33 C
Phnom Penh

គេ​​​សង្ឃឹម​​​ថាការ​​​ផ្តល់​​​ឱកាស​​​​​​ប្រឡង​​​លើក​​​ទី​​​២​​​​​​ នឹង​មានសិស្ស​​​ប្រឡង​​​ជាប់​​​ច្រើន​​​

ដោយ ឌឹ ខេមបូឌា ដេលី

បទវិភាគ

នៅ​​​មុន​​​ថ្ងៃ​​​ប្រឡង​​​សញ្ញាបត្រ​​​មធ្យម​​​សិក្សា​​​​ទុតិយភូមិ​​​លើក​​​ទី​​​២​​​ក្នុង​​​សប្តាហ៍​​​នេះ ជៀប ស្រី​​​ពេជ្រ​​​ បាន​​​ត្រៀម​​​ខ្លួន​​​ស្ទើរ​​​តែ​​​ដូច​​​ទៅ​​​នឹង​​​ការ​​​​​​ត្រៀម​​​សម្រាប់​​​ការ​​​ប្រឡង​​​​​​លើក​​​ទី​​​១​​​កាល​​​ពី​​​ពីរ​​​ខែ​​​មុន​​​នេះ​​​។​​​ នាង​​​បាន​​​ឲ្យ​​​ដឹង​​​ថា ការ​​​លំបាក​​​​​​បន្ថែម​​​តែ​​​មួយ​​​គត់​​​ដែល​​​នាង​​​ត្រូវ​​​ជម្នះ​​​​​​នៅ​​​ពេល​​​នេះ​​​គឺ​​​ការ​​​ភ័យ​​​ខ្លាច​​​។

សិស្ស​​​អាយុ​​​១៨​​​ឆ្នាំ​​​រូប​​​នេះ​​​បាន​​​និយាយ​​​ទាក់ទិន​​​នឹង​​​ការ​​​ប្រឡង​​​លើក​​​ទី​​​១​​​កាល​​​ពី​​​ខែ​​​សីហា​​​ បន្ទាប់​​​ពី​​​នាង​​​បាន​​​ប្រគល់​​​​​​ក្រដាស​​​ប្រឡង​​​របស់​​​នាង​​​កាល​​​ពី​​​ម្សិល​​​មិញ នៅ​​​វិទ្យាល័យ​​​ជា ស៊ីម សន្ធរម៉ុក ក្នុង​​​រាជ​​​ធានី​​​ភ្នំពេញ​​​ថា “យើង​​​ខ្លាច​​​អ្នក​​​អង្កេត​​​ការណ៍​​​មក​​​ពី​​​[អង្គភាព​​​ប្រឆាំង​​​អំពើ​​​ពុក​​​រលួយ​​​] ខ្លាំង​​​ណាស់​​​”។

នាង​​​បាន​​​និយាយ​​​បន្ត​​​ថា “សំណួរ​​​ជា​​​ច្រើន​​​ខ្ញុំ​​​សុទ្ធ​​​តែ​​​បាន​​​ដឹង​​​ចម្លើយ​​​ ប៉ុន្តែ ខ្ញុំ​​​មាន​​​​​​អារម្មណ៍​​​ថា ខ្ញុំ​​​មិន​​​អាច​​​ផ្តោត​​​អារម្មណ៍ និង​​​សរសេរ​​​បាន​​​ដោយ​​​សេរី​​​ឡើយ​​​ ព្រោះ​​​អ្នក​​​អង្កេត​​​ការណ៍​​​នឹង​​​​​​ឈរ​​​ឃ្លាំ​​​មើល​​​ខ្ញុំ​​​ ហើយ​​​សម្លឹង​​​មក​​​ខ្ញុំ​​​​​​​​​មិន​​​ដាក់​​​​​​ភ្នែក​​​​​​​​​។ វា​​​គួរ​​​ឲ្យ​​​ខ្លាច​​​ណាស់​​​”។

ស្រីពេជ្រ ទទួល​​​បាន​​​ពិន្ទុ​​​៤៤​​​ភាគ​​​រយ​​​អំឡុង​​​ការ​​​ប្រឡង​​​លើក​​​ទី​​​១ ដែល​​​មាន​​​១០​​​មុខ​​​វិជ្ជា​​​ ពោល​​​គឺ​​​បាន​​​ត្រឹម​​​តែ​​​៣ភាគ​​​រយ​​​ប៉ុណ្ណោះ​​​នៃ​​​ពិន្ទុ​​​ដែល​​​ក្រសួង​​​អប់​​​រំ​​​ យុវជន​​​ និង​​​កីឡា​​​បាន​​​កំណត់​​​សម្រាប់​​​អ្នក​​​ដែល​​​​​​ប្រឡង​​​ជាប់ និង​​​ពិន្ទុ​​​ដែល​​​អាច​​​ចូល​​​រៀន​​​នៅ​​​មហា​​​វិទ្យាល័យ​​​បាន​​​។

ទោះ​​​ជា​​​យ៉ាង​​​ណា នៅ​​​លើក​​​នេះ ​​​នាង​​​បាន​​​និយាយ​​​ថា នាង​​​បាន​​​ត្រៀម​​​ខ្លួន​​​រួច​​​ជា​​​ស្រេច​​​ដើម្បី​​​កំុ​​​ឲ្យ​​​ខ្លួន​​​ឯង​​​ភ័យ​​​ខ្លាច​​​ចំពោះ​​​អ្នក​​​អង្កេត​​​ការណ៍​​​មក​​​ពី​​​​​​អង្គភាព​​​ប្រឆាំង​​​អំពើ​​​ពុក​​​រលួយ ដែល​​​ត្រូវ​​​គេ​​​បញ្ជូន​​​មក​​​ដើម្បី ត្រួត​​​ពិនិត្យ​​​ការ​​​ប្រឡង​​​ដែល​​​ពី​​​មុន​​​ៗ​​​មក​​​​​​មាន​​​តែ​​​ការ​​​លួច​​​ចម្លង​​​ និង​​​ការ​​​សូក​​​ប៉ាន់​​​​​​នោះ​​​។

នាង​​​បាន​​​និយាយ​​​ទៀត​​​ថា “នៅ​​​លើក​​​ទី​​​២​​​នេះ ​​​ខ្ញុំ​​​មិន​​​សូវ​​​ជា​​​ខ្លាច​​​ទេ​​​ ព្រោះ​​​ខ្ញុំ​​​ធ្លាប់​​​មាន​​​បទ​​​ពិសោធ​​​នៅ​​​​​​លើក​​​ទី​​​១​​​រួច​​​ហើយ​​​”។

ដោយ​​​សារ​​​តែ​​​លក្ខខណ្ឌ​​​តឹង​​​រឹុង​​​ថ្មី​​​នេះ ​​​បេក្ខជន​​​ជិត​​​៧៥​​​ភាគ​​​រយ​​​ក្នុង​​​ចំណោម​​​បេក្ខជន​​​ចំនួន​​​​​​៨៩​​​.៩៣៧​​​នាក់​​​​​​​​​បាន​​​ធ្លាក់​​​នៅ​​​ក្នុង​​​ការ​​​ប្រឡង​​​លើក​​​ទី​​​១គឺ​​​ជា​​​អត្រា​​​ប្រឡង​​​ជាប់​​​ទាប​​​បំផុត​​​ចាប់​​​តាំង​​​ពី​​​ឆ្នាំ​​​១៩៩៤​​​មក​​​ និង​​​ជា​​​ការ​​​ប្រឡង​​​ជាប់​​​ទាប​​​បំផុត​​​លើក​​​ទី​​​៣​​​ចាប់​​​តាំង​​​ពី​​​ឆ្នាំ​​​១៩៧៩​​​មក​​​។

បន្ទាប់​​​ពី​​​លទ្ធផល​​​ត្រូវ​​​បាន​​​ប្រកាស​​​ជា​​​សាធារណៈ​​​ លោក​​​នាយក​​​រដ្ឋ​​​​​​មន្ត្រី​​​ ហ៊ុន សែន បាន​​​ប្រកាស​​​ថា នឹង​​​មាន​​​ការ​​​ប្រឡង​​​ឡើង​​​វិញ​​​សម្រាប់​​​សិស្ស​​​ទាំង​​​អស់​​​ដែល​​​​​​ធ្លាក់​​​ លើក​​​លែង​​​​​​តែ​​​​​​អ្នក​​​ដែល​​​ត្រូវ​​​បាន​​​រក​​​ឃើញ​​​ថា មាន​​​បំណង​​​លួច​​​ចម្លង​​​តែ​​​ប៉ុណ្ណោះ​​​។

នៅ​​​ក្នុង​​​កិច្ច​​​សម្ភាស​​​មួយ​​​ បន្ទាប់​​​ពី​​​សេចក្តី​​​ប្រកាស​​​មួយ​​​​​​របស់​​​លោក ហ៊ុន សែន លោក ហង់​​​ ជួន ណារុ៉ន ​​​​​​​​​​​​ រដ្ឋ​​​មន្ត្រី​​​ក្រសួង​​​អប់​​​រំ​​​ យុវជន និង​​​កីឡា​​​​​​បាន​​​ការ​​​ពារ​​​សេចក្តី​​​សម្រេច​​​​​​​​​ឲ្យ​​​មាន​​​ការ​​​ប្រឡង​​​ឡើង​​​វិញ​​​នេះ​​​ ដោយ​​​លោក​​​បាន​​​លើក​​​ឡើង​​​ពី​​​ហេតុ​​​ផល​​​ថា​​​ វា​​​ជា​​​រឿង​​​ល្អ​​​បំផុត​​​នៅ​​​ក្នុង​​​ការ​​​បង្កើន​​​ចំនួន​​​អ្នក​​​​​​បញ្ចប់​​​ការ​​​សិក្សា​​​ថ្នាក់​​​ទី​​​១២ ព្រោះ​​​ថា​​​វា​​​​​​អាចធ្វើ​​​​​​ឲ្យ​​​សិស្ស​​​ត្រឡប់​​​ទៅ​​​ខិត​​​ខំ​​​រៀន​​​ឡើ​​​ង​​​វិញ​​​។

លោក ហង់ ជួន ណារ៉ុន បាន​​​មាន​​​​​​ប្រសាសន៍​​​ថា “យើង​​​មាន​​​មធ្យោបាយ​​​ពីរ​​​ដើម្បី​​​[បង្កើន​​​ចំនួន​​​សិស្ស​​​]​​​ ដែល​​​​​​ប្រឡង​​​ជាប់​​​។ ការ​​​កាត់​​​បន្ថយ​​​ពិន្ទុ​​​សម្រាប់​​​ការ​​​ប្រឡង​​​ជាប់​​​ គឺ​​​មិន​​​មែន​​​ជា​​​មធ្យោបាយល្អ​​​ដែល​​​ត្រូវ​​​អនុវត្ត​​​នោះ​​​ទេ​​​​​​ ប៉ុន្តែ ការ​​​បង្កើន​​​ចំណោះ​​​ដឹង​​​​​​ទើប​​​ជា​​​មធ្យោបាយ​​​ល្អ ដែល​​​ត្រូវ​​​ធ្វើ​​​”។

នៅ​​​ប៉ុន្មាន​​​ថ្ងៃ​​​ក្រោយ​​​ការ​​​ប្រឡង​​​លើក​​​​​​ដំបូង​​​ ក្រសួង​​​អប់​​​រំ​​​ យុវជន​​​ និង​​​កីឡា​​​បាន​​​បង្ហោះ​​​មេរៀន​​​សង្ខេប​​​នៅ​​​ក្នុង​​​មុខវិជ្ជា ​​​ដូច​​​​​ជា​​​គណិត​​​វិទ្យា​​​ រូប​​​វិទ្យា​​​ គីមីវិទ្យា និង​​​ជីវវិទ្យា​​​នៅ​​​លើ​​​គេ​​​ហ​​​ទំព័រ​​​របស់​​​ខ្លួន ដើម្បី​​​ជា​​​ជំនួយ​​​ដល់​​​បេក្ខ​​​ជន​​​នៅ​​​ក្នុង​​​ការ​​​ប្រឡង​​​លើ​​​ក​​​ទី​​​២​​​ ព្រោះ​​​ថា មុខ​​​វិជ្ជា​​​​​​ទាំង​​​នេះ​​​ពួក​​​គេ​​​ធ្វើ​​​មិន​​​បាន​​​ល្អ​​​ឡើយ​​​។

នៅ​​​ពេល​​​ទាក់​​​ទង​​​តាម​​​ទូរស័ព្ទ​​​កាល​​​ពី​​​ម្សិល​​​មិញ​​​ លោក ហង់ ជួន ណារ៉ុន ដែល​​​ធ្វើ​​​សេចក្តី​​​ព្រាង​​​នៃ​​​វិញ្ញាសា​​​​​​ខ្មែរ​​​ និង​​​ប្រវត្តិវិទ្យា​​​ដោយ​​​ខ្លួន​​​លោក​​​ផ្ទាល់​​​បាន​​​ឲ្យ​​​ដឹង​​​ថា សិស្ស​​​ណា​​​ដែល​​​មិន​​​បាន​​​ធ្វើ​​​តាម​​​ការ​​​ណែ​​​នាំ​​​តាម​​​អីុន​​​ធើណិត​​​នោះ​​​ទេ​​​នឹង​​​មិន​​​អាច​​​ទទួល​​​បាន​​​លទ្ធផល​​​ល្អ​​​ឡើយ​​​។

លោក​​​បាន​​​មាន​​​ប្រសាសន៍​​​ថា “មាន​​​សំណួរ​​​មួយ​​​ចំនួន​​​[នៅ​​​ពេល​​​ប្រឡង​​​] ដែល​​​ត្រូវ​​​បាន​​​ដក​​​ចេញ​​​ដោយ​​​ផ្ទាល់​​​ពី​​​មេរៀន​​​សង្ខេប​​​ទាំង​​​នោះ​​​។ ប៉ុន្តែ លំហាត់​​​ទាំង​​​នោះ​​​គឺ​​​តម្រូវ​​​ឲ្យ​​​មាន​​​​​​ការ​​​យល់​​​ដឹង​​​មិន​​​មែន​​​​​​គ្រាន់​​​តែ​​​ចម្លង​​​មក​​​នោះ​​​​​​ទេ​​​”។

រដ្ឋ​​​មន្ត្រី​​​រូប​​​នេះ​​​បាន​​​ទទួល​​​ស្គាល់​​​ថា ​​​មេរៀនសង្ខេបទាំងនេះអាចត្រូវអ្នកប្រឡង​​​យក​​​មក​​​ធ្វើ​​​ជា​​​ព្រីយ៉ុងដ៏មានប្រយោជន៍សម្រាប់ខ្លួន​​​ ប៉ុន្តែ​​​បើ​​​យោង​​​តាម​​​ព័ត៌​​​មាន​​​ដែល​​​លោក​​​ប្រមូល​​​បាន​​​មក​​​ទល់​​​ពេល​​​នេះ​​​ ចំនួន​​​សិស្ស​​​ដែល​​​ព្យាយាម​​​​​​លាក់​​​ព្រីយ៉ុង​​​ចូល​​​ក្នុង​​​បន្ទប់​​​ប្រឡង​​​គឺ​​​តិច​​​ជាង​​​ការ​​​ប្រឡង​​​លើក​​​ទី​​​១​​​ប្រហែល​​​ល​​​ពាក់​​​កណ្តាល។

នៅ​​​ពេល​​​ ​​​មនុស្ស​​​ពេញ​​​វ័យ​​​ចំនួន​​​ពីរ​​​នាក់​​​ត្រូវ​​​បាន​​​គេ​​​ចាប់​​​ខ្លួន​​​នៅ​​​ក្នុង​​​រាជ​​​ធានី​​​ភ្នំពេញ​​​ក្នុង​​​ថ្ងៃ​​​​​​ទី​​​១នៃ​​​ការ​​​ប្រឡង​​​លើក​​​ទី​​​២​​​កាល​​​ពី​​​ថ្ងៃ​​​ច័ន្ទ ដែល​​​ក្នុង​​​នោះ​​​មាន​​​ម្នាក់​​​ត្រូវ​​​បាន​​​ចាប់​​​​​​​​​ខ្លួន​​​ពី​​​បទ​​​លក់​​​ក្រដាស​​​ចម្លើយ​​​នៅ​​​ក្រៅ​​​សាលា​​​​​​ និង​​​ម្នាក់​​​ទៀត​​​ពី​​​បទ​​​ក្លែង​​​បន្លំ​​​ជា​​​អ្នក​​​អង្កេត​​​ការណ៍​​​នៅ​​​ក្នុង​​​សាលា​​​​​​នោះ លោក រស់​​​ សាលីន អ្នក​​​នាំ​​​ពាក្យ​​​ក្រសួង​​​អប់​​​រំ យុវជន និង​​​កីឡា បាន​​​លើក​​​ឡើង​​​ថា អង្គភាព​​​ប្រឆំាង​​​អំពើ​​​ពុក​​​រលួយ​​​ គឺ​​​មិន​​​សូវ​​​ជា​​​រវល់​​​ប៉ុន្មាន​​​ទេ​​​​​​កាល​​​ពី​​​ម្សិលមិញ​​​។

លោក​​​បាន​​​មាន​​​ប្រសាសន៍​​​ថា “ថ្ងៃ​​​នេះ​​​ គ្មាន​​​ព័ត៌​​​មាន​​​ពាក់​​​ព័ន្ធ​​​នឹង​​​​​​ការ​​​ប្រព្រឹត្ត​​​អំពើ​​​ពុក​​​រលួយ​​​អំឡុង​​​ការ​​​ប្រឡង​​​លើ​​​ក​​​ទី​​​២​​​​​​​​​​​​​​​​​​​​​​​​​​​​​​​​​​​​​​​​​​​​​ឡើយ​​​”។

ទាំង​​​លោក​​​ ហង់ ជួន ណារ៉ុន និង​​​លោក​​​ រស់​​​ សាលីន សុទ្ធ​​​តែ​​​បាន​​​បដិសេធ​​​មិន​​​ផ្ដល់​​​ការ​​​ព្យាករ​​​សម្រាប់​​​អត្រា​​​អ្នក​​​ប្រឡង​​​ជាប់​​​ក្នុង​​​ការ​​​ប្រឡង​​​លើក​​​ទី​​​២​​​នេះ​​​ឡើយ​​​។

ទោះ​​​ជា​​​យ៉ាង​​​ណា លោក រ៉ុង បញ្ញា សមាជិក​​​មួយ​​​រូប​​​នៃ​​​សមាគម​​​​​​គ្រូបង្រៀន​​​កម្ពុជា​​​ឯករាជ្យ​​​​​​បាន​​​លើក​​​ឡើង​​​កាល​​​ពី​​​ម្សិល​​​មិញ​​​ថា លោក​​​​​​រំពឹង​​​ថា អត្រា​​​នៃ​​​ការ​​​ប្រឡង​​​ជាប់​​​នឹង​​​កើន​​​ឡើង​​​បើ​​​ធៀប​​​នឹង​​​ការ​​​ប្រឡង​​​លើក​​​ទី​​​១​​​។ ​​​

​​​​​​​​លោក​​​បាន​​​លើក​​​ឡើង​​​ថា សិស្ស​​​ជា​​​ច្រើន​​​មាន​​​ការ​​​ភ្ញាក់​​​ផ្អើល​​​យ៉ាង​​​ខ្លាំង​​​ចំពោះ​​​ការ​​​រឹត​​​បន្តឹង​​​អំឡុង​​​ការ​​​ប្រឡង​​​លើក​​​ទី​​​១​​​​​​ ហើយ​​​ពួក​​​គេ​​​បាន​​​ស្ថិត​​​ក្រោម​​​សម្ពាធ​​​នៃ​​​អ្នក​​​អង្កេត​​​ការណ៍​​​។ ប៉ុន្តែ ដូច​​​ ស្រីពេជ្រ​​​ អ៊ីចឹង​​​ដែរ​​​លើក​​​នេះ​​​សិស្ស​​​សុទ្ធ​​​តែ​​​បាន​​​ត្រៀម​​​ខ្លួន​​​រួច​​​ជា​​​ស្រេច​​​។

លោក​​​បាន​​​លើក​​​ឡើង​​​ថា “ការ​​​ឃ្លាំ​​​មើល​​​របស់​​​អ្នក​​​អង្កេត​​​ការណ៍​​​មក​​​ពី​​​​​​អង្គភាព​​​ប្រឆាំង​​​អំពើ​​​ពុក​​​រលួយ ​​​គឺ​​​បាន​​​ដាក់​​​សម្ពាធ​​​យ៉ាង​​​ខ្លាំង​​​លើ​​​សិស្ស​​​ ហើយ​​​ពួកគេ​​​មិន​​​បាន​​​ត្រៀម​​​ខ្លួន​​​សម្រាប់​​​ការ​​​ឃ្លាំ​​​មើល​​​​​​បែប​​​នេះ​​​ទេ​​​​​អំឡុង​​​ប្រឡង​​​លើក​​​ទី​​​១​​​”។

សម្រាប់​​​ ស្រីពេជ្រ ដែល​​​ជឿ​​​ជាក់​​​ថា ​​​នឹង​​​ជាប់ការ​​​ប្រឡង​​​នេះ​​​ដើម្បី​​​ចូល​​​រៀន​​​មហា​​​វិទ្យា​​​ល័យ​​​រួច​​​ធ្វើ​​​ជា​​​គ្រូ​​​បង្រៀន​​​នោះ​​​ ការ​​​ប្រឡង​​​លើក​​​ទី​​​២​​​​​​នេះ​​​គឺ​​​ជា​​​ខ្សែ​​​ជីវិត​​​ដ៏​​​ចាំ​​​បាច់​​​មួយ​​​។

នាង​​​ក៏​​​ដូច​​​ជា​​​អ្នក​​​ដ៏ទៃ​​​ៗ​​​ទៀត​​​ដែរ​​​​​​មិន​​​ព្រួយ​​​បារម្ភ​​​អំពី​​​ច្បាប់​​​រឹត​​​បន្តឹង​​​ថ្មី​​​នៅ​​​មុន​​​​​​ថ្ងៃ​​​ប្រឡង​​​លើក​​​ទី​​​១​​​ឡើយ​​​។ នាង​​​បាន​​​និយាយ​​​ថា “គ្មាន​​​នរណា​​​ម្នាក់​​​នឹក​​​ស្មាន​​​ដល់​​​ថា មាន​​​​​អ្នក​​​អង្កេត​​​ការណ៍​​​យ៉ាង​​​ច្រើន​​​មក​​​ពី​​​អង្គភាព​​​ប្រឆាំង​​​អំពើ​​​ពុក​​​រលួយ​​​បែប​​​នេះ​​​នោះ​​​ទេ ហើយ​​​ក៏​​​នឹក​​​​​​ស្មាន​​​មិន​​​ដល់​​​ថា វា​​​​​​តឹង​​​រឹុង​​​យ៉ា​ង​​​នេះ​​​ដែរ​​​​​​។ សិស្ស​​​ជា​​​ច្រើន​​​​​​​​​​​​នឹង​​​ជាប់​​​ការ​​​ប្រឡង​​​លើក​​​នេះ​​​ ព្រោះ​​​ពួក​​​គេ​​​អាច​​​ផ្តោត​​​លើ​​​សំណួរ​​​បាន​​​ច្រើន​​​​​​មិន​​​ដូច​​​ពី​​​មុន​​​ដែល​​​ខ្លាច​​​តែ​​​អ្នក​​​អង្កេត​​​ការណ៍​​​នោះ​​​ទេ​​​”។

នៅ​​​ពេល​​​គេ​​​សួរ​​​នាង​​​ថា តើ​​​នាង​​​គិត​​​ថា ខ្លួន​​​ឯង​​​ធ្វើ​​​បាន​​​ល្អ​​​គ្រប់​​​គ្រាន់​​​ដែល​​​អាច​​​​​​ជាប់​​​ទៅ​​​រៀន​​​នៅ​​​មហាវិទ្យាល័យ​​​ដែរ​​​ ឬអត់​​​ នាង​​​បាន​​​និយាយ​​​ទាំង​​​ទឹក​​​មុខ​​​ញញឹម​​​​​​អៀន​​​ប្រៀន​​​ថា “ចាស លើក​​​នេះ​​​គ្មាន​​​បញ្ហា​​​ទេ​​​”៕​​​ស៊ុយ​​​ឈាង​​​

​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស