ក្រសួងការងារបានដាក់ចេញនូវគោលការណ៍ជាមូលដ្ឋានសម្រាប់សហជីព និងរោងចក្រកាលពីម្សិលមិញ នៅឯជំនួបចរចាដំបូងរបស់ក្រុមការងារថ្មីមួយទទួលបន្ទុកសម្របសម្រួលឲ្យភាគីទាំងពីរព្រមព្រៀងគ្នាលើប្រាក់ខែគោលថ្មីសម្រាប់កម្មករកាត់ដេរ រួមទាំងលក្ខខណ្ឌមួយដែលពួកគេត្រូវនិយាយរកគ្នាដោយមានសុជីវធម៌ផងដែរ។
ក្រសួងចង់ឲ្យសហជីព និងរោងចក្រព្រមព្រៀងគ្នាលើការដំឡើងបន្ថែមពីលើប្រាក់ខែគោល១០០ដុល្លារនាពេលបច្ចុប្បន្នដើម្បីចៀសវាងការធ្វើកូដកម្មដែលសហជីពមួយចំនួនធ្លាប់បានធ្វើកន្លងមក បន្ទាប់ពីមិនទទួលបាន១៦០ដុល្លារតាមការទាមទាររបស់ខ្លួនកាលពីខែធ្នូ។
ដោយមានបំណងនាំសហជីពដែលចូលចិត្តប្រើហិង្សាចូលតុចរចា ក្រសួងបានប្រកាសបង្កើតក្រុមការងារថ្មីមួយកាលពីសប្តាហ៍មុន ដែលមានសមាសភាពតំណាងចំនួនប្រាំបួនរូប ដោយមួយរូបៗមកពីសហជីព រោងចក្រ និងរដ្ឋាភិបាល។ ពួកគេមានភារកិច្ចសម្របសម្រួលការដំឡើងណាមួយសម្រាប់គណៈកម្មាធិការប្រឹក្សាការងារ ដែលនឹងលើកឡើងពីការដំឡើងនោះប្រាប់ទៅក្រសួងការងារ មុនពេលរដ្ឋាភិបាលធ្វើសេចក្តីសម្រេចចុងក្រោយ។
ការស្ម័គ្រចិត្តដំឡើងចុងក្រោយពីសំណាក់រោងចក្រ គឺ១០ដុល្លារ។ សហជីពបានជំរុញឲ្យមានការដំឡើងរហូតដល់ទៅ៧៧ដុល្លារ ប៉ុន្តែ កាលពីប៉ុន្មានថ្ងៃថ្មីៗនេះសហជីពមួយចំនួនក្នុងចំណោមសហជីពទាំងនោះបាននិយាយថា ខ្លួនសុខចិត្តបន្ទាបការទាមទារមកនៅត្រឹម៣៥ដុល្លារ ឬ៣០ដុល្លារក៏បាន។
នៅចុងបញ្ចប់នៃជំនួបចរចាដំបូងរបស់ខ្លួនកាលពីម្សិលមិញ ក្រុមការងារថ្មីនេះមិនបានបញ្ចេញតួលេខរួមសម្រាប់ប្រាក់ខែគោលថ្មីទេ។ ប៉ុន្តែ ក្រសួងពិតជាបានដាក់ចេញនូវគោលការណ៍ប្រាំំមួយចំណុចសម្រាប់តំណាងទាំងនោះសម្របខ្លួនធ្វើយ៉ាងណាឲ្យដំណើរការនេះប្រព្រឹត្តទៅបានឆាប់ហ័ស។
ចំណុចមួយបានលើកឡើងថា “កុំប្រើប្រាស់ពាក្យហិង្សា ឬបង្កជម្លោះដាក់គ្នា”។ចំណុចផ្សេងៗទៀតជំរុញតំណាងទាំងនេះកុំឲ្យផ្សព្វផ្សាយព័ត៌មាន ដែលអាចបង្កអំពើហិង្សា ឬការប្រមូលផ្តុំ “ខុសច្បាប់” និងកំុឲ្យអាក់ខានកិច្ចប្រជុំណាមួយនៅពេលខាងមុខ លើកលែងតែករណីមានជំងឺ គាំទ្ររាល់ទឡ្ហីករណ៍របស់ខ្លួនដោយមានហេតុផលត្រឹមត្រូវ និងគោរព
សំណើរបស់អ្នកដទៃដែលសុំឲ្យរក្សាការអត្ថាធិប្បាយជាក់លាក់ណាមួយជាការសម្ងាត់។ក្រសួងមិនបានចែងអំពីទោសទណ្ឌសម្រាប់អ្នកបំពានគោលការណ៍នេះទេ លើកលែងតែអ្នកដែលខកខានមិនបានចូលរួមជំនួបចរចាប៉ុណ្ណោះ ដែលអាចនឹងបាត់បង់អាសនៈរបស់ខ្លួននៅក្នុងក្រុមនេះ។
លោក ហេង សួរ អ្នកនាំពាក្យក្រសួងការងារបានមានប្រសាសន៍ថា គោលការណ៍ទាំងនេះត្រូវបានដាក់ចេញក្នុងបំណងជួយឲ្យគណៈកម្មាធិការនេះឈានដល់ការព្រមព្រៀងនេះឲ្យបានឆាប់រហ័ស។ លោកមានប្រសាសន៍ថា “គោលការណ៍ទាំងនេះមានបំណងធ្វើឲ្យទទួលបានលទ្ធផលឆាប់រហ័សតាមដែលអាចធ្វើទៅបាន។ ពីមុននិយោជកចោទប្រកាន់សហជីពថាប្រើប្រាស់ការតវ៉ា និងកូដកម្មដើម្បីដាក់សម្ពាធអំឡុងពេលចរចា ដូច្នេះយើងមិនចង់ឲ្យភាគីណាមួយមានអារម្មណ៍ថាខ្លួនរងសម្ពាធឡើយ”។
លោកបានមានប្រសាសន៍ទៀតថា ក្រសួងក៏បានបង្ហាញតួលេខផ្សេងៗគ្នាដែរស្តីអំពីសេដ្ឋកិច្ច ឧស្សាហកម្មកាត់ដេរ និងអត្រានៃភាពក្រីក្រអំឡុងជំនួបចរចាបិទទ្វារកាលពីម្សិលមិញ ដើម្បីជួយជូនដំណឹងអំពីការចរចា។ សូមបញ្ជាក់ថា ក្រុមការងារនេះនឹងជួបចរចាគ្នាទៀតនៅថ្ងៃនេះ៕សុខុម