26 C
Phnom Penh

ស្ត្រី​​​ម្នាក់​​​ដែល​​​អះអាង​​​ថា សម្រាលកូន​​ជា​​​ចិញ្ចៀន ​​​ត្រូវ​​​បាន​​​បណ្តេញ​​​ចេញ​​​ពី​​​វត្ត

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ អាជ្ញាធរ​ខេត្ត​កំពង់ឆ្នាំង​​បាន​បង្គាប់​ឲ្យ​​​ស្ត្រី​អាយុ​៤៣​ឆ្នាំ​ម្នាក់ ដែល​អះអាង​ថា មាន​ទេវតា​​មក​សណ្ឋិត​ឲ្យ​ចាក​ចេញ​​​ពី​​​វត្ត​មួយ​ក្នុង​ស្រុក​​បរិបូណ៍ ទី​ដែល​ស្ត្រី​រូប​នេះ​បាន​ប្រមូល​​លុយ​​​ពី​អ្នក​ដែល​បាន​មក​មើល​ចិញ្ចៀន​ប្លាទីន​​​មួយ​​​វង់​​​​ដែល​ស្ត្រី​​​រូប​​​នេះ​អះអាង​ថា គាត់​សម្រាល​​បាន​។

លោក ឃួន សារុំ អភិបាល​ស្រុក​បាន​មាន​ប្រសាសន៍​កាល​​​ពី​ម្សិលមិញ​ថា ដំបូង​​​អ្នកស្រី ជា អុិត និង​ប្ដី​របស់​គាត់​ឈ្មោះ ប៊ូ រុន​​​ អាយុ​៥០​ឆ្នាំ​បាន​មក​វត្ត​ដំរី​កូន​ស្ថិត​ក្នុង​ឃុំ​អញ្ចាញ​រូង កាលពី​ថ្ងៃ​ទី​៨ ខែ​តុលា ដែល​ពួកគេ​អះអាង​ថា អ្នកស្រី​ អុិត មាន​​​ព្រះនាង​គង់​​​ស៊ី​​​អុីម​ មក​សណ្ឋិត​នោះ សម្រាល​​​បាន​​​ចិញ្ចៀន​ប្លាទីន​​​មួយ​​​វង់ និង​លើក​ទី២សម្រាល​​បាន​ចិញ្ចៀន​​​ពណ៌​ស​មួយ​​​វង់​​​ទៀត​។

លោក សារុំ បាន​មាន​ប្រសាសន៍​ថា អ្នកស្រី អុិត ក៏​បាន​យក​ពងមាន់​មួយ​​​គ្រាប់​​ដែល​​គាត់​អះអាង​ថា បាន​​​ឃើញ​​​ក្នុង​​​ក្រោល​​​គោ​របស់​​​គាត់​កាលពី​ខែ​កក្កដា​ផង​​​ដែរ​។

លោក​បាន​មាន​ប្រសាសន៍​ថា ” យើង​បាន​បង្គាប់​ឲ្យ​ស្ត្រី​រូប​នេះ​ចេញ​ពី​​​វត្ត​នៅ​ថ្ងៃ​នេះ​ ប៉ុន្តែ​គាត់​បាន​សុំ​ស្នាក់​​​នៅ​មួយ​ថ្ងៃ​ទៀត​ ពីព្រោះ​គាត់​បាន​ប្រាប់​យើង​ថា គាត់​ចង់​ឲ្យ​មនុស្ស​មក​មើល​ចិញ្ចៀន​ និង​ពង​មាន់​​​នេះ​បន្ថែម​ទៀត​​”។ លោក​បាន​បន្ថែម​ថា អាជ្ញាធរ​មិនព្រម​ធ្វើ​តាម​ការ​ស្នើ​សុំ​របស់​អ្នកស្រី អុិត ឡើយ​។

លោក សារុំ​ បាន​មាន​ប្រសាសន៍​ថា មាន​​​ពាក្យ​ចចាមអារ៉ាម​ថា ស្ត្រី​រូប​នេះ​មាន​​ទេវតា​មក​សណ្ឋិត​នោះ​​បាន​​​ទាក់​ទាញ​មនុស្ស​ប្រហែល​១០០​នាក់​មក​កាន់​វត្ត​នេះ​ក្នុង​មួយ​ថ្ងៃ​ៗ​សម្រាប់​រយៈ​ពេល​ពីរ​បី​ថ្ងៃ​ដំបូង ដែល​ស្ត្រី​រូប​នេះ​​​មក​​​ស្នាក់​នៅ​ទីនោះ ប៉ុន្តែ​​​ថា ចំនួន​មនុស្ស​បាន​ថយ​ចុះ​បន្តិច​ម្ដង​​ៗ​​​ដោយ​មានការ​​​សង្ស័យ​ថា ការ​អះអាង​របស់​គាត់​គឺ​ជា​ការ​ភូត​កុហក​។

កាលពី​ម្សិលមិញ លោក រុន បាន​និយាយ​ការ​ពារ​ការ​អះអាង​របស់​ប្រពន្ធ​គាត់ ដោយ​លើក​ឡើង​ថា នៅ​ព្រឹក​ថ្ងៃ​ទី​៨ ខែ​តុលា ប្រពន្ធ​របស់​​​គាត់​បាន​យំ ហើយ​សុំ​ឲ្យ​គាត់​ជូន​ទៅ​វត្ត​ ទី​​​ដែល​គាត់​សម្រាល​បាន​ចិញ្ចៀន​ប្លាទីន​មួយ​​​វង់​​​នៅ​​​ម៉ោង​ប្រហែល​៣រសៀល ហើយក៏​សម្រាល​​​​បាន​ចិញ្ចៀន​ពណ៌ស​​​មួយ​​​វង់​ទៀត​ពី​ឆ្អឹង​ជំនីរ​ផុត​​​ខាង​ស្ដាំ​បន្តិច​ក្រោយ​មក​។

លោក​បាន​និយាយ​ថា ” ប្រពន្ធ​របស់​ខ្ញុំ​គ្មាន​ផ្ទៃ​ពោះ​ទេ ប៉ុន្តែ​គាត់​សម្រាល​​​បាន​ចិញ្ចៀន​ពីរ​វង់​នៅ​វត្ត​នេះ​ក្នុង​​​ពេល​រសៀល​។ ឧបាសក​ឧបាសិកា​នៅ​ក្នុង​វត្ត​ក៏​បាន​ឃើញ​ប្រពន្ធ​របស់​ខ្ញុំ​សម្រាល​​​បាន​ចិញ្ចៀន​ពីរ​វង់​នោះ​ដែរ”។ លោក រុន បាន​បន្ថែម​ថា ក្នុងមួយថ្ងៃៗ​​​ក្នុង​​​ចំណោម​​​បួន​ថ្ងៃ​ដំបូង​​​ដែល​ប្ដី​ប្រពន្ធ​គាត់​មក​ស្នាក់​នៅ​វត្ត​នេះ ​ពួក​​​គាត់​​​រក​លុយ​​​បាន​ពី​៥០.០០០​រៀល​ទៅ​៦០.០០០​រៀល​ពី​អ្នក​ដែល​មក​គោរព​ដល់​ទេវតា​។

លោក រុន បាន​និយាយ​ថា យើង​មិន​បាន​បង្ខំ​ប្រជាជន​ទាំង​នេះ​ឲ្យ​ដាក់លុយ​ទេ។ អ្នក​មក​មើល​បាន​ដាក់​លុយ​ដោយ​ស្ម័គ្រ​ចិត្ត​”។

លោក​​​មេឃុំ​​ ខ្លុង វ៉ាត បាន​មាន​ប្រសាសន៍​​​ថា អ្នកស្រី អុិត បាន​រៀបចំ​​​គម្រោង​​​ដើម្បី​បោក​ប្រាស់​​។ លោក​បាន​​​មាន​ប្រសាសន៍​ថា ” ស្ត្រី​រូប​នេះ​ភូត​កុហក​ដើម្បី​រក​លុយ​។ ខ្ញុំ​មិន​​​ជឿ​ថា មាន​ទេវតា​មក​សណ្ឋិត​ក្នុង​ខ្លួន​ស្ត្រី​នេះ​ទេ ពីព្រោះ​គ្មាន​នរណា​ម្នាក់​អាច​សម្រាល​​​កូន​​​ជា​ចិញ្ចៀន​បែប​នេះ​ឡើយ​”៕ សារុន​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស