យោងតាមអគ្គលេខាធិការគណៈមេធាវីកម្ពុជាបានឲ្យដឹងថា កាលពីម្សិលមិញ គណៈមេធាវីកម្ពុជាបានបោះឆ្នោតជ្រើសរើសលោក ប៊ុន ហុន ឲ្យធ្វើជាប្រធានរបស់ខ្លួនម្ដងទៀតក្រោយការបោះឆ្នោតមួយ ដែលធ្វើឡើងនៅកាស៊ីណូណាហ្គាវើល ក្នុងរាជធានីភ្នំពេញ។
លោក សាង សុធន បានលើកឡើងថា លោក ប៊ុន ហុន ដែលត្រូវបានបោះឆ្នោតជ្រើសរើសជាលើកដំបូងឲ្យធ្វើជាប្រធានគណៈមេធាវីនេះកាលពីខែវិច្ឆិកា ឆ្នាំ២០១២ ទទួលបានការគាំទ្រចំនួន៥៥៤សំឡេង ដោយយកឈ្នះលើលោក សោម ចាន់ឌីណា ដែលទទួលបានត្រឹមតែ១៣០សំឡេង។ លោកបានបន្ថែមថា សំឡេងឆ្នោតចំនួន១៨សំឡេងបន្ថែមទៀតត្រូវបានចាត់ទុកជាមិនបានការ។
លោក សុធន មានប្រសាសន៍ថា ” បន្ទាប់ពីការប្រកាសលទ្ធផល លោក ទិត្យ សុធី អគ្គព្រះរាជអាជ្ញារងនៅសាលាឧទ្ធរណ៍ដែលជាតំណាងរបស់អគ្គព្រះរាជអាជ្ញា [អ៊ុក សាវុធ] បាននិយាយថា ដំណើរការបោះឆ្នោតជ្រើសរើសនេះគឺល្អ”។
កាលពីខែឧសភាឆ្នាំមុន លោក ប៊ុន ហុន អតីតអនុរដ្ឋលេខាធិការក្រសួងយុត្តិធម៌ ដែលមកពីគណបក្សប្រជាជនកម្ពុជាបានបង្ខំចិត្តចេញមកការពារខ្លួន ហើយគណៈមេធាវីត្រូវអង្គការឃ្លាំមើលសិទ្ធិមនុស្សរិះគន់ម្ដងទៀតថា ស្ថាប័ននេះខ្វះឯករាជភាព ហើយបានរារាំងមិនឲ្យមេធាវីនិយាយជាមួយប្រព័ន្ធផ្សព្វផ្សាយនៅក្នុងករណីខ្លះៗ។
នៅពេលទាក់ទងតាមទូរស័ព្ទមុនពេលបោះឆ្នោតកាលពីម្សិលមិញ លោក ប៊ុន ហុន បានលើកឡើងថា ស្នាដៃអំឡុងអាណត្តិដំបូងរបស់លោកជាប្រធានគណៈមេធាវី គឺរួមមានការជំរុញមេធាវីឲ្យបង្កើនសមត្ថភាពរបស់ខ្លួនដល់កម្រិតបទដ្ឋានអន្តរជាតិ ហើយបានជំរុញឲ្យមេធាវីប្រមាណ១៥១រូបធ្វើការដោយមិនគិតកម្រៃ។
លោក ចាន់ឌីណា ដែលជាអ្នកចាញ់លោក ប៊ុន ហុន ក្នុងការបោះឆ្នោត និងដែលជាអតីតមេធាវីរបស់លោក សម រង្ស៊ី ប្រធានគណបក្សសង្គ្រោះជាតិបានលើកឡើងថា លោកចង់ឲ្យគណៈមេធាវីមិនទទួលរងឥទ្ធិពលពីគណបក្សនយោបាយណាមួយឡើយ។ លោកបានមានប្រសាសន៍ថា ” យើងត្រូវតែរៀនរស់ដោយខ្លួនឯង និងមានឯករាជ្យដោយខ្លួនឯង”។
លោក ចាន់ឌីណា ក៏បានចោទប្រកាន់លោក ប៊ុន ហុន ថាបានទិញសមាជិកគណៈមេធាវីដោយបានអញ្ជើញអ្នកទាំងអស់នោះទៅទទួលទានអាហារក្នុងភោជនីយដ្ឋានមួយចំនួនមុនពេលការបោះឆ្នោតផងដែរ ហើយបានអំពាវនាវឲ្យគណៈមេធាវីទប់ស្កាត់កុំឲ្យមានយុត្តិសាស្ត្រធ្វើយុទ្ធនាការបែបនេះទៀតនៅពេលក្រោយ ព្រោះថា វាអាចជះឥទ្ធិពលលើការបោះឆ្នោត។
លោក ប៊ុន ហុន បានការពារសកម្មភាពរបស់លោក ដោយលើកឡើងថា បើយោងតាមច្បាប់បោះឆ្នោត បេក្ខភាពត្រូវបានអនុញ្ញាតឲ្យជួបជាមួយអ្នកបោះឆ្នោតជាផ្នែកនៃយុទ្ធនាការរបស់ខ្លួន។ លោកបានមានប្រសាសន៍ថា “មេធាវីទាំងអស់សុទ្ធតែបញ្ញវន្ត ហេតុដូច្នេះយើងមិនអាចប្រើយុទ្ធសាស្ត្រណាមួយទៅទិញបេះដូងរបស់ពួកគេបានឡើយ”៕ ស៊ុយឈាង