តំណាងសហគមន៍ជនជាតិដើមភាគតិចទំពួនក្នុងខេត្តរតនគិរី បានដាក់ពាក្យបណ្ដឹងពីរដាច់ដោយឡែកពីគ្នាទៅអាជ្ញាធរមូលដ្ឋានកាលពីសប្ដាហ៍មុន ចោទប្រកាន់មន្ត្រីមន្ទីរបរិស្ថានមួយក្រុមមានគ្នាប្រាំនាក់ថា បានជំរិតទារប្រាក់បន្ទាប់ពីមន្ត្រីទាំងនោះដែលតាមចោទថា បានឃើញអ្នកភូមិជនជាតិដើមភាគតិចដាក់អន្ទាក់សត្វខុសច្បាប់ក្នុងដែនជម្រកសត្វព្រៃ ហើយបានជំរិតទារប្រាក់តែម្តង។
លោក គង់ ស្រ៊ុន អភិបាលស្រុកលំផាត់បានមានប្រសាសន៍កាលពីថ្ងៃអាទិត្យថា អ្នកភូមិជនជាតិដើមភាគតិចទំពួនប្រាំពីរនាក់មកពីឃុំកាឡែង ស្រុកលំផាត់ បានដាក់ពាក្យបណ្ដឹងទៅអាជ្ញាធរស្រុកកាលពីថ្ងៃព្រហស្បតិ៍ បន្ទាប់ពីគេឃើញពួកគាត់ដាក់អន្ទាក់សត្វពីរលើកនៅក្នុងដែនជម្រកសត្វព្រៃលំផាត់កាលពីដើមសប្ដាហ៍នេះ។
លោក ស្រ៊ុន បានមានប្រសាសន៍ថា នៅក្នុងពាក្យបណ្ដឹងមួយ អ្នកភូមិពីរនាក់បានចោទឧទ្យានុរក្ស
នៅមន្ទីរបរិស្ថានប្រាំនាក់ថា បានជំរិតទារប្រាក់ចំនួន៣០០.០០០រៀល។ នៅក្នុងពាក្យបណ្ដឹងទី២នាក់ភូមិប្រាំនាក់បានចោទមន្ត្រីដដែលនេះថា បានជំរិតទារប្រាក់ចំនួន៦០០.០០០រៀលពីពួកគាត់។
លោក ស្រ៊ុន បានមានប្រសាសន៍ថា “អ្នកភូមិទាំងនេះមានកំហុស ពីព្រោះពួកគាត់បរបាញ់សត្វនៅក្នុងដែនជម្រកសត្វព្រៃ។ ប៉ុន្តែមន្ត្រីបរិស្ថានគួរចេញវិក្កយបត្រដល់ពួកគាត់ ដូច្នេះពួកគាត់មិនប្រឈមនឹងការចោទប្រកាន់ពីបទជំរិតទារប្រាក់ឡើយ។
លោក ស្រ៊ុន បានមានប្រសាសន៍ថា នៅក្នុងពាក្យបណ្ដឹងទាំងនោះ អ្នកភូមិប្រាប់តែឈ្មោះដែលគេហៅមន្ត្រីពីរនាក់នោះថា ឈ្មោះ អឿន និង ឃន ដោយលើកឡើងថា លោកមិនដឹងឈ្មោះពេញរបស់មន្ត្រីទាំងពីរនាក់នេះទេ។
លោកបានបន្ថែមថា នៅថ្ងៃព្រហស្បតិ៍ លោកនឹងសាកសួរលោក ធិន ង៉ោល អនុប្រធានដែនជម្រកសត្វព្រៃលំផាត់ ជុំវិញពាក្យបណ្ដឹងទាំងនេះ។
លោក ធិន ង៉ោល បានមានប្រសាសន៍កាលពីម្សិលមិញថា មន្ត្រីឈ្មោះ អឿន មិនបានធ្វើការឲ្យលោកទេ ប៉ុន្តែមន្ត្រីម្នាក់ទៀតដែលលោកស្គាល់ថា ឈ្មោះ នៅ ឃន បានធ្វើការឲ្យលោក។
កាលពីថ្ងៃអាទិត្យ លោក ង៉ោល បានច្រានចោលការអះអាងរបស់អ្នកដាក់អន្ទាក់សត្វដែលថា កូនចៅរបស់លោកមានកំហុសពីបទជំរិតទារប្រាក់នោះ។ លោកបានមានប្រសាសន៍ថា ” មន្ត្រីរបស់យើងមិនបានជំរិតទារប្រាក់ពីអ្នកភូមិទាំងនោះទេ។ ពួកគេគ្រាន់តែតម្រូវឲ្យពួកគាត់បង់ប្រាក់ពិន័យតែប៉ុណ្ណោះ”។
បុរសម្នាក់ក្នុងចំណោមបុរសដែលបានដាក់ពាក្យបណ្ដឹងកាលពីថ្ងៃព្រហស្បតិ៍ ឈ្មោះ ខ្យង អាន់ បាននិយាយថា លោកនិងអ្នកភូមិបួននាក់ទៀតបានដាក់អន្ទាក់សត្វក្នុងដែនជម្រកសត្វព្រៃនេះកាលពីដើមសប្ដាហ៍មុន ស្រាប់តែមន្ត្រីប្រាំនាក់បានមកជិតពួកគាត់ដោយដកកាំភ្លើងភ្ជង់ ហើយជំរិតទារប្រាក់។
លោក អាន់ បានមានប្រសាសន៍ថា ” មន្ត្រីបីនាក់ក្នុងចំណោមមន្ត្រីទាំងប្រាំនាក់នោះបានយកកាំភ្លើងភ្ជង់ពួកយើង ហើយបានបញ្ជាឲ្យយើងដាក់កាំបិតផ្គាក់ និងពូថៅចុះ”។
លោកបានបន្ថែមថា ” ពួកគេបានសុំឲ្យយើងបង់ប្រាក់៦០០.០០០រៀល ហើយយើងសុខចិត្តបង់ឲ្យ១៥០.០០០រៀល តែពួកគេមិនព្រម ហើយបានរឹបអូសយកម៉ូតូរបស់ពួកយើងមួយគ្រឿង”៕ សារុន