុខទាំងនោះបានផ្ដល់សំណងដល់គាត់ចំនួន១០០ដុល្លារ។
នៅពេលត្រូវបានទាក់ទងតាមទូរស័ព្ទ លោក មាស វណ្ណថុន នាយប៉ុស្តិ៍ឃុំបានបដិសេធការដែលថា កូនចៅរបស់លោកមិនព្រមទទួលយកពាក្យបណ្ដឹងរបស់ មឿន ប្រុស។
លោកបានមានប្រសាសន៍ថា ” យើងទទួលស្គាល់ថា គាត់បានមកប៉ុស្តិ៍នគរបាល ដោយក្បាលប្រឡាក់ឈាមកាលពីម្សិលមិញមែន។ វាមិនពិតទេ ដែលថាយើងមិនបានទទួលយកពាក្យបណ្ដឹងនោះ ពីព្រោះយើងបានហៅសន្តិសុខទាំងនោះមកសាកសួរ”។
លោក អេរិក យ៉ាង អ្នកគ្រប់គ្រងរោងចក្របានលើកឡើងថា លោកមិនដឹងអំពីហេតុការណ៍នេះទេ។ លោកបានបន្ថែមថា ” ខ្ញុំស្រឡាញ់កម្មកររបស់ខ្ញុំ។ មិនគួរមានអំពើហិង្សានៅក្នុងប្រទេសណាមួយឡើយ”៕ សារុន
(រាយការណ៍បន្ថែមដោយ HollyRobertson)