អនុប្រធាននាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល បានមានប្រសាសន៍កាលពីម្សិលមិញថា នាយកដ្ឋាននេះបានជ្រើសរើសមន្ទីរពេទ្យចំនួនប្រាំនៅទូទាំងប្រទេសសម្រាប់ដាក់អ្នកដែលឆ្លងវីរុសអេបូឡាឲ្យនៅដាច់ដោយឡែកពីគេ ប្រសិនបើករណីជំងឺនេះផ្ទុះនៅកម្ពុជា។
នៅឯពិធីមួយមានឈ្មោះថា “ហានិភ័យជំងឺអេបូឡា និងសុខាភិបាលសាធារណៈនៅកម្ពុជា”ដែលរៀបចំឡើងដោយសភាពាណិជ្ជកម្មអាមេរិកនៅក្នុងរាជធានីភ្នំពេញ លោក លី សុវណ្ណ អនុប្រធាននាយកដ្ឋានប្រយុទ្ធនឹងជំងឺឆ្លង បានមានប្រសាសន៍ថា មន្ទីរពេទ្យកាល់ម៉ែតក្នុងរាជធានីភ្នំពេញ បូករួមមន្ទីរពេទ្យចំនួនប្រាំទៀតក្នុងខេត្តសៀមរាប កំពង់ចាម កំពត និងខេត្តស្ទឹងត្រែង ត្រូវបានជ្រើសរើសឲ្យទទួលព្យាបាលអ្នកដែលឆ្លងជំងឺដ៏កាចសាហាវនេះ។
លោកមានប្រសាសន៍ថា គ្រូពេទ្យជំនាញក៏ត្រូវបានជ្រើសរើសដែរ សម្រាប់ព្យាបាលអ្នកដែលកើតជំងឺអេបូឡា។ “យើងមានមនុស្សចំនួន២.០០៨នាក់នៅនាយកដ្ឋានប្រយុទ្ធនឹងជំងឺឆ្លង ដែលទទួលបានការបណ្តុះបណ្តាលពីរបៀបធ្វើការសុើបអង្កេតបឋម ហើយយើងមានបទពិសោធក្នុងការឆ្លើយតបការរាតត្បាតជំងឺ”។
លោកបានលើកឡើងបន្ថែមថា “នឹងមានការបណ្តុះបណ្តាលបន្ថែមទៀតសម្រាប់មនុស្ស១០នាក់ដែលមានការប្តេជ្ញាចិត្តឆ្លើយតប នៅពេលយើងនាំអ្នកដែលជាប់សង្ស័យថា ឆ្លងជំងឺអេបូឡាទៅ។ យើងចាំបាច់ត្រូវស្វែងរកនរណា ដែលអាចធ្វើការនេះបានពិតប្រាកដពីព្រោះវាពិតជាអាចមានគ្រោះថ្នាក់ខ្លាំងណាស់”។
លោកមានប្រសាសន៍ថា សម្រាប់កងកម្លាំងរក្សាសន្តិភាពកម្ពុជា ក៏នឹងត្រូវឆ្លងកាត់ការពិនិត្យរកវីរុសជំងឺនេះដែរ នៅពេលពួកគេត្រឡប់មកពីបណ្តាប្រទេសនៅអាហ្វ្រិកវិញ។
លោកបានបន្តថា “យើងកំពុងរង់ចាំទាហានទាំងនោះត្រឡប់មកវិញ [ពីអាហ្វ្រិក] ហើយយើងនឹងធ្វើការជិតស្និទ្ធជាមួយក្រសួងការពារជាតិដើម្បីសម្របសម្រួលឲ្យពួកគាត់ត្រឡប់មកវិញ និងតាមដានសុខភាពពួកគាត់”។
លោកមានប្រសាសន៍ថា ទោះបីជាសមត្ថភាពរបស់នាយកដ្ឋានប្រយុទ្ធនឹងជំងឺឆ្លងនៅមានកម្រិតនៅក្នុងការដោះស្រាយករណីផ្ទុះជំងឺកាចសាហាវ រួមទាំងកង្វះសម្ភារមួយចំនួនក្តីកម្ពុជាក៏នៅតែមានការជឿជាក់ ពីព្រោះកន្លងមកកម្ពុជាធ្លាប់បានដោះស្រាយករណីផ្ទុះជំងឺរួចមកហើយ។
គូសបញ្ជាក់ពីការឆ្លើយតបយ៉ាងមានប្រសិទ្ធភាពរបស់រដ្ឋាភិបាលក្នុងការចាត់វិធានការតបទៅនឹងការផ្ទុះករណីជំងឺផ្តាសាយបក្សីក្នុងរយៈពេលប៉ុន្មានឆ្នាំថ្មីៗនេះ លោកមានប្រសាសន៍ថា “យើងមិនបានត្រៀមអ្វីទាំងអស់សម្រាប់ទប់ទល់ជំងឺសា។យើងបានសាងសមត្ថភាពចាប់តាំងពីពេលនេះទៅ ហើយយើងត្រៀមខ្លួនបានល្អជាងមុន ប៉ុន្តែ យើងចាំបាច់ត្រូវធ្វើឲ្យបានច្រើនជាងនេះ។ ប្រសិនបើគ្រប់ប្រទេសទាំងអស់ត្រៀមខ្លួន យើងក៏នឹងត្រូវទប់ទល់ស្ថានភាពនេះដែរ”។
ករណីជំងឺគ្រុនផ្ដាសាយបក្សីក្នុងខ្លួនមនុស្សដែលប្រទេសកម្ពុជាបានកត់ត្រាមានចំនួន២៦ករណីកាលពីឆ្នាំមុន ហើយក្នុងនោះមាន១២ករណីបណ្ដាលឲ្យអ្នកឆ្លងជំងឺនេះស្លាប់ ដែលជាឆ្នាំរងគ្រោះបំផុតចាប់តាំងពីវីរុសជំងឺនេះត្រូវបានរកឃើញលើកដំបូងនៅក្នុងខ្លួនបក្សីនៅកម្ពុជាក្នុងឆ្នាំ២០០៤មក៕សុខុម