រដ្ឋមន្ត្រីក្រសួងការបរទេសអូស្ត្រាលីបានថ្លែងអំណរគុណលោកនាយករដ្ឋមន្ត្រី ហ៊ុន សែន នៅក្រៅកិច្ចប្រជុំក្នុងប្រទេសអីុតាលីកាលពីចុងសប្តាហ៍ ចំពោះការយល់ព្រមផ្តល់ការតាំងទីលំនៅថ្មីដល់ជនភៀសខ្លួនដែលស្វែងសុំសិទ្ធិជ្រកកោននៅប្រទេសអូស្ត្រាលី ហើយបានបញ្ជាក់ថា ការបញ្ជូននិងទទួលជនភៀសខ្លួននឹងឈរលើមូលដ្ឋានស្ម័គ្រចិត្ត។
ប្រទេសកម្ពុជាបានចុះហត្ថលេខាលើកិច្ចព្រមព្រៀងដ៏ចម្រូងចម្រាសនេះកាលពីខែមុន ដោយព្រមយកជនស្វែងរកសិទ្ធិជ្រកកោនមួយចំនួន ដែលប្រទេសអូស្ត្រាលីកំពុងឃាត់ទុកនៅលើប្រទេសកោះណូរូ មហាសមុទ្រប៉ាស៊ីហ្វិកខាងត្បូង ក្នុងពេល៤ឆ្នាំ ជាថ្នូរនឹងជំនួយ៤០លានដុល្លារបន្ថែមទៀត។
ក្រុមសិទ្ធិមនុស្សនិងសមាជិកសភាបក្សប្រឆាំងក្នុងប្រទេសទាំង២បានរិះគន់កិច្ចព្រមព្រៀងនេះ ហើយប្រជាពលរដ្ឋរាប់រយនាក់បានតវ៉ាប្រឆាំងផែនការនេះកាលពីថ្ងៃសុក្រ ដោយបានចោទរដ្ឋាភិបាលថាព្រមទទួលយកជនភៀសខ្លួនក្នុងពេលដែលខ្លួនគ្មានសមត្ថភាពថែទាំមើលខុសត្រូវចំពោះពលរដ្ឋខ្លួនឯងបានផងនោះ។
ខណៈដែលពលរដ្ឋកម្ពុជាកំពុងតវ៉ាក្នុងរាជធានីភ្នំពេញ លោក ហ៊ុន សែន កំពុងពិភាក្សាកិច្ចព្រមព្រៀងនេះជាមួយលោកស្រី ជូលី ប៊ីសប ជារដ្ឋមន្ត្រីក្រសួងការបរទេសអូស្ត្រាលីនៅក្រុងមីឡង់ សាធារណរដ្ឋអីុតាលី នៅចន្លោះកិច្ចប្រជុំនៃជំនួបកំពូលអាស៊ី-អឺរ៉ុបលើកទី១០។
ទីភ្នាក់ងារសារព័ត៌មានកម្ពុជា AKP បានរាយការណ៍កាលពីថ្ងៃសៅរ៍ថា “លោកស្រី ជូលី អីុសាបែល ប៊ីសប បានសំដែងអំណរគុណយ៉ាងជ្រាលជ្រៅចំពោះរាជរដ្ឋាភិបាលកម្ពុជា ដែលបានចុះហត្ថលេខានាពេលថ្មីៗនេះជាមួយប្រទេសអូស្ត្រាលី នូវអនុស្សរណៈនៃការយោគយល់គ្នា ទាក់ទិននឹងការតាំងទីលំនៅជនភៀសខ្លួននៅប្រទេសកម្ពុជា”។
លោកស្រីបានអះអាងថា “រដ្ឋាភិបាលអូស្ត្រាលីនឹងបន្តធ្វើសហប្រតិបត្តិការជិតស្និទ្ធថែមទៀតជាមួយប្រទេសកម្ពុជា ដើម្បីអនុវត្តអនុស្សរណៈនៃការយោគយល់គ្នា ក្នុងស្មារតីទទួលខុសត្រូវ និងឈរលើមូលដ្ឋានស្ម័គ្រចិត្ត មិនមែនដោយបង្ខិតបង្ខំឡើយ”។
នៅឯសន្និសីទព័ត៌មាននាអាកាសយានដ្ឋានអន្តរជាតិភ្នំពេញ លោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី កាលពីព្រឹកម្សិលមិញបានបញ្ជាក់ថា កិច្ចប្រជុំបានធ្វើឡើងមែន ប៉ុន្តែ លោកបានបដិសេធមិនបរិយាយច្រើនអំពីកិច្ចព្រមព្រៀងជនភៀសខ្លួននេះទេ។
ទាក់ទងបានតាមទូរស័ព្ទកាលពីម្សិលមិញ លោក សុខ ផល អគ្គនាយកនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ បានមានប្រសាសន៍ថា រដ្ឋាភិបាលមានផែនការបញ្ជូនគណៈប្រតិភូមួយក្រុមទៅប្រទេសណូរូ នៅចុងឆ្នាំនេះ ដើម្បីជួបជនភៀសខ្លួន ដែលប្រហែលចង់តាំងទីលំនៅថ្មីនៅប្រទេសកម្ពុជា ហើយកំពុងរង់ចាំប្រទេសអូស្ត្រាលីរៀបចំការធ្វើដំណើរ។ ដូចមានចែងក្នុងអនុស្សរណៈ ប្រទេសអូស្ត្រាលីនឹងចេញថ្លៃសោហ៊ុយធ្វើដំណើរ រួមនឹងការចំណាយផ្សេងទៀតលើការតាំងទីលំនៅជនភៀសខ្លួនក្នុងប្រទេសកម្ពុជា។
លោក ឧត្តមសេនីយ៍បានមានប្រសាសន៍ថា “យើងមិនទាន់ដឹងយ៉ាងណានៅឡើយទេ។ ខាងអូស្ត្រាលីត្រូវរៀបចំការធ្វើដំណើរនេះឲ្យយើងដើម្បីទៅណូរូ”។
ទោះជាមានការប្តេជ្ញាពីប្រទេសទាំងពីរ ថាការផ្ទេរជនភៀសខ្លួនណាមួយនឹងធ្វើដោយស្ម័គ្រចិត្តក៏ដោយ ក៏ក្រុមសិទ្ធិមនុស្សដែលធ្វើការជាមួយជនភៀសខ្លួននៅប្រទេសណូរូ បានលើកឡើងថា ជនភៀសខ្លួនទាំងនោះកំពុងត្រូវគេបង្ខំឲ្យទទួលយកសំណើនេះ។
អ្នកស្រី វិកតូរៀ អីុវើសុន មន្ត្រីព័ត៌មានសម្រាប់បណ្តាញសកម្មភាពជនភៀសខ្លួន មានមូលដ្ឋាននៅប្រទេសអូស្ត្រាលី បានមានប្រសាសន៍ថា “មនុស្សដែលខ្ញុំទាក់ទង ត្រូវគេប្រាប់ថា ប្រសិនបើពួកគេមិនព្រមទៅប្រទេសកម្ពុជា ពួកគេនឹងវេទនាក្នុងជំរំឃុំឃាំងនេះលើកោះប្រទេសណូរូ។ ដូច្នេះ ប្រសិនបើអ្នកទាំងនោះមិនត្រូវគេដាក់ខ្នោះមែនទែននិងបង្ខំឲ្យឡើងយន្តហោះក៏ដោយ ក៏របៀបនៃការបង្ខិតបង្ខំនេះ ពួកគេកំពុងរងទុក្ខទៅហើយ តាមមតិរបស់ខ្ញុំ វាស្មើនឹងការបង្ខិតបង្ខំមនុស្ស”។
លោកស្រី អីុវើសុន បានលើកឡើងអំពីសារខ្លីមួយពីជនស្វែងរកសិទ្ធិជ្រកកោនម្នាក់នៅប្រទេសណូរូ ដែលលោកស្រីបានទទួលតាមរយៈព័ត៌មានសង្គមកាលពីថ្ងៃទី១១ខែតុលា មានខ្លឹមសារថា “ថ្ងៃនេះ ក្រុមមន្ត្រីអន្តោប្រវេសន៍បានមកប្រាប់យើងថា អ្នកនឹងត្រូវបញ្ជូនទៅប្រទេសកម្ពុជា គ្រប់គ្នាស្រឡាំងកាំងតែម្តង…។ មន្ត្រីខ្លះបានព្រមានយើងថា ប្រសិនបើយើងមិនឈប់ធ្វើការតវ៉ាទេ ពួកគេនឹងវាយធ្វើបាបយើង។ សូមប្រាប់អ្នកកាសែត…។ មានភាពតានតឹងណាស់នៅទីនេះ ហើយមានការរឹតបន្តឹងសន្តិសុខ។ ដូចឋាននរកអ៊ីចឹង!”។
អ្នកនាំពាក្យរបស់លោក ស្កត់ ម៉ូរីសុន (Scott Morrison)រដ្ឋមន្ត្រីក្រសួងអន្តោប្រវេសន៍អូស្ត្រាលីដែលបានមកក្រុងភ្នំពេញដើម្បីចុះហត្ថលេខាអនុស្សរណៈយោគយល់គ្នាជាមួយប្រទេសកម្ពុជាកាលពីខែមុន មិនបានឆ្លើយតបភ្លាមៗទៅនឹងសំណើសុំការពន្យល់បានទេ។
ទាក់ទិននឹងការធ្វើដំណើររបស់លោក ហ៊ុន សែន ទៅប្រទេសអីុតាលីនេះ លោក គឹមហួន បានមានប្រសាសន៍ថា លោកនាយករដ្ឋមន្ត្រី ហ៊ុន សែន ក៏បានជួបសមភាគីថៃឧត្តមសេនីយ៍ ប្រាយុទ្ធ ចាន់អូចា ផងដែរ។
លោកបានមានប្រសាសន៍ថា ឧត្តមសេនីយ៍រូបនេះ ដែលបានដឹកនាំការផ្តួលរំលំរដ្ឋាភិបាលជាប់ឆ្នោតក្នុងក្រុងបាងកកកាលពីខែឧសភា បានលើកឡើងនូវការចាប់អារម្មណ៍របស់ប្រទេសថៃក្នុងការបង្កើតតំបន់សេដ្ឋកិច្ចពិសេស តាមបណ្តោយព្រំដែនរួមរបស់ប្រទេសលោកជាមួយប្រទេសកម្ពុជា។
លោក ហ៊ុន សែន បានស្នើឲ្យឧត្តមសេនីយ៍ថៃរូបនេះកម្ចាត់ចោលប្រភពនៃប្រាក់ដុល្លារក្លែងក្លាយប្រហែល៧លានដុល្លារ ដែលរឹបអូសបានក្នុងប្រទេសកម្ពុជាកាលពីខែមុន និងបង្កើតគណៈកម្មការរួមមួយផ្សេងទៀតដើម្បីចរចាដោះស្រាយជម្លោះព្រំដែន។
លោក គឹមហួន បានមានប្រសាសន៍ទៀតថា លោកនាយករដ្ឋមន្ត្រីក៏បានអញ្ជើញឧត្តមសេនីយ៍ ចាន់អូចា មកបំពេញទស្សនកិច្ចនៅប្រទេសកម្ពុជានៅចុងខែនេះផងដែរ៕មានិត