កាលពីម្សិលមិញ លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានលើកឡើងថា មនុស្សមួយក្រុមដែលស្និទ្ធនឹងគណបក្សប្រឆាំងបានដាក់ពាក្យសុំចុះបញ្ជីក្រុមហ៊ុនមួយជាមួយរដ្ឋាភិបាល ដើម្បីទទួលបានអាជ្ញាប័ណ្ណបង្កើតទូរទស្សន៍តាមអ្វីដែលលោកនាយករដ្ឋមន្ត្រី ហ៊ុន សែន បានសន្យាជាមួយគណបក្សសង្គ្រោះជាតិអំឡុងភាពជាប់គាំងផ្នែកនយោបាយ។
កាលពីថ្ងៃទី១០ ខែមិថុនា លោក ហ៊ុន សែន បានសន្យាថា គណបក្សសង្គ្រោះជាតិដែលសមាជិករដ្ឋសភាទំាង៥៥រូបរបស់ខ្លួនធ្វើពហិការមិនចូលសភានៅពេលនោះ នឹងត្រូវអនុញ្ញាតឲ្យបង្កើតស្ថានីយទូរទស្សន៍មួយប្រសិនបើលោក សម រង្ស៊ី ប្រធានគណបក្សសង្គ្រោះជាតិចុះបញ្ជីក្រុមហ៊ុនឯកជនមួយ ហើយបន្ទាប់មកទៀតដាក់ពាក្យសុំអាជ្ញាប័ណ្ណនោះ។
ស្ថានីយទូរទស្សន៍ចំនួនប្រាំបួននៅក្នុងប្រទេសកម្ពុជាបច្ចុប្បន្នត្រូវបានគ្រប់គ្រង ឬមានសម្ព័ន្ធភាពជាមួយគណបក្សប្រជាជនកម្ពុជា ហើយការទាមទាររបស់គណបក្សសង្គ្រោះជាតិសុំបង្កើតស្ថានីយទូរទស្សន៍មួយផ្ទាល់ខ្លួន គឺជាការទាមទារមួយក្នុងចំណោមការទាមទារសំខាន់ៗរបស់ខ្លួនអំឡុងភាពជាប់គាំងផ្នែកនយោបាយរយៈពេលជិតមួយឆ្នាំបន្ទាប់ពីការបោះឆ្នោតជាតិដ៏ចម្រូងចម្រាសមួយកាលពីខែកក្កដា ឆ្នាំ២០១៣។
លោក យឹម សុវណ្ណ បានលើកឡើងទៀតថា កាលពីដើមខែនេះគណបក្សប្រឆាំងបានចាប់ផ្ដើមដំណើរការនៃការចុះបញ្ជីក្រុមហ៊ុនមួយជាមួយរដ្ឋាភិបាល។
លោក យឹម សុវណ្ណ បានពន្យល់ថា “យើងបានប្រមូលផ្ដុំបុគ្គលមួយចំនួនដែលស្មោះស្ម័គ្រនឹងគណបក្សដើម្បីធ្វើការក្នុងការចុះបញ្ជីក្រុមហ៊ុន។ វានឹងមានឈ្មោះថា ប្រព័ន្ធផ្សព្វផ្សាយឯករាជ្យកម្ពុជា”។ លោកបានឲ្យដឹងថា ពាក្យសុំចុះបញ្ជីក្រុមហ៊ុនត្រូវបានបញ្ជូនទៅក្រសួងពាណិជ្ជកម្មរួចហើយ។
លោកបានមានប្រសាសន៍បន្តថា “បន្ទាប់ពីក្រុមហ៊ុនឯកជនត្រូវបានចុះបញ្ជី អ្នកគ្រប់គ្រងនៃក្រុមហ៊ុននេះនឹងផ្ញើលិខិតមួយច្បាប់ទៅលោកនាយករដ្ឋមន្ត្រី ហ៊ុន សែន ដោយផ្ទាល់ដើម្បីស្នើសុំអាជ្ញាប័ណ្ណបង្កើតស្ថានីយទូរទស្សន៍”។
លោក ខៀវ កាញ៉ាឫទ្ធិ រដ្ឋមន្ត្រីក្រសួងព័ត៌មានបានបញ្ជាក់ថា ការសន្យារបស់លោកនាយករដ្ឋមន្ត្រី ហ៊ុន សែន ដែលអនុញ្ញាតបង្កើតស្ថានីយទូរទស្សន៍ប្រឆាំងមួយនៅតែមានសុពលភាពនៅឡើយ ប៉ុន្តែលោកបានលើកឡើងថា គ្មានមន្ត្រីគណបក្សប្រឆាំងណាមួយមកទាក់ទងជាមួយក្រសួងរបស់លោកឡើយ។
លោក យឹម សុវណ្ណ បានលើកឡើងបន្តទៀតថា លោកមិនច្បាស់ទេថាតើពេលណាស្ថានីយទូរទស្សន៍នេះនឹងចាប់ផ្ដើមធ្វើការផ្សាយ ហើយថា គណបក្សរបស់លោកកំពុងទន្ទឹងរង់ចាំព័ត៌មានអំពីការចុះបញ្ជីរបស់ខ្លួនពីក្រសួងពាណិជ្ជកម្មនៅពីរសប្ដាហ៍ក្រោយ។
លោក យឹម សុវណ្ណ បានពន្យល់ថា នៅពេលក្រុមហ៊ុនត្រូវបានចុះបញ្ជី ហើយបន្ទាប់មកទៀតទទួលបានអាជ្ញាប័ណ្ណពីក្រសួងព័ត៌មាននោះ ស្ថានីយទូរទស្សន៍នេះនឹងធ្វើប្រតិបត្តិការតាមប្រព័ន្ធពាក់កណ្ដាលស្វយ័ត ហើយមានគោលដៅផ្សព្វផ្សាយព័ត៌មានប្រកបដោយតុល្យភាព។
លោកបានមានប្រសាសន៍ថា ”យើងនឹងចំណាយប្រាក់ចំពោះប្រតិបត្តិការ ហើយយើងនឹងអំពាវនាវដល់វិនិយោគិនណាដែលចង់បណ្ដាក់ទុន។ ចំពោះខ្លឹមសារនៃកម្មវិធីវិញគឺត្រូវប្រកបដោយវិជ្ជាជីវៈ ហើយមិនទទួលរងឥទ្ធិពលនយោបាយខ្លាំងពេកនោះទេ ដោយព័ត៌មាននីមួយៗត្រូវតែមានភាពច្បាស់លាស់ ទាន់ពេលវេលា និងឆ្លុះបញ្ចាំងពីការពិត”។លោកបានបន្តថា ” វានឹងជាសិទ្ធិ និងអំណាចរបស់អ្នកគ្រប់គ្រងស្ថានីយទូរទ្សន៍ក្នុងការសម្រេចថា តើកម្មវិធីណាមួយនឹងត្រូវធ្វើការផ្សាយ”។ លោកបានបន្ថែមថា ស្ថានីយទូរទស្សន៍នេះនឹងផ្ដោតលើកម្មវិធីកម្សាន្តភាគច្រើន។
លោកបានមានប្រសាសន៍បន្តទៀតថា “ជាទូទៅវានឹងផ្ដោតលើការកម្សាន្ត ព្រោះយើងត្រូវការរស់រានដោយសារការលក់ម៉ោងផ្សាយ។ យើងត្រូវការប្រាក់ចំណូល និងប្រាក់ចំណេញដើម្បីរស់រាន បើមិនដូច្នោះទេយើងនឹងស្លាប់។ យើងមិនផ្សាយតែព័ត៌មាននយោបាយ២៤ម៉ោងពេញនោះទេ ពោលគឺព័ត៌មានផ្នែកនយោបាយនេះមានតែពីរទៅបីភាគរយប៉ុណ្ណោះ។
កាលពីខែវិច្ឆិកា គណបក្សសង្គ្រោះជាតិបានបើកស្ថានីយទូរទស្សន៍តាមប្រព័ន្ធអុីនធើណិតមួយ ដែលមានឈ្មោះថា “CNRPTV” ក្នុងគោលបំណងគេចចេញពីការរារាំងមិនឲ្យគណបក្សប្រឆាំងផ្សព្វផ្សាយសកម្មភាពនានារបស់ខ្លួននៅតាមបណ្ដាស្ថានីយទូរទស្សន៍ផ្សេងៗ អំឡុងការតវ៉ាដែលកើតឡើងក្រោយការបោះឆ្នោតជាតិកាលពីខែកក្កដា ឆ្នាំ២០១៣។
ស្ថានីយទូរទស្សន៍តាមអុីនធើណិតនេះជះឥទ្ធិពលតែបន្តិចបន្តួចប៉ុណ្ណោះលើស្ថានីយទូរទស្សន៍នានា ដែលមានសម្ព័ន្ធភាពជាមួយគណបក្សប្រជាជនកម្ពុជា និងដែលត្រូវបានបង្កើតឡើងចាប់តាំងពីដើមទសវត្សរ៍ឆ្នាំ១៩៩០មកនោះ។ ស្ថានីយទូរទស្សន៍ទាំងនោះរួមមាន ស្ថានីយទូរទស្សន៍បាយ័នដែលគ្រប់គ្រងដោយលោកស្រី ហ៊ុន ម៉ាណា ជាកូនស្រីរបស់លោក ហ៊ុន សែន និងស្ថានីយទូរទស្សន៍អប្សរាដែលគ្រប់គ្រងដោយកូនប្រុសរបស់លោក សាយ ឈុំ អគ្គលេធិការគណបក្សប្រជាជនកម្ពុជា គឺលោក សាយ សំអាល់ រដ្ឋមន្ត្រីក្រសួងបរិស្ថាន និងលោកឧបនាយករដ្ឋមន្ត្រី សុខ អាន។
ស្ថានីយទូរទស្សន៍ស៊ីធីអិន ស៊ីអិនស៊ី និងម៉ាយធីវី គឺគ្រប់គ្រងដោយលោក គិត ម៉េង ដែលមានទំនាក់ទំនងយ៉ាងជិតស្និទ្ធជាយូរមកហើយជាមួយលោក ហ៊ុន សែន និងដែលជារឿយៗធ្វើដំណើរជាមួយលោកនាយករដ្ឋមន្ត្រីក្នុងដំណើរទស្សនកិច្ចផ្លូវការនៅក្រៅប្រទេសនោះ។ ចំណែកឯទូរទស្សន៍ជាតិកម្ពុជាវិញ គឺគ្រប់គ្រងដោយក្រសួងព័ត៌មាន ដោយមានលោក កឹម គុណវឌ្ឍ ដែលជាអ្នកស្មោះស្ម័គ្រនឹងគណបក្សប្រជាជនកម្ពុជាធ្វើជាអគ្គនាយក។
លោក នូ សម្ផស្ស អគ្គនាយកផ្នែកព័ត៌មានរបស់ស្ថានីយទូរទស្សន៍ស៊ីធីអិន បានលើកឡើងថា លោកគ្មានអ្វីត្រូវខ្លាចចំពោះស្ថានីយទូរទស្សន៍ថ្មីនេះទេ ហើយលោកបានការពារការផ្សាយព័ត៌មានរបស់ទូរទស្សន៍លោក។
លោកបានមានប្រសាសន៍ថា “ចំពោះព័ត៌មាន យើងមិនចាំបាច់ព្រួយបារម្ភអ្វីឡើយ ព្រោះវាជាសិទ្ធិរបស់គេក្នុងការបង្កើតស្ថានីយទូរទស្សន៍មួយ។ យើងនឹងឈរលើមូលដ្ឋាននៃវិជ្ជាជីវៈ ហើយខ្ញុំមិនអាចនិយាយបានថា តើវាល្អឬមិនល្អនោះទេ ព្រោះយើងមិនទាន់ឃើញស្ថានីយទូរទស្សន៍ថ្មីនៅឡើយទេ។ ប្រសិនបើគេបង្កើតស្ថានីយទូរទស្សន៍នេះសម្រាប់តែបម្រើគណបក្សរបស់ខ្លួនវាទំនងជាមិនល្អទេ ព្រោះវាមិនបម្រើឲ្យសាធារណជនទូទៅ។ យើងនឹងមើលឃើញថា តើពួកគេនឹងមានឯករាជភាពប៉ុណ្ណា”។
លោកស្រី មូរ សុខហួរ ប្រធានទទួលបន្ទុកកិច្ចការសាធារណៈរបស់គណបក្សសង្គ្រោះជាតិ ដែលបានធ្វើការយ៉ាងជិតស្និទ្ធជាមួយសកម្មជនបក្សសង្គ្រោះជាតិ ដែលជាអ្នកបង្កើតស្ថានីយទូរទស្សន៍ប្រឆាំងតាមអុីនធើណិតបានលើកឡើងថា ស្ថានីយទូរទស្សន៍របស់គណបក្សសង្គ្រោះជាតិនឹងជាស្ថានីយទូរទស្សន៍ប្រកបដោយវិជ្ជាជីវៈ ហើយនិងមានការគ្រប់គ្រងដោយផ្ទាល់តិចតួចពីមន្ត្រីគណបក្ស។
លោកស្រីបានមានប្រសាសន៍ថា ” ក្នុងនាមជាសមាជិកនៃគណៈកម្មាធិការអចិន្ត្រៃយ៍ [គណបក្សសង្គ្រោះជាតិ] យើងក៏នឹងមានសិទ្ធិដែរនៅក្នុងគោលនយោបាយ។ តែទោះជាយ៉ាងណាអ្វីដែលជារឿងសំខាន់នោះ គឺឯករាជភាព និងអព្យាក្រឹតភាពនៃប្រព័ន្ធផ្សព្វផ្សាយជាធំ។ យើងចង់ក្លាយជាប្រភពនៃព័ត៌មានដែលប្រកបដោយឯករាជ្យ”។
លោកស្រីបានបន្តថា វាមិនគ្រាន់ត្រឹមតែជាស្ថានីយទូរទស្សន៍របស់គណបក្សសង្គ្រោះជាតិប៉ុណ្ណោះទេ តែយើងក៏ចង់ឲ្យវាមានក្រមសីលធម៌នៃប្រព័ន្ធផ្សព្វផ្សាយដែរ។ ហេតុដូច្នេះ យើងនឹងបណ្ដុះបណ្ដាលបុគ្គលិកឲ្យឈានដល់បទដ្ឋានដែលប្រកបដោយវិជ្ជាជីវៈមួយ ហើយនឹងបណ្ដុះបណ្ដាលមនុស្សមួយក្រុមដែលចាប់អារម្មណ៍លើប្រព័ន្ធផ្សព្វផ្សាយនេះឲ្យចេះធ្វើការ”។
លោក ប៉ា ងួនទៀង នាយកប្រតិបត្តិនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ បានលើកឡើងថា លោកគិតថា វានឹងមានការលំបាកក្នុងការរក្សាឲ្យមានអព្យាក្រឹតទាំងស្រុងសម្រាប់ក្រុមការងារផ្នែកព័ត៌មានទាក់ទិននឹងរឿងនយោបាយដែលធ្វើការនៅក្នុងទូរទស្សន៍ថ្មីរបស់គណបក្សប្រឆាំង។
លោក បា៉ ងួនទៀង បានមានប្រសាសន៍ថា ” ប្រសិនបើវាមានសម្ព័ន្ធភាពជាមួយគណបក្សសង្គ្រោះជាតិ អ៊ីចឹងសូមរង់ចាំមើលខ្លឹមសារសិន ប៉ុន្តែខ្ញុំសង្ឃឹមថា គណបក្សនេះនឹងមិនផ្សព្វផ្សាយអ្វីដែលផ្ដល់ផលប្រយោជន៍ឲ្យតែគណបក្សរបស់ខ្លួនឡើយ”។ លោកបានពន្យល់ថា លោកសន្មត់ថា គោលដៅចម្បងរបស់ស្ថានីយទូរទស្សន៍ថ្មីនេះនឹងជាទូរទស្សន៍សម្រាប់ផ្សព្វផ្សាយតែពីគណបក្សសង្គ្រោះជាតិប៉ុណ្ណោះ។ លោកបានមានប្រសាសន៍បន្តថា ” ការទស្សន៍ទាយរបស់ខ្ញុំគឺថា នេះគឺជាគោលបំណងរបស់គណបក្ស។ ប្រសិនបើពួកគេគ្មានគោលបំណងបែបនេះទេនោះ ពួកគេនឹងមិនត្រូវការស្ថានីយទូរទស្សន៍ទេ។ ហើយក្នុងគោលបំណងទី២នោះ ពួកគេក៏ប្រហែលជាចាប់អារម្មណ៍លើប្រព័ន្ធផ្សព្វផ្សាយឯករាជ្យដែរ”។
លោក យឹម សុវណ្ណ បានលើកឡើងថា គណបក្សសង្គ្រោះជាតិសង្ឃឹមថា ស្ថានីយទូរទស្សន៍ថ្មីនេះនឹងមានប្រតិបត្តិការស្រដៀងទៅនឹងបណ្ដាញផ្សព្វផ្សាយព័ត៌មាន CNNBBC និង ChannelNewsAsia ដែរ ហើយថា មេដឹកនាំគណបក្សនឹងមិនដាក់សម្ពាធលើការផ្សព្វផ្សាយឡើយ។ លោកបានមានប្រសាសន៍ថា ” យើងមិនចង់ចូលខ្លួនឲ្យពាក់ព័ន្ធខ្លាំងពេកនៅក្នុងស្ថានីយទូរទស្សន៍ថ្មីនេះទេ។ យើងនឹងទុកឲ្យទូរទស្សន៍នេះមានតុល្យភាព”៕ ស៊ុយឈាង
(រាយការណ៍បន្ថែមដោយ ហ៊ុល រស្មី)