28 C
Phnom Penh

តំណាងរាស្ត្រ​​គណបក្ស​សង្គ្រោះ​ជាតិ​​​រួម​គ្នា​ជា​មួយអតីត​សមាជិក​​រណសិរ្ស​រំដោះ​​ប្រជា​ពលរដ្ឋខ្មែរ​​រំឭកខួប​៣៥​ឆ្នាំ​

ដោយ ឌឹ ខេមបូឌា ដេលី

បទវិភាគ

កៀនស្វាយ, ខេត្ត​កណ្ដាល-អតីត​សមាជិក​រណសិរ្ស​រំដោះ​ប្រជាពលរដ្ឋខ្មែរ និង​ក្រុម​មន្ត្រី​គណបក្ស​សង្គ្រោះ​ជាតិ​ បាន​ជួប​ជុំគ្នា​កាលពី​ម្សិលមិញ ដើម្បី​​ធ្វើ​ពិធី​​​រំឭក​ខួប​៣៥​ឆ្នាំ​នៃ​ការ​កកើត​រណសិរ្ស​នេះ​ ដោយ​កោត​សរសើរ​ចំពោះ​ឧត្តម​គតិ​នៃ​ចលនា​នយោបាយ​ប្រដាប់​អាវុធ​នេះ ដែល​បាន​ក្រោក​ឡើង​​ប្រឆាំង​របប​កុម្មុយនីស្ត​​​គាំទ្រ​ដោយ​រដ្ឋាភិបាល​ក្រុង​ហាណូយ បន្ទាប់ពី​របប​ខ្មែរ​ក្រហម​ដួល​រលំ។

លោក កឹម សុខា អនុប្រធាន​គណបក្ស​សង្គ្រោះ​ជាតិ​​ដែល​ស្ថិត​ក្នុង​ចំណោម​អ្នក​នយោ​បាយ​ប្រឆាំង​មួយ​ក្រុម​ ដែល​បាន​ចូល​រួម​​ពិធី​នេះ​ បាន​​ថ្លែង​ទៅកាន់​​អ្នក​ចូល​រួម​ប្រហែល​២០០​នាក់អំឡុង​ពិធី​នេះ​ដែល​ធ្វើ​ឡើង​​នៅ​ស្តូប​រំឭក​វិញ្ញាណ​ក្ខន្ធ​ សឺន សាន ​ក្នុង​ខេត្ត​កណ្ដាល ដែល​ដាក់​ឈ្មោះ​តាម​អតីត​នាយក​រដ្ឋមន្ត្រី​ ដែល​បាន​បង្កើត​រណសិរ្ស​នេះ​នៅ​ក្នុង​ឆ្នាំ​១៩៧៩​។

លោក កឹម សុខា ​ដែល​​ជាអតីត​​សមាជិក​មួយ​រូប​របស់​រណសិរ្ស​រំដោះ​ប្រជា​​ពលរដ្ឋ​ខ្មែរ​នៅ​ដើម​ទសវត្សរ៍​ឆ្នាំ​១៩៨០​ មាន​ប្រសាសន៍​បន្ទាប់ពី​ពិធី​នេះ​ថា ” បើសិន​គ្មាន​ចលនា​តស៊ូ​របស់​​ខ្មែរ​យើង​ ដែល​​​ក្រោក​ឡើង​ក្រោយ​ពី​​ការ​ឈ្លាន​ពាន​របស់​យួន​នៅ​ឆ្នាំ​១៩៩៩​ទេ គឺ​យើង​អត់​មាន​បាន​ដល់​ថ្ងៃ​នេះ​ទេ​។ រណសិរ្ស​រំដោះ​ប្រជាពលរដ្ឋខ្មែរ​ចង់​ឲ្យ​ប្រជា​ពល​រដ្ឋខ្មែរ​ចាក​ផុត​ពី​ការ​​ឈ្លាន​ពាន​របស់​បរទេស​ ចាក​ផុត​ពី​ពួក​កុម្មុយនីស្ត​ផ្ដាច់​ការ​ និង​ចាក​ផុត​ពី​អំពើ​ពុក​រលួយ​ ដើម្បី​កសាង​ប្រទេស​ឯករាជ្យ​មួយ​​ដែល​មាន​លទ្ធិប្រជាធិបតេយ្យ​ពិត​ប្រាកដ​”។

លោក យឹម សុវណ្ណ អ្នក​នាំពាក្យ​គណបក្ស​សង្គ្រោះ​ជាតិ​​ដែល​បាន​ចូលរ​ួម​ពិធី​នេះ​ដែរ បាន​កោត​សរសើរ ” ការ​បូជា​របស់​រណសិរស្ស​រំដោះ​​ប្រជាពលរដ្ឋខ្មែរ ដើម្បី​ការ​ពារ​ទឹក​ដី​ យុត្តិធម៌ និង​ប្រឆាំង​​បរទេស​ឈ្លាន​ពាន​” ហើយ​បាន​មាន​ប្រសាសន៍​ថា កម្ពុជា​គួរ​តែ​រក្សា​ស្មារតី​ប្រុង​ប្រយ័ត្ន​ចំពោះ​ប្រទេស​ជិត​ខាង​ភាគ​ខាង​កើត​របស់​ខ្លួន​។ លោក​បាន​មាន​ប្រសាសន៍​ទៀត​ថា ” វៀតណាម​មិន​ដែល​មាន​បំណង​ល្អ​ជាមួយ​យើង​ទេ។ នៅ​ក្នុង​ប្រវត្តិសាស្ត្រ​ ពួក​គេ​គឺ​ជា​អ្នក​ដែល​ឈ្លានពាន និង​ត្រួត​ត្រា​កម្ពុជា​”។

ជំរឿន​បច្ចុប្បន្ន​លើ​ជនបរទេស​ដែល​​បានឈាន​ទៅ​ដល់​ការ​បណ្ដេញ​ជនជាតិ​វៀតណាម​ជាង​១៦០​នាក់​ ដែល​រស់​នៅ​ក្នុង​ប្រទេស​កម្ពុជា​ដោយ​ខុស​ច្បាប់​ទៅ​ស្រុក​វិញ​ ក៏ជា​របៀប​វារៈ​ដែល​ត្រូវ​បាន​លើក​ឡើង​ក្នុង​ពិធី​នេះ​ដែរ​។

លោក យឹម សុវណ្ណ បាន​មាន​ប្រសាសន៍​ថា ” យើង​មើល​ឃើញ​ជនជាតិ​វៀតណាម​​​មួយ​ចំនួន​ត្រូវ​បាន​បញ្ជូន​​ទៅ​ប្រទេស​របស់​ពួកគេ​វិញ ហើយនេះ​គឺ​ជា​ជំហាន​វិជ្ជមាន​ ប៉ុន្តែ​បើ​ប្រៀប​ធៀប​ទៅ​នឹង​ចំនួន​អ្នក​ដែល​រស់​នៅ​ខុស​ច្បាប់​ក្នុង​ប្រទេសកម្ពុជាវា​តិច​តួច​ណាស់​”។

លោក លឺ ឡាយស្រេង អតីត​​រដ្ឋមន្ត្រី​ក្រសួង​ព័ត៌មាន​នៃ​គណបក្ស​ហ្វុ៊នស៊ីនប៉ិច​ ក៏​បាន​រិះ​គន់​ជំរឿន​​បច្ចុប្បន្ន​នេះ​ដែរ​។ លោក​បាន​មាន​ប្រសាសន៍​ថា ” ខ្ញុំ​គិត​ថា គេ​នឹង​លើក​ឡើង​ថា មាន​ជនជាតិ​វៀតណាម​២០០.០០០​នាក់​នៅ​ក្នុង​ជំរឿន​នេះ ប៉ុន្តែ​វា​មាន​រាប់​លាននាក់​​ឯណោះ”។ លោក​បាន​អំពាវ​នាវ​ឲ្យអ្នក​ដែល​ចូលរួម​នៅ​ក្នុងពិធី​នេះ ” អនុវត្ត​តាម​គោល​ការណ៍ដើម​របស់​អ្នក​ដែល​បាន​​ស្លាប់ទៅ​”៕ សុខុម​​​​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស