36 C
Phnom Penh

អ្នករត់តាក់ស៊ីក្រុង​ប៉ោយប៉ែត​​ត​វ៉ា​ជុំវិញ​ការ​បង្កើត​ប៉ុស្តិ៍​ត្រួតពិនិត្យ​ថ្មី

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ អ្នក​រត់​តាក់ស៊ី​ជាច្រើន​នាក់​ក្នុង​ក្រុង​ប៉ោយប៉ែត​បាន​ធ្វើ​ការ​តវ៉ា​ប្រឆាំង​នឹង​ការ​បង្កើត​ប៉ុស្តិ៍​ត្រួតពិនិត្យ​ថ្មី ដែល​ពួកគេ​ត្រូវបាន​​បង្ខំឲ្យបង់​ប្រាក់​សំណូក​​ជា​ច្រើន​​ក្នុងការ​​ដឹក​ទំនិញ​ដែល​ត្រូវ​បាន​រត់ពន្ធ​កាត់​ព្រំដែនពីប្រទេស​ថៃ​។

យោង​តាម​លោក ឌិន ពុទ្ធី ប្រធាន​សមាគម​អភិវឌ្ឍន៍​សេដ្ឋកិច្ច​ក្រៅ​ប្រព័ន្ធ​ ដែល​តំណាង​ឲ្យ​អ្នក​រត់​តាក់ស៊ី​បាន​ឲ្យ​ដឹង​ថា អ្នក​រត់​តាក់ស៊ី​មួយ​ក្រុម​បាន​បិទ​ផ្លូវ​ជាតិ​លេខ​៥ ក្នុង​ខេត្ត​បន្ទាយ​មានជ័យ​រយៈ​ពេល​១ម៉ោង​កាលព​ី​ម្សិលមិញ ជំទាស់​ទៅ​នឹង​ការ​បន្ថែម​ប៉ុស្តិ៍​ត្រួត​ពិនិត្យ​ទី៥​មួយកន្លែង​ទៀត​នៅ​តាម​ផ្លូវ​ស្ថិត​ក្នុង​ឃុំនិមិត្ត។

អ្នក​រត់​ម៉ូតូឌុប​មួយ​ក្រុម​ដែល​ត្រូវ​បាន​ហាមឃាត់​មិន​ឲ្យ​ដឹក​កម្មករ​ខ្មែរ​ត្រឡប់​ពី​ប្រទេស​ថៃមក ” ដើម្បី​រក្សា​សណ្ដាប់​ធ្នាប់​” នៅ​ក្នុង​តំបន់​នោះ បាន​ជួយតវ៉ា​​ធ្វើ​ឲ្យ​ចំនួន​អ្នក​តវ៉ា​​កើន​ដល់​១០០​នាក់​។

លោក ពុទ្ធី​ បាន​មាន​ប្រសាសន៍​ថា អ្នក​រត់​តាក់ស៊ី​ទាំង​នោះ​ដែល​លោក​ទទួល​ស្គាល់​ថា បាន​ដឹក​ទំនិញ​ជា​ប្រចាំ​ដែល​ត្រូវ​បាន​រត់ពន្ធ​កាត់​ព្រំដែន​ថៃឲ្យ​អ្នកផ្សេង ​​ត្រូវ​បង់​ប្រាក់​ចន្លោះពី​៣០.០០០​រៀល​ទៅ​១០០.០០០​រៀល​​នៅ​តាម​ប៉ុស្តិ៍​ត្រួត​ពិនិត្យ​នីមួយៗ។ លោក​បាន​មាន​ប្រសាសន៍​ថា “ពីមុន​មាន​ប៉ុស្តិ៍ត្រួត​ពិនិត្យ​តែ​បួន​កន្លែង​ប៉ុណ្ណោះ ប៉ុន្តែ​ឥឡូវ​នេះ​អាជ្ញាធរ​បាន​​បង្កើត​ប៉ុស្តិ៍​ត្រួត​ពិនិត្យ​មួយ​កន្លែង​ទៀត ដែល​បង្ខំ​ឲ្យ​ពួកគេ​បង់​ប្រាក់​កាន់​តែ​ច្រើន​ឡើងៗ​”។

លោក ពុទ្ធី​ បានមាន​ប្រសាសន៍​ថា អ្នក​​បើក​បរ​ពេញ​ចិត្ត​បង់​ពន្ធ​ផ្លូវ​ការលើ​ទំនិញ​រត់ពន្ធ​ ហើយ​បាន​អំពាវ​នាវ​ដល់​មន្ត្រី​ទាំង​នោះ​ក្នុង​ការ​បង្កើត​ប៉ុស្តិ៍​ត្រួត​ពិនិត្យ​ពន្ធ​គយ​តែ​មួយ​កន្លែង​នៅ​តាម​កំណាត់​ផ្លូវ​ប្រវែង​៤៥​គីឡូម៉ែត្រ​ ចាប់ពី​ព្រំដែន​អន្តរជាតិ​ដល់ក្រុង​សេរីសោភ័ណ​ភាគ​ខាងកើត​។

លោក ង៉ោ ម៉េងជ្រុន អភិបាល​ក្រុង​ប៉ោយប៉ែត​បាន​មាន​ប្រសាសន៍​ថា ប៉ុស្តិ៍​ត្រួត​ពិនិត្យ​ទាំង​នេះ​គឺ​ស្រប​ច្បាប់ ហើយ​ត្រូវ​បាន​អនុម័ត​យល់​ព្រម​ដោយ​ក្រសួង​សេដ្ឋកិច្ច។ លោក​បានមាន​ប្រសាសន៍​ថា ” យើង​មិន​មែន​បង្កើត​ប៉ុស្តិ៍​ត្រួត​ពិនិត្យ​ដើម្បី​រឹប​អូស​​ទំនិញ​ទេ ប៉ុន្តែ​គឺ​ដើម្បី​អប់រំ​ និង​ណែនាំពួកគាត់​​បង់​ពន្ធ​ឲ្យ​បាន​ត្រឹម​​ត្រូវតែ​ប៉ុណ្ណោះ”។

លោក គោស៊ុំ សារឿត អភិបាល​ខេត្ត​បាន​មាន​ប្រសាសន៍​ថា អ្នក​រត់​តាក់​ស៊ី​​បាន​បន្ទោស​ចំពោះ​ការ​ចំណាយ​ថ្មី​របស់​ខ្លួន​។ ដោយ​បដិសេធ​មិន​និយាយ​ថា អ្នក​ណា​បាន​យក​លុយ​នោះ លោក​បានមាន​ប្រសាសន៍​ថា ” ពួកគេ​ត្អូញ​ត្អែ​អំពី​ការ​បង់​ប្រាក់​ច្រើន ប៉ុន្តែ​ពួកគេទេដែល​​បង់នោះ​”៕ សារុន​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស