សមាជិក​ព្រឹទ្ធ​សភា​អាមេរិក​សរសើរ​ការ​ប្រឹងប្រែង​ប្រឆាំង​អំពើ​ពុករលួយ​របស់​លោក ហ៊ុន សែន

កាលពី​ថ្ងៃព្រហស្បតិ៍ សមាជិក​ព្រឹទ្ធ​សភា​អាមេរិក​ម្នាក់​ដែល​មក​ធ្វើ​ទស្សនកិច្ច​នៅ​ប្រទេស​កម្ពុជា បាន​សរសើរ​លោក​នាយក​រដ្ឋមន្ត្រី ហ៊ុន សែន ចំពោះ​កិច្ច​ប្រឹងប្រែង​របស់​លោក​ដើម្បី​លុប​បំបាត់​អំពើ​ពុករលួយ ប៉ុន្តែ​បាន​មាន​ប្រសាសន៍​ថា រដ្ឋាភិបាល​មិន​គួរ​ពឹង​ផ្អែកលើ​ប្រទេស​ចិនពេកទេ តែត្រូវ​ធ្វើ​ឲ្យ​ហេដ្ឋា​រចនា​សម្ព័ន្ធ​ប្រសើរ​ឡើង និង​បញ្ចុះ​តម្លៃ​អគ្គិសនី ដើម្បី​ទាក់​ទាញ​វិនិយោគទុន​អាមេរិក​ថែមទៀត។

សមាជិក​ព្រឹទ្ធ​សភា​រដ្ឋ​វ៉ាស៊ីនតោន លោក ដុន បេនថុន ជា​សមាជិក​គណបក្ស​សាធារណរដ្ឋ កំពុង​បំពេញ​បេសកកម្ម​ពាណិជ្ជកម្ម​រយៈ​ពេល​មួយ​សប្តាហ៍ ដើម្បី​ជំរុញ​ការ​វិនិយោគ និង​កិច្ច​សហប្រតិបត្តិ​ការ​រវាង​ប្រទេស​កម្ពុជា​និង​រដ្ឋ​វ៉ាស៊ីនតោន​របស់​លោក។

លោក បេនថុន បាន​មាន​ប្រសាសន៍​ថា “ខ្ញុំ​បាន​ជួប​កូនប្រុស​របស់​លោក​នាយករដ្ឋ​មន្ត្រី​នៅ​ថ្ងៃ​នេះ ហើយ​ពិតណាស់​ថា ឱពុក​របស់​គាត់​និង​រដ្ឋាភិបាល​របស់​គាត់​ប្តេជ្ញា​ដាច់ខាត​នឹង​នាំ​ប្រទេស​កម្ពុជា​ចូល​សតវត្សរ៍​ទី​២១ និង​លុប​បំបាត់​អំពើ​ពុករលួយ​ក្នុង​រដ្ឋាភិបាល​របស់​ខ្លួន។ ខ្ញុំ​ជឿជាក់​លើ​ការ​ខិតខំ​នេះ។ ប្រាកដ​ណាស់ គាត់​ប្តេជ្ញា​ធ្វើ។ ក្រុម​គ្រួសារ​និង​រដ្ឋ​មន្ត្រី​ប្តេជ្ញា​ធ្វើ​ហើយ”។

លោក​បាន​បន្ត​ថា “ហើយ វា​កំពុង​ប្រសើរ​ឡើង ពីព្រោះ​ប្រសិនបើ​ប្រទេស​នេះ​បោះ​ជំហាន​ទៅ​មុខ គេ​ត្រូវ​បោះ​ជំហាន​ដោយ​ស្អាត​ស្អំ ហើយ​ខ្ញុំ​គិត​ច្បាស់​ថា ថ្នាក់​ដឹកនាំ​នៅ​ប្រទេស​នេះ​យល់​ឃើញ​ថា នោះ​ជា​អ្វី​ដែល​ចាំ​បាច់​ត្រូវធ្វើ។ ពួកគេ​ចង់​ធ្វើ​ឲ្យ​ជីវភាព​រស់នៅ​របស់​ពលរដ្ឋ​ខ្លួន​ប្រសើរ​ឡើង”។

ក៏​ប៉ុន្តែ មិន​ច្បាស់ថា កូនប្រុស​ម្នាក់​ណា​របស់​លោក ហ៊ុន សែន ដែល​លោក បេន ថុន បាន​ជួប​នោះ​ទេ ព្រោះ​កូន​ប្រុស​ទាំង៣​សុទ្ធ​តែ​កាន់​តំណែង​មាន​ឥទ្ធិពល​ក្នុង​យោធា​និង​រដ្ឋាភិបាល។

យោងតាម​សេចក្តី​រាយការណ៍​មួយ​ដែល​ចេញ​កាលពី​ខែ​មុន​ដោយ​អង្គការ​តម្លាភាព Transparency International (IT) ឲ្យ​ដឹង​ថា ប្រទេស​កម្ពុជា​មាន​អំពើ​ពុក​រលួយ​រ៉ាំរ៉ៃ និង​ការ​សូក​ប៉ាន់​ក្នុង​ប្រព័ន្ធ​តុលាការ កម្លាំង​នគរបាល និង​ស្ថាប័ន​រដ្ឋ​ផ្សេងទៀត​របស់​ខ្លួន។

សន្ទស្សន៍ Corruption Perceptions Index បាន​ដាក់​ចំណាត់​ថ្នាក់​ប្រទេស​កម្ពុជា​ទី​១៦០​ក្នុង​ចំណោម​ប្រទេស​១៧៧​ដែល​គេ​បាន​ស្រាវជ្រាវ។ ទោះជា​យ៉ាង​នេះ​ក្តី របាយការណ៍​ធនាគារ​ពិភព​លោក ដែល​ចេញ​កាលពី​សប្តាហ៍​មុន បាន​ឲ្យ​ដឹង​ថា បើទោះជា “ការ​បង់​ប្រាក់​ក្រៅ​ផ្លូវការ” ទៅ​លើ​មន្ត្រី​រដ្ឋាភិបាល​និង​មន្ត្រី​តុលាការ​នៅ​តែ​មាន​ជា​ទូទៅ​ក៏​ដោយ ក៏​វា​បាន​ថយ​ចុះ​ខ្លះ​ដែរ។

លោក បេនថុន ក៏​បាន​មាន​ប្រសាសន៍​ដែរ​ថា ប្រទេស​កម្ពុជា​ត្រូវតែ​ខិតខំទាក់ទាញ​អ្នក​វិនិយោគ​អាមេរិក ដោយ​ការ​ធ្វើ​ឲ្យ​ប្រព័ន្ធ​ផ្លូវ​ថ្នល់​របស់​ខ្លួន​ប្រសើរ​ឡើង និង​ធ្វើ​យ៉ាងណា​ឲ្យ​តម្លៃ​អគ្គិសនី​ថោក ហើយ​មិន​គួរពឹងផ្អែកពេកទេ​លើ​សំណង់​ចិន​”មិន​សូវ​មាន​គុណភាព”​សម្រាប់​គម្រោង​សាធារណការ​សំខាន់ៗ។

លោក បេន បាន​មាន​ប្រសាសន៍​សំដៅ​លើ​ការ​ពឹង​ពាក់​របស់​ប្រទេស​កម្ពុជា​ទៅ​លើ​ប្រទេស​ចិន ចំពោះ​ហេដ្ឋារចនា​សម្ព័ន្ធ​ផ្លូវ​ផ្នល់​ថា “នោះ​ជា​មូលហេតុ​មួយ​ទៀត​ដែល​យើង​មក​ទីនេះ​ដើម្បី​និយាយ​ប្រាប់​ថា អ្នក​មិន​ត្រូវ​យក​ផលិតផល​លំដាប់​ទី២​នោះទេ ត្បិត​ចិន​ជា​ប្រទេស​តែ​មួយ​ដែល​ជួយ​អ្នក​ក៏ដោយ…តែ​អាមេរិក​ក៏​អាច​ជួយ​អ្នក​បាន​ដែរ”។ ប្រទេស​ចិន​បាន​ផ្តល់​កម្ចី​ការ​ប្រាក់ទាប​ជិត​៣​ពាន់​លាន​ដុល្លារ និង​ជំនួយ​ផ្សេងទៀត​ឲ្យ​ប្រទេស​កម្ពុជា​សម្រាប់​គម្រោង​ហេដ្ឋារចនា​សម្ព័ន្ធ​នានា ជា​គម្រោង​ធំៗ​ដែល​បន្ទាប់​មក​ត្រូវ​ចុះ​កិច្ច​សន្យា​ឲ្យ​បណ្តា​ក្រុមហ៊ុន​ចិន​ទទួល​ម៉ៅការ​សាងសង់៕​មានិត

 

 

© 2014, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.