40.9 C
Phnom Penh

នគរបាល​ចាប់ខ្លួន​​បុរស​ម្នាក់​ពី​បទ​ធ្វើទារុណកម្ម​ ចាប់​រំលោភ និង​សម្លាប់​មិត្ត​ស្រី​របស់​ខ្លួន

ដោយ ឌឹ ខេមបូឌា ដេលី

បទវិភាគ

នគរ​​​បាល​​​បាន​​​និយាយ​​​ថា កាល​​​ពី​​​ម្សិល​​​មិញ នគរ​​​បាល​​​បាន​​​ចាប់​​​ខ្លួន​​​បុរស​​​អាយុ​​​២៧​​​ឆ្នាំ​​​ម្នាក់ ដែល​​​តាម​​​ចោទ​​​ថា បាន​​​ធ្វើ​​​ទារុណកម្ម​​​ ចាប់​​​រំលោភ​​​ និង​​​សម្លាប់​​​មិត្ត​​​ស្រី​​​របស់​​​ខ្លួន ដែល​​​សាក​​​សព​​​របស់​​​នាង​​​ត្រូវ​​​បាន​​​ប្រទះ​​​ឃើញ​​​អណ្តែត​​​ក្នុង​​​ទន្លេ​​​សាប​​​កាល​​​ពី​​​សប្តាហ៍​​​មុន​​​។

នគរ​​​បាល​​​បាន​​​រក​​​ឃើញ​​​សាក​​​សព សុង ដាវីន អាយុ​​​២០​​​ឆ្នាំ ជា​​​និស្សិត​​​ឆ្នាំ​​​ទី​​​១​​​ផ្នែក​​​គណ​នេយ្យ​​​​​​នៅ​​​វិទ្យាស្ថាន​​​វ៉ាន់​​​ដា​​​ក្នុង​​​រាជ​​​ធានី​​​ភ្នំពេញ ដែល​​​នាង​​​ក៏​​​បាន​​​ធ្វើ​​​ការ​​​ក្រៅ​​​ម៉ោង​​​នៅ​​​កន្លែង​​​ប្តូរ​​​ប្រាក់​​​មួយ​ផង​​​ដែរ កាល​​​ពី​​​ព្រឹក​​​ព្រលឹម​​​ថ្ងៃ​​​ទី​​​៧ ខែ​​​តុលា​​​ អណ្តែត​​​ក្បែរ​​​មាត់​​​ទន្លេ​​​ក្នុង​​​ខណ្ឌ​​​ជ្រោយ​​​ចង្វា។នគរ​​​បាល​​​ឲ្យ​​​ដឹង​​​ថា សាក​​​សព​​​មាន​​​ស្នាម​​​ជាំ​​​ ហើយ​​​បាន​​​សន្និដ្ឋាន​ថា​​​ជន​​​រង​​​គ្រោះ​​​ត្រូវ​​​បាន​​​ធ្វើ​​​​​​ទារុណ​​​កម្ម។

យោង​​​តាម​​​លោក តី វិសាល អនុ​​​ប្រធាន​​​ការិយាល័យ​​​ព្រហ្មទណ្ឌ​​​រាជ​​​ធានី​​​បាន​​​ឲ្យ​​​ដឹង​​​ថា​បុរស​ឈ្មោះ ហុង កាលីឌីន ដែល​​​គេ​​​សង្ស័យ​​​ថា ជា​​​ឃាត​​​ករ​​​នោះ​ត្រូវ​​​បាន​​​ចាប់​​​ខ្លួន​​​កាល​​​ពី​​​ព្រឹក​​​ម្សិល​​​មិញ នៅ​​​ផ្ទះ​​​របស់​ជន​​​នេះ​​​តែ​​​ម្តង នៅ​​​ផ្លូវ​​​លេខ​​​៤៣០​​​ក្នុង​​​សង្កាត់​​​ផ្សារ​​​ដើម​​​ថ្កូវ ខណ្ឌ​​​ចំការ​​​មន។

លោក​​​ វិសាល បាន​​​មាន​​​ប្រសាសន៍​​​កាល​​​ពី​​​ម្សិល​​​មិញ​​​ថា តាម​​​រយៈ​​​ការ​​​ធ្វើ​​​កោសល្យ​​​វិច័យ​​​ បង្ហាញ​​​ថា សុង ដាវីន ក៏ត្រូវ​​​បាន​​​ចាប់​រំលោភ​​​ផង​​​ដែរ​​​។

​​​លោក​​​បាន​​​មាន​​​ប្រសាសន៍​​​ថា “លទ្ធផល​​​នៃ​​​ការ​​​ពិនិត្យ​​​សាក​​​សព​​​ជន​​​រងគ្រោះ​​​បង្ហាញ​​​ថា នាង​​​ត្រូ​​​វ​​​បាន​​​រំលោភ​​​ ហើយ​​​សម្លាប់​​​”។ឧត្តម​​​សេនីយ៍​​​ត្រី ឡឹក​​​ វណ្ណៈ អនុ​​​ប្រធាន​​​នាយក​​​ដ្ឋាន​​​ព្រហ្មទណ្ឌ​​​ក្រសួង​​​មហា​​​ផ្ទៃ ដែល​​​បាន​​​ដឹក​​​នាំ​​​ការ​​​សើុប​​​អង្កេត​​​បាន​​​មាន​​​ប្រសាសន៍​​​ថា នៅ​​​ពេល​​​នគរ​​​បាល​​​ទៅ​​​ដល់​​​ផ្ទះ​​​ កាលីឌីន ដើម្បី​​​ចាប់ខ្លួន​​​ជន​​​នេះ​​​កាល​​​ពី​​​ម្សិល​​​មិញ ពួកគេ​​​បាន​​​រក​​​ឃើញ​​​កាំភ្លើង​​​ខ្លីមា៉ាក​​​ឡុកមួយដើម និង​ប្រដាប់​តកាណុង​ចំនួនពីរ​​​នៅ​​​ក្នុង​​​រថយន្ត​​​តូយូ៉តា​​​ ទុន​​​ដ្រា​​​ ដ៏ថ្មី​​​សន្លាង​​​របស់​​​ជន​​​​​​​​​​​​​​​នេះ​​​។ លោក​​​បាន​​​បន្ថែម​​​ថា ជន​​​សង្ស័យ​​​រូប​​​នេះ​​​ត្រូវ​​​បាន​​​សាក​​​សួរ​​​នៅ​​​នាយក​​​ដ្ឋាន​​​ព្រហ្មទណ្ឌ។

ឧត្តម​សេនីយ៍​​​ត្រី វណ្ណៈ បាន​​​មាន​​​ប្រសាសន៍​​​ថា កាលីឌីន បាន​​​ប្រឡង​​​ជាប់​​​ធ្វើ​​​ជា​​​មន្ត្រី​​​នគរ​​​បាល​​​កាល​​​ពី​​​ដើម​​​ឆ្នាំ​​​នេះ ប៉ុន្តែ លោក​បដិសេធ​​​មិន​​​និយាយ​​​ថា តើ​​​ជន​នេះ​បម្រើការ​នៅ​នាយក​​​ដ្ឋាន​​​ណា​​​​​ឡើយ​​​។ លោក​​​បាន​​​មាន​​​ប្រសាសន៍​​​ថា “យើង​​​កំពុង​​​សាក​​​សួរ​​​ជន​​​សង្ស័យ​​​រូប​​​នេះ​​​ ហើយ​​​នឹង​​​ធ្វើ​​​ការ​​​សើុប​​​អង្កេត​​​បន្ត​​​ទៀត​​​។ យើង​​​មិន​​​អាច​​​ប្រាប់​​​អ្នកឲ្យ​​​លើស​​​ពី​​​នេះ​​​បាន​​​ទេ​​​”។

លោក​​​ វិសាល​​​ បាន​​​មាន​​​ប្រសាសន៍​​​ថា ក្រុម​​​សើុប​​​អង្កេត​​​បាន​​​រក​​​ឃើញ​​​ថា កាលីឌីន ជា​​​មិត្ត​​​ប្រុស​​​របស់​​​ សុង ដាវីន បន្ទាប់​​​ពី​​​ឆែក​​​ឆេរ​​​ផ្ទះ​​​ជួល​របស់​​​ជន​​​រង​​​​​​គ្រោះ​​​ក្នុង​​​សង្កាត់​​​បឹង​​​ត្របែក​​​ខណ្ឌ​​​ចំការ​​​មន​​​។ លោក​​​ វិសាល​​​ បាន​​​មាន​​​ប្រសាសន៍​​​ថា “យើង​​​បាន​​​ឆែក​​​ឆេរ​​​ផ្ទះ​​​ជួល​​​ជន​របស់​​​រង​​​គ្រោះ​​​
ហើយ​​​បាន​​​ឃើញ​​​លេខ​​​ទូរស័ព្ទ​​​របស់​​​ជន​​​សង្ស័យ​​​នៅ​​​ក្នុង​​​បញ្ជី​​​ហៅ​​​ទូរស័ព្ទ​​​ចូល​​​​​​​​ក្នុង​ទូរស័ព្ទ​​​ជន​​​រង​​​គ្រោះ​​​”។ លោក​​​បាន​​​បន្ថែម​​​ថា អ្នក​​​ជិត​​​ខាង​​​ដែល​​​នគរបាល​​​​​​បាន​​​សាក​​​សួរ​​​អះ​​​អាង​​​ថា អ្នក​​​ទាំង​​​ពីរ​​​មាន​​​​​ទំនាក់​​​ទំនង​​​គ្នា​​​៕សារុន​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស