មន្ត្រីតុលាការ និងមន្ត្រីកងរាជអាវុធហត្ថបានឲ្យដឹងកាលពីម្សិលមិញថា យុវជនអាយុ១៩ឆ្នាំម្នាក់ដែលត្រូវបានចាប់ខ្លួនកាលពីសប្ដាហ៍មុនបានសារភាពចំពោះការសម្លាប់អតីតមន្ត្រីកងរាជអាវុធហត្ថម្នាក់កាលពីថ្ងៃទី៥ ខែកញ្ញា នៅក្នុងរាជធានីភ្នំពេញ ព្រមទាំងសម្លាប់មេការក្រុមហ៊ុនចម្ការកៅស៊ូម្នាក់ទៀតក្នុងខេត្តមណ្ឌលគិរីកាលពីឆ្នាំមុន។
លោក អុ៊ំ សុភក្ត្រ ព្រះរាជអាជ្ញារងអមសាលាដំបូងរាជសាលាដំបូងរាជធានីភ្នំពេញបានមានប្រសាសន៍ថា អេង សៀង អាយុ១៩ឆ្នាំបានសារភាពចំពោះការបាញ់សម្លាប់លោក នូ គឹមសាន អតីតមន្ត្រីកងរាជអាវុធហត្ថខេត្តព្រៃវែង អំឡុងការសាកសួរនៅតុលាការកាលពីម្សិលមិញ។
ព្រះរាជអាជ្ញារងរូបនេះបានមានប្រសាសន៍ថា “យុវជនរូបនេះបានសារភាពថា ខ្លួនបានប្រព្រឹត្តបទឧក្រិដ្ឋនោះ។ យើងបានបញ្ជូនជននេះទៅឲ្យចៅក្រមស៊ើបសួរដើម្បីសាកសួរបន្ថែម។ ខ្ញុំបានស្នើឲ្យចៅក្រមឃុំខ្លួនជននេះបណ្ដោះអាសន្នដើម្បីរង់ចាំការកាត់ក្តី”។
លោក ផាន់ តារាវុធ មេបញ្ជាការរងកងរាជអាវុធហត្ថបានមានប្រសាសន៍ថា ចៅក្រម តាំង ស៊ុនឡាយ បានចោទប្រកាន់យុវជន អេង សៀង ពីបទមនុស្សឃាតដោយគិតទុកជាមុន និងពីបទប្រើប្រាស់អាវុធខុសច្បាប់។
សាកសពត្រូវគ្រាប់កាំភ្លើងសុសរបស់លោក នូ គឹមសាន ត្រូវបានប្រទះឃើញកាលពីថ្ងៃទី៦ ខែកញ្ញា នៅក្នុងដីឡូត៍មួយកន្លែងក្នុងខណ្ឌឫស្សីកែវ រាជធានីភ្នំពេញ។
លោក តារាវុធ បានមានប្រសាសន៍ថា យុវជន អេង សៀង ត្រូវបានចាប់ខ្លួនពីបទមនុស្សឃាតកាលពីថ្ងៃព្រហស្បតិ៍ នៅក្នុងខេត្តកំពង់ស្ពឺ។
យោងតាមលោក តារាវុធ បានឲ្យដឹងថា លោក នូ គឹមសាន ដែលបានងាកទៅជួញដូរប្រមាត់ខ្លាឃ្មុំ និងក្រពះកាំប្រមា និងសរីរាង្គសត្វព្រៃដទៃទៀត បន្ទាប់ពីឈប់ធ្វើកងរាជអាវុធហត្ថ បានណាត់ជួបយុវជន អេង ស៊ាង កាលពីថ្ងៃទី៥ ខែកញ្ញា នៅរង្វង់មូលមួយកន្លែងនៅកាំកូស៊ីធី ក្នុងរាជធានីភ្នំពេញ ដើម្បីពិភាក្សាពីការរកស៊ីជាមួយថៅកែជនជាតិចិន ដែលគេមិនស្គាល់អត្តសញ្ញាណរបស់ជនសង្ស័យរូបនេះ”។
លោកបានមានប្រសាសន៍ថា ថៅកែរបស់ អេង សៀង បានចេញបញ្ជា ហើយចង់ជួបលោក នូ គឹមសាន នៅដីឡូត៍មួយកន្លែងក្នុងខណ្ឌឫស្សីកែវនៅល្ងាចថ្ងៃដដែលនោះ។
យោងតាមលោក តារាវុធ បានឲ្យដឹងថា ប៉ុន្តែបន្ទាប់ពីយុវជន អេង សៀង និងលោក នូ គឹមសាន បានបើករថយន្តទៅដល់ដីឡូត៍នោះដោយជិះរថយន្តតូយ៉ូតាហាយឡិនឌ័រ របស់ជនរងគ្រោះ ហើយបានរង់ចាំជាច្រើនម៉ោង ហើយលោក នូ គឹមសាន បានសម្រេចចាកចេញ។ លោកបានបន្តថា ត្រង់ចំណុចនេះហើយ យុវជន អេង សៀង ដែលអង្គុយនៅកៅអីខាងក្រោយបានបាញ់តែម្ដង។
លោកបានមានប្រសាសន៍ថា ” ជនសង្ស័យរូបនេះបានបាញ់ជនរងគ្រោះពីក្រោយ ស្លាប់តែម្តងដោយត្រូវចំក្បាលបីគ្រាប់ និងចំដងខ្លួនបួនគ្រាប់”។
លោក តារាវុធ បានមានប្រសាសន៍ថា បន្ទាប់មកយុវជន អេង សៀង បានយករថយន្តទំនើបនោះទៅលាងសម្អាត ហើយបានយកទៅបញ្ចាំនៅហាងបញ្ចាំមួយនៅថ្ងៃបន្ទាប់ក្នុងតម្លៃ៩.០០០ដុល្លារ។
លោកបានមានប្រសាសន៍ថា អំឡុងការសាកសួរកាលពីម្សិលមិញ យុវជន អេង សៀង ត្រូវបានសួរថា តើខ្លួនមានពិរុទ្ធភាពពីបទឧក្រិដ្ឋផ្សេងទៀតឬយ៉ាងណា ត្រង់ចំណុចនេះយុវជនរូបនេះក៏បានសារភាពថា ខ្លួនបានសម្លាប់មេការជនជាតិចិនម្នាក់នៅចម្ការកៅស៊ូមួយនៅក្នុងខេត្តមណ្ឌលគិរីកាលពីឆ្នាំមុនផងដែរ។
លោកបានមានប្រសាសន៍ថា ” យុវជននេះបានសារភាពថា ខ្លួនបានបាញ់សម្លាប់មេការជនជាតិចិន…ពីព្រោះខ្លួនមានកំហឹងបន្ទាប់ពីបុរសជនជាតិចិនរូបនេះបានបណ្ដេញខ្លួនចេញពីការងារ ហើយបានបង្ខំឲ្យកម្មករខ្មែរធ្វើការថែមម៉ោង”។ លោកបានបន្ថែមថា លោកមិនចាំឈ្មោះ ឬអាយុមេការនោះទេ៕ សារុន