លោក មិន ឃិន រដ្ឋមន្ត្រីក្រសួងធម្មការ និងសាសនាបានប្រាប់គណៈកម្មការសភាកាលពីម្សិលមិញថា បើទោះណាជាត្រូវបានហ៊ុមព័ទ្ធដោយការសាងសង់គ្រប់ផ្នែកទាំងអស់ ខណៈដែលកាស៊ីណូណាហ្គាវើលបានពង្រីកបរិវេណកាស៊ីណូរបស់ខ្លួនក្នុងរាជធានីភ្នំពេញក៏ដោយ ក៏វិទ្យាស្ថានពុទ្ធសាសនបណ្ឌិត្យនឹងមិនត្រូវបានលក់ ឬក៏ជួលដែរ។
កាលពីខែឧសភា ខ្លោងទ្វារមុខរបស់ពុទ្ធសាសនបណ្ឌិត្យត្រូវបានវាយកម្ទេចដើម្បីសម្រួលដល់ការសាងសង់ផ្លូវក្រោមដី ហើយកាលពីពេលថ្មីៗនេះក្រុមហ៊ុនឯកជនមួយបានសង់របងបេតុងលើផ្ទៃដី៣០ម៉ែត្រគុណនឹង១០០ម៉ែត្រនៅចំកណ្ដាលបរិវេណវិទ្យាស្ថានពុទ្ធសាសនបណ្ឌិត្យតែម្ដង ដោយធ្វើឲ្យមានកង្វល់ថា ដីនេះត្រូវបានលក់។
ព្រះសង្ឃបានធ្វើការតវ៉ានៅតាមផ្លូវកាលពីដើមសប្ដាហ៍នេះអំពីលទ្ធភាពនៃការលក់វិទ្យាស្ថាននេះ ដោយហែក្បួនកាត់រាជធានីភ្នំពេញ និងដាក់ញត្តិទៅរដ្ឋសភា។
ដោយត្រូវបានកោះហៅឲ្យមកឆ្លើយសំណួរអំពីស្ថានភាពវិទ្យាស្ថានពុទ្ធសាសនបណ្ឌិត្យនៅចំពោះមុខគណៈកម្មការសភាទទួលបន្ទុកអប់រំ យុវជន កីឡា និងកិច្ចការសាសនា លោក មិន ឃិន បានធានាអះអាងកាលពីម្សិលមិញថា វិទ្យាស្ថានពុទ្ធសាសនបណ្ឌិត្យមិនស្ថិតក្រោមការគំរាមកំហែងទេ។
លោកបានប្រាប់ក្រុមអ្នកយកព័ត៌មានបន្ទាប់ពីចេញពីប្រជុំថា ” ចំពោះវិទ្យាស្ថានពុទ្ធសាសនបណ្ឌិត្យនេះ យើងមិនបានជួល លក់ ឬអភិវឌ្ឍសម្រាប់ការវិនិយោគឡើយ”។
លោកបានមានប្រសាសន៍ថា ” យើងបានអនុវត្តតាមនីតិវិធីដើម្បីរុះរើ [របងបេតុងនោះ]ឆាប់ៗតាមដែលអាចធ្វើទៅបាន”។ លោកបានបន្ថែមថា រដ្ឋាភិបាលបានបញ្ជាឲ្យផ្អាកការសាងសង់សំណង់ផ្សេងៗទៀតនៅក្នុងបរិវេណនេះ។
លោក យ៉ែម បុញ្ញឫទ្ធិ អ្នកនាំពាក្យគណបក្សប្រឆាំង និងជាប្រធានគណៈកម្មការនេះបានមានប្រសាសន៍ថា សមាជិកគណៈកម្មការនឹងចុះទៅវិទ្យាស្ថានពុទ្ធសាសនបណ្ឌិត្យនៅពេលដ៏ខ្លីខាងមុខនេះ និងពិនិត្យមើលស្ថានភាពនោះរហូតដល់ក្រសួងនេះធ្វើតាមការសន្យារបស់ខ្លួន។
នៅក្នុងការសាកសួរដេញដោលរបស់គណៈកម្មការ លោក មិន ឃិន បានមានប្រសាសន៍ថា ណាហ្គាខបទទួលបានការអនុញ្ញាតឲ្យសាងសង់សំណង់បេតុងនៅលើដីរបស់វិទ្យាស្ថានពុទ្ធសាសនបណ្ឌិត្យដើម្បីទុកសម្ភារតែប៉ុណ្ណោះ។
នៅពេលត្រូវបានសួរដោយលោក បុញ្ញឫទ្ធិ ថាតើក្រុមហ៊ុនបានចំណាយប្រាក់ប៉ុន្មានដើម្បីបានសិទ្ធិនេះ លោក មិន ឃិន បានមានប្រសាសន៍ថា វិទ្យាស្ថានពុទ្ធសាសនបណ្ឌិត្យមិនបានជួលកន្លែងនេះទេ ប៉ុន្តែក្រុមហ៊ុន “គ្រាន់តែខ្ចីដីនេះប៉ុណ្ណោះ”។
លោក បុញ្ញឫទ្ធិ បានឆ្លើយតបថា ក្រសួងអីក៏ចិត្តល្អម្លេ៉ះ។ តើណាហ្គាវើលទទួលបានប្រាក់ចំណេញប៉ុន្មានលានទៅក្នុងមួយខែៗ”?
ជាការឆ្លើយតបលោក មិន ឃិន បានបញ្ជាក់ជាថ្មីថា ក្រសួងបានបញ្ជាឲ្យរុះរើសំណង់ទាំងនោះហើយ៕ សារុន