កាលពីថ្ងៃសុក្រអង្គភាពប្រឆាំងអំពើពុករលួយបានឲ្យដឹងថាខ្លួនប្រហែលជាចាប់ផ្ដើមឃ្លាំមើលការដោះដូរអំណោយធំៗដែលជារឿយៗត្រូវបានធ្វើឡើងក្នុងចំណោមអ្នកជំនួញនិងអ្នកនយោបាយមានអំណាចក្នុងប្រទេសកម្ពុជានៅក្នុងពិធីមួយចំនួនដូចជាពិធីមង្គលការ ខួបកំណើតនិងពិធីផ្សេងៗទៀតជាដើម។
ថ្លែងនៅក្នុងពិធីចុះហត្ថលេខាលើអនុស្សរណៈនៃការយោគយល់គ្នាមួយរវាងអង្គភាពប្រឆាំងអំពើពុករលួយនិងក្រុមហ៊ុនធានារ៉ាប់រង Prudential (Cambodia) Life Insurance PLC ដែលប្ដេជ្ញាថានឹងរកស៊ីដោយស្មោះត្រង់លោក ឃាង សេងអនុប្រធានអង្គភាពប្រឆាំងអំពើពុករលួយបានថ្លែងថាកម្មវិធីនេះស្ថិតនៅក្នុងដំណើរការហើយ។
ដោយឆ្លើយតបទៅនឹងអ្នកយកព័ត៌មានម្នាក់ដែលនិយាយថាអង្គភាពប្រឆាំងអំពើពុករលួយធ្លាប់លើកឡើងពីគំនិតបែបនេះម្ដងរួចមកហើយកាលពីលើកមុននិងដែលសួរថាតើនៅពេលណាគំនិតនេះនឹងក្លាយជាការពិតលោក ឃាង សេង បានលើកឡើងថាជំហានដំបូងគឺត្រូវធ្វើសិក្ខាសាលាមួយស្ដីអំពីប្រធានបទនេះជាមុនសិន។
លោកឃាង សេង បានមានប្រសាសន៍ថា ” យើងធ្លាប់មើលឃើញមកហើយថាពលរដ្ឋខ្មែររបស់យើងតែងតែផ្ដល់អំណោយនៅក្នុងពិធីផ្សេងៗ”។
លោកបានសួរថា ” យើងត្រូវតែគិតថាតើសង្គមរបស់យើងចង់ឲ្យបញ្ហានេះបន្តបែបនេះទៀតឬថាតើសង្គមអាចផ្លាស់ប្ដូរផ្នត់គំនិតនេះហើយសម្រេចថាយើងចាំបាច់ត្រូវតែកំណត់អំពីតម្លៃពិតប្រាកដនៃអំណោយឬយ៉ាងណា?”។លោកបានបន្តថា ” តើអំណោយសមរម្យនោះមានទំហំប៉ុណ្ណាទៅ? វាទាមទារឲ្យមានការស្ទង់មតិដោយផ្អែកលើគំនិតនេះ។យើងប្រហែលជាធ្វើក្នុងពេលឆាប់ៗ”។
នៅពេលទាក់ទងកាលពីថ្ងៃសុក្រលោក ព្រាប កុលនាយកប្រតិបត្តិនៃអង្គការតម្លាភាពកម្ពុជាបានលើកឡើងថាវាមានវប្បធម៌យ៉ាងជាក់លាក់មួយក្នុងការដោះដូរអំណោយធំៗក្នុងចំណោមមន្ត្រីរដ្ឋាភិបាលដែលមានឋានៈខ្ពស់។
លោកព្រាប កុល បានមានប្រសាសន៍ថា ” នៅពេលកូនៗរបស់មន្ត្រីដែលមានឋានៈខ្ពស់រៀបចំពិធីជប់លៀងណាមួយមន្ត្រីដែលចូលរួមបានឲ្យអំណោយដូចជារថយន្តស៊េរីទំនើបផ្ទះ និងប័ណ្ណកម្មសិទ្ធិដីធ្លីជាដើម។តើលុយទាំងនេះបានមកពីណា?”។
លោកព្រាប កុលដែលអង្គការរបស់លោកបានដាក់ចំណាត់ថ្នាក់ឲ្យប្រទេសកម្ពុជាជាប់លេខទី១៦០ក្នុងចំណោមប្រទេស១៧៧ក្នុងសន្ទស្សន៍នៃការយល់ឃើញអំពីអំពើពុករលួយឆ្នាំ២០១៤របស់ខ្លួនបានលើកឡើងបន្តថាការផ្ដល់អំណោយបែបនេះគឺជា “ ការប្រព្រឹត្តអំពើពុករលួយដោយប្រយោល”។
លោកអំ សំអាតអ្នកគ្រប់គ្រងបច្ចេកទេសនៅអង្គការសិទិ្ធមនុស្សលីកាដូបានលើកឡើងថាអំណោយធំៗដែលត្រូវបានដោះដូរគ្នារវាងគ្រួសារមានអំណាចគឺជារឿយៗត្រូវបានធ្វើឡើងដើម្បីលាក់បាំងអំពើពុករលួយ។លោកបានមានប្រសាសន៍ថា ” យើងទទួលស្គាល់ថានេះជាសិទ្ធិរបស់បុគ្គលម្នាក់ៗក្នុងការផ្ដល់អំណោយប៉ុន្តែពួកគេតែងតែប្រើពិធីទាំងនេះដើម្បីផ្ដល់ឋានៈឬតំណែងថ្មីផងដែរ”៕ស៊ុយឈាង