31 C
Phnom Penh

កម្មករ​បិទ​ផ្លូវ​ជាតិ​តវ៉ា​ទាមទារ​ប្រាក់​ខែ​ និង​លក្ខខណ្ឌ​ការងារ​ល្អ​ប្រសើរ

ដោយ ឌឹ ខេមបូឌា ដេលី

បទវិភាគ

កម្មករ​រាប់ពាន់​នាក់​មក​ពី​រោង​ចក្រ​កាត់​ដេរ​ ហ្គ្រែន​ ធ្វីន អីុនធើ​ណេសិនណល​ ជា​ក្រុមហ៊ុន​មួយ​ក្នុង​ចំណោម​ក្រុមហ៊ុន​ពីរ​ដែល​បាន​ចុះ​បញ្ជី​នៅ​ផ្សារ​មូល​ប័ត្រ​កម្ពុជា​ (CSX) បាន​បិទ​ផ្លូវ​ដ៏​សំខាន់​មួយ​ដែល​ចេញ​ពី​រាជ​ធានី​កាល​ពី​ព្រឹក​ថ្ងៃ​សុក្រ ដើម្បី​តវ៉ា​ទាម​ទារ​លក្ខខណ្ឌ​ការ​ងារ​ល្អ​ប្រសើរ​ និង​ការ​ដំឡើង​ប្រាក់​ខែ​។

កម្មករ​​ជាង​៥.០០០​នាក់​នៅ​រោង​ចក្រ​នេះ​​បាន​និង​កំពុង​ធ្វើ​កូដកម្ម​តាំង​ពី​ថ្ងៃ​ច័ន្ទ​មក​ ដោយ​អំពាវ​នាវ​ឲ្យ​គណៈ​គ្រប់​គ្រង​រោង​ចក្រ​ដោះស្រាយ​ការ​ទាម​ទារ​១៦​ចំណុច​ ក្នុង​នោះ​រួម​មាន​ប្រាក់​ស្នាក់​នៅ​ប្រចាំ​ខែ​១៥​ដុល្លារ​ និង​ឈប់​​បង្ខំ​ឲ្យ​ធ្វើ​ការ​លើស​ម៉ោង​។

កម្មករ​យ៉ាង​ហោច​ណាស់​២.៥០០​នាក់​ ​បាន​មក​ជួប​ជុំ​គ្នា​នៅ​ផ្លូវ​ជាតិ​លេខ​៤​ ជិត​រោង​ចក្រ​ ហ្គ្រែន ធ្វីន ក្នុង​ខណ្ឌ​ពោធិ៍​សែន​ជ័យ​នា​ម៉ោង​ប្រហែល​៩​ព្រឹក​កាលពី​ថ្ងៃ​សុក្រ​ ដើម្បី​ធ្វើ​បាតុ​កម្ម​រយៈ​ពេល​២ម៉ោង​ ដែល​បាន​បង្ក​ឲ្យ​មាន​ការ​ស្ទះ​ចរាចរណ៍​​​​ទាំង​ទៅ​ទាំង​មក។

កម្មការិនី​ ភុំ​ ចាន់​ថេង ​អាយុ​៣៤​ឆ្នាំ បាន​និយាយ​ថា អ្នក​ស្រី​​មិន​​ពេញ​ចិត្ត​​នឹង​លក្ខខណ្ឌ​ការងារ​ក្នុង​រោង​ចក្រ​ ដែល​ផលិត​សម្លៀក​បំពាក​់​ឲ្យ​ក្រុមហ៊ុន​ល្បី​ៗ​ដូច​ជា​ក្រុមហ៊ុន Adidas​ជា​ដើម​ ទេ។ អ្នកស្រី​បាន​និយាយ​ថា រោង​ចក្រ​នេះ​បាន​ប្តូរ​ឈ្មោះ​ពី QMI ទៅ​ ហ្គ្រែន​ ធ្វីន កាល​ពី​​ឆ្នាំ​២០០៦​ ដែល​នាំ​ឲ្យ​កម្មករ​ធ្វើ​ការ​រយៈ​​ពេល​យូរ​ជា​ច្រើន​នាក់​ព្រួយ​បារម្ភ​អំពី​ការ​បាត់​បង់​អតីត​ភាព​ការងារ​របស់​ខ្លួន ក៏​ដូច​ជា​ប្រាក់​ឧបត្ថម្ភ​ផ្សេង​ៗ និង​ប្រាក់​អតីតភាព​។

អ្នកស្រី​បាន​និយាយ​ថា “ប្រសិនបើ​រោង​ចក្រ​នេះ​មិន​ដោះ​ស្រាយ​បញ្ហា​ទាំង​នេះ​ទេ​ យើង​នឹង​បន្ត​ធ្វើ​កូដ​កម្ម​រហូតដល់​យើង​ទទួល​បាន​ដំណោះ​ស្រាយ​”។

ប្រហែល​២ម៉ោង​ក្រោយ​មក​ កម្មករ​ដែល​ធ្វើ​ការ​តវ៉ា​បាន​យល់​ព្រម​ចាក​ចេញ​ពី​ផ្លូវ​ជាតិ​​ដើម្បី​ឲ្យ​តំណាង​របស់​ខ្លួន​ចូល​រួម​ចរចា​ជា​មួយ​រោង​ចក្រ​។ ក៏​ប៉ុន្តែ លោក​ នួន នី ប្រធាន​សហព័ន្ធ​សហជីព​គាំទ្រ​កម្មករ​កម្ពុជា​បាន​និយាយ​ថា ការ​ចរចា​​នោះ​ត្រូវ​បាន​ផ្អាក​ទៅ​វិញ​ បន្ទាប់​ពី​ភាគី​ទាំង​ពីរ​មិន​បាន​ព្រមព្រៀង​គ្នា​អំពី​ទី​កន្លែង​ត្រូវ​ជួប​គ្នា​​។ លោក​បាន​និយាយ​ថា “យើង​​នឹង​សុំ​អន្តរាគមន៍​ពី​សមាគម​រោង​ចក្រ​កាត់​ដេរ​នៅ​កម្ពុជា​ ហៅ​កាត់​ថា GMAC អ្នក​បញ្ជា​ទិញ​​​​ និង​រដ្ឋ​មន្ត្រី​ក្រសួង​ការ​ងារ​”។

លោក​ នួន​​ នី បាន​ឲ្យដឹង​ទៀត​ថា សហជីព​របស់​លោក​បាន​ចូល​ធ្វើ​អន្តរាគមន៍​ក្នុង​ជម្លោះ​នេះ​កាល​ពី​ថ្ងៃ​ទី​១ ខែ​កញ្ញា តាម​សំណើ​កម្មករ​ បន្ទាប់​ពី​សហជីព​មួយ​ដែល​យល់​ព្រមដោយ​រោងចក្រ​ មិន​អាច​ដោះស្រាយ​ការ​ទាមទារ​របស់​កម្មករ​បាន​​។

លោក នួន​ នី បាន​និយាយ​ថា លិខិត​មួយ​ច្បាប់​ផ្ញើ​ទៅ​រោង​ចក្រ​ដោយ​ស្នើ​ឲ្យ​មាន​ការ​ប្រជុំ​ពិភាក្សា​អំពី​​ការ​ទាម​ទារ​របស់​កម្មករ​​ មិន​មាន​ចម្លើយ​តប​ទេ​ ជា​ហេតុ​បណ្តាល​ឲ្យ​មាន​កូដ​កម្ម​ការងារ​នៅ​សប្តាហ៍​នេះ​ ដែល​ត្រូវ​បាន​ប្រកាស​ដល់​ភាគី​ពាក់​ព័ន្ធ​កាល​ពី​ថ្ងៃ​ទី​១៣​ ខែ​តុលា​។

រោង​ចក្រ​ ហ្គ្រែន ធ្វីន មិន​អាច​ទាក់​ទង​សុំ​ការ​ពន្យល់​បាន​ទេ​កាល​ពី​ថ្ងៃ​សុក្រ​ ប៉ុន្តែ រោង​ចក្រ​នេះ​បាន​បង្ហោះ​ការ​ជូន​ដំណឹង​ផ្អាក​ការ​ងារ​​នៅ​តាម​គេ​ហ​ទំព័រ​របស់​ CSX កាល​ពី​ថ្ងៃ​អង្គារ​។

ការ​ជូន​ដំណឹង​នោះ​មាន​ខ្លឹម​សារ​ថា “GTI សូម​ប្រកាស​អំពី​ការ​ផ្អាក​ជា​បណ្តោះ​អាសន្ន​នូវ​ផលិត​កម្ម​របស់​ GTI ដោយ​ហេតុ​ថា មាន​កម្មករ​ជួប​ជុំ​តវ៉ា​នៅ​ខាង​មុខ​រោង​ចក្រ​នេះ​”។

បច្ចុប្បន្ន​នេះ​ GTI បាន​ចាត់​វិធាន​ការ​ផ្លូវ​ច្បាប់​រួច​ហើយ​ជា​មួយ​​អាជ្ញាធរ​ជាប់​ពាក់​ព័ន្ធ​។ក្រៅ​ពី​នេះ​ GTI នឹង​ព្យាយាម​ស្វែង​រក​ដំណោះ​ស្រាយ​ផ្សេង​ទៀត​ ដើម្បី​ដោះ​ស្រាយ​បញ្ហា​ឲ្យ​បាន​ឆាប់​តាម​ដែល​អាច​ធ្វើ​ទៅ​បាន​។

ក្រុមហ៊ុន​នេះ​បាន​ចុះបញ្ជី​នៅ​ផ្សារ​មូល​ប័ត្រ​កម្ពុជា​កាល​ពី​ខែ​មិថុនា ដោយ​តម្លៃ​ហ៊ុន​ពេល​បើក​៩.៧០០​រៀល​។ តម្លៃ​ហ៊ុន​របស់​ក្រុមហ៊ុន​នេះ​កាល​ពី​ថ្ងៃ​សុក្រ​ ៥.០០០រៀល​នៅ​ពេល​បិទ​ផ្សារ​ហ៊ុន​៕មានិត

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស