27.6 C
Phnom Penh

ឈើប្រណីត​ជាង​៣.០០០ដុំ​ត្រូវ​បាន​រក​ឃើញ​នៅ​ក្នុង​ដែន​ជម្រកសត្វព្រៃ​

ដោយ ឌឹ ខេមបូឌា ដេលី

បទវិភាគ

នគរ​បាល​ និង​មន្ត្រី​បរិស្ថាន​​​នៅ​ក្នុង​ខេត្ត​មណ្ឌលគិរី​រឹប​អូស​បាន​​ឈើប្រណីត​ជាង​៣.០០០ដុំ​ ដែល​គេ​បាន​រក​ឃើញ​នៅ​ក្នុង​ដែន​ជម្រក​សត្វព្រៃ​មួយ​កន្លែង​កាលពី​ថ្ងៃ​អាទិត្យ ប៉ុន្តែ​នៅ​មិន​ទាន់​កំណត់​នៅ​ឡើយ​ទេ​​ថា តើ​វា​​ជា​របស់​ក្រុម​ហ៊ុន​ចិន​ដែល​ទទួល​បាន​ដី​សម្បទាន​សេដ្ឋកិច្ច​នៅ​តំបន់​​នោះ​ឬរបស់​អ្នក​ផ្សេង​។

យោង​តាម​លោក ងួន សារ៉ាន អភិបាល​ស្រុក​ពេជ្រាដា បាន​ឲ្យ​ដឹង​ថា នគរ​បាល​ខេត្ត​ និង​មន្ត្រី​មក​ពី​មន្ទីរ​បរិស្ថាន​ខេត្ត​មណ្ឌលគិរី បាន​សម្រុក​ចូល​ទៅ​ក្នុង​កន្លែង​លាក់​ឈើ​ប្រភេទ​ធ្នង់​នៅ​​ក្នុង​ឃុំ​ពោធិ៍ជ្រៃ ស្រុក​ពេជ្រាដា បន្ទាប់ពី​ទទួល​បាន​ព័ត៌មាន​ពី​អ្នកភូមិ។

លោក សារ៉ាន បាន​មាន​ប្រសាសន៍​ដោយ​បដិសេធ​​មិន​ប្រាប់​​ឈ្មោះ​ក្រុម​ហ៊ុន​ថា ” យើង​នៅ​មិន​ទាន់​ដឹង​នៅ​ឡើយ​ទេ​ថាតើ​ឈើ​ប្រណីត​ទាំង​នេះជា​របស់​ក្រុម​ហ៊ុន​ ឬ​របស់​អ្នក​កាប់​​ឈើ​ ហើយ​យើង​ត្រូវ​ការ​ធ្វើ​ការ​ស៊ើបអង្កេត​បន្ថែមទៀត​សិន​”។

ឈើ​ប្រភេទ​ធ្នង់​នេះ​អាច​មាន​តម្លៃ​រហូត​ដល់​៨០០​ដុល្លារ​ក្នុង​ម៉ែត្រគូប​នៅ​ក្នុង​បណ្ដា​ខេត្ត​នានា ហើយ​អាច​មាន​តម្លៃ​លើស​ពី​នេះ​នៅ​ក្នុង​ប្រទេស​ចិន និង​ប្រទេស​វៀតណាម។

លោក ឈិត សុផល ប្រធាន​មន្ទីរ​បរិស្ថាន​ខេត្ត​បាន​បញ្ជាក់​ថា ឈើ​ជាង​៣.០០០​ដុំ​​នេះ​ពិត​ជា​ត្រូវ​បាន​រឹបអូស​មែន ប៉ុន្តែ​លោក​បាន​ផ្ដល់​ព័ត៌មាន​តែ​បន្តិចបន្តួច​ប៉ុណ្ណោះ។

លោក​បាន​មាន​ប្រសាសន៍​ថា “ឥឡូវ​នេះ​ខ្ញុំ​កំពុង​តែ​ធ្វើ​ដំណើរ​ទៅ​ស៊ើបអង្កេត​។ ខ្ញុំ​ត្រូវ​ការ​ព័ត៌មាន​លម្អិត​បន្ថែម​ដើម្បី​ចង់​ដឹង​ថា តើ​វា​ស្ថិត​នៅ​ក្នុង​ដី​សម្បទាន​សេដ្ឋកិច្ច​របស់​ក្រុម​ហ៊ុន ឬនៅ​ក្នុង​ដីព្រៃ​អភិរក្ស​”។

ផ្ទៃដី​ភាគច្រើន​នៅ​ក្នុង​ស្រុក​ពេជ្រាដា គឺ​ជា​ផ្នែក​​មួយ​នៃ​ដែន​ជម្រក​សត្វព្រៃ​ភ្នំព្រិច ដែល​​ផ្ទៃ​ដីទំហំ​២២.២៥០ហិកតា​មាន​​ព្រំប្រទល់​ជាប់​ប្រទេស​វៀតណាម​នៅ​ប៉ែក​ខាង​កើត​ ហើយ​ប៉ែក​ខាង​ជើង​ជាប់​ព្រំប្រទល់​ព្រៃការ​ពារ​ខេត្ត​មណ្ឌលគិរី។

លោក សុខ រដ្ឋា អ្នក​សម្រប​សម្រួល​នៅ​អង្គការ​សិទ្ធិមនុស្ស​អាដហុក​ប្រចាំ​ខេត្ត​មណ្ឌល​គិរី​បាន​លើក​ឡើង​ថា ឈើ​ទាំង​នេះ​ត្រូវ​បាន​រក​ឃើញ​នៅ​ក្នុង​ដែន​ជម្រកសត្វ​ព្រៃ​ មិន​មែន​នៅ​ក្នុង​ដី​សម្បទាន​សេដ្ឋកិច្ច​របស់​ក្រុម​ហ៊ុន​នោះ​ទេ​។ លោក​បាន​លើក​ឡើង​ដូច្នេះ​ដោយ​ផ្អែក​លើ​អ្វី​ដែល​អ្នកភូមិ​​​បាន​ប្រាប់​លោក​។

លោក​បាន​មាន​ប្រសាសន៍​ថា ” យើង​នៅ​មិន​ទាន់​ដឹង​នៅ​ឡើយ​ទេថា តើ​នរណា​ជា​ម្ចាស់​ឈើ​ទាំងនេះ ប៉ុន្តែ​ទីតាំង​ដែល​ឈើ​ទាំង​នេះ​ត្រូវ​បាន​រក​ឃើញ​ គឺ​មាន​ព្រំប្រទល់ជាប់​នឹង​ដី​សម្បទាន​សេដ្ឋកិច្ច​របស់​ក្រុម​ហ៊ុន​ចិន”។

យោង​តាម​អនុក្រឹត្យ​ចុះ​ថ្ងៃ​ទី​៣០ ខែ​ឧសភា ឆ្នាំ​២០១១​ ដី​សម្បទាន​សេដ្ឋកិច្ច​ចំនួន​ពីរ​កន្លែង​នៅ​ក្នុង​ដែន​ជម្រក​​សត្វព្រៃ​ភ្នំព្រិច ត្រូវ​បាន​ផ្ដល់​ទៅ​ឲ្យ​ក្រុម​ហ៊ុន​ចិន​។ ដី​សម្បទាន​សេដ្ឋកិច្ច​​ទំហំ​៨.៧០៨ហិកតា​ត្រូវ​បាន​ប្រគល់​ទៅ​ឲ្យ​ក្រុម​ហ៊ុន​ចិន DaiThanh ហើយ​ដី​សម្បទាន​សេដ្ឋកិច្ច​មួយ​កន្លែង​ទៀត​ដែល​មាន​ទំហំ​៨.៦៨៥​ហិកតា​ត្រូវ​បាន​ប្រគល់​ទៅ​​ឲ្យ​ក្រុម​ហ៊ុន​ចិន DaiNam។ ​ដី​សម្បទាន​សេដ្ឋកិច្ច​ទាំង​ពីរ​កន្លែង​នេះ​សុទ្ធ​តែ​សម្រាប់​ការ​អភិវឌ្ឍ​ផ្នែក​កសិឧស្សាហកម្ម​៕ ស៊ុយឈាង​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស