យោងតាមឯកសារចម្លងមួយច្បាប់ដែលទទួលបានកាលពីថ្ងៃពុធបានឲ្យដឹងថា ព្រះរាជក្រឹត្យមួយដែលចុះហត្ថលេខាដោយលោក ជា ស៊ីម ប្រមុខរដ្ឋស្តីទី បានសម្រេចតែងតាំងទីប្រឹក្សានិងជំនួយការ៦៣រូបរបស់លោក ងួន ញ៉ិល អនុប្រធានទី២នៃរដ្ឋសភា។
ការតែងតាំងថ្មីក្នុងព្រះរាជក្រឹត្យ ដែលបានចុះហត្ថលេខាដោយលោក ជា ស៊ីម ពេលព្រះរាជអវត្តមានព្រះមហាក្សត្រ នរោត្តម សីហមុនី កាលពីថ្ងៃទី១៥ខែកញ្ញា រូមមានសមាជិកសភាគណបក្សប្រជាជនកម្ពុជា លោក ញ៉ែម ថាវី និងលោក ស៊ីក ប៊ុនហុក។
ព័ត៌មាននៃការតែងតាំងថ្មីនេះមានឡើងមួយខែបន្ទាប់ពីលោក កឹម សុខា អនុប្រធានទី១ នៃរដ្ឋសភា ហើយក៏ជាអនុប្រធានគណបក្សសង្គ្រោះជាតិដែរនោះ បានរងការរិះគន់ចំពោះការតែងតាំងទីប្រឹក្សា២១របស់លោក។
កាលពីថ្ងៃពុធ លោក ស៊ុន ឆ័យ ប្រធានក្រុមអ្នកតំណាងគណបក្សសង្គ្រោះជាតិ បានរិះគន់បញ្ជីទីប្រឹក្សាថ្មីរបស់លោក ងួន ញ៉ិល ដែលរួមមានមនុស្ស៣នាក់ ដែលមានត្រកូលដូចលោក ងួន ញ៉ិល។
លោកបានមានប្រសាសន៍ថា “ជាយូរមកហើយ យើងបានឃើញទីប្រឹក្សាលោក ងួន ញ៉ិល ពួកគេជាសាច់ញាតិរបស់គាត់ ហើយគេគ្រាន់តែតែងតាំងពួកគេដើម្បីយកលុយ ឬប្រើឈ្មោះរបស់ពួកគេជាទីប្រឹក្សាដើម្បីធ្វើខុសប៉ុណ្ណោះ”។
លោក ងួន ញ៉ិល មិនអាចទាក់ទងបានទេ ហើយលោក ឈាង វុន អ្នកនាំពាក្យសភាជាតិ និងជាសមាជិកគណបក្សប្រជាជនកម្ពុជា បានបដិសេធមិនអធិប្បាយទេ៕មានិត