26 C
Phnom Penh

តុលាការ​ចោទប្រកាន់​បុរស​បី​នាក់​ពី​បទ​សម្លាប់​អ្នក​កាសែត​ម្នាក់

ដោយ ឌឹ ខេមបូឌា ដេលី

បទវិភាគ

មន្ត្រី​តុលាការ​ម្នាក់​បាន​លើក​ឡើង​ថា កាល​ពីម្សិល​មិញ​ សាលាដំបូង​ខេត្ត​ក្រចេះ​បាន​ចោទ​ប្រកាន់​បុរស​បី​នាក់​​ដែល​ត្រូវ​បាន​ចាប់ខ្លួន​ពី​បទ​សម្លាប់​លោក តាំង​ ទ្រី អាយុ​៤៩ឆ្នាំ​ជា​អ្នកកាសែត​ម្នាក់​ក្នុង​ស្រុក​ស្នួល កាល​ពី​ព្រឹក​ថ្ងៃអាទិត្យ ហើយ​បាន​បញ្ជូន​ទៅ​ពន្ធនាគារ​ខេត្ត​ដើម្បី​រង់​ចាំ​ការ​កាត់​ក្តី។

ការ​សម្លាប់​អ្នក​កាសែត​នេះ​បាន​បង្ក​ឲ្យ​មាន​ការ​ថ្កោល​ទោស​យ៉ាង​ខ្លាំង ពីព្រោះ​ជន​សង្ស័យ​ទាំងអស់​មក​ពី​កង​​កម្លាំង​សន្តិសុខ​ក្នុង​ប្រទេស​កម្ពុជា​។ អង្គការ​សិទ្ធិមនុស្ស​បាន​អំពាវ​នាវ​ឲ្យ​មាន​ស៊ើប​អង្កេត​ឲ្យ​បាន​ល្អិត​ល្អន់​ និង​ការ​កាត់​ក្តី​ដោយ​មិន​លម្អៀង​ដើម្បី​កែប្រែ​វប្បធម៌​និ​ទណ្ឌ​ភាព​ចំពោះ​បទ​ឧក្រិដ្ឋ​ដ៏​ឃោរ​ឃៅ​លើ​អ្នក​ដែល​ស៊ើប​អង្កេត​ការ​កាប់​ឈើ​ខុសច្បាប់។

លោក ទី សុវិនថាល់ ព្រះរាជ​អាជ្ញា​អម​សាលាដំបូង​ខេត្ត​បាន​មាន​ប្រសាសន៍​ថា “យើង​បាន​ចោទ​ប្រកាន់​ពួកគេ​ពី​បទ​មនុស្សឃាត។ នៅ​ទូទាំង​ប្រទេស​ ប្រជាពលរដ្ឋ​បាន​ដឹង​ពី​សកម្មភាព​របស់​ពួកគេ ហើយ​ពួកគេ​ទាំងអស់​ប្រឈម​នឹង​ការ​ជាប់ពន្ធនាគារ​យ៉ាងតិច​១០​ឆ្នាំ”។

ចុងចោទ​ទាំងនោះ​គឺ​ឈ្មោះ បែន ហៀង អាយុ​៣១ឆ្នាំ នាយ​ប៉ុស្តិ៍​ឃុំ​ស្រែ​ឈូក​ក្នុង​ស្រុក​កែវ សីមា ខេត្ត​មណ្ឌលគិរី លោក ឃឹម ភក្តី អាយុ​២៧ឆ្នាំ មន្ត្រី​កង​រាជ​អាវុធហត្ថ​រាជ​ធានី​ភ្នំពេញ និង​ជា​អតីត​អនុរក្ស​ព្រៃឈើ​ក្នុងស្រុក​កែវសីមា និង​ខ្មាន់​កាំភ្លើង​ឈ្មោះ ឡា ណារ៉ុង​​ អាយុ​៣២ឆ្នាំ អតីត​ទាហាន​កង​យោធពល​ខេ​មរ​ភូមិន្ទ​នៅ​ក្នុង​ខេត្ត​មណ្ឌលគិរី។

អ្នក​ទាំង​បី​នាក់​នេះ​បាន​សារភាព​ចំពោះ​បទ​ឧក្រិដ្ឋ​នេះ​នៅ​សន្និសីទ​កាសែត​មួយកាល​ពី​ថ្ងៃ​ច័ន្ទ​ ដោយ​អះ​អាង​ថា ពួកគេ​បាន​បាញ់​ប្រហារ​បន្ទាប់​ពី​ការ​ផឹក​ស៊ី​នៅ​ពេល​យប់។ ពួកគេ​បាន​និយាយ​ថា អ្នក​យក​ព័ត៌មាន​រូប​នេះ​បាន​គំរាម​បង្ហាញ​សកម្មភាព​កាប់​ឈើ​ខុស​ច្បាប់​របស់​ពួកគេ​នៅ​ព្រឹក​ថ្ងៃ​នោះ នៅ​ពេល​ពួក​គេ​មិន​ព្រម​ឲ្យ​ទូក​គាត់​ខ្ចី។

លោក សុវិន​ថាល់ បាន​មាន​ប្រសាសន៍​ថា “ប្រសិន​បើ​ពួកគេ​ខឹង​នឹង​អ្នក​យក​ព័ត៌មាន​នោះ​ចំពោះ​ការ​ព្យាយាម​ជំរិត​ទារ​ប្រាក់​ ឬ​អ្វី​ផ្សេង​ពី​ពួកគេ​នោះ ពួកគេ​គួរ​ដាក់ពាក្យ​បណ្តឹង​ទៅ​តុលាការ​ ប៉ុន្តែ​ផ្ទុយទៅវិញ​ ពួកគេ​បាញ់​សម្លាប់​គាត់​យ៉ាង​ឃោរ​ឃៅ​ទៅ​វិញ”។

លោក​បាន​សន្និដ្ឋាន​ថា ចៅក្រម​ស៊ើប​សួរ​នឹង​ចំណាយ​ពេល​យ៉ាង​តិច​ក៏​បី​ខែ​ដែរ​ដើម្បី​ព្យាយាម​កំណត់​មូលហេតុ​ពិត​ប្រាកដ​នៃ​ការ​បាញ់​សម្លាប់​នេះ។

ប៉ុន្តែ​មាន​ការ​បារម្ភ​ថា ការ​ចាប់ខ្លួន​និង​ការ​ចោទ​ប្រកាន់​ដ៏​ឆាប់​រហ័ស​បែបនេះ​មាន​ន័យ​ថា អាជ្ញាធរ​កំពុង​ការ​ពារ​​មន្ត្រី​កង​រាជ​អាវុធ​ហត្ថ​ជាន់​ខ្ពស់​នៅ​ក្នុង​ស្រុក​ស្នួល ដែល​មាន​ពាក្យ​ចចាម​​អារ៉ាម​ថា នៅ​ពីក្រោយ​ការ​រកស៊ី​កាប់​ឈើ​ខុស​ច្បាប់​នៅ​ក្នុង​តំបន់​នេះ។

លោកស្រី ឡូរ៉ា ឃីង (Laura King) អ្នក​គ្រប់គ្រង​ផ្នែក​ទំនាក់​ទំនង​នៅ​មជ្ឈមណ្ឌល​កម្ពុជា​ដើម្បី​ប្រព័ន្ធ​ផ្សព្វផ្សាយ​ឯក​រាជ្យ​បាន​មាន​ប្រសាសន៍​ថា ត្រូវ​ធ្វើការ​ស៊ើប​អង្កេត​ឲ្យ​បាន​ហ្មត់​ចត់​ដើម្បី​រក​ឲ្យ​ឃើញ​មូលហេតុ​នៃ​ការ​សម្លាប់​នេះ និង​ដើម្បី​ធានា​ថា អ្នក​ដែល​ពាក់ព័ន្ធ​ត្រូវ​យក​ទៅ​ផ្តន្ទា​ទោស។

លោក​ស្រី​បាន​មាន​ប្រសាសន៍​ថា “ប្រសិនបើ​យើង​មាន​តុលាការ​ឯក​រាជ្យ​ពិត​ប្រាកដ យើង​អាច​ទទួល​បាន​យុត្តិ​ធម៌​ពិត​ចំពោះ​ករណី​មនុស្សឃាត និង​ការ​បំភិត​បំភ័យ​អ្នកកាសែត​ឯករាជ្យ​តាំងពី​ដំបូង​​ម៉្លេះ​ចាប់​តាំង​ការ​បោះឆ្នោត​​តាម​បែប​លទ្ធិប្រជាធិបតេយ្យ​កាលពី​ឆ្នាំ​១៩៩៣”៕ សារុន

 

© 2023, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស