ដោយនគរបាលទទួលស្គាល់កាលពីថ្ងៃព្រហស្បតិ៍ថា ពួកគេយឺតមួយជំហានក្នុងការចាប់ទាហានអាមេរិក និងជាជនរំលោភផ្លូវភេទកុមារ ម៉ៃឃើល អិដវើដ ហារីស (Michael Edward Harris) ដែលបានចាកចេញពីផ្ទះជួលរបស់គាត់កាលពីថ្ងៃពុធ បន្ទាប់ពីគេដឹងថាគាត់កំពុងរស់នៅនិងធ្វើការជាអ្នកបង្ហាត់ឆ្កែនៅក្រុងព្រះសីហនុនោះ អតីតភរិយារបស់គាត់បានផ្តល់ប្រាក់រង្វាន់២.០០០ដុល្លារដល់នរណាដែលមានព័ត៌មានឈានទៅដល់ការចាប់ខ្លួនគាត់និងបញ្ជូនទៅអាមេរិកវិញ។
លោក វេនី ហល ជាមន្ត្រីទំនាក់ទំនងព័ត៌មានកងទ័ពអាមេរិកបានបញ្ជាក់កាលពីថ្ងៃព្រហស្បតិ៍ថា ពលបាលត្រីមកពីរដ្ឋអារីហ្សូណារូបនេះបានភៀសខ្លួនចេញពីប្រទេសអាមេរិកមកប្រទេសកម្ពុជាកាលពីថ្ងៃទី១៧ខែមករា បន្ទាប់ពីមិនបានឡើងតុលាការនៅក្រុងអ័រឡិនដូ រដ្ឋផ្លរីដា ព្រោះគាត់ត្រូវប្រឈមនឹងបទចោទ៤៤ករណីទាក់ទិននឹងការមានរូបអាសគ្រាមកុមារ ដែលនាំឲ្យមានការចោទពីបទរត់ចោលជួរទ័ព និងស្ថិតក្នុងបញ្ជីតាមចាប់ខ្លួន២០នាក់លើគេរបស់កងទ័ពអាមេរិក។
យោងតាមអ្នកស្រី ដេនីស ដាយ៉ា អតីតភរិយារបស់គាត់ ដែលសុខចិត្តផ្តល់ប្រាក់រង្វ្ាន់២.០០០ដុល្លារដល់អ្នកណាដែលជួយដល់ការចាប់ខ្លួនឆាប់រហ័ស និងបញ្ជូនគាត់ទៅអាមេរិកឲ្យប្រឈមនឹងបទចោទទាំងនោះបានឲ្យដឹងថា លោក ហារីស ក៏ជាប់ចោទពីបទរំលោភផ្លូវភេទកុមារនៅអាមេរិកដែរ ហើយអាចបង្កគ្រោះថ្នាក់ធ្ងន់ធ្ងរដល់កុមារនៅកម្ពុជា។
អ្នកស្រីបានឲ្យដឹងក្នុងអីុម៉េលថា “ខ្ញុំផ្តល់ប្រាក់រង្វាន់១.០០០ដុល្លារ ហើយខ្ញុំមានអ្នកផ្តល់ជំនួយអនាមិក១.០០០ដុល្លារផ្សេងទៀត សរុបមានប្រាក់២.០០០ដុល្លារសម្រាប់អ្នកដែលក្របួចកគាត់ចូលស្ថានទូតអាមេរិក ដើម្បីឲ្យគេអាចនាំគាត់ទៅអាមេរិកវិញ ហើយខ្ញុំមិនខ្វល់ថា គាត់ស្លាប់ ឬរស់ទេ”។
អ្នកស្រី ដាយ៉ា បានឲ្យអាជ្ញាធរអាមេរិកនិងអាជ្ញាធរមូលដ្ឋាននៅទីនេះដឹង បន្ទាប់ពីដឹងតាមរយៈហ្វេសប៊ុកកាលពីថ្ងៃអង្គារថា អតីតប្តីអ្នកស្រីធ្វើជាអ្នកបង្ហាត់ឆ្កែនៅ K9 Cambodia EliteService Dog Facility ដោយកែឈ្មោះថា Michael Dobbs វិញ។
ប៉ុន្តែ ក្រុមប៉ូលិសស៊ើបអង្កេតបានឆែកឆេរផ្ទះជួលរបស់គាត់នៅក្រុងព្រះសីហនុកាលពីព្រឹកថ្ងៃព្រហស្បតិ៍ ទើបដឹងថា គាត់ចេញបាត់ទៅហើយ។
លោក អ៊ុក ហៃសិលា ប្រធាននាយកដ្ឋានស៊ើបអង្កេត និងអនុវត្តនីតិវិធីនៃអគ្គនាយកដ្ឋានអន្តោប្រវេសន៍នៅក្រសួងមហាផ្ទៃបានឲ្យដឹងថា “យើងមានតម្រុយមួយចំនួនថា គាត់រស់នៅក្នុងក្រុងព្រះសីហនុ ហើយយើងបានធ្វើដំណើរទៅស្វែងរកជនសង្ស័យនៅព្រឹកនេះ ប៉ុន្តែជននេះបានដឹងថា ប៉ូលិសមករកចាប់គាត់ ដូច្នេះ គាត់ចាកចេញបាត់ទៅ”។
លោក ហៃសិលា នៅតែមានជំនឿចិត្តថា អាជ្ញាធរកម្ពុជានឹងរារាំងជនគេចខ្លួនរូបនេះមិនឲ្យចាកចេញពីប្រទេសនេះបានឡើយ និងបានមានប្រសាសន៍ទៀតថា រូបថតលោក ហារីស និងរូបថតម៉ូតូរបស់គាត់ត្រូវបានបញ្ជូនទៅគ្រប់ប៉ុស្តិ៍ព្រំដែនទាំងអស់។
លោកបានឲ្យដឹងទៀតថា “គាត់មិនអាចគេចខ្លួនបានទេ។ យើងជឿថា យើងនឹងចាប់ខ្លួនគាត់ក្នុងពេលពីរបីថ្ងៃទៀតនេះ ពីព្រោះអ្នកជំនាញរបស់ជើងបានស្គាល់តម្រុយច្រើនទៀត ដែលនឹងជួយយើងស្វែងរកចាប់គាត់”។ លោកបានបន្ថែមទៀតថា លោកជឿថា ជនសង្ស័យរូបនេះកំពុងលាក់ខ្លួនក្នុងក្រុងព្រះសីហនុ ឬ ក៏បានធ្វើដំណើរទៅភ្នំពេញហើយ។
លោក ហៃសិលា បានឆ្លើយតបដោយភ្ញាក់ផ្អើលពេលដឹងថា អតីតភរិយារបស់ជនសង្ស័យបានផ្តល់ប្រាក់រង្វាន់ ប៉ុន្តែបាននិយាយថា វាជួយតិចតួចដល់ការស៊ើបអង្កេតនោះ។
លោកបានមានប្រសាសន៍ “ខ្ញុំភ្ញាក់ផ្អើលនឹងរឿងនេះ។ ខ្ញុំមិនគិតថា វាជាគំនិតល្អ ឬថាការផ្តល់២.០០០ដុល្លារនេះនឹងជួយក្នុងករណីនេះទេ”។ “យើងមិនអាចរារាំងគាត់មិនឲ្យធ្វើបែបនេះបានទេ ព្រោះវាអាចបង្កើតភាពច្របូកច្របល់ដល់ការស៊ើបអង្កេតរបស់យើង ប៉ុន្តែវាជារឿងតូចតាចសម្រាប់យើងប៉ុណ្ណោះ”៕មានិត