តំណាងរបស់អ្នកភូមិចំនួន១៤២គ្រួសារមកពីស្រុកវាលវែង ខេត្តពោធិ៍សាត់ បានដាក់ពាក្យបណ្ដឹងទៅកាន់អភិបាលខេត្តកាលពីម្សិលមិញ ដើម្បីស្នើសុំឲ្យមានការធ្វើអន្តរាគមន៍នៅក្នុងវិវាទដីធ្លីរបស់ពួកគាត់ជាមួយលោក ទ្រី ភាព ដែលជាអ្នកជំនួញដ៏មានអំណាច និងមានទ្រព្យសម្បត្តិស្ដុកស្ដម្ភ។
ក្រុមហ៊ុន អឹម ឌី អេស(MDS) របស់លោក ទ្រី ភាព ត្រូវបានរដ្ឋាភិបាលផ្ដល់ដីសម្បទានសេដ្ឋកិច្ចទំហំ២.២៥០ហិកតានៅក្នុងស្រុកវាលវែង ដើម្បីបង្កើតច្រកព្រំដែនថ្មីមួយជាមួយប្រទេសថៃ និងដើម្បីអភិវឌ្ឍចម្ការកៅស៊ូ ប៉ុន្តែអ្នកភូមិបាននិយាយថា ក្រុមហ៊ុននេះបានរំលោភយកដីធ្លីដែលពួកគាត់បានធ្វើស្រែរាប់ឆ្នាំមកហើយ ដោយគ្មានការផ្ដល់ប្រាក់សំណងសមរម្យឡើយ។
លោក ជុំ សាវ៉ាត តំណាងរបស់អ្នកភូមិចំនួន៦៥គ្រួសារបាននិយាយថា ” យើងបានត្រឹមតែឈរសម្រក់ទឹកភ្នែកមើលក្រុមហ៊ុនដែលគាំទ្រដោយកងកម្លាំងប្រដាប់អាវុធរំលោភយកដីស្រែរបស់យើង ហើយដាំដើមកៅស៊ូតែប៉ុណ្ណោះ”។
អ្នកភូមិបាននិយាយទៀតថា ពួកគាត់កំពុងដាក់ញត្តិជូនលោក ម៉ៅ ធនិន អភិបាលខេត្តពីព្រោះគាត់ទើបតែឡើងកាន់តំណែងបានបីខែប៉ុណ្ណោះ ហើយប្រហែលជាអាចធ្វើឲ្យមានការពិភាក្សាថ្មីមួយលើបញ្ហានេះ។
យោងតាមលោក សាវ៉ាត បានឲ្យដឹងថា លោក ម៉ៅ ធនិន បានប្រាប់អ្នកភូមិថា លោកនឹងចុះទៅតំបន់នោះដោយផ្ទាល់ដើម្បីចង់ដឹងអំពីវិវាទនោះ។ គេមិនអាចទាក់ទងលោកអភិបាលខេត្តសុំការធ្វើអត្ថាធិប្បាយបានទេ ប៉ុន្តែមន្ត្រីមួយរូបនៅការិយាល័យរបស់លោកបានលើកឡើងថា ពាក្យបណ្ដឹងរបស់អ្នកភូមិត្រូវបានបញ្ជូនបន្តទៅឲ្យអាជ្ញាធរពាក់ព័ន្ធរួចហើយ។ គេក៏មិនអាចទាក់ទងក្រុមហ៊ុនរបស់លោក ទ្រី ភាព បានដែរ៕ ស៊ុយឈាង