29 C
Phnom Penh

ការ​​​ខ្វែង​​​គំនិតចាស់​​​ផ្ទុះ​​​ឡើង​​​ជា​​​ថ្មីនៅ​​​ថ្ងៃ​​​ខួប​​​​អនុស្សាវរីយ៍​​​​​​នៃ​​​កិច្ច​​​ព្រមព្រៀង​​​​​​​​​​សន្តិ​​​ភាព​​​ក្រុង​​​ប៉ារីស​​​

ដោយ ឌឹ ខេមបូឌា ដេលី

បទវិភាគ

កាល​​​ពី​​​ម្សិល​​​មិញ ពិធី​​​ប្រារព្ធ​​​ខួប​​​២៣​​​ឆ្នាំ​​​នៃ​​​ថ្ងៃ​​​ដែល​​​ព្រះ​​​អង្គ​​​ម្ចាស់​​​ នរោត្តម សីហនុ និង​​​លោក​​​នាយ​​​ក​​​រដ្ឋ​​​មន្ត្រី​​​ ហ៊ុន សែន បាន​​​រួប​​​រួម​​​គ្នា​​​ដើម្បី​​​បញ្ចប់​​​សង្គ្រាម​​​ស៊ីវិល​​​​​ក្នុង​​​ប្រទេស​​​កម្ពុជា​​​ បាន​​​​​​​​​​​​ក្លាយ​​​ជា​​​ថ្ងៃ​​​បង្ហាញ​​​ពី​​​ការ​​​អត់​​​ទ្រាំ​​​ចំពោះ​​​ការ​​​ខ្វែង​​​គំនិត​​ខាង​​​នយោបាយ​​​ ដែល​​​បាន​​​កើត​​​មាន​​​អំឡុង​​​សង្គ្រាម​​​ស៊ីវិលដែល​បាន​អូស​បន្លាយ​​អស់​​​​រយៈ​​​ពេល​​​ពីរ​​​ទសវត្សរ៍​​​។cam-photo-front

ព្រះ​​​អង្គ​​​ម្ចាស់ នរោត្តម សីហនុ និង​​​លោក ហ៊ុន សែន បាន​​​ដឹក​​​នាំ​​​ក្រុម​​​របស់​​​ខ្លួន​​​ទៅ​​​ចុះ​​​កិច្ច​​​ព្រម​​​ព្រៀង​​​សន្តិភាព​​​ក្រុង​​​បា៉រីស​​​នៅ​​​ថ្ងៃ​​​ទី​​​២៣ ខែ​​​តុលាឆ្នាំ​​​១៩៩៣​​​ ដើម្បី​​​ត្រួស​​​ត្រាយ​​​ផ្លូវ​​​សម្រាប់​​​ការ​​​រម្លាយ​​​របប​​​ដឹក​​​នាំ​​​គាំទ្រ​​​ដោយ​​​វៀត​​​ណាម​​​នៅ​​​ក្នុង​​​ក្រុង​​​ភ្នំពេញ​​​ និង​​​ការ​​​ចាប់​​​ផ្តើម​​​លទ្ធិប្រជា​​​ធិបតេយ្យ​​​សេរី​និយមតាម​រយៈ​​​ការ​​​បោះ​​​ឆ្នោត​​​ដែល​​​រៀប​​​ចំ​​​ឡើង​​​ដោយ​​​អង្គការ​​​សហ​​​ប្រជាជាតិ​​​នៅ​​​ក្នុង​​​ឆ្នាំ​​​១៩៩៣​​​។

កិច្ច​​​​​​​​​​​​​​​​​​ព្រមព្រៀង​​​នេះ​​​ត្រូវ​​​បាន​​​គណបក្ស​​​ប្រជា​​​ជន​​​កម្ពុជា​​​របស់​​​លោក ហ៊ុន សែន រិះ​​​គន់​​​ជា​​​យូរ​​​មក​​​ហើយ​​​ចំពោះ​​​ការ​​​មិន​​​បាន​​​ដក​​​ហូត​​​អាវុធ​​​ពី​​​ខ្មែរ​​​ក្រហម ហើយ​​​គណបក្ស​​​កាន់​​​អំណាច​​​បាន​​​លុប​​​ចោល​​​ពិធីបុណ្យ​​​នេះ​​​ចេញ​​​ពី​​​បញ្ជី​​​បុណ្យ​​​ជាតិ​​​នៅ​​​ចន្លោះ​​​ឆ្នាំ​​​២០០៤​​​ដល់​​​ឆ្នាំ​​​២០១១​​ដើម្បី​​​លើក​​​តម្កើង​​​​​​ថ្ងៃ​​​៧​​​មករា​​​ ឆ្នាំ​​​១៩៧៩​​​ថា​​​ ជាថ្ងៃ​​​រំដោះ​​​ជាតិ​​​ពី​​​របប​​​ ប៉ុល​​​ ពត។

នៅ​​​ឯទី​​​ស្នាក់​​​ការ​​​កណ្តាល​​​របស់​​​គណបក្ស​​​សង្គ្រោះ​​​ជាតិ​​​​​ក្នុង​​​ខណ្ឌ​​​មាន​​​ជ័យ ​​​រាជ​​​ធានីភ្នំពេញ​​​​​​កាល​​​ពី ម្សិលមិញ លោក កឹម សុខា អនុប្រធាន​​​គណបក្ស​​​​​​នេះ ដែល​​​បាន​​​​​ក្លាយ​​​​​​ជា​​​​​​សមាជិក​​​សម្ងាត់​​​មួយ​​​រូប​​​​​​​ក្នុង​​​ក្រុម​​​ចលនា​​​តស៊ូ​​​របស់​​​ព្រះ​​​អង្គ​​​ម្ចាស់​​​ នរោត្តម សីហនុ នៅ​​​ទសវត្សរ៍​​​ឆ្នាំ​​​១៩៨០​​​ បាន​​​ចាត់​​​ទុក​​​ថ្ងៃ​​​២៣​​​តុលា​​​ថា ជា​​​ថ្ងៃ​​​បុណ្យ​​​ជាតិ​​​ដ៏​​​មាន​​​សារៈ​​​សំខាន់​​​បំផុត​​​។

លោក បាន​​​មាន​​​ប្រសាសន៍​​​ទៅ​​​កាន់​​​អ្នក​​​គាំទ្រ​​​គណបក្ស​​​ប្រឆាំង​​​ប្រមាណ​​​២០០នាក់​​​ថា “កម្ពុជា​​​មាន​​​ថ្ងៃ​​​ប្រវត្តិសាស្ត្រ​​​​​​​​​​​​​​​​​​ជា​​​ច្រើន ប៉ុន្តែ​​​ថ្ងៃ​​​២៣​​​តុលា គឺ​​​ជា​​​ថ្ងៃ​​​សម្រាប់​​​ប្រជា​​​ពល​​​រដ្ឋ​​​កម្ពុជា​​​គ្រប់​​​រូប។ ថ្ងៃ​​​១៨ មីនា ឆ្នាំ​​​១៩៧០​​​ គឺ​​​ជា​​​ថ្ងៃ​​​ប្រវត្តិសាស្ត្រ​​​របស់​​​ លន់ នល់ និង​​​សាធារណរដ្ឋ​​​ខ្មែរ​​​។ ថ្ងៃ​​​១៧​​​មេសា ឆ្នាំ​​​១៩៧៥​​​ ជា​​​ជ័យ​​​ជម្នះ​​​របស់​​​ខ្មែរ​​​ក្រហម និង​​​ ប៉ុល​​​ពត។ ហើយ​​​ថ្ងៃ​​​៧​​​មករា​​​គឺ​​​ជា​​​ថ្ងៃ​​​ជ័យ​​​ជម្នះ​​​របស់​​​គណបក្ស​​​ប្រជា​​​ជន​​​កម្ពុជា ​​​ជា​​​ពិសេស​​​គឺ​​​ជា​​​ជ័យ​​​ជម្នះ​​​របស់​​​យួន​​​”។

ពាក្យ​​​ថា “យួន” ដែល​​​ខ្មែរ​​​ហៅ​​​សំដៅ​​​ដល់​​​ជន​​​ជាតិ​​​វៀតណាម ​​​ត្រូវ​​​បាន​​​មនុស្ស​​​​​​មួយ​​​ចំនួន​​​យល់​​​ថា​​​ជា​​​ពាក្យ​​​ប្រមាថ​​​មាក់​​​ងាយ​ចំពោះ​ជាតិ​សាសន៍​នេះ​​​​​​​។​​​ការ​​​ប្រើ​​​ប្រាស់​​​ពាក្យ​​​នេះត្រូវ​​​បាន​​​ហាម​​​ឃាត់​​​អំឡុង​​​ពេល​​​វៀត​​​ណាម​​​ត្រួត​​​ត្រា​​​កម្ពុជា​​​​​​នៅ​​​ទសវត្សរ៍​​​ឆ្នាំ​​​១៩៨០​​​ ប៉ុន្តែ​​​វា​​​នៅ​​​តែ​​​ជា​​​ពាក្យ​​​ដែល​​​មនុស្ស​​​ភាគ​​​ច្រើន​​​​​ចូល​ចិត្ត​ហៅ​។ ​​​

អំឡុង​សុន្ទរកថា​កាល​​​ពី​​​ម្សិល​​​មិញ លោក កឹម សុខា បាន​​​និយាយ​បន្ទាប​តម្លៃ​នៃ​​តួនាទី​​​របស់​​​លោក​​​ ហ៊ុន សែន នៅ​​​ក្នុង​​​កិច្ច​​​ព្រម​​​ព្រៀងសន្តិ​​​ភាព​​​​​​នេះ ហើយ​​​បាន​​​កោត​​​សរសើរ​​​ចំពោះ​​​មេ​​​ដឹកនាំ​​​ចលនា​​​តស៊ូ​​​។ លោក​​​បាន​​​មាន​​​ប្រសាសន៍​​​សំដៅ​​​ដល់​​​មេដឹក​​​នាំ​​​ចលនា​​​តស៊ូ​​​របស់​​​លោក​​​ថា “យើង​​​ទាំង​​​អស់​​​គ្នា​​​គិត​​​ថា ថ្ងៃ​​​នេះ​​​គឺ​​​ជា​​​ថ្ងៃ​​​ដ៏​​​មាន​​​សារៈ​​​សំខាន់​​​​​សម្រាប់​​​ឧទ្ទិស​​​ដល់​​​មេដឹក​​​នាំ​​​របស់​​​យើង​​​ដែល​​​បាន​​​ចុះ​​​ហត្ថលេខា​​​នាំ​​​មក​​​នូវ​​​ថ្ងៃ​​​២៣​​​តុលា​​​ ឆ្នាំ​​​១៩៩១​​​ នោះ​​​គឺ​​​​​ព្រះ​​​មហាក្សត្រ​​​ នរោត្តម​​​ សីហនុ និង​​​លោក​​​តា សឺន សាន”។

លោក សឺន សាន ដែល​​​ជា​​​អតីត​​​នាយក​​​រដ្ឋ​​​មន្ត្រី​​​ បាន​​​ដឹក​​​នាំ​​​ក្រុម​​​ចលនា​​​តស៊ូ​​​នៅ​​​តាម​​​ព្រំ​​​ដែន​​​ថៃ​​​ ហើយ​​​ក្រោយ​​​មក​​​បាន​​​បង្កើត​​​គណបក្ស​​​លទ្ធិ​​​ប្រជា​​​ធិបតេយ្យ​​​សេរីនិយមព្រះ​​​ពុទ្ធ​​​សាសនា ដែល​​​ក្នុង​​​នោះ​​​លោក កឹម សុខា បាន​​​ឈ្នះ​​​អាសនៈ​​​សភា​​​ដំបូង​​​របស់​​​លោក​​​នៅ​​​ក្នុង​​​ឆ្នាំ​​​១៩៩៣។

គណបក្ស​​​លទ្ធិ​​​ប្រជា​​​ធិបតេយ្យ​​​សេរីនិយមព្រះ​​​ពុទ្ធ​​​សាសនា បាន​​​ដួល​​​រលំ​​​នៅ​​​ទសវត្សរ៍​​​ឆ្នាំ​​​១៩៩០​​​ ក្រោយ​​​មក​គណបក្ស​​​ហ៊្វុនសិុនប៉ិច ក៏​បាន​​​រលំរលាយ​​​ដែរ​នៅ​​​ទសវត្សរ៍​​​​​ឆ្នាំ​​​២០០០ ដែល​​​សុទ្ធ​​​​​​តែ​​​ដោយសារ​​​ការ​​​​​បែក​​​​​​បាក់​​​ផ្ទៃ​​​ក្នុង​ និង​​​ការ​​​សហការ​​​ជាមួយ​​​គណបក្ស​​​ប្រជា​​​ជន​​​កម្ពុជា​​​កំពុង​​​កាន់​​​អំណាច។ ប៉ុន្តែ អតីត​​​ក្រុម​​​ប្រឆាំង​​​​​នៃ​​​​​​គណបក្ស​​​ទាំង​​​ពីរ ​​​បាន​​​រួប​​​រួម​​​គ្នា​​​ឡើង​​​វិញ​​​ដើម្បី​​​បង្កើត​​​គណបក្ស​​​សង្គ្រោះ​​​ជាតិ​​​នៅ​​​ខែ​​​កក្កដា​​​ ឆ្នាំ​​​២០១២។

​​​​​​​​​​​​​​ លោក កឹម សុខា បាន​​​មាន​​​ប្រសាសន៍​​​ថា គោល​​​បំណង​​​នៃ​​​កិច្ច​​​ព្រម​​​ព្រៀង​​​សន្តិភាព​​​ក្រុង​​​បា៉រីស​​​​​​ដើម្បី​​​បង្រួប​​​បង្រួម​​​ជាតិ​​​ដែល​​​មាន​​​ការ​​​បែក​​​បាក់​​​គ្នា បន្ទាប់ពី​​​សង្គ្រាម​​​ស៊ីវិល​​​ដែល​​​បាន​​​អូស​​​បន្លាយ​​​អស់​​​រយៈពេល​​​រាប់​​​ទសវត្សរ៍​​​​​​នោះ​​​ ​​​មិន​​​ទាន់​​​​បាន​សម្រេច​​​​​​​​នៅ​​​ឡើយ​​​ទេ ហើយ​​​បាន​​​រិះ​​​គន់គណ​​​បក្ស​​​ប្រជា​​​ជន​​​កម្ពុជា​​​ចំពោះ​​​ការ​​​មិន​​​បាន​​​ផ្សះ​​​ផ្សា​​​ជាតិ​​​ ដោយ​​​ចាត់ទុក​​​គោល​​​នយោបាយ​​​ “ឈ្នះឈ្នះ” របស់​​​លោក ហ៊ុន សែន ថាជា​​​ការ​​​បរាជ័យ​​​ទាំង​​​ស្រុង​​​។

លោក​​​បាន​​​​​​មាន​​​ប្រសាសន៍​​​ទៀត​​​ថា “ពួក​​​គេ​​​ប្រើ​​​ប្រាស់​​​គោល​​​នយោបាយ​​​ឈ្នះ​​​ឈ្នះ។ តើ​​​នេះ​​​មាន​​​ន័យ​​​ថាម៉េច​​​? វា​​​មាន​​​ន័យ​​​ថា អ្នក​​​ឈ្នះ​​​នៅ​​​តែ​​​ឈ្នះ​​​ ហើយ​​​អ្នក​​​ចាញ់​​​នៅ​​​តែ​​​ចាញ់​​​។ ពេល​​​នេះ​​​អ្នក​​​ខ្លាំង​​​បំពាន​​​អ្នក​​​ខ្សោយ អ្នក​​​មាន​​​អំណាច​​​បំពាន​​​អ្នក​​​គ្មាន​​​អំណាច។ កត្តា​​​នេះ​​​​​​បាន​​​បង្ក​​​ឲ្យ​​​​​មាន​​​​​​ទុក្ខ​​​​​​វេទនា​​​​​​​​​កាន់​​​​​តែ​​​ខ្លាំង វា​​​មិន​​​មែន​​​ជា​​​ការ​​​ផ្សះ​​​ផ្សា​​​ទេ​​​”។

នៅ​​​​​ជ្រុង​​​ម្ខាង​​​ទៀត​​​នៃ​​​រាជ​​​ធានីភ្នំពេញ​​​ លោក វន់​​​ ពៅ និង​​​លោក រ៉ុង ឈុន មេ​​​ដឹក​​​នាំ​​​សហជីព​​​ដែល​​​​​មាន​​​សម្ពន្ធ​​​ភាព​​​ជា​​​មួយ​​​គណបក្ស​​​ប្រឆាំង​​​ បានដឹក​​​នាំ​​​មនុស្ស​​​ប្រហែល​​​១.០០០​​​នាក់​​​ហែ​​​ក្បួន​​​ទៅ​​​ពី​​​ស្ថាន​​​ទូត​​​បារាំង ​​​ទៅ​​​​​​កាន់​​​រដ្ឋ​​​សភា​​​ ដែល​​​មាន​​​តំណាង​​​រាស្ត្រ​​​មួយ​​​ក្រុម​​​តូច​​​រង់​​​ចាំ​​​ពួកគេ​នៅទី​​នោះ​​​​​​​​​​​​​​​​​​​​។

ឡើង​​​លើ​​​ដំបូល​​​រ៉ឺម៉ក​​​ម៉ូតូ​​​កង់​​​បី ​​​​​​លោក វន់ ពៅ ប្រធាន​​​សមាគម​​​សេដ្ឋ​​​កិច្ច​​​ក្រៅ​​​ប្រព័ន្ធ​​​ធំបំផុត​​​នៅកម្ពុជា ​​​បាន​​​អាន​​​ញត្តិ​​​របស់​​​ក្រុម​​​នេះ​​​ឮៗ ដែល​​​ចោទ​​​ប្រកាន់​​​គណបក្ស​​​កាន់​​​អំណាច​​​ថា​​​មិន​​​បានគោរព​​​​​​តាម​​​ស្មារតី​​​នៃ​​​កិច្ច​​​ព្រម​​​ព្រៀង​​​​​​សន្តិភាព​​​​​​។

លោក​​​បាន​​​ស្រែក​​​ឮៗ​​​តាម​​​ឧគ្ឃោសនសព្ទ​​​ថា “អំពើ​​​ពុក​​​រលួយ​​​ និង​​​តុលាការ​​​មិន​​​ឯករាជ្យ​​​បាន​​​បម្រើ​​​គណបក្ស​​​កាន់​​​អំណាច​​​ នាំ​​​ឲ្យ​​​មាន​​​របបផ្តាច់​​​ការ​​​ ហើយ​​​ឃាតកម្ម​​​បាន​​​​​​កើត​​​​​ឡើង​​​ទូទាំង​​​ប្រទេស​​​​​​កម្ពុជា​​​ក្រោម​​​ការ​​​ដឹក​​​នាំ​​​របស់​​​រដ្ឋាភិបាល​​​បច្ចុប្បន្ន​​​អស់​​​​​​ជាង​​​​​​ពីរ​​​ទសវត្សរ៍​​​”។

បន្ទាប់​​​មក ​​​លោក​​​ស្រី ឡោក ខេង តំណាង​​​រាស្ត្រ​​​គណបក្ស​​​ប្រជា​​​ជន​​​កម្ពុជា​​​ និង​​​លោក ហូរ វ៉ាន់ តំណាង​​​រាស្ត្រ​​​គណបក្ស​​​សង្គ្រោះ​​​ជាតិ​​​​​​​​​​​​​​​​​​​​​ ទទួលបាន​​​​​​ឱកាស​​​ឆ្លើយ​​​តប​​​ទៅ​​​ក្រុម​​​​​​នេះ​​​។ លោក ហូរ វ៉ាន់ បាន​​​ថ្លែង​​​តាម​​​​​ឧគ្ឃោសនសព្ទ​​​ទៅ​​​កាន់​​​ក្រុមតវ៉ា​​​​​​នេះ​​​ថា ​​​លោក​​​សង្ឃឹម​​​ថា​​​នឹង​​​​​​​​​ប្រើ​​​តួនាទី​​​របស់​​​លោក​​​​​​នៅ​ក្នុងរដ្ឋ​​​​​​សភា​​​ដើម្បី​​​អនុវត្ត​​​កិច្ច​​​ព្រម​​​ព្រៀង​​​​​​សន្តិភាព​​​ក្រុង​​​ប៉ារីស​​​​​​ឆ្នាំ​​​១៩៩១​​​នេះ​​​ឲ្យ​​​បាន​​​​​​ប្រសើរ​​​ជាង​​​មុន​​​។

ចំណែក​​ឯ​​​លោកស្រី ឡោក ខេង បាន​​​ធ្វើ​​​ឲ្យ​​​ក្រុម​​​នេះ​​​​​​ភ្ញាក់​​​ផ្អើល​​​យ៉ាង​​​ខ្លាំង​​​ដោយសារ​​​​តែ​​​​​​ការ​​​​​​លើក​​​ឡើង​​​​​​​​​របស់​​​លោក​​​​ស្រី។ លោក​​​ស្រី​​​បាន​​​​​​មាន​​​ប្រសាសន៍​​​ឮៗ​​​ទៅ​​​កាន់​​​ក្រុម​​​នេះ​​​ដែល​​​​​​​​​បាន​​​ចាប់​​​ផ្តើម​​​សើច​​​ចំអក និង​​​​​​​​​ខិត​​​ចូល​​​កាន់​​​តែ​​​ជិត​​​លោក​​​​​​ស្រី​​​ថា “បង​​​ប្អូន​​​បាន​​​ប្រាប់​​​ខ្ញុំ​​​មិន​​​ឲ្យ​​​រំឭក​​​អំពី​​​ថ្ងៃ​​​​​​​​៧​​​មករា​​​ ដូច្នេះ​​​ខ្ញុំ​​​នឹង​​​មិន​​​រំឭក​​​បង​​​ប្អូន​​​ថា វា​​​​​ជាថ្ងៃ​​​កំណើត​​​ទី​​​២​​​របស់​​​យើង​​​ឡើយ​​​។មាន​​​ថ្ងៃ​​​៧​​​មករា​​​ ទើប​​​មាន​​​ថ្ងៃ​​​២៣​​​តុលា​​​ ជា​​​ថ្ងៃ​​​ដែល​​​​​​យើង​​​​​​ទទួល​​​បាន​​​លទ្ធ​​​ប្រជា​​​ធិបតេយ្យ ​​​សេរី​​​ពហុ​​​បក្ស​​​ និង​​​ជា​​​ថ្ងៃ​​​ដែល​​​គណបក្ស​​​ទាំង​​​អស់​​​​​​បានរួប​​​រួម​​​គ្នា​​​ជា​​​ជាតិ​​​ខ្មែរ​​​តែ​​​មួយ​​​”។

​​​ក្នុង​​​ទឹក​​មុខ​​​ញញឹម​​​ញញែម លោក​​​ស្រី​​​បាន​​​​​​ក្រើន​​​រំឭក​​​ក្រុម​​​ដែល​​​ស្រែក​​​ហ៊ោ​​កញ្ជៀវ​​​នេះ​​​ឲ្យ​​​ចង​​​ចាំ​​​​​​ថា កិច្ច​​​ព្រម​​​ព្រៀង​​​សន្តិភាព​​​​​​ឆ្នាំ​​​១៩៩១​​​នេះ ​​​​​​​​​បាន​​​​​​ទទួលស្គាល់​​​ភាព​​​ស្រប​​​ច្បាប់​​​របស់​​​ខ្មែរ​​​ក្រហម ​​​ដែល​​​មិន​​​ត្រូវ​​​បាន​​​ដក​​​ហូត​​​អាវុធ​​​រហូត​​​ដល់​​ឆ្នាំ​​​១៩៩៩​​​។

លោក​​​ស្រី​​​បាន​​​មាន​​​ប្រសាសន៍​​​ទៀត​​​ថា “ទោះ​​​បី​​​ជា​​​មាន​​​ថ្ងៃ​​​២៣​​​តុលា ក៏​​​ប្រទេស​​​របស់​​​យើង​​​មិនទាន់​​​ទទួល​​​បាន​​​សន្តិភាព​​​ សន្តិសុខ និង​​​សាមគ្គីភាព​​​ដែរ រហូតដល់​​​យើង​​​មានគោលនយោ​​​បាយ​​​ឈ្នះ​​​ឈ្នះ ​​​ហើយជា​​​លទ្ធផល​​​ យើង​​​បាន​​​បង្ខំ​​​ឲ្យ​​​ខ្មែរ​​​ក្រហម​​​​​​ទម្លាក់​​​អាវុធ​​​ចុះ ហើយ​​​ចូល​​​រួម​​​ជាមួយ​​​រដ្ឋាភិបាល​​​។ នេះ​​​ជា​​​អ្វី​​​ដែល​​​យើង​​​មាន​​​មោទនភាព​​​”។

នៅពេល​​​លោកស្រី ឡោក ខេង និង​​​លោក​​​ ហូរ វ៉ាន់ ចាក​​​ចេញ​​​ ក្រុម​​​នេះ​​​​​​បាន​​​ហែ​​​​​​ក្បួន​​​បន្ត​​​ឆ្ពោះ​​​ទៅ​​​ស្ថាន​​​ទូតជប៉ុន ​​​ស្ថាន​​​ទូតចិន និង​​​ស្ថាន​​​ទូត​​​ឥណ្ឌូនេស៊ី ព្រម​​​ទាំង​​​ការិយាល័យ​​​នានា​​​របស់​​​អង្គការ​​​សហប្រជា​​​ជាតិ​​​​​​ក្នុង​​​រាជ​​​ធានី​​​ភ្នំពេញ​​ផងដើម្បី​​​ដាក់ញត្តិ​​​។

អ្នក​​​ហែ​​​ក្បួនទាំង​​​នេះ​​​ក៏​​​​​​មាន​​​​​​គម្រោង​​​ដាក់​​​ញត្តិ​​​​​​នៅ​​​​​​ស្ថាន​​​ទូត​​​វៀតណាម​​ដែរ​​​។ លោក វន់ ពៅ​​​ បាន​​​ប្រាប់​​​អ្នក​​​យក​​​ព័ត៌​​​មាន​​​ថា “យើង​​​មិន​​​បាន​​​ទៅ​​​ស្ថាន​​​ទូត​​​វៀត​​​ណាម​​​ទេ​​​ ពីព្រោះ​​​យើង​​​ព្រួយ​​​បារម្ភ​​​ខ្លាច​​​ការ​​​តវ៉ា​​​របស់​​​យើង​​​នាំ​​​ឲ្យ​​​មាន​​​​​​ការ​​​ប្រឈម​​​តតាំង​​​​​​ជាមួ​យ​​​អាជ្ញាធរ​​​នៅ​​​ទី​​​នោះ​​​”៕សុខុម​​​​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស