មន្ត្រីមួយរូបបានឲ្យដឹងកាលពីម្សិលមិញថា អ្នកភូមិប្រហែល២០នាក់ ដែលធ្វើការឲ្យក្រុមជួញដូរឈើខុសច្បាប់ក្នុងស្រុកសាលាក្រៅ ខេត្តប៉ៃលិន បានដាក់ពាក្យបណ្ដឹងទៅកាន់នគរបាលខេត្ត ដោយចោទប្រកាន់មេខ្លោងចំនួនពីរនាក់របស់ខ្លួនថា មិនបានបង់ថ្លៃឈ្នួលឲ្យពួកគាត់។
លោក ជាវ ខាន់ នាយខុទ្ទកាល័យខេត្តប៉ៃលិនបានលើកឡើងថា អ្នកភូមិដែលដាក់ពាក្យបណ្ដឹងកាលពីថ្ងៃសៅរ៍ ត្រូវបានគេជួលឲ្យឆ្លងកាត់ព្រំដែនចូលទៅកាប់ឈើដោយខុសច្បាប់ក្នុងទឹកដីថៃ ប៉ុន្តែមិនដែលទទួលបានប្រាក់ឈ្នួលឡើយ។
លោក ខាន់ បានមានប្រសាសន៍ថា ” ពាក្យបណ្ដឹងរបស់ពួកគាត់គឺចង់ឲ្យអភិបាលរបស់យើងស្គាល់មេខ្លោងជួញដូរឈើគ្រញូងដែលមានឈ្មោះថា រ៉ា និង រី និងដែលបោកប្រាស់ពួកគាត់ ហើយបញ្ចុះបញ្ចូលពួកគាត់ឲ្យទៅកាប់ និងដឹកឈើគ្រញូងចេញពីក្នុងព្រៃទឹកដីថៃ”។
លោកបានមានប្រសាសន៍បន្ថែមថា “ ជនបោកប្រាស់ រ៉ា និង រី ដែលរស់នៅក្នុងស្រុកសំឡូត [ខេត្តបាត់ដំបង] ជាប់ព្រំដែនកម្ពុជា-ថៃ មិនបានបង់ថ្លៃឈ្នួលឲ្យអ្នកភូមិទាំងនោះឡើយ ហើយធ្វើឲ្យពួកគាត់មានកំហឹង ហេតុដូច្នេះ យើងបានស្នើសុំឈ្មោះ និងស្នាមមេដៃរបស់ពួកគាត់ដើម្បីធ្វើសេចក្ដីរាយការណ៍ជូននគរបាលខេត្ត”។
លោក ខាន់ បានលើកឡើងថា នគរបាលបានទទួលយកសេចក្ដីរាយការណ៍នោះ ហើយបន្ទាប់មកទៀតបានប្រាប់អ្នកភូមិថា ខ្លួនមិនអាចជួយពួកគាត់ឲ្យទទួលបានប្រាក់ឈ្នួលពីសកម្មភាពខុសច្បាប់នេះមកវិញនោះទេ។
លោកបានមានប្រសាសន៍ថា ” តាមពិតទៅ ភាគីទាំងពីរសុទ្ធតែខុសទាំងសងខាង ហើយយើងបានអប់រំអ្នកភូមិរងគ្រោះ ហើយស្នើឲ្យពួកគាត់បោះបង់ចោលមុខរបរនេះ ប៉ុន្តែវាទើបតែលើកដំបូងទេ ដែលយើងបានជួបជាមួយអ្នកភូមិដែលដាក់ពាក្យបណ្ដឹងទាក់ទងនឹងថ្លៃឈ្នួល របស់ពួកគាត់”។
លោក ញឹក ថុល អធិការនគរបាលស្រុកសាលាក្រៅ បានឲ្យដឹងថា នគរបាលនឹងធ្វើការដើម្បីពន្យល់អ្នកភូមិដែលរស់នៅតាមបណ្ដោយព្រំដែនអំពីការពាក់ព័ន្ធរបស់ពួកគាត់នៅក្នុងការដឹកជញ្ជូនឈើដោយខុសច្បាប់នេះ។
លោក ថុល បានមានប្រសាសន៍ថា ” យើងនឹងអប់រំពួកគាត់ឲ្យដឹងអំពីហានិភ័យនៃការលួចចូលទៅក្នុងព្រៃក្នុងទឹកដីថៃ ដើម្បីកាប់ និងដឹកឈើគ្រញូង ហើយប្រាប់ពួកគាត់អំពីអ្នកភូមិដែលត្រូវបានបោកប្រាស់ដោយមេខ្លោងជួញដូរឈើគ្រញូង”៕ ស៊ុយឈាង