31 C
Phnom Penh

អង្គការ​មិន​មែន​រដ្ឋាភិបាល​ និង​សហគមន៍​ជំរុញ​ឲ្យ​រដ្ឋាភិបាល​ចាត់​វិធានការ​តឹង​រ៉ឹង​ចំពោះ​ការ​កាប់​ឈើ​ខុស​ច្បាប់​

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ​ អង្គការ​មិន​មែន​រដ្ឋាភិបាល​ និង​តំណាង​សហគមន៍​បាន​អំពាវ​នាវ​ឲ្យ​រដ្ឋាភិបាល​​បើកចំហ​ជា​សាធារណៈ​ចំពោះ​​ការដាក់​​ដេញ​ថ្លៃ​ឈើ​ដែល​រឹប​អូស​បាន​ និង​អំពាវ​នាវ​ឲ្យ​លុប​ចោល​កិច្ច​ព្រមព្រៀង​មួយ​ដែល​អនុញ្ញាត​ឲ្យ​លោក ទ្រី ភាព ទិញ​យក​ឈើ​ទាំង​អស់​ដែល​រដ្ឋាភិបាល​រឹបអូស​បាន​​។ ​បញ្ហាទាំង​ពីរ​នេះ​ជា​បញ្ហា​ដែល​ពួកគេ​បាន​រិះគន់​ថា បាន​ធ្វើ​ឲ្យ​មាន​ការ​កាប់​ឈើ​ខុស​ច្បាប់​ទូទាំង​ប្រទេស​កម្ពុជា​។

នៅ​ក្នុង​សន្និសីទ​កាសែត​មួយ​ក្នុង​រាជ​ធានីភ្នំពេញ ​តំណាង​វេទិកា​អង្គការ​មិនមែន​រដ្ឋាភិបាល​ និង​មជ្ឈមណ្ឌល​អប់រំ​ច្បាប់​សម្រាប់​សហគមន៍​ត្រូវ​បាន​ចូល​រួម​ដោយ​​អ្នកភូមិ​ចំនួន​បីនាក់​មកពី​ខេត្ត​ក្រចេះ មណ្ឌលគិរី និង​ខេត្ត​ព្រះវិហារ ដែល​ស្ដីបន្ទោស​លើ​​អ្នក​កាប់​ឈើ​ខុស​ច្បាប់​យ៉ាង​ច្រើន​ចំពោះ​ការ​​បំផ្លិច​បំផ្លាញ​ព្រៃ​សហគមន៍​របស់​ពួកគាត់​។

យោង​តាម​របាយការណ៍​ថ្មី​មួយ​ពីក្រសួង​កសិកម្ម​​បាន​ឲ្យ​ដឹង​ថា រដ្ឋាភិបាល​បាន​ដោះ​ស្រាយ​សំណុំរឿង​ចំនួន​១.៨៩១​ដែល​ទាក់​ទិន​នឹង​បទ​ល្មើស​ព្រៃ​ឈើ និង​ការ​កាប់​ឈើ​ខុស​ច្បាប់​អំឡុង​រយៈ​ពេល​៩ខែ​ដំបូង​នៃ​ឆ្នាំ​នេះ​។ របាយការណ៍​នេះ​បាន​ឲ្យ​ដឹង​បន្ត​ថា ករណី​ភាគច្រើន​​ត្រូវ​បាន​ដោះ​ស្រាយ​ដោយ​តុលាការ​ ប៉ុន្តែ​មិន​បាន​ពន្យល់​ថា​តើ​អ្វី​​បាន​កើត​ឡើង​​នៅ​​ក្នុង​តុលាការ​ឡើយ​។ របាយការណ៍​នេះ​ក៏​បាន​ឲ្យ​ដឹង​បន្ថែម​ទៀត​ថា រដ្ឋាភិបាល​បាន​រឹបអូស​ឈើ​ចំនួន​១.៦០១ម៉ែត្រគូប ឈើ​អារ​​រួច​ចំនួន​៤.១៦២ម៉ែត្រគូប និង​ឈើ​មាន​តម្លៃ​បំផុត​[ឈើ​គ្រញូង]​ចំនួន​១០៥​ម៉ែត្រ​គូប​។

លោក តឹក​ វណ្ណារា៉ ​​ប្រធាន​វេទិកា​អង្គការ​មិន​មែន​រដ្ឋាភិបាល​បាន​មាន​ប្រសាសន៍​ថា “ចំនួន​ឈើ​ដែល​រឹបអូស​បាន​ទាំង​នោះ​បង្ហាញ​ឲ្យ​ឃើញ​ពីការ​កាប់​បំផ្លាញ​ព្រៃ​ឈើ​យ៉ាង​ច្រើន​ក្នុង​ប្រទេស​កម្ពុជា​”។ លោក​បាន​ចាត់​ទុក​ការ​កាប់​បំផ្លាញ​ទាំង​​នេះ​ជា​សោក​នាដកម្ម​ជាតិ​។

អង្គការ​មិន​មែន​រដ្ឋាភិបាល​ និង​អ្នក​ភូមិ​​បាន​ស្ដីបន្ទោស​បញ្ហា​ដែល​កើត​មាន​យ៉ាង​ច្រើន​នេះ​លើ​របៀប​ដែល​រដ្ឋាភិបាល​បាន​ដោះ​ស្រាយ​ចំពោះឈើ​​ដែល​ខ្លួន​រឹបអូស​បាន​។

​​ តាម​ច្បាប់ ឈើ​ដែល​រឹបអូស​បានទាំង​អស់​ត្រូវ​ដាក់​ដេញ​ថ្លៃ​ជាសាធារណៈ​។ អង្គការ​មិន​មែន​រដ្ឋាភិបាល​បាន​លើក​ឡើង​ថា តាមពិត​ទៅ​អង្គការ​មិន​ដែល​​ឃើញ​ថា មាន​ការ​ដាក់​ដេញ​ថ្លៃ​នោះ​ទេ ហើយ​រដ្ឋាភិបាល​បាន​បដិសេធ​មិន​ផ្ដល់​ព័ត៌មាន​អំពី​ដំណើរ​ការ​នេះ​ឡើយ​។ ព័ត៌មាន​ដែល​រដ្ឋាភិបាល​បាន​ផ្ដល់​នោះ គឺ​ប្រាប់​ឲ្យ​ដឹង​ត្រឹម​តែ​អ្នក​ដែល​ឈ្នះ​ក្នុង​ការ​ដេញ​ថ្លៃ​ប៉ុណ្ណោះ។

កាលពី​ពីរបី​ឆ្នាំ​កន្លង​ទៅ​នេះ​ ការ​ឈ្នះ​ក្នុង​ការ​ដេញ​ថ្លៃទាំង​អស់​គឺ​សុទ្ធ​តែ​ធ្លាក់​ទៅ​លើ​លោក ទ្រី ភាព ដែល​បន្ទាប់​មក​បាន​បន្ត​លក់​ឈើ​ទាំង​នោះ​ទៅ​ក្រៅ​ប្រទេស​ ដោយ​ទទួល​បាន​ប្រាក់​ចំណេញ​​រាប់​លាន​ដុល្លារ​។ អង្គការ​មិន​មែន​រដ្ឋាភិបាល​​បាន​លើក​ឡើង​បន្ត​ទៀត​ថា ដំណើរ​ការបែប​​នេះ​បាន​ធ្វើ​ឲ្យ​រដ្ឋាភិបាល​​ដែល​ក៏ទទួល​បាន​ប្រាក់​ចំណេញពី​ការ​ដេញ​ថ្លៃ​​ដែរ​នោះ គ្មាន​បំណង​បញ្ឈប់​ការ​កាប់​ឈើ​ខុស​ច្បាប់​​ដែល​អាច​ជួយ​ឲ្យ​លោក ទ្រី ភាព អាច​ទិញ​បាន​ឈើ​បន្តទៀត​​​នោះ​ឡើយ​។

ក្នុង​ចំណោមអនុសាសន៍​ដែល​អង្គការ​មិន​មែន​រដ្ឋាភិបាល និង​អ្នកភូមិ​បាន​លើក​ឡើង​កាលពី​ម្សិលមិញ គឺ​ចង់​ឲ្យ​មាន​ការ​ដាក់​ដេញ​ថ្លៃ​ជាសាធារណៈ​ពិត​ប្រាកដ​មួយ​ និង​ចង់​ឲ្យ​សង្គម​ស៊ីវិល​ត្រូវ​បាន​គេ​អនុញ្ញាត​ឲ្យ​ឃ្លាំមើល​ការ​ដាក់​​ដេញ​ថ្លៃទាំង​នោះ​។

ពួកគេ​ក៏​បាន​ផ្ដល់​អនុសាសន៍​ឲ្យ​រដ្ឋាភិបាល​លុប​ចោល​ការ​ផ្ដល់​សិទ្ធិ​ផ្ដាច់​មុខ​ទៅ​ឲ្យ​លោក ទ្រី ភាព ក្នុង​ការ​ទិញ​យក​ឈើ​រឹប​អូស​បាន​ទាំង​អស់​​​ផង​ដែរ​។ ឈើ​ដែល​រឹប​អូស​បាន​ទាំង​នេះ​ គឺ​ស្ថិត​ក្នុង​ការ​គ្រប់គ្រង​របស់​ក្រសួង​បរិស្ថាន និង​ក្រសួង​កសិកម្ម ហើយ​វា​ទំនង​ជា​មិន​ត្រូវ​បាន​ដាក់​ដេញថ្លៃ​នោះ​ទេ​។ បទបញ្ជា​កាលពី​ថ្ងៃទី​២៤ ខែ​កក្កដា របស់​ទីស្ដីការ​គណៈរដ្ឋមន្ត្រី​បាន​​ណែនាំ​ឲ្យ​ក្រសួង​​ទៅ​ចរចា​​អំពី​តម្លៃ​ឈើ​ជាមួយ​តែ​ក្រុម​ហ៊ុន​របស់​លោក​ ទ្រី ភាព ប៉ុណ្ណោះ ហើយ​បាន​ណែនាំ​​ឲ្យ​ធ្វើ​ដូច្នេះ​ដដែល​ចំពោះ​ឈើ​ដែល​ត្រូវ​បាន​រឹបអូស​បន្ថែមទៀត​នៅ​ថ្ងៃ​អនាគត។

លោក ស្វាយ ភឿន សមាជិក​នៃ​បណ្ដាញ​កសាង​សន្តិភាព​សហគមន៍​ ជា​សម្ព័ន្ធ​អ្នកភូមិនៅ​ទូទាំង​ប្រទេស​កម្ពុជា ដែល​ប្ដេជ្ញា​ការ​ពារ​ធនធាន​ធម្មជាតិ​​បាន​លើក​ឡើង​ថា កិច្ច​ព្រមព្រៀង​ជាមួយ​លោក ទ្រី ភាព ទំនង​ជា​ការ​ដេញ​ថ្លៃ​ដោយ​សម្ងាត់​ ហើយ​គឺ​ជា​កិច្ច​ព្រមព្រៀង​តែ​មួយ​គត់​ដែល​ធ្វើ​ឲ្យ​មាន​ការ​កាប់ឈើ​ខុស​ច្បាប់​។

លោក​បាន​មាន​ប្រសាសន៍​ថា “ខ្ញុំ​គិត​ថា សម្ដេច​នាយករដ្ឋមន្ត្រី [​ហ៊ុន សែន] គួរ​តែ​លុប​ចោល​កិច្ច​ព្រមព្រៀង​ជាមួយ​លោក ទ្រី ភាព ព្រោះ​វា​នឹង​ធ្វើ​ឲ្យមាន​ការ​បំផ្លិច​បំផ្លាញ​ព្រៃ​ឈើ​ទូទាំង​ប្រទេស​។ ខ្ញុំគិត​ថា ប្រសិន​បើ​រដ្ឋាភិបាល​លុប​ចោល​កិច្ច​ព្រមព្រៀង​នេះ​ ​នោះ​វា​នឹង​មិន​មាន​នរណា​ម្នាក់​ទៅ​ទិញ​ឈើ​ឡើយ”។

ចំណែក​ឯ​អង្គការ​ការ​ពារ​បរិស្ថាន​មួយ​ចំនួន​បាន​លើក​ឡើង​ថា រដ្ឋាភិបាល​គួរ​តែ​ដុត​កម្ទេច​ចោល​ឈើ​កាប់​ដោយ​ខុស​ច្បាប់​ដែល​ខ្លួន​រឹប​អូស​បាន​ ដើម្បី​កុំ​​ឲ្យ​គេ​ទទួល​បាន​ប្រាក់​ពី​ការ​លក់​ឈើ​នេះ​ ព្រោះវា​អាច​​ជា​ប្រាក់​​ដែល​លើកទឹក​ចិត្ត​ឲ្យ​មាន​ការ​កាប់ឈើ​បន្ត​ទៀត​។ មន្ត្រី​រដ្ឋាភិបាល​បាន​បដិសេធ​មិន​និយាយ​ពី​អ្វី​ដែល​អង្គការ​មិន​​មែន​រដ្ឋាភិបាល និង​អ្នក​ភូមិ​បាន​លើក​ឡើង​កាលពី​ម្សិលមិញ​ឡើយ។

លោក អ៊ុក រ៉ាប៊ុន រដ្ឋមន្ត្រី​ក្រសួង​កសិកម្ម​បាន​​ផ្ដាច់​ទូរស័ព្ទ​របស់អ្នក​យក​ព័ត៌មាន។ លោក​ អៀង សុផាល្លែត អនុរដ្ឋលេខាធិការ​ក្រសួង​កសិកម្ម​ទទួល​បន្ទុក​ការ​​ដាក់​ដេញ​ថ្លៃ​ឈើ និង​ដែល​ជា​នាយ​ខុទ្ទកាល័យ​របស់​លោក អ៊ុក រ៉ាប៊ុន បាន​បដិសេធ​មិន​ធ្វើ​អត្ថាធិប្បាយឡើយ​ ហើយ​បាន​បង្វែរ​សំណួរ​ទៅ​ឲ្យ​លោក ឡោ រស្មី អ្នកនាំពាក្យ​ក្រសួង​កសិកម្ម​វិញ​។ គេ​ក៏​មិន​អាច​ទាក់​ទង​លោក ឡោ រស្មី បាន​ដែរ​។

ចំណែក​នៅ​ឯ​​រដ្ឋបាល​ព្រៃ​ឈើ​នៅ​ក្រសួង​កសិកម្មនេះ​វិញ មន្ត្រី​ឈ្មោះ​ ទឹម ស៊ីផា ប្រធាន​អនុវត្ត​ច្បាប់​ក៏​បដិសេធ​មិន​ធ្វើ​អត្ថាធិប្បាយ​ដែរ ហើយ​បាន​បង្វែរ​សំណួរ​ទៅ​អ្នក​នាំពាក្យ​រដ្ឋបាល​ព្រៃ​ឈើ​។ រដ្ឋបាល​ព្រៃឈើ​គ្មាន​អ្នកនាំពាក្យ​នោះ​ទេ៕ ស៊ុយឈាង (រាយការណ៍​បន្ថែម​ដោយ ផាន់ អាណា និង ZsomborPeter)​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស