អ្នកភូមិប្រហែល៣០០នាក់មកពីសហគមន៍ចំនួន១០នៅក្នុងខេត្តព្រះសីហនុ បាននាំគ្នាបិទផ្លូវនៅខាងមុខសាលាខេត្តអស់រយៈពេលជាង២ម៉ោងកាលពីម្សិលមិញ ដើម្បីទាមទារឲ្យមានការធ្វើអន្តរាគមន៍នៅក្នុងវិវាទដីធ្លីរបស់ពួកគាត់។ អ្នកភូមិបានចាប់ផ្តើមបិទផ្លូវមុនម៉ោង១១ព្រឹក ហើយបានបញ្ចប់ការតវ៉ារបស់ខ្លួននៅម៉ោងប្រហែល១រសៀល បន្ទាប់ពីលោក ឈិត សុខុន អភិបាលខេត្តបានទទួលយកញត្តិរបស់ពួកគាត់ ហើយបានជួបជាមួយតំណាងអ្នកភូមិដែលប្ដេជ្ញាថា នឹងធ្វើការតវ៉ានៅក្នុងរាជធានីភ្នំពេញបន្ថែមទៀតប្រសិនបើការតវ៉ារបស់ពួកគាត់មិនទទួលបានដំណោះស្រាយទេនោះ។
ក្រុមអ្នកភូមិទាំងនេះរួមមានសហគមន៍ចំនួនបីមកពីសង្កាត់រាម ខណ្ឌព្រៃនប់ ដែលបច្ចុប្បន្នកំពុងមានវិវាទដីធ្លីជាមួយក្រុមហ៊ុនចិន ឈ្មោះ Yijea Investment Group ដែលទទួលបានសិទ្ធិកាន់កាប់ដីសម្បទានសេដ្ឋកិច្ចកាលពីឆ្នាំ២០០៤ដើម្បីអភិវឌ្ឍតំបន់ទេសចរណ៍មួយនៅលើដីទំហំ៣.៣០០ហិកតា នៅក្នុងឧទ្យានជាតិរាម។
លោក កែវ ពិសិដ្ឋ តំណាងមកពីសហគមន៍វាលចន្ទី នៅក្នុងសង្កាត់រាមបាននិយាយថា អ្នកភូមិបានតស៊ូជាមួយក្រុមហ៊ុន Yijea Investment Group ចាប់តាំងពីឆ្នាំ២០០៧មកម្លេ៉ះ បន្ទាប់ពីត្រូវបានបណ្ដេញចេញដោយគ្មានសំណងពីដីធ្លីដែលពួកគាត់បានរស់នៅតាំងពីឆ្នាំ១៩៩០មក។
លោកបាននិយាយថា “ក្រុមហ៊ុនមួយបានប្លន់យកដីធ្លីរបស់យើងដោយគ្មានការផ្តល់ប្រាក់សំណង ហេតុដូច្នេះខ្ញុំជឿជាក់ថា ឯកឧត្តមអភិបាលខេត្ត [ឈិត សុខុន] នឹងធ្វើអន្តរាគមន៍ក្នុងវិវាទដីធ្លីនេះ”។
លោក ណាម ថេន តំណាងអ្នកភូមិមួយទៀតមកពីសហគមន៍អូរកម្ពុជា ដែលក៏មានជាប់ពាក់ព័ន្ធក្នុងវិវាទដីធ្លីជាមួយក្រុមហ៊ុន Yijea Investment Group ដែរនោះបានឲ្យដឹងថា សមាជិកសហគមន៍នាំគ្នាតវ៉ានេះ ព្រោះក្រុមហ៊ុនបានបិទផ្លូវប្រវែង១០គីឡូម៉ែត្រកាលពីដើមឆ្នាំនេះ។
លោកបាននិយាយថា “តាំងពីខែមេសាមក ក្រុមហ៊ុនបានបិទផ្លូវប្រវែង១០គីឡូម៉ែត្រចន្លោះសហគមន៍ និងក្រុមហ៊ុន។ វាផ្តល់ការលំបាកដល់អ្នកភូមិក្នុងការធ្វើដំណើរ”។ លោកបានបន្ថែមថា ប្រសិនបើអាជ្ញាធរខេត្តមិនចេញបទបញ្ជាឲ្យក្រុមហ៊ុនឈប់បិទផ្លូវនៅក្នុងរយៈពេលពីរខែទេនោះ សមាជិកនៃសហគមន៍របស់គាត់ នឹងធ្វើដំណើរមករាជធានីភ្នំពេញហើយធ្វើការតវ៉ាខាងមុខរដ្ឋសភា។
កាលពីខែសីហា ដោយខឹងចំពោះអ្នកភូមិដែលធ្វើដំណើរមករាជធានីភ្នំពេញចេះតែច្រើនឡើងៗ ដើម្បីតវ៉ា ចំពោះការបាត់បង់ដីធ្លីរបស់ពួកគាត់ លោកនាយករដ្ឋមន្ត្រី ហ៊ុន សែន បានចេញបទបញ្ជាឲ្យមន្ត្រីមូលដ្ឋានដោះស្រាយវិវាទដីធ្លីតាមមូលដ្ឋានរបស់ខ្លួន បើពុំដូច្នេះទេត្រូវបញ្ឈប់ពីតំណែង លោកស្រី ប្រាក់ ចាន់សុខា អភិបាលរងខេត្តបានបញ្ជាក់ថា អាជ្ញាធរខេត្តបានទទួលញត្តិដែលមានស្នាមមេដៃរបស់តំណាងអ្នកភូមិចំនួន១.១០៥គ្រួសារដែលរងផលប៉ះពាល់ដោយសារវិវាទដីធ្លី។ លោកស្រីបានលើកឡើងថា លោកស្រីនឹងបញ្ជូនមន្ត្រីឲ្យទៅពិនិត្យមើលឲ្យបានលម្អិតលើវិវាទដីធ្លីនេះ៕ ស៊ុយឈាង