36 C
Phnom Penh

ម្ចាស់​អចលន​ទ្រព្យ​នៅ​បុរី​កីឡា​នៅ​តែរឹងត្អឹង​បន្ទាប់ពី​ជួប​ប្រជុំជាមួយ​សមាជិក​សភា

ដោយ ឌឹ ខេមបូឌា ដេលី

បទវិភាគ

អ្នកស្រី ស៊ុយ សុផាន ជាពាណិជ្ជករ​ម្នាក់​នៅ​តែ​ប្រកាន់ជំហររឹងត្អឹងបន្ទាប់​ពី​កិច្ច​ប្រជុំ​បិទ​ទ្វារ​មួយ​ជាមួយ​សមាជិក​សភា​នៅ​រដ្ឋសភា​កាលពី​ម្សិលមិញ អំពី​អចលនទ្រព្យ​ដ៏ចម្រូង​ចម្រាស​​​របស់​អ្នកស្រី​នៅ​តំបន់​បុរីកីឡាស្ថិតក្នុង​កណ្ដាល​រាជ​ធានី​ភ្នំពេញ​ បន្ត​បដិសេធ​ថា អ្នក​ស្រី​មិន​បាន​រំលោភ​កិច្ច​សន្យា​​ក្នុង​ការ​ផ្ដល់​ផ្ទះ​ល្វែង​ថ្មីដល់​អ្នក​ដែល​ត្រូវ​បាន​បណ្ដេញ​ចេញ​ទាំង​អស់​ឡើយ​។_suy-sophan

ក្រុម​ហ៊ុន​ផានអុីម៉ិច ជា​ក្រុម​ហ៊ុន​​របស់​អ្នកស្រី​ ស៊ុយ សុផាន ទទួល​បានដីទំហំ​​២,៦ហិកតា​កាលពី​ឆ្នាំ​២០០៧ ហើយ​ជា​ថ្នូរ​បាន​ព្រមព្រៀង​សាង​សង់​ប្លុក​ផ្ទះ​ល្វែង​ចំនួន​១០​សម្រាប់​ប្រជា​ពលរដ្ឋ​១.៧៧៦​គ្រួសារ​នៅ​ក្នុង​តំបន់​នោះ។

ប៉ុន្តែ​​តាំងពីពេល​នោះ​មក អ្នកស្រី​បាន​សាង​សង់​ប្លុក​ផ្ទះល្វែង​តែ​ប្រាំបី​ប៉ុណ្ណោះ​ ដោយ​អះ​អាង​ថា អ្នកស្រី​អស់​ប្រាក់​​មិន​អាច​សាង​សង់​ផ្ទះ​ល្វែងដែល​នៅ​សល់​បាន​ឡើយ​។ ប្រជា​ពលរដ្ឋ​​ជាង​១០០គ្រួសារ​ក៏​បាន​អះអាង​ផង​ដែរ​ថា ពួកគាត់​នៅ​តែជា​ម្ចាស់ផ្ទះ​ល្វែង​នោះ ដដែល ប៉ុន្តែ​អ្នកស្រី ស៊ុយ សុផាន បាន​លើកឡើង​ថា ពួកគាត់​មិន​មាន​ឯកសារ​​ដើម្បី​បង្ហាញ​ថា ពួកគាត់​ធ្លាប់​រស់​នៅទីនោះ​ទេ​។

នៅ​កិច្ច​ប្រជុំ​កាលពី​ម្សិលមិញ​ជាមួយ​គណៈកម្មការ​ប្រឆាំង​អំពើ​ពុករលួយ​ថ្មី​នៅ​រដ្ឋសភា ដែល​ធ្វើ​ជា​ប្រធាន​ដោយ​គណបក្ស​សង្គ្រោះ​ជាតិ​នោះ​ មិន​បាន​ធ្វើ​ឲ្យ​អ្នកស្រី​ផ្លាស់​ប្ដូរ​ចិត្ត​ឡើយ។

អ្នកស្រី​បាន​ប្រាប់​អ្នក​យក​ព័ត៌​មាន​ក្រោយ​មក​​ថា “ខ្ញុំ​បាន​ប្រាប់​គណៈកម្មការ​នោះ​ថា ខ្ញុំ​បាន​សាង​សង់​ផ្ទះ​ល្វែង​សម្រាប់ប្រជាពលរដ្ឋ១.២៦១​គ្រួសារ​រួច​ហើយ។ យើង​បាន​សាង​សង់​អគារផ្ទះល្វែងផ្អែក​លើ​ចំនួនប្រជាពលរដ្ឋដែល​រស់​នៅ​តំបន់​បុរីកីឡា​ពិត​ប្រាកដ​។ ចំពោះ​អ្នក​ដែល​មិន​បាន​រស់​នៅ​ក្នុង​តំបន់​បុរីកីឡា​ យើង​មិន​មាន​ផ្ទះ​ល្វែងសម្រាប់​ពួកគាត់​ឡើយ​។

លោក ហូរ វ៉ាន់ សមាជិក​សភា​គណ​បក្ស​សង្គ្រោះ​ជាតិ ដែលជា​ប្រធាន​គណៈកម្មការ​ ហើយ​បាន​អញ្ជើញ​អ្នកស្រី ស៊ុយ សុផាន ឲ្យ​មកចូល​រួម​ប្រជុំ​នោះបាន​មាន​ប្រសាសន៍​ថា ស្ត្រី​ជា​ពាណិជ្ជករ​រូប​នេះ​ក៏​បាន​និយាយ​ការ​ពារ​សេចក្ដី​សម្រេច​របស់​គាត់​​ក្នុង​ការ​ប្រែក្លាយ​ប្លុក​​ផ្ទះ​ល្វែង​​ជាន់​ក្រោម​ទាំង​អស់​ទៅជា​កន្លែង​រក​ស៊ី​ជំនួស​ឲ្យ​កន្លែង​ចត​យាន​យន្ត​ដែល​អ្នកស្រី​បាន​សន្យា​ ហើយ​ថា អ្នកស្រី​បាន​បដិសេធ​មិនទទួល​ខុស​ត្រូវ​ចំពោះ​ការ​អះអាង​ថា​បក្ខពួក​និយម​ក្នុង​ការ​បែង​ចែក​ផ្ទះ​ល្វែង​មួយ​ចំនួន​នៅ​ក្នុងអគារ​ដែល​បាន​សាង​សង់​នោះឡើយ​។

លោក ហូរ វ៉ាន់ បាន​មាន​ប្រសាសន៍​ថា លោក​នៅ​តែមានជំនឿថា អ្នកស្រី​បាន​រំលោភកិច្ច​សន្យា​ ហើយ​ថា លោក​នឹង​សរសេរ​លិខិត​ទៅ​លោក​នាយក​រដ្ឋមន្ត្រី ហ៊ុន សែន ប្រសិន​បើ​អ្នក​ស្រី​នៅ​តែ​មិនគោរព​តាម​កិច្ច​សន្យា។ លោក​បាន​មាន​ប្រសាសន៍​ថា “ខ្ញុំ​បាន​ប្រាប់​គាត់​ថា ប្រសិន​បើ​គាត់​មិន​បញ្ចប់​បញ្ហា​ទេ ខ្ញុំ​នឹង​សរសេរ​លិខិត​ទៅ​លោក​នាយក​រដ្ឋមន្ត្រី ហើយ​សូម​កុំ​ឲ្យ​លោក​ជឿ​របាយការណ៍​មុនៗ​របស់​អ្នកស្រី ស៊ុយ សុផាន ដែល​អះអាង​ថា គាត់​មិន​​មាន​ប្រាក់គ្រប់គ្រាន់​” ដើម្បី​សាង​សង់​អគារ​ផ្ទះល្វែងពីរ​ចុង​ក្រោយ​នោះឡើយ។

អ្នកស្រី ឆាយ គឹមហន ដែលអះអាង​ថា គាត់​មិន​​បានទទួល​ផ្ដល់​ផ្ទះ​ល្វែង​ ហើយ​ឥឡូវ​នេះ​រស់​នៅ​ដោយ​បោះ​តង់​ស្នាក់​នៅ​បណ្ដោះ​អាសន្ន​នៅ​ជាប់​ប្លុក​អគារផ្ទះល្វែង​ថ្មី​នោះ​​បាន​និយាយ​ថា អ្នក​ស្រី​សង្ឃឹម​តិច​តួច​ណាស់លើការរ​ខិត​ខំ​ប្រឹង​ប្រែង​របស់គណៈកម្មការ​នេះ​។ អ្នកស្រី​បាន​និយាយ​ថា ” ខ្ញុំ​គ្មាន​សង្ឃឹម​១០០​ភាគរយ​​ថា​នឹង​ទទួល​បាន​ជោគ​ជ័យ​ទេ ពីព្រោះយើង​មិន​ដែលឃើញ​អ្វី​ដែល​យើង​បានទាមទារ​បាន​កើត​ឡើង​នោះ​ឡើយ។ ខ្ញុំ​សង្ឃឹម​តែ​៣០ភាគរយ​ប៉ុណ្ណោះ​។ ខ្ញុំគិត​ថា អ្នកស្រី ស៊ុយ សុផាន កំពុង​គេច​ពី​បញ្ហា​នេះ​”៕ សារុន​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស