32 C
Phnom Penh

អ្នក​​​កាប់​​​ឈើ​​​ម្នាក់​​​បាត់ខ្លួន និង​​​បួន​​​នាក់​​​ទៀត​​​រង​​​របួស​​​បន្ទាប់ពី​​​ត្រូវ​​​ទាហាន​​​ថៃ​​​បាញ់​​​ពេល​​​ទៅ​​​កាប់​​​ឈើ​​​នៅតាមព្រំដែន

ដោយ ឌឹ ខេមបូឌា ដេលី

បទវិភាគ

បុគ្គលិក​អង្គការ​សិទ្ធិមនុស្ស​ម្នាក់​បាន​​​និយាយ​កាលពី​ម្សិលមិញ​ថា ទាហាន​ថៃ​បាន​បាញ់​ និង​ធ្វើ​ឲ្យ​អ្នក​កាប់​ឈើ​ខុស​ច្បាប់​យ៉ាង​តិច​បួន​នាក់​រង​​​របួស​ធ្ងន់ ដែល​បាន​ឆ្លង​ចូល​ទឹកដី​ថៃពី​​ស្រុក​​​ត្រពាំង​ប្រាសាទ ខេត្ត​ឧត្តរមានជ័យ កាលពី​សប្ដាហ៍​​​មុន​។

យោង​តាម​លោក ស្រី ណារិន អ្នក​ឃ្លាំ​​​មើល​​​នៅ​អង្គការ​សិទ្ធិមនុស្ស​អាដ​​​ហុក​ប្រចាំ​ខេត្ត​ឧត្តរ​មានជ័យ បាន​ឲ្យ​ដឹង​ថា អ្នក​កាប់​ឈើ​មួយ​ក្រុម​មាន​គ្នា​ប្រហែល​១០​នាក់​បាន​ស្វែង​រក​ឈើ​គ្រញូង ដែល​ជា​ប្រភេទ​ឈើ​ប្រណីត​​បាន​​​ឆ្លង​កាត់​ព្រំ​ដែន​ក្នុង​ខេត្ត​ស៊ីសា​​​កេត​ ប្រទេស​ថៃ​កាលពី​យប់​ថ្ងៃ​ព្រហស្បតិ៍ នៅ​​​ពេល​នោះ​​​ទាហាន​បាន​​ប្រទះ​ឃើញ​ពួកគេ​ ហើយ​បាន​ចាប់​​​ផ្តើម​​​បាញ់​​​តែម្តង។

លោក ណារិន បាន​មាន​ប្រសាសន៍​​​ថា បួននាក់​ក្នុង​ចំណោម​​​ពួកគេ​ គឺ​ កាន់ កឿន អាយុ​៣៤ឆ្នាំ អាល់ បូរី អាយុ​៣៥ឆ្នាំ​ សុខ មឿន អាយុ​២១ឆ្នាំ និង​បុរស​ម្នាក់​ដែល​ស្គាល់​​​តែ​​​ឈ្មោះ​​​ថា ប៉ាន់​ ត្រូវ​បាន​បញ្ជូន​​​ទៅ​មន្ទីរពេទ្យ​មួយ​ស្ថិត​ក្នុង​ស្រុក​អន្លង់​វែង ចំណែក​អ្នកទី៥ ឈ្មោះ ឈុន ឡាស់ អាយុ​៣៥ឆ្នាំ បាន​បាត់​ខ្លួន។

លោក ណារិន បាន​មាន​ប្រសាសន៍​​​ថា “ខ្ញុំបាន​ទៅ​ជួប​ពួកគាត់​នៅ​មន្ទីរពេទ្យ​បង្អែក​​​អន្លង់វែង​ [កាល​​​ពីថ្ងៃ​​​សុក្រ]​​​​​​​​​ ខណៈ​​​ដែល​​​ពួក​​​គាត់​មក​សម្រាក​ព្យាបាល ហើយ​ទទួល​​​​​​​​​ព័ត៌​​​មាន​ពី​ពួកគាត់”។លោក​បាន​បន្ថែម​​​ថា អ្នក​​​កាប់​​​ឈើ​​​មួយ​ចំនួន​ត្រូវ​បាន​បាញ់​ជាច្រើន​លើក។

លោក​ ណារិន បាន​មាន​ប្រសាសន៍​​​ថា ” ក្រុម​អ្នក​ភូមិ​បន្ត​​លួច​ចូល​ក្នុង​ទឹក​ដីថៃ ដើម្បី​រក​កាប់​ឈើ​គ្រញូង ពីព្រោះ​ទាហាន​នៅ​ព្រំដែន​កម្ពុជា​…​អនុញ្ញាត​ឲ្យ​ពួកគាត់​ឆ្លង​កាត់​ ប្រសិន​បើ​​​ពួក​​​គាត់​បង់​ប្រាក់​សំណូក​”។

លោក​បាន​បន្ថែម​ថា ឈ្មួញ​កណ្ដាល​ដែល​ប្រចាំ​ការ​នៅ​ក្បែរ​ព្រំដែន​បាន​​​ជំរុញ​ឲ្យអ្នក​​​ភូមិ​ក្រីក្រ​ប្រថុយ​ប្រថាន​អាយុ​ជីវិត​ដើម្បី​ទៅ​រក​កាប់​ឈើ​​ដ៏​មាន​តម្លៃ​នេះ​។

ឧត្តម​សេនីយ៍​​​ត្រី នួន នៅ មេបញ្ជាការ​រង​យោធភូមិភាគ៤​នៃ​កង​យោធពល​ខេមរភូមិន្ទ​​បាន​មាន​ប្រសាសន៍​កាលពី​ម្សិលមិញ​ថា វា​ពិបាក​​​រក​ឲ្យ​​​ឃើញ​ថា នរណា​បាន​បាញ់​អ្នក​កាប់​ឈើណាស់ ពីព្រោះ​ហេតុការណ៍​នេះ​បាន​កើត​ឡើង​ក្នុង​ប្រទេស​ថៃ​ឯណោះ។

លោក​បាន​មាន​ប្រសាសន៍​ថា ” ការ​បាញ់​នេះ​បាន​កើតឡើង​នៅ​ក្នុង​ព្រៃ​របស់​ថៃ ដូច្នេះ​យើង​មិន​ដឹង​ពី​អ្វី​ដែល​បាន​កើត​ឡើង​ចំពោះ​​​ពួកគាត់​ឡើយ​។ យើង​បាន​ដឹង​ថា ពួកគាត់​រង​របួស​បន្ទាប់ពី​ពួកគាត់​បាន​រត់ចេញ​ពី​​​ព្រៃ​របស់​​​ថៃ​តែ​ប៉ុណ្ណោះ”។

ឧត្តម​សេនីយ៍​​​ត្រី នួន នៅ​ បាន​មាន​ប្រសាសន៍​ថា កង​កម្លាំង​របស់​យើង​ល្បាត​នៅ​តំបន់​នោះ​រាល់​ថ្ងៃ ប៉ុន្តែ​មិន​អាច​នៅ​ពេល​យប់​បាន​ទេ ដោយ​សារ​ភូមិ​​​សាស្ត្រ​​​មាន​​​លក្ខណៈ​ចោត​នៅ​តាម​ព្រំដែន។

លោក​បាន​មាន​ប្រសាសន៍​ថា ” យើង​មិន​អាច​ឈរ​ជើង​នៅ​ទីនោះ​ទាំង​ថ្ងៃ​ទាំង​យប់ ដើម្បី​រារាំង​មិន​ឲ្យ​មាន​ការ​​ឆ្លង​ចូល​ខុស​​​ច្បាប់​​​បាន​ទេ ពីព្រោះ​មិន​មានការ​​​ផ្គត់ផ្គង់​ទឹក​​សម្រាប់​ទាហាន​​​​របស់​យើង​​​ដែល​យក​តែ​បាយ​កញ្ចប់​ និង​ទឹក​ទៅ​តំបន់​ព្រំដែន​នៅ​វេលា​ព្រឹក ហើយ​ត្រឡប់​មក​បន្ទាយ​វិញ​នៅ​​​ពេល​ល្ងាច​​​​​​តែប៉ុណ្ណោះ”៕ សារុន​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស