30 C
Phnom Penh

សមាជិក​នៃ​ចលនារណសិរ្ស​រំដោះជាតិខ្មែរ​​​ត្រូវ​បាន​​ចោទ​ប្រកាន់​ពីបទ​ញុះញង់​ឲ្យ​កើត​មាន​អំពើ​ហិង្សា​​

ដោយ ឌឹ ខេមបូឌា ដេលី

បទវិភាគ

កាលពី​ថ្ងៃ​សៅរ៍ សាលា​ដំបូង​រាជ​ធានី​ភ្នំពេញ​​បាន​ចោទ​ប្រកាន់​សមាជិក​ចំនួន​១០​នាក់​នៃ​ចលនា​រណសិរ្ស​រំដោះជាតិ​ខ្មែរ​​ ជាក្រុម​តស៊ូមតិ​ផ្នែក​នយោបាយ​មួយ​ដែល​ប្រឆាំង​​​ដាច់​អហង្ការ​ចំពោះ​​គណបក្ស​ប្រជាជន​កម្ពុជា​ ពីបទរៀបចំ​ផែនការ​ញុះញង់​ឲ្យ​កើត​មាន​អំពើ​ហិង្សា​ក្រោយ​ការ​ចាប់​ខ្លួន​​ពួកគេ​កាលពី​សប្ដាហ៍​មុន​។

លោក មាស ច័ន្ទពិសិដ្ឋ ព្រះរាជ​អាជ្ញារង​អម​សាលា​ដំបូង​រាជ​ធានី​ភ្នំពេញ​បាន​ឲ្យ​ដឹង​ថា ក្រុម​នេះ​ដែល​ភាគច្រើន​ជា​កសិករ​ និង​កម្មករ​​ត្រូវ​បាន​ចោទ​ប្រកាន់​ពី​បទ​​រៀបចំផែន​ការ​ផ្ដួល​រំលំ​​រដ្ឋាភិបាល​តាម​រយៈ​ការ​ចែក​ខិត្តប័ណ្ណ​អុជអាល​ ហើយ​សំណុំ​រឿង​របស់​ពួកគេ​នឹង​ត្រូវ​បញ្ជូន​ទៅ​ចៅក្រម​ស៊ើបសួរ​ដើម្បី​សាកសួរ​បន្ថែម​។

​​​​​​​​ លោក គៀត ច័ន្ទថារិទ្ធ អ្នក​នាំពាក្យ​អគ្គស្នង​ការដ្ឋាន​នគរ​បាល​ជាតិ​​​បាន​ឲ្យ​ដឹង​កាលពី​ម្សិលមិញ​ថា នគរ​បាល​មាន​ភ័ស្តុ​តាង​បញ្ជាក់​ពី​ការ​ប៉ុនប៉ង​ធ្វើ​ឲ្យ​កើត​មាន​​អំពើ​​ហិង្សា​របស់​ក្រុម​នេះ​ ទោះបី​ជា​ការ​អះអាង​របស់​ចលនា​រណសិរ្ស​រំដោះ​ជាតិ​ខ្មែរ​ថា ​ការ​ចោទ​ប្រកាន់​ប្រឆាំង​សមាជិក​របស់​ខ្លួន​​ជា​រឿង​ពាក់​ព័ន្ធ​នឹង​បញ្ហា​នយោបាយ​ក៏ដោយ។

ឧត្ដមសេនីយ៍ឯក គៀត ច័ន្ទថារិទ្ធ បាន​មាន​ប្រសាសន៍​​ដោយ​សំដៅ​ទៅ​លើ​ករណី​​កាលពី​ឆ្នាំ​២០០៩​ ដែល​ពី​មុន​​​ត្រូវ​បាន​ស្ដីបន្ទោស​ទៅ​លើ​អង្គការ​ភេរវកម្ម​មួយ​ផ្សេង​ទៀត​គឺ​ចលនា​ក្បាល​ខ្លា​ ​ថា ” សកម្មភាព​របស់​ពួកគេ​​គឺ​ដើម្បី​ផ្ដួល​រំលំ​រដ្ឋាភិបាល​។ កាល​ពី​លើក​មុន​​ពួកគេ​មាន​​ជាប់​ទាក់​ទង​ទៅ​នឹង​ការ​បង្កៃ​គ្រឿង​ផ្ទុះ​ ដែល​ត្រូវ​បាន​រក​ឃើញ​នៅ​ខាង​មុខ​ទីស្ដីការ​គណៈរដ្ឋមន្ត្រី​”។

លោក​បាន​មាន​ប្រសាសន៍ទាក់​ទិន​នឹងបុរសដែល​ត្រូវ​បាន​ចាប់​ខ្លួន​​ទាំង​នោះ​ថា ” យើង​មាន​ភ័ស្តុតាង និង​វត្ថុតាង​ផ្សេងៗ​ទៀត​​ដែល​អាច​បញ្ជាក់​ថា ពួកគេ​ចូល​រួម​ជាមួយ​អង្គការ​ខុស​ច្បាប់​នេះ​ [ចលនា​រណសិរ្ស​រំដោះ​ជាតិ​ខ្មែរ​]”។

ជនសង្ស័យ​ដែល​រួម​មាន​ឈ្មោះ លីវ យី អាយុ​២៩​ឆ្នាំ ឈុន ណាគង់ អាយុ​២៨​ឆ្នាំ ឈុន ឆាត​ អាយុ២៩​ឆ្នាំ ច្រាញ់ ម៉ុច អាយុ​២៤​ឆ្នាំ ឡាត់ លីហេង អាយុ​២២​ឆ្នាំ ចាន់ ស្នា អាយុ​២៧​ឆ្នាំ ឈឹម ស្ម័គ្រ អាយុ​៥៧​ឆ្នាំ អាន ចាន់ ​អាយុ​៣៥​ឆ្នាំ​ ចាន់ រ៉ា អាយុ​២៣​ឆ្នាំ និង​ ឆាយ វ៉ិច អាយុ​៤០​ឆ្នាំ​ ត្រូវ​បាន​ចាប់​ខ្លួន​កាលពី​ថ្ងៃ​ពុធ និង​ព្រឹក​ថ្ងៃ​ព្រហស្បតិ៍ មុន​ការ​តវ៉ា​មួយ​ដែល​គេ​គ្រោង​ធ្វើ​នៅ​ខាង​ក្រៅ​ស្ថានទូត​វៀតណាម​កាលពី​ថ្ងៃ​ព្រហស្បតិ៍ ដើម្បីរំឭក​ខួប​នៃ​កិច្ច​ព្រមព្រៀង​សន្តិភាព​ក្រុង​បា៉រីស​ឆ្នាំ​១៩៩១​។

ចលនា​រណសិរ្ស​រំដោះជាតិ​ខ្មែរ​បង្កើត​ឡើង​ដោយ​​​មនុស្ស​មួយ​ក្រុម​ដែល​ភាគច្រើន​ជា​ជនជាតិ​ខ្មែរ​ក្រោម​ និង​ដែល​ភាគច្រើន​​រស់​នៅ​ក្នុង​ប្រទេស​ថៃ​ គឺ​ដឹក​នាំ​ដោយ​លោក សម សេរី ដែល​រស់​នៅ​ក្នុង​ប្រទេស​ដាណឺម៉ាក។ នៅ​លើ​គេហទំព័រ​របស់​ខ្លួន​ ចលនា​រណសិរ្ស​រំដោះ​ជាតិ​ខ្មែរ​នេះ​បាន​លើក​ឡើង​ថា ខ្លួន​មាន​គោល​បំណង​ ” រំដោះ​ពលរដ្ឋខ្មែរ​ឲ្យ​រួច​ផុត​ពី​ការ​គ្រប់​គ្រង​របស់​វៀតណាម និង​របប​ផ្ដាច់​ការ​របស់​លោក ហ៊ុន សែន​”។

ការ​ចាប់​ខ្លួន​នេះ​គឺ​ជា​​យុទ្ធនាការ​ថ្មី​បំផុត​របស់​រដ្ឋាភិបាល​ ដើម្បី​​លុប​បំបាត់​ចលនា​រណសិរ្ស​រំដោះ​ជាតិ​ខ្មែរ​នេះ ដែល​លោក​នាយក​រដ្ឋមន្ត្រី ហ៊ុន សែន​ បាន​ចាត់​ទុក​ថា ជា​អង្គការ​ភេរវកម្ម​នោះ​។

កាលពី​ខែ​ឧសភា សមាជិក​ចំនួន​១៣​នាក់​នៃ​ចលនា​រណសិរ្សរំដោះ​ជាតិ​ខ្មែរ​​ត្រូវ​បាន​រក​ឃើញ​ថា មាន​ទោស​កំហុស​ពីបទ​រៀបផែន​ការ​ផ្ដួល​រំលំ​រដ្ឋាភិបាល​ ហើយ​ត្រូវ​បាន​ផ្ដន្ទាទោស​​ឲ្យ​ជាប់​ពន្ធនាគារ​ក្នុង​ម្នាក់ៗ​ចន្លោះពី​៥ឆ្នាំ​ដល់​៩​ឆ្នាំ។ ចុង​ចោទ​ចំនួន​ប្រាំពីរ​រូប​ត្រូវ​បាន​បញ្ជូន​ទៅ​​ពន្ធនាគារ​ រីឯ​ប្រាំមួយ​រូប​ផ្សេង​ទៀត​ ដែល​មាន​ទាំង​លោក សម សេរី ផង​​ត្រូវ​បាន​ផ្តន្ទា​ទោស​កំបាំង​មុខ ហើយ​ឥឡូវ​កំពុង​រត់គេច​ខ្លួន​នៅ​ឡើយ។

អ្នកស្រី ហ៊ិន ស្រីមុំ ប្រពន្ធ​របស់​លោក លីវ យី ​​ជា​កម្មករ​សំណង់​ម្នាក់​ដែល​ស្ថិត​ក្នុង​ចំណោម​អ្នក​ដែល​ត្រូវ​បាន​ចាប់​ខ្លួន​កាលពី​សប្ដាហ៍មុន​បាន​ឲ្យ​ដឹង​ថា ប្ដី​របស់​អ្នកស្រី​ទៅ​រាជ​ធានីភ្នំពេញ​​គ្រាន់​តែ​ដើម្បី​​ព្យាបាល​​ជំងឺ​ប៉ុណ្ណោះ។

អ្នកស្រី​បាន​និយាយ​ថា “ខ្ញុំ​មិន​ដែល​ឃើញ​ប្ដី​របស់​ខ្ញុំ​ជាប់​ពាក់​ព័ន្ធ​ជាមួយ​ក្រុម​ណាមួយ​ឡើយ។ ខ្ញុំ​មិន​ដែល​ឮ​ពីក្រុម​នេះ​ទេ​។ នគរ​បាល​ចាប់​មនុស្ស​ខុស​ហើយ ព្រោះ​ប្ដី​របស់​ខ្ញុំ​គ្មាន​ទោសពៃរ៍​អ្វី​ទេ ហើយ​មិន​ដែល​ជាប់​ពាក់​ព័ន្ធ​នៅ​ក្នុង​បទ​ល្មើស​ណាមួយ​ឡើយ​”៕ ស៊ុយឈាង​​​​

 

© 2023, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស