តំណាងសហជីពប្រាំនាក់ត្រូវបានកោះហៅឲ្យមកបង្ហាញខ្លួននៅតុលាការនៅចុងខែនេះដើម្បីធ្វើការសាកសួរ បន្ទាប់ពីមានការប៉ះទង្គិចគ្នារវាងកម្មករនិងអ្នកគ្រប់គ្រងនៅរោងចក្រមួយក្នុងខេត្តកំពង់ចាមកាលពីសប្តាហ៍មុនដែលបានបណ្តាលឲ្យអ្នកមើលការខុសត្រូវបីនាក់រងរបួស។
កម្មករប្រហែល២.០០០នាក់ដែលបានតវ៉ានឹងការបណ្តេញពួកគាត់ចេញពីរោងចក្រស្បែកជើង Juhui នៅក្នុងស្រុកជើងព្រៃកាលពីថ្ងៃច័ន្ទសប្តាហ៍មុននោះ បានសម្រុកចូលទៅក្នុងបរិវេណរោងចក្រ ហើយបានគប់ដុំថ្មដាក់អ្នកគ្រប់គ្រងជនជាតិតៃវ៉ាន់ បណ្តាលឲ្យពួកគាត់បីនាក់រងរបួសក្បាល។
កម្មករទាំងនោះត្រូវបានបណ្តេញចេញកាលពីថ្ងៃទី១៦ ខែកញ្ញា បន្ទាប់ពីមិនអើពើនឹងសេចក្តីបង្គាប់របស់តុលាការដែលបង្គាប់ឲ្យពួកគាត់បញ្ចប់ការធ្វើកូដកម្មជុំវិញការទាមទារដំឡើងប្រាក់ឈ្នួល លក្ខខណ្ឌការងារ ដែលបានចាប់ផ្តើមកាលពីថ្ងៃទី១ ខែកញ្ញា។
ឯកសារដែលបានផ្តល់ឲ្យកាលពីថ្ងៃអាទិត្យដល់តំណាងរោងចក្រប្រាំនាក់មកពីសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា(ស៊ីខៅឌូ) បានកោះហៅក្រុមអ្នកតំណាងទាំងនេះទៅសាលាដំបូងខេត្តកំពង់ចាមចំពោះ “ការបដិសេធមិនអនុវត្តតាមសេចក្តីបង្គាប់របស់តុលាការ ហើយញុះញង់កម្មករឲ្យចូលរួមធ្វើកូដកម្ម”។
ដីកាកោះដែលចេញដោយលោក ផាន់ សុភក្ត្រ ព្រះរាជអាជ្ញារងអមសាលាដំបូងខេត្តកាលពីថ្ងៃទី១០ ខែតុលា បានកោះហៅលោក ហេត ហ៊ុន ម៉ុន សារ៉ែម ខៃ ចាន់ថន អាត ស៊ីណា និង ហេត ឆេង ឲ្យមកបង្ហាញខ្លួននៅតុលាការនៅថ្ងៃទី២៤ខែតុលា។
លោក ស៊ីណា បានបដិសេធកាលពីម្សិលមិញថា លោក ឬសមាជិកសហជីពផ្សេងទៀតមិនបានធ្វើអ្វីខុសឡើយ។
លោកបានមានប្រសាសន៍ថា “ដីកាកោះហៅនេះចោទប្រកាន់ពួកយើងថា បានញុះញង់កម្មករ ហើយមិនអនុវត្តតាមសេចក្តីបង្គាប់របស់តុលាការ ប៉ុន្តែវាគ្រាន់តែជាការគំរាមកំហែង ដើម្បីឲ្យសហជីពឈប់ដឹកនាំកូដកម្មតែប៉ុណ្ណោះ”។
កាលពីម្សិលមិញ កម្មករប្រហែល១.៥០០នាក់បានបន្តកូដកម្មរបស់ខ្លួននៅក្រៅរោងចក្រនេះ ខណៈដែលនគរបាលនិងកងរាជអាវុធហត្ថប្រហែល៥០នាក់បានយាមនៅច្រកចូល។
លោក ស៊ីណា បានមានប្រសាសន៍ថា ការតវ៉ាដែលបន្តនេះធ្វើឡើងបន្ទាប់ពីការពិភាក្សាមិនត្រូវរ៉ូវគ្នាកាលពីថ្ងៃសុក្រ នៅពេលតំណាងសហជីពបានដើរចេញពីកិច្ចប្រជុំ បន្ទាប់ពីរោងចក្របានលើកឡើងថា រោងចក្រនឹងចរចាដោយផ្ទាល់ជាមួយកម្មករ។
លោក តេង សម្បត្តិ ប្រធានរដ្ឋបាលរោងចក្រ Juhui បានបញ្ជាក់ថា រោងចក្របានដាក់ពាក្យបណ្តឹងទៅតុលាការ។
លោកបានមានប្រសាសន៍ថា “កម្មករមានសិទ្ធិធ្វើការតវ៉ានៅមុខរោងចក្ររបស់យើង ប៉ុន្តែយើងបានអំពាវនាវឲ្យពួកគាត់កុំបង្កអំពើហិង្សាដល់ទ្រព្យសម្បត្តិរបស់រោងចក្រ”។
លោក សម្បត្តិ ក៏បានមានប្រសាសន៍ផងដែរថា ការអះអាងរបស់កម្មករដែលថា អ្នកគ្រប់គ្រងរោងចក្របានទះកំផ្លៀងអ្នកតវ៉ាជាស្ត្រីម្នាក់ ដោយបង្កឲ្យមានការប៉ះទង្គិចគ្នាកាលពីសប្តាហ៍មុននោះ គឺមិនពិតឡើយ៕សារុន