លោក សុន ឆ័យ សមាជិកសភាគណបក្សសង្គ្រោះជាតិបានផ្ញើលិខិតមួយច្បាប់ជូនលោក ឡេង ប៉េងឡុង អគ្គលេខាធិការរដ្ឋសភា ដោយចោទប្រកាន់មន្ត្រីមួយរូបពីការផ្ដល់តួនាទីដល់សមាជិកគ្រួសាររបស់ខ្លួនដ៏ការិយាធិបតេយ្យនៅក្នុងសភា។
នៅក្នុងលិខិតចុះថ្ងៃអង្គារ ហើយបានចែកចាយកាលពីម្សិលមិញ លោក សុន ឆ័យ បានទាមទារឲ្យធ្វើការស៊ើបអង្កេតថា តើលោក មិត្ត ការ៉េន អគ្គលេខាធិការរងរដ្ឋសភាបានប្រើប្រាស់ឥទ្ធិពលរបស់ខ្លួនដើម្បីផ្ដល់តួនាទីដល់សមាជិកគ្រួសារខ្លួនយ៉ាងតិចប្រាំពីរនាក់ដឹកនាំនាយកដ្ឋានរដ្ឋសភាឬយ៉ាងណា។
អ្នកដែលត្រូវបានចោទប្រកាន់ថា ទទួលបានតួនាទីរបស់ខ្លួនតាមរយៈបក្ខពួកនិយមនោះ រួមមាន លោក ហុង វិចិត្រ អគ្គនាយកនៃអគ្គនាយកដ្ឋានរដ្ឋបាល និងហិរញ្ញវត្ថុ ដែលត្រូវជាកូនប្រសារបស់លោក ការ៉េន និង មិត្ត ទីមាន ប្រធាននាយកដ្ឋានសវនកម្មផ្ទៃក្នុង ដែលត្រូវជាកូនស្រីរបស់លោក។
នៅពេលត្រូវបានទាក់ទងកាលពីម្សិលមិញ លោក ការ៉េន បានទទួលស្គាល់ថា អ្នកដែលមានឈ្មោះនៅក្នុងលិខិតរបស់លោក សុន ឆ័យ នោះគឺជាសាច់ញាតិរបស់លោក ប៉ុន្តែបានបដិសេធការចោទប្រកាន់ពីបទបក្ខពួកនិយម ដោយលោកលើកឡើងថា លោកគ្មានសិទ្ធិផ្ដល់ការងារទេ។
លោកបានមានប្រសាសន៍ថា ” ពិតមែនហើយពួកគេគឺជាសាច់ញាតិរបស់ខ្ញុំ ប៉ុន្តែពួកគេមិនកាន់តួនាទីខ្ពស់ទេ។ ពួកគេនៅធ្វើការក្រោមមេរបស់ខ្លួនដដែល”។
លោកបានបន្ថែមថា “ខ្ញុំគ្មានសិទ្ធិតែងតាំងនរណាម្នាក់ទេ រួមទាំងសាច់ញាតិរបស់ខ្ញុំ។ ការតែងសម្រាប់ការងារនៅទីនេះត្រូវបានចាត់ចែងដោយប្រធានរដ្ឋសភាពីមុន បន្ទាប់ពីធ្វើការពិនិត្យពីជំនាញរបស់ពួកគេ”។
លោក ការ៉េន បានបន្ថែមទៀតថា សាច់ញាតិរបស់លោកបានធ្វើការនៅក្នុងរដ្ឋសភាតាំងពីព្រះអង្គម្ចាស់ នរោត្តម ជានាយករដ្ឋមន្ត្រីមកម្លេ៉ះ ហើយទទួលបានការងាររបស់ខ្លួនដោយស្របច្បាប់តាមរយៈកិច្ចព្រមព្រៀងនយោបាយរវាងគណបក្សប្រជាជនកម្ពុជា និងគណបក្សហ្វុ៊នស៊ិនប៉ិច។
លោកបានមានប្រសាសន៍ថា ” អ្វីៗត្រូវបានកត់ត្រាទុកជាឯកសារ ហើយប្រសិនលោកចង់បានឯកសារទាក់ទងការតែងតាំងបុគ្គលិក លោកអាចសុំការយល់ព្រមពីសម្ដេចប្រធានរដ្ឋសភា ហេង សំរិន ទៅ”។
លោក សុន ឆ័យ បានមានប្រសាសន៍តាមទូរស័ព្ទថា សាច់ញាតិរបស់លោក ការ៉េន គួរតែត្រូវបានដកចេញពីតួនាទីរបស់ខ្លួនដើម្បីរង់ចាំការស៊ើបអង្កេត ហើយបានអំពាវនាវឲ្យលោក ឡេង ប៉េងឡុង អគ្គលេខាធិការរដ្ឋសភាចេញផ្សាយបញ្ជីបុគ្គលិករបស់សភា ដើម្បីបង្ហាញថា មិនមានបក្ខពួកនិយមនោះ។
លោក សុន ឆ័យបានពន្យល់ថា ខ្ញុំបានឮថា ឥឡូវនេះតួនាទីអចិន្ត្រៃយ៍ឬការងារនៅក្នុងសភាមានចំនួន១.៣៥០ ហើយការងារដែលមានកិច្ចសន្យាប្រហែល៥០០ទៅ៦០០។ ខ្ញុំបានស្នើសុំបញ្ជីឈ្មោះនេះ១០ឆ្នាំមកហើយ ហើយមិនទទួលបានទេ”។
លោក សុន ឆ័យ បានមានប្រសាសន៍ថា ” នាយករដ្ឋមន្ត្រីតែងតែលើកឡើងថា សភាគួរតែជាកញ្ចក់ដើម្បីអនុញ្ញាតឲ្យរដ្ឋមន្ត្រីរបស់លោកឆ្លុះមើលធូលីនៅលើមុខរបស់ពួកគេ ហើយសម្អាតមុខរបស់ខ្លួន។ ប៉ុន្តែប្រសិនបើកញ្ចក់នេះប្រឡាក់សុទ្ធតែដី តើរដ្ឋមន្ត្រីទាំងនេះអាចឆ្លុះមើលបញ្ហាដែលខុសឆ្គងឃើញទេ?”។ គេមិនអាចទាក់ទងលោក ឡេង ប៉េងឡុង បានទេ៕ សារុន