សមាជិកក្រុមប្រឹក្សាគណបក្សសង្គ្រោះជាតិម្នាក់ក្នុងខេត្តកំពង់ធំបានដាក់ពាក្យបណ្តឹងទៅស្ថាប័នរដ្ឋាភិបាលចំនួនបួន កាលពីថ្ងៃច័ន្ទ ប្រឆាំងថ្នាក់ដឹកនាំនៅស្នងការដ្ឋាននគរបាលខេត្តដោយចោទប្រកាន់ពួកគេថា បានលួចកាត់ប្រាក់មុខងារនិងតួនាទីរបស់កូនចៅខ្លួន។
លោក ស៊ុន ចន្ធី សមាជិកក្រុមប្រឹក្សាខេត្តបានមានប្រសាសន៍កាលពីម្សិលមិញថា លោកបានដាក់លិខិតទៅអង្គភាពប្រឆាំងអំពើពុករលួយ ក្រសួងមហាផ្ទៃ ព្រឹទ្ធសភា និងគណៈកម្មការប្រឆាំងអំពើពុករលួយក្នុងរដ្ឋសភា។ លោក ចន្ធី បានមានប្រសាសន៍ថា “យើងមានភ័ស្តុតាងបីដែលបង្ហាញថា មានអំពើពុករលួយកើតឡើងនៅក្នុងស្នងការដ្ឋាននគរបាលខេត្តកំពង់ធំ”។
លោកបានមានប្រសាសន៍ថា “ខ្ញុំបានជួបសម្ភាសមន្ត្រីនគរបាលមួយចំនួន ដែលអះអាងថា ថ្នាក់ដឹកនាំនៅស្នងការដ្ឋាននគរបាលបានកេងប្រវ័ញ្ចប្រាក់មុខងារនិងតួនាទីរបស់ពួកគេ”។ លោកបានបន្ថែមថា លោក ជូ សំអាន ស្នងការនគរបាលខេត្តបានទទួលស្គាល់អំឡុងកិច្ចប្រជុំក្រុមប្រឹក្សាខេត្តកាលពីថ្ងៃព្រហស្បតិ៍ថា អំពើពុករលួយបានកើតឡើងក្នុងជួរនគរបាលរបស់លោក។
លោក ចន្ធី បានមានប្រសាសន៍ថា នគរបាលខេត្តបានប្រាប់លោកឲ្យដឹងអំឡុងការសម្ភាសថា យ៉ាងហោចណាស់មន្ត្រី៤០០នាក់បានត្អូញត្អែរថា ចៅហ្វាយនាយរបស់ខ្លួនបានកាត់ប្រាក់មុខងារនិងតួនាទីរបស់ពួកគេ។ លោកបានមានប្រសាសន៍ថា “ឧទាហរណ៍មន្ត្រីនគរបាលដែលសមទទួលបានប្រាក់៦០០.០០០រៀល បន្ទាប់ពីការដំឡើងឋានន្តរស័ក្តិត្រូវបានកាត់យក៦០ទៅ៧០ភាគរយនៃប្រាក់មុខងារនិងតួនាទីរបស់ខ្លួន ពីព្រោះថ្នាក់ដឹកនាំនៅស្នងការដ្ឋាននគរបាលខេត្តបានកាត់យក”។
នៅពេលត្រូវបានទាក់ទងកាលពីម្សិលមិញ លោក សំអាន បានមានប្រសាសន៍ថា លោកដឹងត្រឹមតែថា សហសេវិករបស់លោកម្នាក់នៅក្នុងការិយាល័យនគរបាលខេត្តបើកប្រាក់មុខងារនិងតួនាទីមិនត្រឹមត្រូវ។ លោកបានមានប្រសាសន៍ថា “ករណីនេះមិនពាក់ព័ន្ធរូបខ្ញុំទេ វាពាក់ព័ន្ធតែមន្ត្រីនគរបាលម្នាក់ប៉ុណ្ណោះ គឺលោកវរសេនីយ៍ត្រី ជឹម លក្ខិណា អនុប្រធានការិយាល័យគណនេយ្យដែលមិនបានបើកប្រាក់មុខងារនិងតួនាទីឲ្យមន្ត្រីនគរបាលពេញ”។ លោកបានបន្ថែមថា “កូនចៅរបស់ខ្ញុំបានត្អូញត្អែរប្រាប់ខ្ញុំអំពីករណីនេះ ហើយខ្ញុំបានអប់រំលោក លក្ខិណា ម្តងរួចមកហើយ ប៉ុន្តែ គាត់មិនស្តាប់”។
លោក សំអាន បានមានប្រសាសន៍ថា លោកបានធ្វើដំណើរមករាជធានីភ្នំពេញកាលពីម្សិលមិញ ដើម្បីជួបប្រជុំជាមួយមន្ត្រីនគរបាលជាតិទាក់ទងបញ្ហានេះ។
លោក ឆាយ សាវុធ អនុប្រធានអង្គភាពប្រឆាំងអំពើពុករលួយបានមានប្រសាសន៍ថា លោកមិនដឹងពីការដាក់ពាក្យបណ្ដឹងរបស់លោក ចន្ធី ទេ ពីព្រោះលោករវល់ពិនិត្យតាមដានការប្រឡងសញ្ញាបត្រមធ្យមសិក្សាទុតិយភូមិកាលពីម្សិលមិញ។
លោក ខៀវ សុភ័គ អ្នកនាំពាក្យក្រសួងមហាផ្ទៃ និងលោក គៀត ច័ន្ទថារិទ្ធ អ្នកនាំពាក្យនគរបាលជាតិមិនអាចទាក់ទងសុំអត្ថាធិប្បាយបានទេ៕សារុន