37 C
Phnom Penh

ប្រទេស​​​កម្ពុជា​​​ងាក​​​​ទៅរក​​​អង្គការ​​​​​​ទេសន្តរប្រវេសន៍​​​ឲ្យ​ជួយ​​​​​​តាំង​​​ទី​​​លំនៅ​​​ជន​​​ភៀស​​​ខ្លួន​​​ពី​​​អូស្ត្រាលី​​​

ដោយ ឌឹ ខេមបូឌា ដេលី

បទវិភាគ

យោង​​​តាម​​​អ្នក​​​នាំ​​​ពាក្យ​​​អង្គការ​​​អន្តរ​​​ជាតិ​​​ទេសន្តរ​​​ប្រវេសន៍​​​(IOM)​​​បាន​​​ឲ្យ​​​ដឹង​​​ថា ប្រទេស​​​កម្ពុជា​​​បាន​​​ងាក​​​ទៅ​​​រក​​​អង្គការ​​​អន្តរ​​​ជាតិ​​​ទេសន្តរប្រវេសន៍​​​​​​ ឲ្យ​ជួយ​​​ដល់​​​ការ​​​តាំង​​​ទី​​​លំនៅ​​​ជា​​​ថ្មី​​​សម្រាប់​​ជន​​​ភៀស​​​ខ្លួន ដែល​​​ប្រទេស​​​កម្ពុជា​​​បាន​​​យល់​​​ព្រម​​​ទទួល​​​យក​​​ពី​​​ប្រទេស​​​អូស្ត្រាលី​​​ក្រោម​​​កិច្ច​​​ព្រមព្រៀង​​​ដ៏​​​ចម្រូង​​​ចម្រាស​​​មួយ​​​ដែល​​​ចុះ​​​ហត្ថ​​​លេខា​​​កាល​​​ពី​​​ខែ​​​មុន។

ប្រទេស​​​អូស្ត្រាលី​​​មាន​​​ផែនការ​​​បញ្ជូន​​​ជន​​​ស្វែង​​​រក​​​សិទ្ធិ​​​ជ្រក​​​កោន​​​មួយ​​​ចំនួន​​​ ដែល​​​សព្វ​​​ថ្ងៃ​​​កំពុង​​​ត្រូវ​​​ឃាត់​​​ទុក​​​នៅ​​​លើ​​​ប្រទេស​​​ដែន​​​កោះ​​​ណូរូ​​​ ​ឯនាយ​សមុទ្រ​​​ប៉ាស៊ីហ្វិក​​​ខាង​​​ត្បូង​​​ មក​​​ប្រទេស​​​កម្ពុជា​​ ជា​​​ថ្នូរ​​​នឹង​​​ការ​​​ផ្តល់​​​ជំនួយ​​​៣៥​​​លាន​​​ដុល្លារ​​​បន្ថែម​​​ក្នុង​​​រយៈ​​​ពេល​​​បួន​​​ឆ្នាំ។

កិច្ច​​​ព្រមព្រៀង​​​នេះ​​​បាន​រង​ការ​​រិះ​​​គន់​​​យ៉ាង​​​ខ្លាំង​​​ពី​​​សំណាក់​​​អង្គការ​​​សិទ្ធិ​​​មនុស្ស​​​ និង​​​ត្រូវ​​​បាន​​​ច្រាន​​​ចោល​​​ដោយ​​​​​​ឧត្តម​​​ស្នង​​​ការ​​​អង្គការ​​​សហ​​​ប្រជា​​​ជាតិ​​​ទទួល​​​បន្ទុក​​​ជន​​​ភៀស​​​ខ្លួន​​​ ដែល​​​និយាយ​​​ថា ខ្លួន​​​នឹង​​​គ្មាន​​​តួនាទី​​​ក្នុង​​​ការ​​​សម្រប​​​សម្រួល​​​ការ​​​បញ្ជូន​​​ជន​​​ភៀស​​​ខ្លួន​​​នេះ​ទេ។

លោក ចូ ឡូរី អ្នក​​​នាំ​​​ពាក្យ​​​​​​​​​​​​​​​​​​​​​​​​​​​​​​អង្គការ​​​អន្តរ​​​ជាតិ​​​ទេសន្តរ​ប្រវេសន៍​​​​​​ប្រចាំ​​​តំបន់​​​អាស៊ី​​​ប៉ាស៊ីហ្វិក​​​បាន​​​មាន​​​ប្រសាសន៍​​​ថា អង្គការ​​​ដែល​​​ប្ដូរ​​​ផ្ដាច់​​​ចំពោះ​​​ការ​​​ជំរុញ​​​ឲ្យ​​​មាន​​​ចំណាក​​​ស្រុក​​​ប្រកប​​​ដោយ​​​ក្តី​​​មេត្តា​​​ និង​​​ត្រឹម​​​ត្រូវ​​​នោះ​​​ បាន​​​ទទួល​​​លិខិត​​​មួយ​​​ច្បាប់​​​ពី​​​រដ្ឋាភិបាល​​ដែល​​​​ស្វែង​​​រក​​​ជំនួយ​ “មិន​​​ដល់​​​បី​​​សប្តាហ៍​​​មុន​​​នេះ​​​ទេ​​​”​​​​​​។

លោក​​​បាន​​​ឲ្យ​​​ដឹង​​​ទៀត​​​ថា “​​​គេ​បាន​សុំយើង​ឲ្យ​​​ជួយ​​​ក្នុង​​​ករណី​​​ជន​ភៀស​ខ្លួន​នេះ ដែល​​​រំពឹង​​​ថា​នឹង​​​មក​​​ដល់​​​កម្ពុជា។ រដ្ឋាភិបាល​​​កម្ពុជា​​​​​​បាន​​​ស្នើ​​​ឲ្យ​យើង​​​​​​ផ្ដល់​​​ជំនួយ​​​”។

លោក ឡូរី បាន​​​មាន​​​ប្រសាសន៍​​​ថា មនុស្ស​មួយ​​​ក្រុម​​​​​​របស់​​អង្គការ IOM​​​​​​​​​​​​​​​​​​ បាន​​​ជួប​​​ជាមួយ​​​​​​មន្ត្រី​កម្ពុជា​​​កាល​​​ពី​​​ថ្ងៃ​​​សុក្រ​​​ ដើម្បី​​​វាយ​​​តម្លៃ​​​ថា តើ​​​ខ្លួន​​​នឹង​​​យល់​​​ព្រម​​​បំពេញ​​​តាម​​​សំណើ​​​នោះ​​​ ឬ​យ៉ាង​​​ណា​​​ ប៉ុន្តែ មិន​​​បាន​​​បញ្ចេញ​​​ឲ្យ​​​ដឹង​​​ថា ក្រុម​​​មន្ត្រី​​​​​​រដ្ឋាភិបាល​​​ ឬ​​​នាយក​​​ដ្ឋាន​​​ណា​​​ខ្លះ​​​​​បាន​​​ចូល​​​រួម​​​​​​ក្នុង​​​ការ​​​ពិភាក្សា​​​នេះ​​​ទេ​​​។ លោក​​​បាន​​​និយាយ​​​ថា ក្រុ​​​ម​​​នេះ​​​នឹង​​​រៀប​​​ចំ​​​របាយ​​​ការណ៍​​​មួយ​​​ឲ្យ​​​អគ្គនាយក​​​ IOM លោក វីលៀម ស្វីង ដើម្បី​​​ឲ្យ​​​គាត់​​​ពិចារណា​​​។

នៅ​​​ពេល​​​សាក​សួរ​​​ថា អង្គការ​​​នេះ​​​​​​​​​មាន​​​តួនាទី​​​អ្វី​​​​​​ក្នុង​​​ដំណើរ​​​ការ​​​​​​តាំង​​​លំនៅ​​​ជា​​​ថ្មី​​​នេះ​​​ លោក ឡូរី បាន​​​ឆ្លើយ​​​តប​​​ថា “ខ្ញុំ​​​នឹង​​​មិន​​​ព្យាយាម​​​ឆ្លើយ​​​​​​ជំនួស​​​​​​លោក​​​អគ្គនាយក​​​ទេ​​​”។

គួរ​កត់​សម្គាល់​ថា អង្គការ​ទេសន្តរ​ប្រវេសន៍​ រាប់​បញ្ចូល​ទាំង​ប្រទេស​អូស្ត្រាលី​ទាំង​ប្រទេស​កម្ពុជា​ក្នុង​ចំណោម​រដ្ឋ​សមាជិក​ទាំង​១៥៦​របស់​ខ្លួន។

លោក​​​ សុខ ផល អគ្គនាយក​​​នៃ​​​អគ្គនាយក​​​ដ្ឋាន​​​អន្តោប្រវេសន៍​​​ក្រសួង​​​មហាផ្ទៃ​​​បាន​​​មាន​​​ប្រសាសន៍​​​ថា តំណាង​​​ IOM បាន​​​ជួប​​​ជាមួយ​​​​​​ក្រុម​​​មន្ត្រី​​​មក​​​ពី​​​ក្រសួង​​​ការ​​​បរទេស​​​កាល​​​ពី​​​ថ្ងៃ​​​​​​សុក្រ​​​ ហើយ​​​បាន​​​បង្វែរ​​​សំណួរ​​ថែម​​​ទៀត​​​ទៅ​​​លោក កុយ​​​ គួង​ អ្នក​​​នាំពាក្យ​​​ក្រសួង​​​ការ​​​បរទេស។

នៅ​​​ពេល​​​សាក​សួរ​​​អំពី​​​ជំនួប​​​នេះ លោក កុយ គួង​​​ បាន​​​មាន​​​ប្រសាសន៍​​​ថា ​​​លោក​​​មិន​​​បាន​ដឹង​​​អំពី​​​រឿង​​​នេះ​​​ទេ​​​។ លោក​បាន​​​មាន​​​ប្រសាសន៍​​​ទៀត​​​ថា “អំពី​​​ជន​​​ភៀស​​​ខ្លួន​​​ឬ​​​​​​? ខ្ញុំ​មិន​​​ដឹង​​ទេ​​​។ ខ្ញុំ​​​គ្មាន​​​ព័ត៌​​​មាន​​​អំពី​​​រឿង​​​ហ្នឹង​​​ទេ​​​។ ខ្ញុំ​​​រវល់​​​​​​នឹង​​​ការ​​​ងារ​​​របស់​​​ខ្ញុំ​​​ណាស់​​​”៕មានិត (រាយការណ៍​​​បន្ថែម​​​​​​ដោយ ឃួន ណារីម)

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស